有日診所好多人～ 有位女士入到嚟診所望望～之後行埋嚟問我：「睇醫生要等幾耐呀？」我：「而家登記嘅等十六個」佢：「但係你呢度冇位坐啦喎」我：「你可以登記完之後出去行吓或者返屋企坐都得，你預返一陣十二點半左右返嚟應該差唔多～」佢：「我大肚㗎喎」咦，你唔講我都唔知添～我：「哦？係呀？咁更加唔好留喺診所等啦～你差唔多時間再返嚟啦」佢：「我唔騰上騰落啦」我：「咁…而家呢度好多人喎？」佢：「你可唔可以體恤吓大肚呀？大肚好辛苦㗎」 我可以點做呢？立即幫你催生，等你即刻輕鬆又自在？ 我：「小姐，我有咩可以幫到你呀？」 佢：「你幫到幾多咪幾多囉，始終我大住個肚，好多嘢都唔方便開聲嘛」我：「即係要我幫你啲咩呢？我頭先咪建議咗你返屋企坐吓先，或者出去行吓先囉？」佢：「你唔俾我睇先唔緊要，好閒㗎啫，今日你咁對人，第日你自己都有機會受返咁解啫。所以我哋呢啲大住個肚嘅就會明大肚有幾辛苦，講偉大就真係唔駛講啦。你阿媽呀！」無啦啦做咩講我阿媽呀！我媽你呀！佢繼續講：「佢咪又係大住個肚，陀得好辛苦先生到你出嚟！你唔俾我睇先唔緊要，好閒㗎咋。」係好閒嘅你又係咁提係咁講？我：「咁我而家同你登記，你十二點半左右再返嚟啦」佢：「我睇唔睇你哋都好閒㗎咋，反正你做女人做姑娘都做到咁，入面個醫生有幾好都冇用啦，同我講聲俾你老細知啦喎，我嚟過㗎，不過係個姑娘唔體恤我哋呢啲大肚嘅啫」 同我老闆講做咩呀？唔通！你係老闆娘？

大家成日話糯米雞嗲，我先係嚇一跳，然後得啖笑。 我對『嗲』嘅定義可能比較唔同，糯米雞喺我眼中係一個『煩』字… 舉個例：半夜三更佢想上床瞓覺時，正路佢識行識跳咪自己跳上床囉。但係佢係唔會，佢會喺床邊先嗌一輪，再等我望吓佢，之後再嗌一輪，最近我都稱佢呢類行為做『雞啼』。到佢嗌飽啦，佢就會自己跳上嚟旁觀我一輪，再跳上枕頭，再望我一輪。我有時都會忍唔住開口問佢：「你前世係變態佬嗎？」。到望完啦，佢就會出手撥吓我隻眼呀鼻呀頭髮等等，總之佢撥到睡意攻心，佢就會用個死人大屎忽隊埋嚟一齊瞓。嗲嗎？再舉個例：我坐喺梳化睇電視時，佢喺房見到後會立即衝埋嚟，衝埋嚟做咩呀？望望我，再跳上電視前成尊佛咁坐喺度。衰仔，你食玻璃大的嗎？定係你變態到要我眼中只能望住你…真係嗲？ 嗲同煩，其實都係一線之差。有冇好心人可以幫我傳遞訊息俾糯米雞知道『你做多咗呀！OVER晒啦！』，你唔好以為你成身毛，我就會覺得你特別可愛啊。米米夠多毛囉～佢晚晚瞓覺想同我一齊瞓時，都會靜靜哋咁行埋嚟，好貼心咁怕整親我驚動我，慢慢慢慢再慢慢咁放輕動作瞓喺我隔離。邊似得糯米雞咁晚晚雞啼，好似喺度大嗌『朕要休息啦！人嚟！侍寢！』 其實糯米雞係咪壞咗呀？佢係咪要返工廠維修呀？間工廠喺邊呀？有冇人話到俾我知…

