醫生手字

有日一位後生仔睇完醫生。

我出藥後同佢講：「你對一對病假紙收據啱唔啱先，如果冇問題嘅，呢度三百蚊啊」

佢望望病假紙：「呢個係咩英文呀？」

我：「意思係腸胃炎啊」

佢：「就咁一個G一個E就係腸胃炎？兩個字得㗎啦？」

我：「簡寫嚟嘅」

佢：「我公司知唔知㗎？」

我：「多數收開嘅都會知」

佢：「唔好啦唔好啦，你都係同我寫返腸胃炎啦，我怕班白痴唔識英文」

我：「一係我叫醫生寫返英文全寫啦？」

佢：「寫中文得唔得呀？」

我：「咁我幫你同醫生講啦，你等等呀」

佢：「仲有收據都係呀」

醫生好唔情願下寫咗中文…

我拎返張病假紙同收據出去俾後生仔：「得啦，醫生寫咗中文啦」

佢望望：「手字仲衰過我喎，公司會唔會以為我張嘢假㗎？個樣好似小學雞寫咁喎！」

做人又唔好坦白得嚟咁大聲！

我：「唔會啦，我哋有齊印喺度㗎嘛，你公司睇得明就得啦」

佢：「唔好啦，你都係同我寫返英文啦，不過寫個長啲嘅英文啦，唔要頭先嗰個得兩個英文字母呀！得嗰兩個字都唔知點解釋係腸胃炎，一個腸一個胃，都仲爭個炎字啦」

你係嚟搞搞震的嗎？

我：「…我幫你入去問醫生啦」

我入到醫生房同醫生講：「佢…想要返英文腸胃炎嘅全寫」

醫生唔係咁好老脾：「又寫過？」

我：「係呀，病假紙收據都要」

醫生：「頭先又話要中文？」

我都唔好意思講人哋嫌棄你寫嘅字：「佢諗諗吓都係覺得英文全寫好啲」

醫生低頭重新再寫過。

後生仔得手後滿意離開。