「退休車長」搭巴士「曬證」拒戴口罩 車長勞氣:唔戴就請你落車

有乘客於16日遇到一名伯伯上巴士後拒絕佩戴口罩,甚至「曬證」自稱為退休九巴車長,聲稱自己有「特權」,惟車長拒絕接受,勞氣地向他說教,並堅持稱:「你上得我車嘅,我唔理你『曬唔曬證』,『曬證』就更加要守規矩先啦!」

一位女網民於16日下午在 Facebook 群組「香港突發事故報料區」中發文,表示自己當日下午12時49分,登上一輛由將軍澳(彩明)開往荃灣西的290號巴士,期間目睹一名伯伯未有佩戴口罩就上車,更聲稱自己為九巴退休司機而可獲轄免,車長及乘客均上前勸其戴回口罩,事主形容:

「(伯伯自恃)有九巴(司機)退休證『大曬』,已經叫咗個阿叔戴返口罩,溝通唔到先請司機『大佬』上嚟。」

從影片可見,該名伯伯坐在上層最前排座位,車長勞氣地向其說教,勸喻:「阿公,戴返個口罩先啦好嗎?」。未料伯伯忽然「發惡」,聲稱自己以前「揸開603(線巴士)」,並出示一張證件,示意自己為退休九巴車長,車長聞言不禁反駁:

「我唔理你係咪九巴(退休車長),麻煩你戴(口罩),你上得車嘅就一定要(戴口罩)。我唔理你係咪603(線巴士)定幾多,你上得我車嘅,我唔理你『曬唔曬證』,『曬證』就更加要守規矩先啦!」

伯伯聽後,反認為車長不相信他的講法,繼續「嘮嘮叨叨」,車長便加重語氣指罵:「我唔係話唔信!依家法例規定上巴士一定要戴口罩!一係你就落車!如果唔係我唔開車架!」

然而,對方彷彿「錯重點」,仍然堅稱自己「以前係『阿頭』」,車長聞言再也按捺不住怒氣:「我唔理你係咪『阿頭』!如果你上得巴士就麻煩你戴返個口罩,一係你就落車!如果唔係我就唔開(車)架喇!你唔好迫我打電話報警!」

惟該名伯伯依然「執着」於「九巴」的問題上,車上不少乘客不禁鼓譟起來,稱應取消其「退休證件」。期間一名熱心男乘客步至上層,詢問「係咪要口罩啊?」,並把一個口罩遞給伯伯,他卻堅拒收下,任人友善勸喻「揸住(個口罩)啦」,他仍無動於衷,車長見況只好繼續指摘:「你唔戴口罩我點開車啊?法例規定咗架!」。

二人僵持一陣子後,該名伯伯稱要向「603」投訴,終肯跟隨車長下車,影片到此結束,事主不禁大讚巴士車長見義勇為,

「已經影咗司機『大佬』資料,讚賞咗。」

不少網民看到影片後,亦讚賞車長非常盡責,留言表示「大叔無口罩,同佢對話咁耐,其實好高危,辛苦車長了」、「司機的行為跟說話,真是很專業」、「司機大佬好嘢」、「個巴士司機真有耐性」、「雖然個司機做得非常之好 ,但真係非常之危險,個司機應該值得嘉許」、「另一個叔叔好好唷,畀埋口罩佢」。

另有人指曾遇過該名伯伯,「佢真係有精神問題架!我好耐之前見過佢!佢係會不停重複『603阿頭』呢句說話!自言自語!」、「佢有腦退化症,經常會唔記得依家嘅嘢。『利申』:以前將軍澳區NGO(非政府組織)經常見到佢」。

九巴指引:先勸喻再要求離開

九巴傳訊及公共事務部主管林子豪日前指出,公司已發內部指引,若有乘客在車長勸喻後仍拒戴口罩,車長有權拒絕對方上車或要求離開巴士;若情況惡劣,車長可致電公司,要求車務督察協助,若仍無法處理就會報警求助。

林子豪又稱,有新法例前,絕大多數乘客都會戴口罩,但仍有部分人會除下或不記得戴口罩,引起乘客之間的問題,需要車長調停,認為新法例清晰,期望有助減少爭拗。但有九巴車長表示,擔心措施會令車長「難做」,希望乘客自律。

Share on facebook
Facebook
Share on twitter
Twitter
Share on linkedin
LinkedIn