【夠鐘食藥】關於筆

有日一位小姐邊傾住電話邊入嚟診所。

佢大大聲講嘢咁行埋嚟登記處，我望住佢，佢又望住我。

我：「睇…」

我都未講返句充滿職業病嘅開場白，佢已經舉起單手示意我收嗲。

好啦，我收嗲。於是佢企咗喺我面前同我分享佢嘅家事～

坦白講，我唔想知唔想理。

佢講講吓，講咗句『拎定筆嚟呀』，我冇理佢，因為我唔知佢係咪同我講緊嘢。

我繼續低頭做嘢，呢次佢終於好大聲講：「你係咪聾呀？」

於是我抬頭望望佢，佢再講：「我嗌你拎筆呀」

小姐，枱角位咪有筆架囉，筆架上咪有筆囉。

我指指筆架：「呢度有筆，你可以自己攞」

佢：「我見到呀，你當我盲？」

你見到又問嘅？唔盲都係智力有問題喎？

佢再講：「我唔用呢啲！個個掂過晒！」

咁冇啦喎，你咬指滴血啦，自便，唔好咬咁大啖呀，一陣標血射到一地都係就唔好啦。

我：「我哋冇其他筆俾你用㗎啦，俾你哋用嘅都係擺晒喺筆架度」

佢：「我用私家嘢呀！」

咁就係你問題啦，話得係私家，梗係你自己自備㗎啦～

我：「我哋冇其他筆可以俾你用㗎啦」

佢：「屌拿星，筆都冇」

做咩無啦啦咁激動咁話自己呀？

我：「小姐你要睇醫生嘅話我就同你登記，你要筆嘅就用筆架上面嗰啲」

佢雖然冇出聲，但係佢似乎嬲到口都震埋，之後佢再同電話嘅人講返：「你介紹埋啲咩垃圾診所俾我呀！筆都冇枝㗎！」

小姐飛快地離開診所。

要用私家筆好心就自備啦，我俾得我枝私家筆你用，我嗰枝就唔係私家筆啦。