【買口罩】一合口罩新一輪口罩料5月開售

一合口罩現時設有5條生產綫,廠房共有40多名員工,未來料將增聘15至20人,並期望員工具工業生產經驗,包裝或文職均可。 一合口罩預計5月初至中進行新一輪預購,將提供10萬盒口罩;交付日期則於5月中至下旬開始。價格連運費在內,預計每盒30個的口罩售88元。而廠房現時生產的口罩,有80%公開網上訂購;20%預留予本地超過100個慈善團體。 20%預留予本地慈善團體的口罩中,為保障有需要人士可以得到口罩抗疫,一合口罩成立了「捐贈口罩1:1配對計劃」。據悉,一合口罩收集各界捐贈的口罩總數,再加碼捐贈同一數量、其廠房生產的口罩。

Read More

【夠鐘食藥】我想拎嚟大便樣本…你哋要幾多呀?

電話響起~ 我:「你好,乜乜診所」佢:「我想睇醫生㗎」我:「今日我哋應診時間去到七點~你七點前嚟到就可以㗎啦」佢:「好呀,我轉頭落嚟呀,七點前呀嘛?我轉頭嚟呀」 收線後冇耐,電話又響起~我:「你好,乜乜診所」佢:「姑娘,我頭先打過嚟㗎」我:「係~有咩事呢?」佢:「你哋睇肚屙之類嗰啲嘢㗎?」我:「腸胃炎睇呀」佢:「咁就啱啦!我而家應該就係腸胃炎啦!」你在興奮什麼…我:「嗯,咁你七點前嚟呀」佢:「我而家仲屙緊唔係好方便呀,屙到我都唔知自己喺邊,而家幾點呀?」我:「五點半」佢:「好啦,我盡快啦,肚屙睇㗎嘛?」我:「係呀」 再一次收線後冇耐,電話又響起~我:「喂?」佢:「我呀我呀」我:「請問有咩事呢…」佢:「我想拎嚟大便樣本俾你哋,你哋要幾多呀?」我:「點解呀?點解要拎過嚟呀?我哋唔駛㗎喎!」佢:「你哋唔駛睇吓我啲大便有咩事㗎咩?」我:「你同醫生講就得㗎啦,除非你想做化驗先要交大便,而且都唔係交俾我哋,交俾化驗所㗎咋」佢:「我撈起咗啲啦喎」撈?你點撈呀?我:「我哋唔駛呀,唔駛呀,你自己處理咗佢啦」佢:「吓…咁㗎咩,醫生唔駛睇個形態㗎咩…」我:「你形容得㗎啦!我哋信你對眼㗎!」佢:「唔好意思呀姑娘,我自己都唔知點形容呀」佢繼續講:「我而家落嚟啦」 我面如死灰…同事問我:「咩事呀?」我:「有人拎住自己啲屎嚟緊診所…」同事:「用咩裝呀?」我:「唔知…我淨係知佢肚屙…」 然後,嗰年中秋我冇食過月餅…

Read More

【夠鐘食藥】糯米雞瀨屎也愉快

上星期糯米雞去咗朋友搞嘅領養加市集日。我哋比原定兩點到嘅時間早,諗住可以行陣買吓嘢先。未上樓前雞爸問我:「你估會唔會好多人呀啦?」,我好堅定咁答:「邊會呀,熱死辣辣,邊有人咁得閒咁神心特登嚟睇佢呀」。 一去到現場,對唔住我知錯了。我想認真行陣買嘢嘅機會都冇。只要我抱住佢出去行吓就會好多人喺身邊舉起手機捕捉佢個屎樣。之後我哋返去貼心朋友安排俾我哋嘅可攻可守嘅角落位,到原定時間後,人開始多,甚至要排隊望佢影佢…我不禁望住糯米雞講:「原來你真係紅過我,唔怪得啲人成日話我靠你上位,表面證供成立,我又等收pm啦。今日我哋係你經理人加保鑣啦」。初初糯米雞表現得有啲緊張,不過都一樣逢人癡同嗲,肆無忌憚咁成塊姨媽巾咁款撻咗喺其他義工心口…之後開始見攰就直程喺現場瞓埋。 你問我有咩感受呀?我都好想當場瞓埋一份呀,不過張枱唔夠大… 到大約四點,我哋離開了。因為糯米雞一味瞓,加上都自覺為附近正為動物機構義賣嘅攤檔帶嚟唔少麻煩,所以我哋比原定時間早咗離開。我之前一直以為雞面對咁多人會好緊張好驚,事實證明…佢比我更慫恿自在食得瞓得。相比下,我覺得自己以前去簽書會更似一舊蕃薯。 不過我未有打算推糯米雞出去做『明星』俾佢長期躝街,今次只係朋友搞嘅領養市集限定啊!見到朋友搞嘅活動咁成功,糯米雞瀨屎也愉快。

Read More

【夠鐘食藥】平嘢一定死人嘅﹗

有日一位太太帶住個女嚟到診所~ 佢問我:「有冇流感針打呀?」我:「有呀,你定小朋友打?」佢:「我個女」我:「我哋有政府資助計劃嘅,你有冇拎佢嘅身分證明文件嚟啊?有就可以填埋表,咁就會平啲㗎啦」佢:「針都係一樣㗎?會唔會平啲就俾垃圾我?」我:「我哋全部都一樣嘅…」佢:「政府有咁好死嘅咩?」我:「…咁有冇證件?」佢:「咪住先,問清楚啲先,枝針有幾大枝呀?」我:「嗯?」佢:「有幾大枝呀?個針窿會有幾大呀?」我:「小朋友之前未打過流感針㗎?」佢:「年年都有打」咁枝針年年都一樣咁嘅SIZE啫…我:「咁同往年嗰啲都一樣呀」佢:「我以前打嗰啲成幾百蚊枝㗎,你呢度幾錢話?」我:「如果你用埋政府資助嘅,你俾50蚊囉」佢好大反應:「咪係囉!我以前打嗰啲成幾百蚊㗎,至少都二百幾啦」我:「咁可能你以前去嗰啲診所冇參加呢個資助計劃啫,不過大家啲針都係咁上下㗎咋,唔會我哋嗰啲特別大枝定細枝…」佢:「都係唔好啦,平嘢一定死人嘅,一陣打到我個女成撻疤咁點算,我個女大個仲要去做香港小姐,佢衰咗你賠咩俾我呀」…我諗選唔成香港小姐未必關嗰撻未發生未成形嘅疤事… 我:「咁你想唔用個資助,照俾正價打針?」佢:「係啦,我個女好矜貴㗎」我:「嗯,明白,冇問題呀,咁我照收你正價啊」 …多錢得滯冇掟駛嘅嘢,我都係唔明㗎啦~

