最近網上流傳一影片～係喺隻貓面前示範『如果主人被咬會有乜下場』，主人拎住一隻公仔扮成俾公仔咬，然後對公仔施展一輪暴力⋯主人隨即伸手俾貓，試試自己隻貓會唔會咬佢～結果當然貓冇咬主人。 主人雖然成功『教育』，但喺我角度睇⋯呢啲教育係失敗嘅～因爲大家建立嘅信任，喺主人向公仔施暴時已被破壞。寵物單純得如白紙如小朋友，大人要教小朋友唔好百厭時，係咪都用類似招數去恐嚇？『你唔聽話，你就會同佢一樣有呢個下場！』，呢個陰影⋯你唔會知道對佢哋有幾大影響～因爲拍呢啲整蠱影片嘅拍片者好似從來唔會考慮到呢啲問題，佢哋只求開心同觀眾回應⋯繼而好多人見有回響喎，就相繼模仿。以前有段時間，有人趁貓唔留意時放條青瓜喺貓身邊，等貓擰轉身望到時嚇到彈起，好多人睇完覺得好得意，就不停模仿⋯網絡上岀現好多類似嘅影片。我唔理解呢類拍片搏回響嘅行為，或者你會諗『嚇吓啫玩吓啫，有幾大不了呀？』，但係我真係想提醒大家，不論人定動物，有好多表面健康嘅都有機會係有隱性心臟病。嚇吓啫，真係可以一下子就死㗎啦～死咗時，你喊幾多次後悔自責亦無謂。 對人定對動物都好，都應該諗吓『己所不欲，勿施於人』。冇得玩好平淡好平凡乏味呃唔到like喎？你要岀位嘅，自己何不嘗試去彌敦道裸跑？整蠱影片～對比下都只不過係碎料啦～

有日一位先生嚟到診所。佢問我：「姑娘，咩都睇㗎嘛？」我：「入去同醫生講呀，如果真係我哋醫生幫唔到你嘅，都會轉介你去睇專科嘅。我同你登記先呀，麻煩你身分證呀」佢：「我可唔可以問咗醫生睇唔睇，先再決定睇唔睇呀？」我：「你想睇啲咩呀？」佢：「er…我想幫我女朋友問㗎」 我：「咩嘢呢？」佢：「體味方面有冇得改變㗎？例如好臭」我：「或者你嗌你女朋友自己嚟睇醫生呀，到時再同醫生傾都得㗎」佢：「佢自己冇咩所謂咁呀，係我有所謂所以先嚟…」我：「但係我哋都要佢本人嚟咗先嘅，咁先知道你所講嘅體味有冇得解決」佢：「er…我帶咗嚟呀」我：「你帶咗咩嚟呀？」佢：「佢啲味…」你點帶佢啲味過嚟呀？用個樽裝住呀？我：「…佢啲味？」佢喺袋入面拎出一個保鮮袋，內裡有一團紙巾：「呢度」我：「真係唔好意思呀先生，我哋唔會咁樣俾意見，醫生都唔會咁樣診症㗎。你叫女朋友過嚟啦，有需要嘅會轉介佢去皮膚科」佢：「醫生要親自聞㗎？」我：「又唔駛嘅，但係醫生要親自同佢本人傾㗎嘛」佢：「嚇得我呀！我以為醫生要親自聞西呀！」我：「吓？」 西？西？西？唔係加拿大小狐仙咩？咁你嗰舊紙巾… 佢：「我都要諗吓點叫佢嚟喎，我冇可能直接話佢臭要睇醫生㗎嘛」我：「呢個…你哋自己傾啦，我俾唔到意見你呀，不過清潔得好啲嘅話應該問題不大嘅」佢：「我plan plan，搵個最好嘅時機先講」 我諗…你呢世都唔會成功。