有日一位先生嚟到診所。 佢好瀟灑咁挨住登記處枱面，撥撥佢嘅頭髮問我：「清明係咪唔開呀？」我：「公眾假期休息，係呀，唔開」佢：「咁我點算？」過主囉可以點呀？我：「而家先二月咋喎？清明成四月喎？」佢又撥頭髮：「要準備㗎嘛」我：「哦～我哋清明唔開啊」佢：「我知呀，你頭先講咗啦，我係問你咁我點算嘛」我：「或者你去第二間問吓啦，我哋嗰日全日唔開㗎啦」佢喺胸前小袋掏出一張卡：「咁都唔開呀？」挑！醫療卡咋嘛？我仲以為你拎張任我哋碌嘅信用卡出嚟添～我：「醫療卡呢…你不如打上去客戶服務度問吓清明有邊間診所開啊～不過佢哋應該都冇咁早知嘅，你試吓問先啦」佢：「我平時喺度睇開嘅喎？」你買起醫生先啦，唔爭在買埋間診所啦～咁你想幾時開幾時睇都由你話事㗎啦～ 我：「真係唔好意思呀先生～因為嗰日我哋真係唔開啊」佢又撥佢個油頭啦：「睇開嘅都冇感情㗎咩？」 冇呀！我同你一啲感情都冇呀！醫生同你有冇感情我就唔知，你不如試吓自己問佢？ 我：「我哋診所嘅應診時間由醫生定嘅～定咗公眾假期休息都已經係好耐嘅事嚟㗎啦」佢：「等錢駛嗰時就開門做生意賺我哋錢，而家搵夠就閂門不問不聞咁啫，係咪？」我：「先生，我諗你誤會啦，我哋咁耐以嚟都係公眾假期放假㗎」佢：「OK啦，你哋冇感情我都可以好絕情，我轉會囉」 佢撥撥頭髮離開診所。邊個好人家收留你嘅真係大恩大德呀！辛苦晒！

我家除咗糯米肥雞係收養嘅之外，米米都係收養返嚟嘅。 米米當初返到嚟惡到不得之了！掂吓手仔都要咬我嘅，邊個喺佢面前行過，不論人定貓定狗，都要食佢嘅貓抓拳，佢個眼神永遠都係帶住一股怨氣。呢個情況維持咗以年計算嘅日子… 不過我好阿Q咁同自己講『呢個可能係佢嘅性格，好型呀喂』。到唔知邊一年嘅冬天，我喺床上享受緊被窩嘅暖笠笠，佢跳上床頭望望我。我問佢：「做咩呀？想入被竇呀？入嚟啦，好凍呀」佢好慢好慢咁行落嚟枕頭，思疑咗一陣就捐咗入被竇了。嗰晚我前所未有同佢共處喺一個小空間，亦前所未有咁近…多謝米米你願意接受我。之後嘅日子，我不停嘗試同佢建立更好嘅關係，我開始握住佢最憎俾人摸嘅手，餵佢食零食，日子有功。佢已經唔會再咬我抓我，佢而家會喺我面前反肚俾我摸，每朝早都會用個頭頂頂我嗌醒我，晚晚會痴住我背脊瞓… 證明冰山真係可以擘開，米米由一開始攻擊力特強，而家變成一隻任我摸嘅小綿羊，仲非常識得嗲人同鍾意痴住人。呢啲都係需要時間培養出嚟，米米，多謝你揀咗我，揀咗呢個家～

有位女士嚟到診所～ 佢問我：「姑娘呀？冇胃口食嘢可以點算呀？」 我：「睇個醫生先啦～因為都要知道詳細情況係點，你冇胃口食嘢呀？」 佢：「我個仔呀」 我：「幾歲呀？」 佢：「一歲咋」 我：「咁細個好少話會冇胃口㗎喎，帶佢嚟俾醫生望望呀」 佢：「唔方便呀」 小朋友睇醫生都會有唔方便嘅時候？我以為得女人經期嚟時先唔方便啫～ 我：「但係冇胃口呢啲…你就咁講，醫生都唔知咩事㗎喎，有可能要檢查㗎」…