Read More

【夠鐘食藥】DREAM CAT?我笑而不語

早幾日篤篤吓電話,望見FACEBOOK內有隻黑貓嘅相~我只不過隨意講咗句:「啊~好可愛呀,好想養隻黑貓呀」 雞爸就即刻好大反應大嗌:「你唔好再講呀!」,玻璃心的我爭啲好似啲悲劇女主角咁跪喺地下,再伸出左手邊喊邊問『你咁對我?你講咩話?』。不過我只係豬腳,於是我一臉不屑咁問佢:「而家咩事先?講吓都唔得呀?」 佢:「你記唔記得你以前就係講過『哎~我都好想要一隻好多嘢講好活潑好動又玩得嘅貓啊,好羨慕人哋有啲咁多嘢講咁嗲嘅貓呀!簡直係DREAM CAT呀!』,你而家咪有囉!」,佢指指糯米雞。噢,呢啲只不過係巧合啫,我夠成日講想中六合彩,咪一樣一次都冇中過,所以我係無辜㗎法官大人! 認真啲諗,糯米雞真係我嘅DREAM CAT?可能係我許願時,唔記得咗講『要健康識自己屙屎屙尿』,於是上天安排嚟嘅DREAM CAT似乎有些少問題~係就係就夠多嘢講呀,朝朝多聲氣到我要大嗌『夠啦,知啦,收嗲啦!』。係嗲呀,嗲到我日日都講『唔好再痴埋嚟啦,我成臉貓毛啦,你啲屎呀!』。係活潑又好動呀,成日周圍貓衝,成日都趁我剛剛起身未回魂就成碌火箭炮咁喺我腳邊跑嚟跑去,於是我朝朝都會大嗌『跑夠未呀?你阿媽就快因為你仆死跌死㗎啦!我未裝平安鐘呀!』DREAM CAT?我笑而不語了…

Read More

【附抽籤連結】UNICEF HK即日可網上登記抽籤免費兒童口罩

聯合國兒童基金香港委員會(UNICEF HK)表示,獲恒基兆業主席李家誠透過恒基兆業「抗疫基金」購買100萬個兒童口罩,其中一半送到基層手上,而餘下50萬個將會給予全港家庭免費抽籤領取。UNICEF HK會於今日(28日)至5月5日開放網上登記抽籤,登記先後次序不會影響中籤機率。 抽籤連結:https://mask.unicef.org.hk UNICEF HK指,兒童口罩一盒50片,非獨立包裝,有「中童款」(14.5cm x 9.5cm)及「幼童款」(12.5cm x 7cm)可供選擇,共有1萬盒兒童口罩。…

Read More

【夠鐘食藥】我對眼就係證據!

有日朝早好多人排晒隊等登記~ 一開始登記,啲人一個跟一個咁嚟到登記處前。有位阿姨繞過排隊嘅人龍,喺登記處前左望望右望望…突然佢攝埋嚟並同準備登記嘅先生講:「我問少少嘢呀,你等吓呀」阿姨你個人都幾風趣。佢問我:「醫生返咗嚟未呀?」我:「未返呀,十點左右返,你要睇醫生嘅麻煩你排隊呀」佢繼續霸住個位,企圖塞埋個頭入嚟:「我有啲趕時間呀,可唔可以而家登記埋先呀?」我好大聲:「小姐,麻煩你排隊呀,後面全部人都係排隊登記嘅,唔該你排隊呀~」佢個頭稍稍退後,但身軀仍然唔郁:「關你乜事啫?」阿姨你個人都幾風趣。關我乜事?得我先會同你登記嘅,仲關唔關我事呀?我:「要睇醫生就排隊呀~麻煩你讓開呀」佢指住頭先俾佢攝咗位埋嚟嘅先生:「嘖,有冇搞錯呀,我喺度好耐啦,我咪排喺呢個哥仔前面囉」講大話講到自己呃埋自己,兼當其他人都係低能啊你~我:「小姐呀,頭先你冇排隊呀,你自己攝埋嚟話問嘢咋嘛」後面位先生和應:「係呀,你話問嘢咋嘛」佢同先生講:「關你乜事啫」你打人尖呀,唔關佢事,唔通關對面街個阿婆膝頭事呀?我:「總之你要睇醫生就要排隊」佢:「邊個睇到我冇排隊啫,有人證明咩~我趕時間呀嘛」 我:「我對眼就係證據!你唔排隊嘅我唔會同你登記!」 佢:「駛唔駛咁呀,關你乜事喎,登記咋嘛」 終於佢扭住屎忽口噏噏行返去隊尾排隊。

Read More

【夠鐘食藥】如此佛系嘅我~

上星期至今日我放監去咗旅行,安置咗糯米雞喺我朋友間貓酒店度。離開酒店前,我朋友同我講:「玩得開心啲啦,我會日日影相俾你㗎啦」我要做個狠角色:「唔好影呀!我唔會掛住佢㗎!」,之後我就懶瀟灑離開了。 夜晚我朋友傳嚟訊息話我知幫唔到糯米雞著片,話佢發哂癲。哎呀呀,我又好想睇吓隻雞仲可以有幾癲呀~喺我同佢相處十個月以嚟,我一早知佢係癲夾喪,根本係有精神病。佢呢一刻可以嗲到你死,下一刻可以咬到你爆粗。可能我本身都係癲,所以我好明白佢,亦可能我本身份工一直都受過訓練,知道對付呢類性格要點做,所以我一於話知佢。 不過我就有啲同情我朋友,佢應該都係俾糯米雞一臉天真嘅樣呃咗。可能都係到照顧後就先發現呢隻貓又煩又癲又喪,佢都係同我講:「佢係咁打人,冇人性㗎,咬完人就扮可愛」。幻想完全破滅了~呢隻糯米雞八分本性如此,另外兩分係受到我呢個主人縱出嚟嘅。我早就放棄咗『教育』佢嘅念頭,教嚟做乜呀~隻嘢都精神分裂嘅,呢頭打完佢,嗰頭佢就唔記得。 留返啖氣暖吓肚好過啦,我成日返工都係咁『無謂同唔同方向嘅人拗,大家目標都唔同,根本冇得拗』。我呢行真是令人麻木的好東西啊! 訓練岀如此佛系嘅我~直到交稿嘅今日,我仲喺東京,說好的唔會掛住糯米雞其實係假嘅,我好掛住佢,真係好掛住隻癲喪臭屎雞,早知帶條有餡屎片過嚟止吓癮啦~

