輪椅大媽上巴士即除口罩搲腳 乘客斥噁心:搲完腳周圍掂扶手

本港第三波武漢肺炎疫情嚴峻,市民均加強防疫,卻有巴士乘客罔顧衛生,上車後馬上拉低口罩,更除鞋用手搲腳,被車長勸喻才勉強戴回,有目擊者指她更曾用骯髒的雙手觸碰扶手。

一位女網民於26日早上在 Facebook 群組「Tai Po 大埔」中發文,指乘搭來往太和邨和大埔墟港鐵站的71K線巴士期間,目睹一名坐輪椅的大媽,甫上車即拉低口罩,並在車廂內除鞋,甚至「晾」高腳,再用手搲腳。

事主指,由於車長難以看到其位置,自己決定開口提醒大媽指「阿姨戴返個口罩啦」。車長聞言亦即介入,請大媽戴回口罩,否則「唔開車」。事主形容,此時大媽便用曾經搲腳的手,拉高口罩覆蓋口鼻,惟其態度輕挑,且帶回口罩後繼續搲腳,令她大為反感:

「(大媽)仲好意思話,跌咗(口罩)落嚟,我明明睇住你拉落嚟,算數,見你戴返,但佢真係好冇公德心囉!」

事主表示,已非首次遇到該名大媽,指「呢個阿嬸我成日喺富亨見到佢」,更稱對方「識行」,毋須借助拐杖步行,認為大媽的行逕非「正常」與否的問題,而是涉及公眾衛生,

「佢(大媽)不停搲完(腳)跟住周圍掂返喺扶手位到,請問下手唔知掂咗,會點呢?依家呢個環境係咪應該注意返啲衛生呢!」

不少網民看到帖文後,紛紛批評「公眾地方搲腳趾,真係好唔衛生」、「坐輪椅都要有公德心架」,亦有其他街坊曾遇過涉事大媽,「日日都見到佢搭71K(巴士)啦」、「我見過佢幾次,佢識自己行,但次次坐輪椅上車,有次司機開前門畀佢落車,佢唔落,係要喺後門落,仲要自己起身落咗車,猛咁叫人幫佢將架輪椅搬落車」。

此外,亦有女乘客在網上貼文,指昨日晚上約9時半,乘坐來往上水和藍田的277E線巴士期間,遇到一名伯伯在車廂內飲食,更拉低口罩大聲講電話,被勸後僅「扮晒嘢話整返好個口罩」,甚至反罵事主。

九巴指引:先勸喻再要求離開

九巴傳訊及公共事務部主管林子豪早前指出,公司已發內部指引,若有乘客在車長勸喻後仍拒戴口罩,車長有權拒絕對方上車或要求離開巴士;若情況惡劣,車長可致電公司,要求車務督察協助,若仍無法處理就會報警求助。

林子豪又稱,有新法例前,絕大多數乘客都會戴口罩,但仍有部分人會除下或不記得戴口罩,引起乘客之間的問題,需要車長調停,認為新法例清晰,期望有助減少爭拗。但有九巴車長表示,擔心措施會令車長「難做」,希望乘客自律。

Share on facebook
Facebook
Share on twitter
Twitter
Share on linkedin
LinkedIn