【夠鐘食藥】細路玩得,我唔可以玩!?

有日一位小姐單手掩住條腰咁入嚟診所。
佢行埋嚟登記處問我:「有冇醫生睇呀?」
我:「有呀,麻煩你身分證明文件呀。」

佢:「仲有個問題,有冇得寫證明㗎‧」
我:「你想寫啲咩證明呀?」
佢:「你哋出面個公園嗰張搖搖櫈整到我呀,我條腰好痛呀。」
我一頭霧水:「出面個公園?搖搖櫈?」
佢:「呢~動物樣,坐上去可以向前向後搖嗰啲。」
我:「係呀,我大概知你講邊啲,你點整親呀?俾佢整親條腰?」
我想像唔到個畫面…唔通….
佢:「我玩玩吓佢突然向後跌囉。」
並唔係突然啊,小姐,你知唔知嗰啲係小朋友玩㗎?小朋友幾重,你幾重呀?俾你坐一坐搖兩搖,根都斷好正常呀!
我:「啊..咁你想寫張紙交俾公司?」
佢:「梗係唔係啦,我都唔駛返工嘅,俾管理處㗎!」
我:「吓?你諗住投訴呀?」
佢:「係呀,唔得咩?而家你哋個公園啲嘢爛喎,整到我喎!」
我:「但係嗰啲本身係俾小朋友玩㗎喎?不過你都可以入去問吓醫生寫唔寫到嘅…」
佢:「咩意思呀你?細路玩得,我唔可以玩㗎咩?」
我:「小朋友同成人個體重唔同嘛。」
佢:「我都係著中童衫㗎咋!」
啊!唔怪得你件衫就爆咁啦,我仲喺度諗緊你做咩要虐待自己啲肉~我以為你鍾意玩綑綁咋~
佢:「身分證呀,登記啦,我病人嚟㗎!」

嗯,你真係好病,病到自己就快十八對都仲覺得自己係小朋友。

Share on facebook
Facebook
Share on twitter
Twitter
Share on linkedin
LinkedIn