以前細個會一家人去海洋公園，到人大咗會發覺即使海洋公園入面嘅動物係假嘅，都一樣會好開心。因為重點係一家人，係邊個同我去，而唔係原本唔應該喺入面嘅動物… 網絡世界令人易知天下事，動物園動物表演…表面華麗動物可愛～睇動物表演時，個個都讚啲動物好叻。但係有冇諗過呢啲係原本佢哋唔需要識嘅嘢，只係佢哋被訓練出嚟，訓練又係點訓練？大象俾人鞭打，獅子老虎俾人剝牙…我哋睇緊嘅表演對於我哋觀眾係可有可無嘅節目，但對動物嚟講就可能係一個地獄。 最近日本有個動物園結業並遺下動物…睇報導留言好多人都覺得好意外。『日本咁有文化，文明大國都咁樣？』，每一個地方都有壞人好人，冇一個地方係會100%好人，有嘅都只係你自行幫佢加上嘅光環。你去旅行見到嘅一切都只係好表面嘅事，因為你每日喺嗰度都只需要食屙買瞓，你並唔係喺嗰度真真正正咁生活過…動物園亦都一樣，你以為動物喺入面日日食屙瞓好愜意舒適，事實佢哋又係咪真係想留喺嗰度一世…究竟呢啲動物原本係喺邊生活？佢哋嘅由來係點？ 究竟佢哋做錯咗啲咩而要坐一世監… 我哋根本唔需要動物園或任何動物表演，去動物園又唔係可以親身感受俾老虎咬死嘅，咁我要隻活生生嘅老虎喺度做咩？我睇電視都睇到啦～

有日診所好忙～ 一位新症嚟到登記處前問我：「而家登記等幾耐呀？」我望望登記名單：「而家嘅話…排第三十七」佢：「即係等幾耐呀？」我：「確實時間我答你唔到嘅，因為我唔知佢哋會喺醫生房度睇幾耐或者有冇咩檢查要做～大概預返五分鐘一個人啦，三個鐘左右啦，你兩個半鐘後再返嚟等啊」佢：「你講笑呀？」我已經忙到一頭煙，唔得閒同你玩呀～我：「冇講笑，你前面係有咁多人」佢：「喂！你啲態度好差喎？」忙都算，有咩慘得過忙嘅時候仲要有人嚟刷存在感…我：「先生，我哋今日真係好多人，如果你要睇嘅我就同你登記啦～」佢：「而家唔係登唔登記呢啲小問題，係你俾我感覺好差呀，而家好似要我跪喺度求你？」既然你個病咁小問題，扯啦，唔駛睇醫生㗎啦，返去打場飛機出身汗就好㗎啦。我：「你要睇醫生嘅就登記，其他嘢你可以到時入房再同醫生講」佢：「喂！你黑口黑面到咁？我點睇得落呀？」最近曬黑咗少少，都不至於黑口黑面啊？隔住個口罩你都睇到我黑口黑面，你好勁啊，你有神奇透視眼啊！我：「先生，我冇黑你面啊」佢：「咁你係咪應該講咩都用多謝做結尾呀？」啊！你鍾意呢味呀？ 『先生，要睇醫生就登記啦多謝』，『你排第三十七呀多謝』，『我咁講嘢法係咪選緊香港小姐呀多謝』，『你係咪痴線㗎多謝』 我：「你係咪睇醫生呀？係就俾身分證我啦好冇？」佢：「你啲態度咁差咁西，我睇你咪即係縱容你！睇唔落呀！」 佢轉身離開。多謝。

糯米雞因為便便問題，佢係唔可以完全食乾糧～不過佢又真係特別鍾意食乾糧…大概係因為乾糧比較重口味，所以久唔久都會俾一餐乾糧佢食吓。 喺長期食罐頭情況下，我發覺佢真係好麻煩，唔係麻煩在佢大食方面，煩就煩在佢食咗一個牌子大概幾個月後，佢會完全唔再願意食嗰個牌子…我已經唔係每餐同一口味咁俾佢食，我係會轉口味㗎！以前食過嘅生肉，食過嘅貴全餐罐，佢突然就係咁有一日全部唔再食。就算餓咗佢一餐，佢下一餐都唔會考慮食吓呢啲『舊愛』… 仔呀，你知唔知罐頭牌子唔係好多款㗎咋？你咁搞法，好快食晒全香港有得賣嘅品牌㗎啦！我真係頭都痛埋…以前嘅佢明明屎都唔臭都可以照食咁款㗎？搞咩越大越有要求呀？我而家屋企有超過九十幾罐『舊愛們』，就係因為我以前見佢食得咁好咁開心而囤貨的… 我望住堆『舊愛們』，再望望糯米雞以前嗰本寫真集，真係概嘆自己俾呢個仔玩咗一年有多。而家堆罐頭成為咗家中其他貓姨姨嘅零食…班貓姨姨梗係開心㗎，本身已經有幾個櫃桶嘅零食，而家又多咗九十幾罐零食，想唔肥過肥婆媽媽都唔得啦？ 我而家學乖咗啦，食完先再買，每次只買少量～唔記得咗或者唔得閒買罐頭？咁就Oh sorry啦～糯米雞你會冇罐頭食㗎啦，食自己隻腳趾啦你。你嘅貓生同我嘅人生反正就係大家一直互相傷害啊～