早幾日夜媽媽我收到個PM… 對方問我『你搵咁多錢有冇做善事積陰德？幫吓有需要幫嘅人？』 我收到當堂嚇一跳，夜媽媽都竟然有人咁關心我，咁有大愛…半夜三更有覺唔瞓都仲要PM我，係咪我令你失眠呀？唔好諗咁多無謂嘢啦～ 錢搵返嚟嘅梗係用晒佢駛晒佢揈晒佢，至於我點揈真係關仁隱士咩。做善事又唔係咩大件事，駛唔駛拎個喇叭或者專登出個POST講『我捐咗幾多幾多去邊度』，你自己講完唔面紅，我都面紅啦，咁樣衰嘅嘢都做得出？唔通你年年打去保良局捐幾百留你全名，再拎住電話趴喺電視前等自己大名出現，之後即刻影相擺FACEBOOK？ 咁做善事為咩呀？你志在拎啲錢出嚟賺取別人掌聲，出發點唔係錯晒咩？學食神咁講『一字記之曰：心』，你有心嘅就算你拎唔起一筆錢出嚟捐俾人，你用行動用體力去幫人，都可以係做善事㗎。 善心唔係成日俾你班市懀嘅人日日掛喺口邊講，講到CHEAP晒㗎～人善則心善，行善可以有好多方法，亦可以好低調咁做。 坦白講呀，善事我真係冇能力做呀，我捨棄唔到熱浪。我有錢都會食晒佢，而家仲要多隻糯米肥雞嚟同我爭食。善事，留俾你做啦。陰德，你積多啲啦～你唔好嚟搶我啲嘢食就得啦，咁我已經覺得你係一個大善人。我會日日祝福你早日Level up做善人NO.1。阿門。

有日一位媽媽拖住一位小妹妹嚟到診所。 佢行埋嚟問我：「姑娘，醫生返咗未呀？」我：「未呀，醫生佢應該廿分鐘後返，而家登記嘅排第十一個」佢：「咁十點前睇唔睇到呀？」我望望鐘：「應該唔得啦，當一個睇五分鐘都應該十點半啦」佢：「我哋趕時間啊」趕時間搭火箭啊，我哋呢度係俾人睇醫生嘅，唔係俾人趕時間啊～你嚟錯地方啦。我：「咁或者你去第二間睇吓有冇醫生返咗啦」佢：「我公司卡喺度用㗎嘛，你唔認得我啦？」經過今次應該有機會認得～我：「哦？係呀？咁你要嚟嘅都要登記啊，唔舒服嘅唔好四圍走啦」呢個時候小妹妹拉拉媽媽衫：「媽媽，我想返學呀…」佢同小妹妹講：「今日我哋唔返學呀，我哋去影相相呀，等媽媽請埋假就行得㗎啦」佢同我講：「我個女今日要去試鏡呀，可唔可以行個方便呀？」門口嗰邊好方便。我：「呢度個個都係咁等緊嘅～你要睇醫生就要等啊」佢：「你當我一開門就嚟咗得唔得呀？呀，唔係！當我未開門已經嚟到呀！我個女做唔做得成明星都靠你啦！」小妹妹講：「媽媽，我想返學呀」我：「睇嚟妹妹佢想返學多過做明星喎」佢：「佢咁細邊知邊啲對佢好呀，佢唔知㗎啦」我：「點都好，睇醫生都要排隊嘅」佢：「我真係趕住去試鏡喎！」我：「呢個唔係一個打尖睇醫生嘅理由呀」佢發爛渣：「咁我急症嚟㗎嘛！」我：「不如你自己問吓坐喺度嘅人讓唔讓俾你睇先？」 佢：「要問都唔係我問啦！唔睇呀！反正我做咗星媽之後都唔得閒返工㗎啦！唔睇呀！」 佢嬲爆爆拖住小妹妹走～ 我都好贊成你劈你老細炮！

自從糯米肥雞用咗人類BB尿片之後，爆屎機會少咗，甩片機會少咗。對比下淘寶用嘅寵物尿片，質素的確好鬼差，不過嗰時我冇得揀冇得嫌棄佢，唯有焗住用。以前每次佢爆屎得嚟又唔會整到一屋屎，我都覺得自己係同死神玩緊俄羅斯輪盤咁，每次都會覺得係賭緊運，總會覺得運氣都會有用盡嘅一日。 而家用咗人類BB尿片，吸濕能力好咗，包覆範圍更好，又有顯濕線顯示係時候要換片，不過就算佢真係有尿滲咗出嚟，糯米肥雞嘅小雞雞周邊毛毛都仍然好乾爽，我仲試過好似人哋賣尿片廣告咁用手摸落返濕咗嘅尿片度，我隻手都仍然係乾爽冇水㗎！之後就會不禁讚嘆：「啊！真係人類史上最偉大嘅發明啊！」 至於你問點解交完尿都仲會有尿滲出嚟，因為只要佢一有少少尿喺膀胱入面，佢一跑一郁啲尿就會喺膀胱內動蕩～蕩吓蕩吓就捐咗出嚟。就好似頭文字D拓海送豆腐咁，揸車一CHOK啲，入彎入得唔靚仔，啲豆腐同車入面嗰杯水咪BYEBYE囉～證明糯米肥雞天生係一個粗心大意得嚟又好濕滑嘅司機。至於屎啦喎…都係繼續咁爆啦～都係好爛好濕啦，不過塊尿片質素高咗咁多，佢個屁股都冇咁受罪。佢已經好耐冇脫肛了，我亦都好耐冇再見到佢屁股紅紅。以前嘅運氣好似返晒嚟啦！ 以前有幾難捱難過都開始唔多記得啦～我哋都一齊共同進步同成長了！