Read More

【夠鐘食藥】同姓三分親

有日一位先生嚟到診所。 佢問我:「你哋醫生姓陳呀可?」我:「係呀」佢自己講自己笑:「同姓三分親」我望住佢冇出聲。佢:「姓陳呀可?」你係咪有老人痴呆呀?我:「係呀,你係咪睇醫生呀?係嘅你俾身分證我同你登記先呀~」佢:「你哋會唔會做緊啲咩折扣優惠咁呀?」我:「先生呀,我哋呢度診所嚟㗎喎?」佢:「我知呀,不過診所唔可以搞折扣優惠㗎咩?」我:「我哋唔做呢啲…」佢:「唔怕坦白同你講,我其實可以唔駛睇醫生」係?門口喺你身後,麻煩你轉身呀。我:「哦?係呀?」佢:「我淨係想要幾粒硬的的嘅藥」我:「先生,我哋呢度除咗藥水之外,係藥丸嘅都好硬吓㗎喎,你要配藥嘅話,你喺度睇過未?如果未睇過,我哋唔會配㗎喎,我哋要跟返你病歷上食過嘅藥先可以配俾你㗎」佢:「姑娘你一輪咀講,我都唔知你講乜。你同我問醫生啦,我都姓陳㗎」你姓陳關醫生咩事呀~全世界有幾多人姓陳呀~我:「其實…你係醫生邊位呀?」佢:「同姓三分親呀,四海之內皆兄弟呀,佢係男嘅分分鐘係我爸爸」….醫生,你喺一兩歲嗰時傳宗接代了嗎?定係你個仔熟得太快呀?我:「…先生呀…我哋呢啲配藥嘅程序唔駛再去問醫生㗎啦~你有喺度睇過就可以配返之前喺度睇過嘅藥。冇嘅話就冇得配㗎啦,你明唔明呀?」佢:「我唔明呀爸爸」…媽,呢度啲人好癲呀,我可唔可以唔撈啦?佢細細聲:「我要偉哥呀」我:「我哋診所都冇…」 佢冇再出聲,自行離開診所。 醫生,你個熟得比人快嘅仔走咗啦喎,你追唔追返佢呀?

Read More

【夠鐘食藥】你唔好搞我啲屎呀!

日本之旅結束~一落機冇耐就仆住去接返糯米雞。 去到朋友嘅舖頭時,朋友同我講:「佢同人(舖內其中一隻貓)鬧交鬧輸咗,而家心情有啲失落呀」 我望望糯米雞,陰公雞囉!又真係落晒形喎~平時蝦蝦霸霸稱王嘅糯米雞居然都會輸呀?返去再練多十幾年先再學人鬧交啦~雖然佢輸咗俾隻貓,但係我朋友話我知佢咬傷咗一名員工,咬到人哋隻手腫晒,繼而放咗幾日假…身為糯米雞媽媽嘅我表示非常抱歉,我問朋友:「可唔可以俾我負責返你同事嘅醫療費?」。 豪爽嘅朋友都係拒絕咗…我嗰刻心諗,真係樣衰啦。 喺住宿期間,平時屙開爛屎嘅糯米雞居然唔屙屎,全部屎堆晒喺腸度。我朋友已經幫佢推過一次屎,仲要一路推一路咬人鬧人,好辛苦先推到兩粒硬屎出嚟。可能糯米雞想講『你唔好搞我啲屎呀!我儲埋儲埋留俾個死肥婆嘆呀!去旅行呀啦?食屎啦佢!』。我接返佢之後,第一樣要做嘅就係幫佢通便,通便嚟講最直接不過都係灌腸,可以用生理鹽水亦可以用椰子油,再加以按摩。其他正常嘅貓狗多數灌完腸都會半個鐘至一個鐘內就會自己屙得到出嚟,但係糯米雞唔識屙屎嘛,所以我哋就要用人手推啲屎出嚟。推足兩日,我哋終於清晒佢條腸啲屎…見到最後嗰條屎擠埋出嚟,真係有種說不出的暢快感!究竟一隻屙開爛屎嘅貓,係點可以做到硬屎效果?

Read More

【夠鐘食藥】你可唔可以俾返嗰個幾鐘我呀?

有日一朝早診所剛剛開門~ 有位小姐入嚟診所,佢問我:「醫生紙係咪可以寫時間㗎?」我:「吓?你係咪指到診時間呀?」佢:「唔係呀,我要上一個鐘至拎到醫生紙嗰刻嘅鐘」乜拎得咁仔細呀?我:「我哋冇得咁寫㗎喎,一個上晝就有嘅」佢:「點解唔可以寫時間呀?」我:「病呢啲嘢,休息嘅…邊有時分秒咁準確嘅時間㗎」佢:「我都唔係病」即係呃病假啦~扯啦。我:「冇唔舒服嘅話,醫生更加唔會寫病假紙啦~」佢:「我今朝遲咗起身啫」關我蛋治?我:「呢啲唔關醫生事啊~」佢:「你可唔可以俾返嗰個幾鐘我呀?」我:「小姐呀,我哋呢度診所嚟㗎,嚟到都係睇醫生嘅」佢發爛渣:「我而家有話唔睇咩?我係要求你寫醫生紙俾我寫嗰少少時間啫」我:「病假紙嘅話係由醫生寫嘅,醫生認為你需要放假休息就會寫~而且一寫就唔會係幾個鐘…」佢舉起食指指向我:「咁你而家點賠返啲時間俾我呀?你講呀!你答我呀!」我:「小姐你自己瞓晏咗唔關我事㗎喎?」佢:「我唔係講我瞓唔瞓晏,遲唔遲到,我係要你嚟解決問題,姑娘唔係咁做㗎!」嚟,你嚟做!你咁勁嘅,你過嚟坐我呢個位,我做你個位,我嚟炳你!我:「總之醫生唔會因為你遲到而寫病假紙俾你啦」佢大嗌:「醫生!你聽到啦!唔係我唔俾錢你賺呀!係你隻門口狗攔住我咋!」佢再同我講:「我同醫生好熟吓㗎!佢聽到一定會炒咗你」 啊?係呀?炒咩呀?炒飯呀?醫生未返嚟啊。不如你自己打俾佢講呀~