佢氣都喘埋衝嚟登記處：「我要睇先呀！」 你話睇就睇～好大嘅官威啊？ 我：「我哋要排隊㗎～你要睇嘅俾身分證我啊，我同你登記呀」佢：「我嗌得睇先梗係有需要睇先㗎啦！你係咪有病呀？」我就冇病啦，係你有病先要睇醫生啫～雖然我真係唔覺得你好緊急，但係我都係戴定頭盔先。我：「你有啲咩事咁緊急啊？如果係我哋處理唔到嘅，你可能要去醫院㗎喎」佢：「我M到呀」用M巾囉～冇呀？去買囉？我：「咁應該可以等喎？我同你登記睇醫生啦～麻煩你身分證」佢：「M到唔等得呀！我要睇先呀！」你咁好中氣，痛極有個譜啦，我見過大把人痛到面都青，企又企唔直～我：「你好痛呀？」佢：「冇痛呀」咁你喺度拗乜呀？我：「咁你係睇M到啲咩呀？」佢：「我要停咗佢呀！即刻呀！」我：「即刻？佢嚟咗就冇得停㗎啦～」佢好詫異：「你講真定講假呀？醫生喎？醫生唔係識止血㗎咩？你都唔識㗎？」平時止血就按住個出血位一陣…你不如試吓？我：「M到流出嚟嗰啲同流血唔同㗎～唔係話止就止～」佢：「我要去船P呀！我專登拎annual去㗎」我:：「或者你用棉條啦～」佢：「我就係唔想用呀！喺人地面前抆條嘢出嚟咩？」吓？做咩無啦啦要喺人哋面前抆呀？啊～唔通…我：「呢個我哋都幫唔到你啊」佢仰天大呻：「搞～～錯～～呀，M咩到呀～」或者等收經再去囉？

香港人工時長，假期少，所以渴望大自然賜大家一個颱風，令大家都有得額外多一日假。不過呢部份人應該代表唔晒全部香港人，有好多人喺打風期間都仍然要堅守崗位… 每逢打風時，就會見到好多人講『個風越大越好！唔駛返工最好！最好有全日假，最好吹冧埋我公司！』，你安坐家中開住冷氣梗係爽啦，出面橫風橫雨都唔關你事啦。雖然見到呢啲人咁講嘢會覺得好抆，但係同佢拗嚟其實一樣好無謂，你會唔會浪費時間同個傻嘅拗？ 喺打風期間，最無助嘅都係喺出面流浪嘅動物，人有臨時庇護中心，但動物呢？呢啲日子仲係生仔高峰期，雖然好多人都話流浪動物匿開就識搵地方避風，但係湊住堆B嘅媽媽，好多時都顧唔到咁多。特別係村入面，好多時大雨後會發現有啲BB俾雨水沖咗出嚟，好命嘅俾人發現到執身彩，唔好命嘅大概已經成為食物…自然界嘅弱肉強食就係咁。作為人類，我哋都未必可以幫到全部，遇到需要幫嘅動物時唯有盡幫。 雖然有一邊嘅人好渴望打風打到吹冧埋公司，但係同樣有另一邊嘅人唔希望打風打到吹冧流浪動物嘅暫避處。就好似有人會將一卷膠紙抬高價格至八十蚊，亦有人會五蚊一卷咁賣俾人。我都唔知有啲人算唔算係識做生意識賺錢啦，我淨係知香港地咩都炒係大家縱出嚟…香港有啲打工嘅咁渴望打風死人冧樓，都可能係因為工作壓力太大卦。

有日一位姨姨嚟到診所。佢行埋嚟登記處問我：「阿妹呀，你哋睇唔睇鹹魚呀？」 鹹魚呢範係咪應該去搵獸醫呀？買賣鹹魚嘅去街市啦～我：「唔好意思呀，我哋呢度西醫診所嚟㗎～醫人㗎喎」佢：「我梗係知啦～所以我先嚟搵你。」我個樣睇嚟似鹹魚再生父母嗎？我：「…鹹魚喎？死咗嗰啲喎？」佢：「哎呀！我話你聽啦！鹹魚喺我度呀！我老公對眼咪唔係咁好嘅。」我：「啊！你老公要嚟睇眼呀？」佢：「你聽我講埋先啦！我老公老啦嘛，佢呢輪返到屋企，我喺度煮飯，佢梗會問我『今晚係咪有鹹魚食呀？』，我邊有整咸魚啫！我冇為意呀嘛，咪話冇囉！點知個衰佬日日都問我喎！我以為佢好鬼鍾意食鹹魚呀！呢啲嘢佢邊食得呀！就噚晚咋嘛，佢自己上咗床瞓先，我做晒家頭細務先上床啦，我一上床佢又問我『老婆，你夜媽媽仲整鹹魚食呀？』。我把幾火話冇啦，佢仲話『唔係喎，我聞到有鹹魚味喎，仲要係好平好低質嗰種喎』。佢索吓索吓，索到去床尾，即係我下面啊！佢好大聲咁講『係佢啦！』，佢話陣鹹魚味係喺我度呀！」 你下面即係…係咪要洗鮑鮑啦？我：「你想做婦科檢查？」佢：「啋！我都幾十歲人做咩檢查呀！我講我隻腳，腳掌呀！佢話我隻腳有鹹魚味呀！嬲到我震呀！」我恍然大悟：「哦～係咪甩皮有水泡好痕咁呀？香港腳呀？」佢：「甩皮？我以為自己換皮咋喎…」 你係蛇嗎？換皮嚟做咩呀？