有日一位小姐嚟到診所～ 佢：「姑娘我要去日本呀」哦？係呀？玩得開心啲呀。我：「有咩幫到你呢？」佢：「我想執幾劑平安藥呀」我：「你喺度睇過未㗎？」佢：「我未，我小朋友睇過」我：「係你想配藥定你小朋友想配？」佢：「有分別㗎咩？」我：「梗係有啦，大人同小朋友食嘅份量都唔同～」佢：「小朋友配啦，有啲咩藥㗎？」我：「你有冇覆診卡號碼或者電話號碼俾我CHECK咗先？」佢：「XXXX-XXXX」我拎出排版後：「小朋友而家就三個月大，都係得退燒收鼻水抗敏感嘅俾到你啊」佢：「止屙呢？」我：「我哋冇咁細個嘅止屙藥啊」佢：「咁佢喺日本食完嘢屙點算呀？」我：「多數啲媽媽都會帶定香港啲樽裝水去旅行，你可以試吓，咁會穩陣啲」佢：「關咩水事呀？係屙嘅一去到日本境內索啖氣都屙啦」 你對於『水土不服』真有見解！一踏入人哋土地就即屙啦嘛？ 我：「因為小朋友得兩個幾月大，可以食嘅藥真係唔多㗎」 佢：「咁我配平安藥啦，我多啲款啦卦？」我：「你嗰啲絕對唔可以俾小朋友食㗎，你嘅份量同佢爭好遠㗎！」佢：「我原先食一粒，佢奶一兩啖得唔得呀又？」奶你個頭能醫百病呀！我：「成人嘅藥係唔可以咁樣俾BB食…」佢：「佢屙嘅話我仲點周圍去呀？」我：「你拎定啲樽裝水去啦，都係開奶飲啫，佢都冇得食魚生㗎啦」佢：「都話索啖空氣就屙囉！你都唔掂嘅，我去問第二個好過啦」 醫生，有冇啲食完可以唔呼吸嘅藥呀？

已經十個月大嘅糯米雞。望住佢大到而家咁漲卜卜，我真係好安慰。因為每個生命都唔係必然咁完美… 以前我搵唔到同樣有曼島貓症候群嘅貓，可能香港本身少繁殖呢種貓。有晚我失眠無意間CLICK入個封咗塵好耐嘅IG輸入『Manx syndrome』，好多好多好多受同樣問題困擾嘅貓仔出現了。 於是我隔幾日就會去望一次，最近我望到有隻好細好細嘅黑白貓仔，一樣有呢個病，佢對後腿比起糯米雞初初返嚟嗰時更加嚴重，我唔識形容係點嘅樣，但係我相信每一個人睇到都會覺得好心痛。隻黑白貓顯然唔知咩嘢叫病，佢仍然好活潑咁拖住後腿不停咁走動～鏡頭下嘅佢，其實真係好有生命力。之後，我再見到IG上有另一隻同樣有呢個病嘅病，佢只有四日大…唔知點解佢失去咗貓媽，去到兩位照顧者手上。到第五日，佢眼睛都未曾睜大望過呢個世界嘅色彩就靜靜離開…雖然小生命離開係一件唔值得開心嘅事，但係我反而有另一個諗法：可能佢投胎前拎漏咗嘢，而家佢要返去拎返～ 我都相信糯米雞佢都係拎漏嘢，仲可能唔止一樣，除咗條尾條完整嘅骨，應該仲拎漏咗個腦…如果唔係點會咁癲呀？媽媽希望你呢世都唔見咗個腦，唔記得亦唔知點樣返去攞返屬於你嘅嘢，因為你冇咗嘅，我可以幫你填補～我哋好樂意繼續照顧同包容冇腦嘅你。

