【夠鐘食藥】大蝦細,好爽啊!

一個寒冷嘅早上~ 我手抽住一隻公仔準備將佢寄出…途中遇到今日嘅兩位主角—一對操普通話嘅母女。

小妹妹見到透明膠袋內的公仔,拉扯住媽媽衫腳不停吵嚷:「你看你看,我要我要我要!」

佢媽媽跟上我嘅步伐,拍拍我膊頭問:「哪買的?」

我:「唔知喎,我唔係買嘅~喺日本寄嚟嘅~或者你睇吓啲精品店有冇啦」 佢就問我邊度有我所講嘅舖頭啦。

我:「唔知啊,而家呢頭都變晒你哋最鍾意嘅藥房啦」

佢:「你可以送小孩嗎」

唔得喎。點解我要無啦啦三九唔識七送俾你個女呀?

佢:「也不能讓小孩失望?你看小孩好喜歡吧」 失望與挫敗係每個人嘅人生中必須承受啊。

我:「我呢個都係送俾人嘅,對方都好鍾意㗎」

佢:「我買行吧,我多錢」

噢~想用錢嚟撻我嚟掟我啦嘛?嚟呀~攞錢出嚟掟我啦嘛,快啲瘋狂用錢蹂躪我啦。咁有錢咪去日本囉。咁有錢咪去樂天網購囉。家陣日本block咗你哋咩? 我冇理佢,耍岀苦練十年嘅『阿婆走得快一定有古怪』本領,一見入直路就立即急腳走人。

佢哋兩位,大嘅喺後面大嗌企圖留低我,細嘅喺後面尖叫哭鬧。 有啲嘢係用錢買唔到嘅,你哋咁自我中心,自以為咩都可以用錢解決…睇怕你哋呢世都唔明㗎啦~ 今日,我感覺無比舒暢。我係一位好邪惡好賤嘅姨姨,大蝦細,好爽啊! 而且你個女一啲都唔可愛。

Share on facebook
Facebook
Share on twitter
Twitter
Share on linkedin
LinkedIn