【夠鐘食藥】生個弱智嘅佢都唔想㗎!

有日,一個婆婆帶住孫仔過嚟登記睇醫生。因為係新症兼小朋友,要先去磅重做紀錄。

我行到去婆孫面前,伸手叫孫仔:小朋友~我哋去磅重呀~

婆婆喺度袋好岀世紙,同孫仔講:跟姨姨去呀~

孫仔望住我伸岀嘅手不為所動,婆婆:唔好意思呀,佢有唐氏㗎,唔係太醒目,你等等呀~

我:唔緊要,慢慢啊,袋好啲嘢先啦~

孫仔抬高頭擘大口望住我。

有對母女望住孫仔⋯唔好!唔好!唔好講嘢呀!

女嘅開口問媽媽:媽咪,點解佢咁嘅樣嘅?

媽媽反應大到好似中槍:殊!咪多事!生個弱智嘅佢都唔想㗎!

哇,你講到咁大聲,你份人都好抵諗好為得人喎!

阿女好奇心好重,繼續望住孫仔。

孫仔發現阿女望住佢,就眼定定望住阿女,之後對住佢笑。

女同媽媽講:媽咪,佢對住我笑呀!

媽媽:唔好望啦,咁醜樣唔好望!

婆婆隻手好溫柔咁摸住孫仔嘅頭髮,孫仔繼續天真無邪咁望住阿女。

媽媽斜眼注視孫仔,唔知係咪唔抵得孫仔笑得咁開心,媽媽居然要求婆婆:可唔可以唔好俾佢望住我個女笑呀?

婆婆個樣好無奈,繼續用手摸住孫仔頭髮:唔好眼定定望住人好冇?咁樣冇禮貌㗎。

孫仔繼續笑,媽媽繼續斜眼:仲望?仲笑?佢笑乜呀?

我:或者太太你哋坐去另一邊啦,又可以行個圈先返嚟都得~

小朋友嘅笑容十有十都係善意嘅,唔通咁細個就知你份人夠戇而笑你咩?

婆婆對媽媽講:唔好意思呀

媽媽:佢喺度笑乜啫?

婆婆同孫仔講:好啦,唔好再望住人啦,姐姐佢哋唔同你玩㗎,婆婆一陣同你玩車仔好冇?

孫仔望向婆婆,笑了。

小朋友世界從來都好簡單開心快樂,只係大人將複雜嘅思想套咗喺小朋友身上了。

Share on facebook
Facebook
Share on twitter
Twitter
Share on linkedin
LinkedIn

隱私權保護政策

請細閱並示意接受以下私隱政策及免責聲明,按下「接受」表示你已同意並願意接受香港藥房格價網站內之私隱政策及免責聲明。