2018年9月～代表糯米雞已住喺豬家一年有多～ 當初嘅細細粒貓仔而家已經變成肥條條大大舊，望返上年同月整嘅月曆相，不知不覺，我覺得大家真係一齊做咗一件好了不起嘅事。我真心想讚大家咁多位奶媽奶爸嘅，喺呢年入面你哋成日聽我廢噏，我出廣告文賺罐錢你哋都會支持。以前爭落一身卡數碌爆卡嘅時候，雖然我印象中明明記得自己嗰時係冇公開講過，但係你哋都好似知道我好唔掂當咁，會送罐頭俾我，媽媽們又將家中BB唔啱用嘅尿片送俾我。直到而家，仍然有有心人送罐頭零食俾我，亦仍然會有人同我講想助養我屋企班毛毛… 不過我一直都覺得呢個係我責任，因為係我自己當初選擇要留糯米雞喺度，係我自己喊苦喊忽叫個天留佢一條小命，所以佢係我嘅責任。我一直都覺得直接用錢助養就真係唔好啦，出面有更加多需要醫療費暫託費嘅毛毛，如果想幫吓我嘅，可以買吓糯米雞本書，又可以買吓佢嘅月曆。而家糯米雞穩定晒，雖然食量一樣咁大，不過至少喺開支上少咗一筆醫療費，亦唔需要再撲嚟撲去搵醫生，我個心臟都受少啲刺激。而家見到嘅糯米雞，眼神都同以前截然不同，真係可以好有自信咁講『我大隻咗又靚仔咗，考試仲一百分添』。 以前嘅糯米雞已經唔喺度，以前拋棄嘅主人亦請唔好打算喺而家出現返，一年前你咁樣對佢，一年後你唔配為佢講任何嘢。即使你有苦衷，我都唔希望你嚟打擾我哋嘅生活。當年我選擇唔打擾你唔追問你任何因由，而家亦希望你可以一樣。

有日一位叔叔嚟到診所。 佢成塊臉出住水行埋嚟同我講：「喂，去呀」我：「吓？去咩呀？」佢：「我部冷氣唔出風呀！」阿先生，你應該熱到有啲眼花呀？我哋診所嚟㗎喎～我：「我哋呢度西醫診所嚟，冇人整冷氣㗎」佢：「你唔整嘅咪寫張紙俾我放假囉」終極目的係病假紙嗎？咁都俾你兜到搵位入？高手嚟喎～我：「你要睇醫生嘅我就同你登記啦，麻煩你俾身分證明文件我呀」佢：「我唔係嚟睇醫生呀」我：「咁我哋冇其他嘢可以做啦～」佢：「管理處叫我過嚟㗎！」係呀？肯定係見你病成咁，叫你快快嚟睇醫生啦，不過我哋普通科嚟～都要轉介你去專科啊。我：「佢叫你過嚟做咩呀？」佢：「過嚟咪過嚟囉」過嚟隻揪呀？我：「可能先生你聽錯啦，佢可能係叫你去搵冷氣師傅啊，或者你去商場周圍望吓有冇師傅幫到你啦」佢：「你都要俾張紙我呀！我都要放假去搞呀！」病因係咪寫『因家中冷氣需維修』？我：「如果你係有咩唔舒服嘅可以睇醫生，等醫生睇吓你需唔需要休息而寫病假紙啊」佢：「你係咪聽唔明呀？」聽唔明嗰個會唔會係你啊？我：「你部冷氣唔係我哋整壞㗎嘛，如果你係因為身體狀況唔好唔舒服嘅，你係可以睇醫生，我可以幫你登記～但係絕對唔會因為你部冷氣壞咗，我哋就會寫病假紙俾你，你明唔明呀？」佢：「＿你老＿！講極都唔＿明，蠢到成塊嘢咁！我去搵管理處同你講呀！」 先生離開後，然後…太陽日落西山，佢再冇返過嚟。唔知佢係咪俾管理處直送入醫院呢…