Read More

【夠鐘食藥】呢一切,我哋捱過了

自從上次旅行後發現糯米雞都會有硬屎出現,我哋同佢通咗便之後就更加留意佢嘅便便。因為佢返到嚟之後,好似對原先食開嘅罐頭冇咩興趣,反而對其他貓食剩嘅乾糧更感興趣。於是我哋由得佢食乾糧了~ 初初執阿雞返嚟嗰時,佢個原主人寫嘅信交帶落阿雞只可以飲奶,如果唔係會便秘。嗰時睇咗幾位醫生都一樣有同樣嘅建議,話佢消化系統神經係有缺憾,一世都唔會有正常便便,亦會一世反反覆覆沒完沒了咁便秘或屙爛屎。我哋就係咁度過咗十個月。最近,糯米雞啲屎成型了!而且可以完整一條條咁推出嚟~我哋嗰刻真係歡呼咗出嚟。由只會屙水泥啫喱糊仔狀屎變成可以完整一條條,真係一個好大好大嘅進步。亦代表住『糯米雞的爆屎年代』已劃上句號了! 回望過去嗰十個月,由寵物尿片到BB尿片,由不停漏屎滲屎屙爆片到只有少量尿滲嘅尿片,由每日洗幾次籠拖十幾次地到個籠已經收埋咗,由當初日日壓大力到喊怕會整死佢害死佢到而家我日日俾佢煩到死。呢一切,我哋捱過了,終於成為過去。不過我哋仍然係邊養邊學,睇嚟呢個學堂,我哋仲可以上多十幾年了。 『存謙卑感恩的心學習能擁有更多。』呢句我唔記得喺邊聽返嚟,但係我一直都有袋穩。幫過我嘅人我一直牢記,至於叉過我嘅人記嚟都蒙嘉慧啦~

Read More

【夠鐘食藥】又唔係你親生嘅!

有日一位小姐嚟到診所。 佢行埋嚟問我:「仲有針打呀?」我:「打咩針啊?」佢講嘢係有啲唔咸唔淡嘅:「尿感針」我:「流感針呀?我哋冇晒啦~今年嘅都打晒啦」佢好大反應:「我個仔都未打!做咩唔等埋我呀?」小姐,你個南瓜車爛咗啦…我:「我哋啲針有限嘅,打晒就冇㗎啦~」佢:「咁我而家打得唔得呀?」我:「我都冇晒針,冇得打㗎啦,而家都四月啦,你等新一季先再打啦,九月十月再嚟啊」佢:「新一季?我打上幾季都得㗎,有得打就得㗎啦」打你條命。我:「我哋唔會有以前啲疫苗喺度㗎,流感針年年都唔同㗎,唔係破傷風針呀,你年尾再嚟啦」佢:「我唔緊要呀,我可以呀」你唔著緊自己個仔條命都唔好搵我哋嚟陪葬呀~我:「唔係你自己覺得O唔OK問題呀,係我哋真係冇呀」佢:「我真係冇所謂呀」我:「小姐,我要講幾多次你先明白,我哋啲疫苗都已經冇啦,要等九月十月先會返新一季嘅流感針呀~」佢:「哎,講極你都唔明嘅」明明唔明嗰個就係你…我:「我哋冇流感針打,冇,冇針,冇疫苗」佢:「哎,咪講咗要之前嗰啲都得囉姑娘」我就斷氣:「我哋…冇呀…」佢發脾氣:「我個仔嚟咋,又唔係你親生嘅!怕咩啫,有咩事死咗咪再生過囉!」 哇,你好豁達喎。既然都唔怕死,仲打咩針呢?留返啲錢嚟醫包包啦你~ 佢繼續講:「我有錢嘅都冇呀?」我:「冇」佢邊講邊離開:「細路仔咋嘛,怕咩啫!我仲有得生,有錢都唔識搵咁笨!」 你咁搞法生到八十歲都冇得抖呀~

Read More

【夠鐘食藥】你又引埋啲傻人嚟

早幾日有位兄台PM我,問我有冇考慮搵多隻比糯米雞更差嘅貓返嚟呃LIKE。 我望望糯米雞,對住佢講咗句:「你又引埋啲傻人嚟」。糯米雞呢啲CASE係因為啲商人只為眼前利益,無視近親繁殖嘅基因缺陷問題而引起。唔係我專登令到糯米雞變成咁嘅~好可惜你只睇到一小部份再曲解。 佢成為我家成員,嗰個心路歷程你真係知條鐵咩~嚟,等姨姨同你講解吓。我有時會『執』到一啲小動物返嚟,每次暫託後見佢哋冇病冇痛都會幫佢哋搵個好人家。但好景不常,亦係上得山多終遇虎,人冇可能一世都好好彩,好多人都會瀨同一樣嘅嘢:終於遇到啲唔健康有缺陷。感覺就好似係個天叫你係時候收手啦~ 當初我鬼知佢咁大鑊咩,我以為真係睇幾次醫生,大不了燒晒啲銀紙做靈符就可以成功健康『出貓』。望住佢嗰啲屎,我諗咗好多次『有冇人真係願意同你抆一世屎?』。喺度諗咗好多好多日,我都係唔放心唔安心將佢交俾其他人,我怕佢會再俾人遺棄,我怕佢會遇上一個到最後會嫌棄佢啲屎嘅人,更怕嚟問領養嘅只係貪圖佢一時可愛。佢嘅貓生天生已經比其他苦,我唔願意再俾佢承受更多。我宣佈封佢盤嗰日,我係好沉重咁揹上佢嘅一生。 動物唔係用嚟鬥慘呃LIKE嘅,更何況我覺得糯米雞而家一啲都唔慘,明明就係我慘啲。

Read More

【夠鐘食藥】我住公屋呀~

有日有位小姐抱住隻狗仔入到嚟診所。 佢問我:「我可唔可以擺佢喺度呀?」我:「我哋診所嚟,唔係咁方便啊」佢:「緊急關頭呀!唔該你呀!」我:「咩事呀?」佢:「我屋企唔可以俾人發現有狗呀」我:「吓?咁你諗住擺低佢幾耐呀?」佢:「一星期咁上下啦」 我:「更加唔得啦!你去搵寵物酒店啊~」佢:「我住公屋邊有錢呀?」而家香港地住公屋先有錢喎,你唔好呃我呀~我:「我都唔可以幫你睇住佢成個禮拜咁耐呀~我哋診所嚟㗎嘛」佢:「咁你喺正我樓下嘛!」隔離麵舖夠係囉,你又唔去問吓佢?我:「我哋診所又點可以俾隻狗仔喺度呢?而且我哋收工都冇人喺度㗎~你去搵寵物酒店啦,有啲二百幾蚊一日㗎咋」佢大驚:「一個星期咪成千幾銀?」我冇出聲。佢:「我交租都係咁上下咋」我:「如果你住公屋嘅,長遠落去你都要諗點安置隻狗仔㗎啦~」佢:「隻狗我新買㗎,我未玩厭㗎!」玩你個頭!明知自己住公屋仲要買狗!我:「小姐,動物唔係拎嚟玩嘅~你自己住緊公屋,明知唔俾養狗就唔好買啦,你而家玩緊你自己咋」佢:「死八婆!你唔好開診所啦!我住公屋點解唔養得狗呀?我擺低佢喺度幾日你仲要煩過我老母!你唔好開喺我樓下呀嘛!」佢講完就離開了。 你同房署講啦~條例又唔係我定…

