有日一位女士嚟到診所。
佢行埋嚟登記處唔出聲,我問:「係咪睇醫生?」
佢一句得埋嚟:「唔通嚟睇你呀?」
…咁兇猛嘅~好驚啊。
我:「未睇過係咪?麻煩你俾身分證明文件我呀」
佢又一句得埋嚟:「弱智」,之後掟張身分證喺枱面。
我深呼吸。
我登記期間,佢一直金晴火眼望住我,呢一刻我懷疑佢可能真係嚟睇我望我…
我:「登記好㗎啦,你可以坐低等等呀」
佢:「阿姑娘呀,你係咪俾人話你弱智都冇感覺㗎?」
唔係冇感覺,只係明知你呢啲人係撩交嗌嘅話,我做咩要同你一齊鬥抓爛面?咁唔係仲戇居咩~
我笑笑:「哦?係咩?原來你話我呀?我以為你自己講嘢咋…我登記咗㗎啦~你可以坐低等醫生嗌名啊」
佢企喺度唔出聲,企咗分幾鐘,都係望住我。再望收你錢呀!
我低頭做嘢唔理佢算~
醫生嗌名,佢終於入得去。
到佢出返嚟,佢又企喺我面前:「我頭先同醫生投訴咗你待客態度有問題」
我:「嗯~OK」
佢:「我希望你知道自己係坐喺診所最前嘅位,你嘅一舉一動都係代表住入面好有學識嘅醫生,你坐得呢個位就唔可以衰得過入面個醫生」
我好得過醫生嘅話,我坐咗房啦。
我:「好,一陣醫生會同我講㗎啦」
佢:「你一陣間慢慢受啦」
我笑笑:「OK!」
到女士離開診所後,醫生行出嚟同我講:「唔駛理呢啲人,心理有問題㗎!冇嘢搵嘢嚟搞!以前佢都唔係咁㗎,一年紀大咗變到咁都有。」
應該係更年期作怪卦~