【夠鐘食藥】病假日數

有日一位先生睇完醫生，我出藥俾佢～

我：「呢度三日藥，呢啲每日食…」

我都未講完，佢打斷我對白：「我自己識睇，你俾張假紙我得啦」

啊，我明啦，係嘅係嘅。

我遞上病假紙，佢拎住嚟睇睇再問我：「唔係三日咩？頭先喺房醫生話俾三日我嘅？」

我再望望張病假紙：「係三日呀，冇寫錯呀」

佢望望自己手錶：「而家都過咗大半日啦喎，你賠俾我呀？」

吓？關我咩事呀？有得咁計㗎？你唔自己早啲嚟睇醫生？

我：「醫生寫嘅係用日嚟計㗎喎，唔係時間計啊」

佢：「你講咩呀？」

我：「即係一日一日咁寫呀，你公司要寫埋時間？一係我哋寫返你到診嘅時間喺角落位度？」

佢：「我秒秒鐘都錢嚟㗎！」

我：「咁你想我哋點寫？」

佢：「今日13號呀嘛，而家三點九呀嘛，三日假你應該寫到去16號三點九囉」

我：「…應該唔可以咁寫，咁樣寫得我哋計就四日啦喎？你係公司一定要你咁寫呀？但係你今朝冇放假咩？今日三點九前嘅你唔需要？」

佢：「要呀，咩嘢唔要呀？唔要你賠俾我呀？」

先生做盛行呀？咁鍾意嗌人賠俾你嘅？

我：「咁樣就唔係三日病假啦喎，我同你問吓醫生先呀」

佢：「你死開呀，我自己入去問醫生呀！」

我死開都冇用呀，你自己撞門入醫生房嘛。

於是佢冇耐之後就再入醫生房，冇耐之後醫生就踢返佢出嚟。

佢向我咆哮：「我冇咗大半日假邊個賠俾我呀？食咗我大半日假呀！」 點知你啫，你自己搞掂佢啦～