有日有位小姐嚟到診所睇醫生。睇完醫生，拎藥時，佢問我：「有冇收據呀？」我：「哦？有呀，下次喺房同醫生講要收據就得㗎～你等等啊」等醫生寫好收據後，我轉交俾小姐。 佢望望收據問我：「個價錢唔會寫明幾多幾多錢咁計㗎咩？」 我：「吓？我唔係好明你意思～」佢：「即係好似打邊爐咁逐碟料寫明幾錢呀」 呀～我食開任食㗎，全包呀！我：「我哋唔會咁寫㗎～我哋診金連藥費咁一個價錢啊」佢：「咁一係你分開診金同藥費寫呀？」我：「你保險要咁寫明呀？」佢：「唔係呀，我純粹自己想知嘅唔得咩？」…得～仲吹你唔漲添。我：「我幫你問問醫生呀」醫生喺診金同藥費一欄填上銀碼後，我再俾張收據小姐。佢望望又問：「診金成百五蚊？」我冇出聲。佢繼續講：「診金收費係點定㗎？」全憑醫生自覺值幾錢，好似係應該係，除非唔係。佢再繼續講：「你知唔知係點定呀？醫生自己定價定係你同佢定價㗎？」我：「醫生自己定嘅」佢：「醫生覺得自己應該收百五蚊診金呀？」我：「小姐呀～其實我哋呢度有貼紙出嚟寫明幾多日藥連診金收費係幾多嘅，你頭先冇睇到咩？」佢：「我問佢點解收百五蚊診金咋嘛」我：「診金呢啲係醫生定嘅，百五蚊都平㗎啦～」 佢：「去打邊爐都有寫明花生醬油茶芥幾錢位啦」 你好喜歡打邊爐嗎？做咩係咁一直講打邊爐啫～呢度診所嚟㗎！唔通醫生逐個步驟同你計錢呀？聽肺一個收費，問診一句一收費咁呀？我：「不如咁啦，你有咩問題嘅，一係我俾你入返房直接自己問醫生呀？你自己問醫生點解佢收百五蚊診金呀？」佢嘴藐藐收埋張收據離開診所：「問真啲問多幾句，咁都發爛渣」我咁都叫發爛渣？你真係未見識過真正嘅發爛渣啊～

我曾經喺網上見到人問『我部寵物水機有好多蟲仔，點算？』，『貓砂盤好大陣味，點算？』。呢啲係你自己清潔得唔好，懶於清潔嘅後果啊。 我亦曾經去過一個義工暫托貓嘅地方，見到貓嘅食物兜充滿污漬…嗰啲污漬並唔係一兩日就可以儲成，連基本清潔都做唔好，但係平時就成日見佢周圍走又可以成日上facebook呃like，我心入面即刻將呢位貓義工打叉叉。你可以利用動物去幫自己成名，但首先請你做好啲基本嘢先。 人懶真係唔好養寵物，養寵物唔會令你變得勤力，只會為你生活上帶嚟更多嘅需要做嘅嘢。連自己都未照顧好，平時亦懶得打掃嘅，一個人養我養嘅心態下，往後幾十幾廿年就要日日左清右潔，又要執屎又要洗兜。到寵物年老時，更要花更大心機時間去照顧佢，所以養寵物並唔係一時慶起，係一世嘅責任。唔好信任何人講嘅『貓好獨立，唔駛點打理㗎』，呢個只不過係一個對比。對比起你養一隻拉布拉多狗，貓的確係比較獨立亦唔駛點打理。因為拉布拉多精力非常旺盛，你唔同佢出去跑街嘅話，你間屋分分鐘會冇咗。我鄰居就係因為收養咗隻拉布拉多，身型由大碼變細碼。因為佢一日至少要俾隻拉布拉多落街跑三次，當然拖住繩嘅佢都要跑埋一份…咁對比下，貓真係好似唔駛點打理。 不過你望望原本自由極懶嘅自己，你本來就乜都唔駛理，養貓後你每日要清潔砂盤食物兜水機，吸塵拖地，甚至有機會每日換床單。同你嘅無貓生活對比下，有貓生活係咪即刻覺得要打理好多嘢？養寵物付出嘅唔係錢咁簡單。