電話響起～ 我：「你好，乜乜診所」對方係一位女士：「喂？診所呀？」我：「係～有咩幫到你？」佢：「我想攞啲藥呀」我：「係咪配藥呀？你覆診卡或者電話號碼幾號？」佢：「我噚日嚟過㗎」噚日百幾人嚟過添呀～我：「咁你覆診卡號碼幾多號呀？」佢：「噚日先嚟完，咁快就唔記得啦你！」我：「小姐，我哋一日睇百幾個症，記錯咗就唔好啦，核對清楚對你都有保障呀」佢：「XXXXX！」我：「你想配啲咩藥呀？」佢：「塞PATPAT嗰隻退燒呀」我望望排版：「噚日俾咗退燒藥水啦喎？」佢：「係呀，我知呀，唔夠勁呀！」我：「小朋友食完唔退燒咩？」佢：「唔係呀，退咗啦」我：「退咗燒仲做咩要退燒塞呀？」佢：「我覺得唔夠呀」 有種發燒叫你媽覺得你發燒。點唔夠法呀？你想佢退到變雪條咁凍呀？啋！ 我：「食咗退燒藥退到燒就唔需要再塞藥㗎啦，佢冇發燒就OK㗎啦」 佢：「但係我摸佢額頭仲暖暖哋㗎喎」係？咁神奇？你摸吓自己嗰個呀，睇吓係咪又暖暖哋呀？我：「咁佢有體溫係正常…你有冇探熱針或者機呀？」佢：「有呀，探咗啦！」我：「幾多度呀？」佢：「36.1囉！」我：「咪即係冇燒囉，佢冇再燒嘅就唔需要再食退燒藥㗎啦，塞藥更加唔駛，冇超過37.5就可以唔駛食退燒㗎啦～」佢：「但係我摸到佢暖暖哋喎」我：「小姐，冇體溫嗰啲呢…就好大鑊㗎啦。正常人係有體溫㗎～」佢：「我冇㗎喎」咁你唔係人囉。佢繼續講：「真係唔攞得呀？」我：「唔得呀，37.5以上先係發燒呀～」 嘟。冇體溫嗰個收咗我線…

上星期我將糯米肥雞安置咗喺寵物酒店渡假兩日～ 有呢個安排前，我問咗好多間寵物酒店有冇店員識人手放尿，接唔接受到照唔照顧到大便失禁嘅貓。有好多間都直接回覆『唔收』，明嘅～大便失禁之餘仲要唔係一粒粒，係一PATPAT，又真係做多好多功夫。我亦有搵過寵物保母，特別向自稱做過獸醫助護嘅埋手，不過有幾個都係『我唔識放』… 反而而家呢間喺我詢問期間，佢雖然表明佢唔識放尿，但係佢主動叫我帶糯米肥雞過去俾佢試吓，佢願意學亦願意照顧大便失禁嘅貓。嗰一刻我覺得自己見到曙光呀！到當日我湊咗糯米肥雞過去，雞爸示範完點放尿，店員用咗四十分鐘就學識了！仲要唔止一個人學識，係兩個人都學識～ 我突然覺得之前問過嗰啲做過獸醫助護嘅寵物保母都可以失業了。我爭啲就係現場撒花歡呼！安置好雞，我一離開寵物酒店就即刻開CAM睇佢做緊咩…一睇，我就睇足兩日了。原先我安排雞去酒店，係想試吓佢仲有冇分離焦慮症，兼睇吓自己仲有冇機會去旅行～點知到最後佢咩事都冇，反而眾人都認為我先係分離焦慮症患者。 自從呢兩日之後，我覺得我已經習慣咗糯米肥雞日日喺屋企嘈鬼住晒，朝朝用屁股坐住我個頭企圖臭醒我。冇咗佢喺屋企，我真係好唔慣… 以前成日聽人講糯米雞冇咗我唔得，而家係我冇咗糯米雞唔得啊。佢已經入侵晒我嘅生活了。

