【夠鐘食藥】媽咪有愛滋

有日,一對情侶嚟到~

情侶:「姑娘,我想問你哋有冇做婚前身體檢查呀?」

我:「有呀~登記後見醫生了解咗先,就可以抽血。」

情侶:「個檢查包唔包驗性病㗎?」

我:「包呀,有check梅毒同愛滋~」

此時一個妹妹問身邊嘅媽媽:「媽媽,乜嘢係梅毒?乜嘢係愛滋呀?」

情侶立即視線望向妹妹,媽媽望一望情侶,再同妹妹講:「呢啲壞人先有嘅」

妹妹:「咁哥哥姐姐係壞人呀?」

啊,原來壞嘅定義係咁㗎?我真係活到老學到老啦!

媽媽:「唔好問啦」

妹妹是好奇寶寶吧:「媽媽」

媽媽:「嗯?」

妹妹:「你有冇梅毒㗎?」

媽媽打一打妹妹個頭:「收聲啦!」

妹妹繼續追問:「愛滋呢?媽媽有冇㗎?」

媽媽:「你再講我就掌你咀!」

妹妹:「媽媽你係壞人啦」

媽媽心入面應該吶喊咗好多次:「夠啦!你再喺度亂講嘢,你一陣返去就知味道!」

越是被壓就越是反抗的妹妹嚟料啦!

「我媽媽有愛滋呀!我媽媽係壞人呀!我媽媽係梅毒呀!」

妹妹喺診所內狂loop⋯媽媽谷到臉都紅埋。

『啪!』媽媽一掌摑埋去。

「嗚⋯呀!呀!呀!嗚⋯媽媽係衰人係壞人!」,妹妹喊住講。

媽媽:「邊個教你講埋啲咁嘅嘢?」

你囉,你唔好扮失憶喎,我聽得清清楚楚㗎,今舖我都幫你唔落啦。嗱,見大家唔係咁熟,你俾返幾百包熱浪我,我就幫你保守秘密,如果唔係你嘅功高偉績應該會喺榕樹頭俾講故佬輪迴幾千次。

妹妹繼續喊唔停:「嗚,媽媽係愛⋯」

『啪』,陰公又啪了。

我:「妹妹呀,不如你一陣入去問醫生叔叔乜嘢係梅毒愛滋呀,你媽媽唔識啫,醫生叔叔識答你㗎~」

醫生表示『點解又係我?』

你專業嘛(笑)

Share on facebook
Facebook
Share on twitter
Twitter
Share on linkedin
LinkedIn

隱私權保護政策

請細閱並示意接受以下私隱政策及免責聲明,按下「接受」表示你已同意並願意接受香港藥房格價網站內之私隱政策及免責聲明。