Read More

【夠鐘食藥】陰公雞啦!你頂唔頂得住呀?

糯米雞足一歲了~係我期待又擔憂嘅歲數。 因為佢係時候要絕育,佢初初返嚟時,我哋一直諗:「佢會唔會喺一歲前就瓜咗啊」,只係抱住邊養邊打算嘅態度去看待『絕育』。到就快一歲時,我哋又怕『佢捱唔捱得過』,諗諗吓就覺得不如唔好絕育算,反正佢都成世著住塊尿片搞唔出啲乜事~ 不過上天總係特別喜歡玩鬼我,我哋發現佢有隱睪症了。佢嘅蛋蛋似乎只出到一粒,另外一粒我哋摸唔到喺邊。隱睪症即係睪丸生咗喺唔應該生嘅地方,粒蛋蛋不見天日收埋咗唔知喺邊,呢個情況下不正常嘅睪丸日後好易成為腫瘤,所以係必須開刀搵佢出嚟。即係我哋冇得揀絕唔絕育,係必須要做,仲要越早越好~ 擔心就一定有㗎啦,因為要開刀,喺腹腔位搵返粒蛋出嚟,代表要全身麻醉了。做手術前,先為佢抽血驗身,睇吓合唔合格。報告顯示各指數非常靚仔!雖然糯米雞而家已經比以前強壯好多肥好多,但係我怪獸媽媽嚟㗎嘛~都仲係好驚好擔心呀大佬。仲要做手術前一晚開始禁水禁食,陰公雞啦!你頂唔頂得住呀?另一樣擔心嘅係佢絕育後變得更肥更漲更好胃口…我家一班女已經係例子。個個絕完育都肥至少一個碼嘅…係咪因為絕育後知道唔再需要吸引異性,人生冇晒戀愛啪啪啪目標,所以個個都大放縱啦?

Read More

【夠鐘食藥】我做老豆機會大唔大呀?

電話響起~ 我:「你好~乜乜診所?」對方係一位男士:「姑娘,我想問你少少嘢」我:「我哋今日開到七點,隨時過嚟登記就有醫生睇㗎啦」佢:「我唔係嚟睇醫生呀」我:「哦?係呀~咁你想問咩呀?」佢:「我噚日冇用套咁搞咗我老婆」哦,同老婆交合係好正常嘅事啊。我:「咁你有咩想問呀?」佢:「我就想問咁樣嘅我老婆有咗嘅機會大唔大呀?」隔住個電話你都睇到我似一張排卵試紙嗎?我:「先生呀~我答唔到你呢啲問題㗎喎」佢:「咁我做老豆機會大唔大呀?」你覺得我又可以聽聲睇相嗎?我唔係盲公陳呀!我:「如果你有啲咩問題嘅,不如同太太嚟見醫生啦」佢:「我而家好後悔呀」我:「你係有需要嘅就同太太嚟啦,我哋有事後避孕丸嘅」佢:「我知你有!我梗知診所有啲咁嘅嘢啦!你估我未食過咩?」你?你食過?你食嚟做咩呀?你怕你生咗一堆精子BB出嚟呀?佢:「噚日我做得咁有幹勁!而家先叫老婆去食藥避孕嘅話,我仲係人嚟?」 咁我可以收線未呀?我唔想聽你有幾幹勁呀~我怕我忍唔住答你『幹得好!』我:「先生,咁你自己決定啦,你有咩問題就嚟睇醫生啦~」佢:「你都未答我機會大唔大?」我:「女性嘅受孕機會高唔高,首先都要睇佢嘅排卵期嘅,呢啲都可以嚟問醫生㗎」佢:「粒卵我會唔會見到㗎?」 有緣嘅話,你派出去嘅精子大軍就會見到。我:「…你應該唔會見到嘅」佢:「我見唔到嘅係咪即係冇咁大機會做老豆呀?」我:「先生,卵子係喺子宮度…喺卵巢…」我都未講完,『嘟』,俾佢收咗我線添… 你唔會諗住叫老婆俾個卵巢你睇呀嘛?放鬆啲啦準爸爸!未來日子仲有好多嘢要學呀~

Read More

【夠鐘食藥】咁就真係奇過奇異種子啦

上星期糯米雞咪去咗絕育嘅~我由一朝早好繃緊咁等呀等~等到姑娘打電話嚟:「佢醒咗啦,可以接返佢啦」,個人先覺得鬆一口氣。 到去到診所時,醫生同我哋講:「佢真係好好喎」我以為係話佢好乖嘅意思,心諗醫生你一定係撞邪啦,佢會乖?原來醫生講嘅係第二樣:「早幾日咪同你講佢要開肚搵埋另外一粒蛋出嚟嘅?」我:「係呀,我仲擔心開刀佢會頂唔住」醫生:「我哋剃晒佢肚毛,打算拎咗陰囊嗰一粒出嚟先,一開就發現兩粒都喺入面啦」我:「吓?即係佢冇隱睪問題啊?」醫生:「係呀,佢兩粒都喺陰囊入面」咁就真係奇過奇異種子啦~明明早幾日醫生都摸唔到兩粒,明明我哋之前都一直摸唔到。唔通糯米雞知開刀手術費貴好多,為咗留返啲錢去食,佢就谷返粒蛋蛋去正常位置?我:「咁佢咪唔駛開刀囉?」醫生:「係呀,所以一陣有錢退返俾你」哇,發達啦,慳咗足足千六銀之餘,糯米雞仲冇咁傷身~接返佢返屋企之後…佢已經即刻跑跑跳跳。說好的做咗手術會有啲痛呢?明明做絕育前個個都話做完會乖好多,唔會再周圍撩交打…但係…似乎糯米雞真係一隻唔多正常嘅貓。佢比以前更撩交打更嘈,我已經冇覺好瞓咗一星期,我有時瞓瞓吓都會聽到佢擘大喉嚨咁嗌,係幻覺嗎?

