【夠鐘食藥】醫生房入面係咪有鬼?

有日,一個媽媽帶住個囝嚟登記睇醫生。

登記後,佢哋坐埋一邊等嗌名,媽媽細細聲咁同囝囝不停講嘢,囝就不停點頭。

到佢哋入得去見醫生時,媽媽推囝囝行快兩步,等囝入咗去之後,媽媽就止步了。

就係咁,佢哋分隔兩地了,一個喺醫生房,一個喺候診大堂。

我問媽媽:「你唔入埋去嘅?」

媽媽:「俾佢自己一個啦」

我:「哦~」

喺醫生房嘅囝好似唔願意離開媽媽咁,繼續貼住隻門。無論醫生點嗌佢埋嚟坐低,佢都聽唔入耳。

我見到咁嘅情況唯有同媽媽講:「小朋友唔肯自己一個睇啊,你不如入埋去啦」

媽媽:「你叫佢坐低啦」

我:「醫生叫咗好多次,佢都唔肯啊,你陪住佢可能冇咁緊張~」

媽媽:「我唔入!」

媽媽大師,你靜靜雞話我知,醫生房入面係咪有鬼?所以你先咁堅決唔入去?

我:「但係小朋友咁樣睇唔到醫生㗎喎」

媽媽:「佢遲早都會埋去嘅,俾佢適應吓啦」

⋯遲早⋯即係有幾遲⋯你會唔會考慮自己喺屋企搭個診所場景慢慢玩?

我:「小朋友病緊嘛,你俾佢快啲睇完返屋企抖吓啦」

媽媽:「我知㗎啦」

你知又點,都係唔肯入去,由得個仔喺度撫摸隻門。你講~係咪好多鬼啫?

醫生對住唔肯埋位唔肯開口講嘢嘅小朋友束手無策,就同我講:「你叫佢媽咪入嚟啦,咁樣真係睇唔到」

我開埋門同媽媽講:「醫生嗌你入埋嚟啊,小朋友都係唔肯一個人啊」

媽媽好嬲咁入嚟炳個囝:「你幾歲呀?一個人睇都唔得?」

6歲⋯

再炳醫生:「你身為一個醫生俾啲耐性小朋友都唔得㗎咩?佢咁細個,你唔可以俾啲耐性佢咩?」

醫生O起小嘴,係啦!肯定係你唔啱啦。

Share on facebook
Facebook
Share on twitter
Twitter
Share on linkedin
LinkedIn

隱私權保護政策

請細閱並示意接受以下私隱政策及免責聲明,按下「接受」表示你已同意並願意接受香港藥房格價網站內之私隱政策及免責聲明。