【夠鐘食藥】你咁做同收數佬有咩分別呀？

有日，有位先生入到嚟～

佢：「姑娘，我想睇醫生」
我：「好呀，係咪未睇過？未睇過嘅就麻煩你俾身分證我登記先呀」
佢：「身分證？你要嚟做咩呀？」
我：「用嚟確認你身分～」
佢：「我唔係好理解」
我：「如果你唔駛病假紙收據轉介信呢啲公式嘢話，都可以同你就咁登記咗先嘅」
佢：「邊個睇醫生會唔要假紙呀？」

我答！我答！我答！唔需要病假紙的人。

我：「有嘅，總有人係唔需要病假紙嘅，咁你要嘅就要俾身分證我登記啦～」

佢：「我唔俾嘅咁點呀？」
我：「醫生可以照睇，假紙就會唔俾。」
佢『嘖』一聲，交出身分證。
我：「麻煩先生填埋電話號碼同地址呀～」

佢：「你咁做同收數佬有咩分別呀？」

冇㗎～我真係喺度收數收錢㗎。不過我唔會拎紅紅的油去潑你，或者講幾句就打你一身咁啦～你鍾意我咁對待你嘅話，我要同老闆商量下加人工呀，咁打法好攰㗎嘛～咁大運動量，瘦咗點算呀～

我：「你會唔會一陣走醫生數呀？」
佢：「會又點呀？」
我：「冇～會咪唔俾你入去…」

佢：「你咪仲衰過啲收數佬！佢哋起碼會借咗錢俾我先呀！你呢度睇次醫生幾多錢呀？幾十萬人哋都係咁俾我，你幾百蚊咋話？」

我：「二百蚊咋」

佢：「咪係囉，二百啫，我幾十萬都係咁攞啦！」
我：「咁你二百蚊都冇呀？」
佢：「有呀」

咁你喺度講乜叉呀？你俾我嘅感覺完全係『我有幾十萬喺身呀，嚟呀嚟呀』

我：「咁我登記啦喎？一陣唔好走醫生數呀？醫生會打999」

佢：「我唔寫電話地址得唔得呀？暴露行蹤好大鑊㗎！」
我：「哦～好啦，我有身分證都夠㗎啦」
佢：「我真係身分證都唔想俾你囉！我揚咗會衰㗎嘛」
我：「你有返工㗎？」
佢：「有呀」
我：「你公司揚唔揚呀？有冇幫你報稅呀？你打工都好揚㗎？」
佢：「……..哎！」

嗯，你早就揚晒啦，係你以為自己唔揚啫。