Read More

【夠鐘食藥】你因住紅呀!

有日有位後生女嚟到診所。 佢行埋嚟問我:「幾錢呀?」我指指登記處玻璃上貼住嘅診金收費表:「呢度有寫~你可以睇吓先」佢望望再問我:「學生有冇得平呀?」我:「我哋淨係有長者優惠咋」佢:「唔係化?就死嘅先有得平」我望望佢,冇出聲。佢再問我:「你不如同老闆講吓學生收平啲呀,我係大學生嚟㗎喎,一係我哋拎學生證過嚟就平啲呀?」你唔講我仲以為你嗰張係咩VIP卡添~我:「唔好意思呀,其實之前都有大學生過嚟問過可唔可以做到優惠之類嘅嘢㗎啦,我哋醫生都係拒絕嘅~我哋暫時都係得長者優惠㗎咋」佢:「未來社會勞動力都係我哋呢啲後生嘅提供㗎喎?老嗰班冇嘢做㗎啦喎?」我:「小姐你冷靜啲先~就係因為老人家已經退咗休冇收入,我哋先會平少少俾佢哋啊。」佢:「我夠冇收入囉?」 但係你手上拎住部最新款嘅蘋果電話,仲有你個袋都係C字頭名牌…如果係你啲朋友送嘅,送得咁闊綽,你唔駛打工都得啦~ 我:「真係唔好意思啦,我哋診所都淨係有長者優惠。」 佢舉起電話影相:「好呀,我叫全校認住你,等全世界都知你睇唔起大學生!」原來唔俾任何優惠就等如睇唔起,而家啲人嘅思路真係好難捉呀~佢再講:「睇唔起大學生呀!你紅硬呀!」我:「我一直都冇講過睇唔起你啊,係你自己走嚟叫我哋平俾你…」佢:「仲要咁扮嘢!」我想翻白眼啊~但係鏡頭在前…我:「小姐,如果你唔係睇醫生嘅,請你離開啦~」佢:「我鍾意幾時走就幾時走!我未影完!影夠我就走!你咪試吓趕我走囉~你因住紅呀!」我:「咁你慢慢」頭先又話我紅硬,而家又話因住紅,咁即係俾唔俾我紅呀?

Read More

【夠鐘食藥】咩咩動物園

唔好睇我而家有五貓一狗就以為我已經係顛峰期。曾經我有更多嘅動物一齊共住,成日都俾人話我屋企係動物園,所以我自己已經唔需要再去咩咩動物園~ 對於加新動物入屋,我係採取幾自由嘅態度的。當新動物入屋時,我會為班『原住民』劃出大大空間,剩返嗰少少空間就係俾『新嚟新豬肉』。頭一星期新丁要困籠先,一嚟俾佢適應環境,二嚟要俾班原住民望真啲聞真啲,大家彼此熟悉吓大家嘅氣味。跟住零食不可缺少~新丁入屋後,正常人都會諗「佢會唔會分薄咗我哋嘅零食㗎?我會唔會冇得食㗎?」,所以我哋要用行動話俾班大帝知,就算多咗個飯碗,大家嘅伙食都只會有多冇少,奴才會更努力去搵食啊!呢點好重要啊,因為每個生命天性都係以食嚟維持生命,如果影響到『食』呢一環,隨時會引發大爆炸! 之後就係到共處啦,好多人應該都會好怕啲貓狗一埋堆就打架,但係我就唔會理嘅,由得佢哋打打撲撲。因為不打不相識,不是冤家不聚頭,大家都肯定係前世有孽積咗落嚟今世先會喺度相遇。只要喺我監察情況下,佢哋係可以自由地隻揪圍毆,唔咬喉嚨死唔去嘅,佢哋好快會自然分出勝負,自己再喺呢頭家度分配出屬於佢哋嘅位置。當然有啲動物性格上本身會比較孤僻焦慮,見到佢唔飲唔食冇咩生氣就要多加留意。 動物就好似人一樣,都會有唔同性格,最緊要係首先多多了解佢啊。

Read More

【夠鐘食藥】我用自己電話打OK嗎?

有日我坐喺登記位度適應緊新公司嘅節奏。 喺人頭湧湧嘅診所內,有位小朋友行埋嚟問我:「姑娘,我可唔可以打電話呀?」我問:「打俾邊個呀?」佢:「我媽咪」我:「好呀,得你自己一個嘅?你媽咪幾號電話呀?我幫你打呀」佢:「媽咪話去買啲嘢…我叫乜乜乜」我翻查登記咗嘅人排版紀錄,搵到電話號碼,於是拎起枱面上嘅有線電話打過去,不過打咗幾次都係冇人聽。我同小朋友講:「你媽咪冇聽電話啊,反正都未到你睇,你不如坐喺度等佢返嚟呀?可能佢而家買緊嘢聽唔到電話」小朋友個樣好失望咁點點頭行返去搵位坐低。 轉個頭診所阿姐走埋嚟同我講:「我哋部電話唔借俾人㗎」我:「但係小朋友嚟喎?搵佢阿媽喎?」阿姐:「都唔借㗎,呢啲你唔駛理㗎,你叫佢自己出去搵咪得囉」我:「佢得自己一個咋喎?」阿姐:「唔駛理㗎,你叫佢出去得㗎啦,有咩事都係佢嘅事咋嘛」我:「佢行到出去又係要搵人借電話,佢仲咁細個嘅邊放心呀?」阿姐:「呢個係佢自己問題啦,我哋啲電話唔俾病人掂㗎,仲有個小朋友點都唔關我哋事㗎」我:「佢都冇掂過電話…」講講吓小朋友又再行埋嚟問:「姑娘,可唔可以幫我打多一次搵媽咪呀?」 阿姐望住我。我望小朋友,再望望阿姐:「我用自己電話打OK嗎?」阿姐面燶燶行開。 新工除咗要適應節奏之外,仲要適應同事,試用期除咗係你試我,亦都係我試你。 祝你搵到志同道合嘅好同事。

Read More

【夠鐘食藥】再肥啲都仲瞓得落呀!

對於管教毛孩,我一定係一個失敗嘅主人。我屋企咁多隻毛毛,冇一隻係會驚我同聽我話…我覺得自己只不過係一個餵食器剷砂機。點解我會咁折墮,雞爸冷眼答我:「因為你縱佢哋」。隱約中我見到雞爸背後係有佛光… 敢問大大,我而家開始撥亂反正會唔會太遲?而家先學人做個惡阿媽又會唔會太突兀?雞爸耍耍手擰擰頭,似乎係睇死我。好!糯米雞,你係第一個,我要挑戰你!撥返你去正軌!於是,我開始同佢進行特訓~以前每晚佢會喺我頭頂瞓覺,霸住晒我個枕頭,瞓瞓吓仲會伸直晒啲手腳趕我個頭走~或者會瞓瞓吓咬我個頭啄我啲頭髮…有時佢自己瞓唔著,就會發晒癲咁通屋跑,每次個check point都會係我肚腩…我每晚都瞓得好差~就係因為我『縱容』佢哋。所以而家除咗b婆可以同我同床瞓之外,其他貓一律要出返廳瞓!頭幾日佢哋會喺門外嗌生嗌死嗌到就斷氣咁…我咬緊牙關同自己講:「唔好理!當聽唔到~唔好心軟呀!」。於是佢哋嗌咗幾日之後,就知道嗌嚟都冇用,不如早啲瞓等天光食早餐好過。呢次,我成功調教咗佢哋啦!我終於發現自己張四尺半床原來係咁大,再肥啲都仲瞓得落呀! 而家張床喺我瞓覺時間嗰陣,終於完全屬於我同b婆~再唔駛好似以前咁四肢扭曲搞到腰痛腿麻,或者瞓瞓吓突然遇襲見紅。我而家好後悔點解我唔早十年的起心肝啦!

Read More

【夠鐘食藥】你瞓緊覺又點返工呀?

有日一位先生嚟到診所。 佢緩慢地行埋嚟,望望我,再同我講:「呢一刻開始唔好講嘢,你聽晒我講先」我望住佢:「嗯」佢:「我噚晚喺床度瞓瞓吓扭到條腰」 瞓覺都整親呀?你係咪瞓到成個驅魔人咁呀?做咩咁百厭呀? 我冇出聲,表情亦冇露出半點驚訝,繼續望住佢。 佢繼續講:「我一整親即刻望鐘,見到個時間係凌晨2點36分」我點頭。佢:「我嗰刻有衝動打俾我老闆,不過最後我冇,因為我知夜啦」入正題未呀?爽快啲啦,我好悶呀。我:「跟住呢?」佢:「你唔好講嘢住,聽埋我講先得唔得呀?」妖。佢繼續講:「我就係想問我可唔可以睇醫生呀?」可以,你根本係要睇醫生啦。我:「可以呀,我同你登記呀,你俾身分證明文件我呀」佢:「我仲要寫份嘢證明我係頭先講嗰個時間同地點整親喎」我:「你意思係要醫生證明你係凌晨兩點幾喺床上整親條腰?」佢:「凌晨2點36分,瞓覺整親」我:「呢個應該有難度,你寫去邊㗎?」佢:「公司,工傷呀」即係你份工係負責瞓覺嗎?我:「啊!你喺公司休息緊嗰陣整親?」佢:「邊有人凌晨仲返工㗎?返工又點會瞓呀?你冇常識定係個腦有事?」先生,你真係話得我好啱。我:「咁你收咗工仲工咩嘢傷呀?收咗工就冇工傷㗎啦喎?」佢:「…係㗎咩?咁…我嗰刻返緊工得唔得呀?」我:「邊有人凌晨仲返工㗎?你瞓緊覺又點返工呀?」YES!仲唔係我威一轉?佢:「我嗰刻諗緊我老闆同公司嘢得唔得呀?」我:「唔係咁計嘅,你收咗工,唔係返工時間嘅照計就唔係計工傷,頂多你可以問自己嘅私人保險。」佢:「…係㗎咩?」我:「係呀~唔信你返去問吓你老闆」佢黯然離開。YES!我終於成功KO一個!

Read More

【夠鐘食藥】又開始爆肝的日子

呢個月我又開始爆肝的日子了~ 因為我學人做奶媽呀!我托養緊一隻得幾日大嘅貓BB,每個幾兩個鐘就要餵一次奶,佢一嗌就要塞飽佢,不分晝夜咁食呀食呀食呀。照顧咁細隻貓BB我都係第一次,原先我以為家中已為人母嗰兩隻大貓會有啲母愛,點知…我一拎到返屋企,meme同米米都只係聞一聞,然後俾個『你自己接返嚟嘅就自己搞掂佢,又不是我親生的!』嘅眼神我…自從嗰一聞,佢哋都冇再理過隻貓BB。我嘅如意算盤打唔響了!咁既然接得返嚟,就唔可以輕易放棄。雖然呢隻貓BB好大機會係因為唔多識飲奶又偏細碼而被貓媽遺棄,但係我信每個小生命都係有生存嘅動力同希望。只係喺野外正在流浪嘅貓媽好難同時兼顧到~ 既然呢隻得76g嘅小生命嚟到我屋企,我一定會出盡力去養大佢,令佢變得肥肥白白,再幫佢搵個好家庭好奴才。所以呢期我真係好忙,連街都唔出得,就算要出都只可以喺半個鐘內返到屋企…每次餵奶前先幫佢放屎放尿,再慢慢用奶樽餵奶,見佢用奶樽飲得唔太好,又要同針筒補奶,之後同佢掃風,洗樽。即使係凌晨都要咁做,每個幾兩個鐘就重覆一次,就算幾眼瞓都好,都一定唔可以邊餵邊瞓…唔怪得朋友講『湊一次貓b老十年』,是真的!真係可一不可再呀,清咗呢罐奶粉之後我唔可以再買奶粉返嚟擺啦~只要冇奶粉自然唔會再豬衝去湊貓BB! 熱浪,請你快快長大,我好眼瞓。

Read More

【夠鐘食藥】我哋以前邊有呢啲嘢㗎

有日一位叔叔嚟到診所。 佢問我:「阿姐,呢度係咪咩都睇呀?」阿叔,你冇嘢呀?你應該去眼科喎。我:「我哋普通科診所~如果呢度醫生都幫你唔到嘅,就會轉介你去專科,你想睇啲咩呀?」佢:「眼呀」原來真係眼有事啊你,對唔住,我頭先怪錯咗你啦~我:「我同你登記先啦,你俾身分證我呀」佢:「要身分證㗎咩?」我:「要呀,睇醫生就要身分證㗎啦」佢:「乜而家咁㗎?以前都冇呢啲嘢㗎」係呀,個世界變咗好多啦,而家好多嘢都唔同晒啦,周圍都係車,個個都有智能電話,你由咩年代穿越過嚟㗎?講俾阿姐知,阿姐帶你去檢查呀~我:「嗯,咁你有冇帶呀?有就俾我啦」佢:「冇呀」我:「如果你要病假紙收據或者轉介信嘅話,我哋都要身分證做登記㗎~」佢:「我想睇對眼咋」我知,如果你可以做到對眼唔屬於你嘅身體一部份的話,咁應該可以唔駛身分證嘅…我:「咁你要唔要病假紙收據呀?」佢:「要呀」我:「或者你返去拎身分證先啦,醫生都未返~你可以拎完再返嚟登記呀」佢:「我喺好遠嘅地方嚟㗎,我唔屬於呢度㗎」 嗱!仲唔俾我陰到你!你肯定係外星人或者穿越過嚟嘅古代人! 我:「咁一係你去返屬於你嘅地方睇醫生啦」 佢:「即係你唔睇我呀?」我:「如果你要病假紙收據嘅,我哋一定要有身分證明文件登記呀,或者你睇咗先,之後拎返證件過嚟,我再俾返病假紙收據你都得。」佢:「我返咗去就再過唔到嚟㗎啦」喂?999呀?呢度有個非法入境呀。我:「咁…你都係去返屬於你嘅地方睇醫生啦,同埋呢~你咁大個人出街出遠門一定要帶身分證㗎,如果唔係有警察查你嘅時候就好麻煩㗎啦。」佢:「我哋以前邊有呢啲嘢㗎,係你哋呢度寧舍多花臣,而家呢個年代都唔知咩年代嚟!」 佢離開了。我頭先同緊咩人講嘢呀?

Read More

【夠鐘食藥】或者有日我哋可以再相遇

熱浪回貓星一星期了,你快樂嗎? 尚記得十三天前從別人手中接你回家,十三天後把你交到別人手中,那感覺很不真實。嗰晚同你插喉灌食後,睇住你安穩舒服的睡覺,我同雞爸快快手落樓食晚飯。回來後,你走了…我抱起你時,身體仍暖,我以為係你瞓得太冧…『小朋友?熱浪?起身啊?』你再冇回應,身體呼吸再沒起伏。雞爸把你放在小盒子內,我坐在一旁,突然聽到你在門口那邊響亮的『喵~』了一聲。我問雞爸『係咪熱浪嗌呀?係咪未死呀佢?』,雞爸再三檢查後擰擰頭。大概係你同我講再見了…熱浪,你好乖啊。老人家成日都講乖嘅有靈性嘅寵物係會唔願意俾主人見到佢死,所以佢哋會揀離家出走或者趁主人唔喺屋企時死… 你走嗰晚,我刪除電話內嘅熱浪夠鐘食奶鬧鐘提示,嗰每隔三小時不分晝夜的提示,係你喺呢頭家出現過最後的證明。家中已沒有你的叫聲,感覺好空洞,原來『多一隻唔多,少一隻好覺』係咁解。你唔舒服睇醫生時,醫生已提醒我奶b係好易走好脆弱。雖然我已做好心理準備,但同時我亦希望有奇蹟出現,就好似糯米雞咁,我希望可以用我嘅努力用我嘅心機補回你一切嘅不可能不完全。 不過現實並冇咁多奇蹟,只有現實嘅生老病死…你嘅離開固然難受,但總要面對總要承認現實中並冇十全十美一帆風順。或者有日我哋可以再相遇,我嘅熱浪仔仔,媽媽會再同你見面的,再見。

Read More

【夠鐘食藥】我賣咗間屋都唔會俾你哋

有日一位阿姨帶住婆婆嚟到診所。阿姨:「姑娘,我阿媽想入老人院,佢要做呢啲檢查呀」我:「好呀,麻煩你俾婆婆嘅身分證明文件我呀,我同佢登記先」企喺身旁嘅婆婆問:「係咪真係要去嗰度住呀?」阿姨:「媽,乖啦,我會成日過嚟睇你㗎」婆婆:「我唔想去生保地方呀,生保床我唔慣呀」 阿姨:「唔好咁啦媽,我哋之前傾好咗㗎嘛?我會成日過嚟睇你㗎啦」婆婆:「我自己行得走得都唔駛你照顧,我自己喺屋企都冇問題呀」阿姨:「屋企地方細都冇位俾你啦」婆婆:「我阻得幾多地方呀?老人院有幾大地方俾我呀?咪又係一個床位」阿姨:「嗰度有好多人陪你呀嘛,你去到唔怕悶呀」婆婆:「我要嗰啲人陪我做咩呀?我唔要嗰啲人呀,我都唔識佢哋」阿姨:「唔好再講啦,話咗去㗎嘛,屋企真係冇位啦。阿孫都大啦,佢都要自己一間房㗎」婆婆:「我真係唔想去呀」 阿姨問我:「姑娘,登記完呀?可唔可以快快趣同佢做咗先呀?」我:「但係你哋好似未傾掂啊?不如傾好咗先啦」阿姨:「傾好咗㗎啦,唔駛理佢㗎,老人家係咁麻煩」我:「做檢查唔係望兩望就得㗎,都要婆婆配合嘅,如果佢同意嘅就當然冇問題,但係佢唔同意我哋都唔可以迫佢做檢查嘅」阿姨:「幫吓手啦,責住佢嚟做又好,綁住佢嚟做又好,今日點都要做㗎啦,佢唔走我哋邊有地方住呀」婆婆一直都喺你身邊聽住你講嘢…阿姨:「姑娘拍硬檔呀」婆婆出聲了:「間屋我嘅,伯爺公走咗,你就趕埋我走。你返嚟住嗰時話要照顧我,我至俾你哋一家幾口嚟住…」阿姨:「阿孫大啦嘛,老人院有咩唔好呀?又多人陪你,你又唔駛咁悶。」 婆婆指住阿姨個頭:「你哋要住大地方就自己扯,我賣咗間屋都唔會俾你哋!」 講完之後忿然離開診所。留低阿姨企咗喺度,佢望望我:「哎,啲老人家真係寧舍煩,我遲啲再同佢過嚟呀」自此,我就再冇見過佢哋。

Read More

隱私權保護政策

請細閱並示意接受以下私隱政策及免責聲明,按下「接受」表示你已同意並願意接受香港藥房格價網站內之私隱政策及免責聲明。