有日一位女士入到嚟診所。 佢行埋嚟登記處：「你可唔可以解釋吓我而家係咩情況呀？去到邊個stage？」從你個外表睇，你而家應該係中年階段，正準備步入老年…我：「請問有咩事呀小姐？」佢掉包藥上枱：「我噚日先嚟睇過，到而家一啲咳都冇止到，仲係咁咳」 係？你講咗咁多句，都冇咳過一聲啊，肯定係你見到我就藥都唔駛食～嚟，姐姐俾張相你返去日日對住呀。 我望望啲藥：「你…食咗一次藥咋？」 佢：「我食過一次覺得冇咩效，都仲係咳嘅！」我：「醫生開咗三日藥俾你，你食一次唔會即刻見效啦～」佢：「你開三日藥唔通我就要食足三日咩？」咁快好返嘅，嗰啲係仙丹啊姑姑！我：「你不如食埋啲藥先～如果真係都仲未好先再過嚟啦」佢：「我而家去到邊個stage呀？你唔識答唔緊要，搵個識答嘅嚟同我講！你唔識答都同我換藥呀！啲藥唔得先冇效呀！」我：「…你食得一次，你份藥醫生都跟足你嘅病情嚟開～氣管藥有，咳藥有，收鼻水都有～你食埋先啦」佢：「我唔駛要咁多藥，我要一粒得㗎啦，你照收我咁多日錢我ok㗎，錢我真係唔care。」如果我有『含笑半步釘』，我一定讓俾你…我：「我嘗試吓幫你問醫生有冇得換藥啦，都十有九係冇得換㗎啦，因為你真係食得嗰一次…」 問完醫生，醫生加多粒維他命俾佢…我：「咁…醫生加咗藥俾你～你再試吓有冇好啲啦」幾日後，小姐再嚟，佢拎住當日加嘅維他命藥袋嚟：「呢個好呀！我淨係食呢隻都已經冇咳啦！我就係要呢隻！我淨係嚟配呢隻擺定喺度得啦！」 維他命好嘢…

成日聽到有人埋怨領養程序複雜，重重難關，有部份人過唔到關就會放養領養，直接到寵物店或上網購買算了。 我都曾經幫貓貓搵過屋企，過程中的確係會比較嚴，可以話係精挑細選。至少我要感受到對方真係有心養一生一世不離不棄。 點感受？首先屋企要有窗網，連氣窗都必須要裝上窗網！ 其次就喺對話中睇吓佢點解想養，萬一貓第時病咗有冇能力同佢睇醫生。我真係試過有人答我『邊有咁易病呀？有先算啦』，從對話中我都會好主觀咁感受對方有冇誠意有冇責任心。我明對方都會覺得我好煩，但係希望你明白我唔係俾一件商品一件死物你，我交託俾你嘅係活生生有感受有感情會病曉痛嘅動物。我希望你從我手上接走佢，可以令佢一世幸福，而唔係隨便射個波俾人，有人接手就算。如果是是但但交隻貓俾人，我點知對方係咪變態，係咪虐貓狂。唔好同我講呢個世界邊有咁多變態！呢個世界就係有咁多！ 義工唔係食飽飯冇屎屙，亦唔係得閒到專登想留難你，我哋都想暫託嘅動物有家，我哋亦只係想要一份『信心』，而呢份『信心』你問我點俾出嚟？我只可以話人夾人緣。如果一兩次領養失敗，就驅使你直接去買貓，咁都冇辦法，呢個係你選擇。 每出一隻動物，每幫一隻動物搵一個家，我哋都需要左度右度思前想後，每一次我哋都真心希望祈盼呢次係幸福嘅配對。我哋只想笑住送佢到新家，唔想日後有機會喊住接收返佢…

有日有位先生嚟到～ 佢行埋嚟問我：「姑娘，點生貝多芬呀？」 首先你要有個子宮，然後去搵上帝申請俾貝多芬去你度…不過貝多芬都走咗咁多年，可能投咗好多轉胎啦喎。 我：「唔好意思，先生～我唔係好明你問咩…」 佢：「我想要貝多芬呀」你不如去HMV望吓呀？圖書館呀？我：「貝多芬死咗好耐啦喎…」佢：「咩呀？咩嘢死咗呀？你知唔知我講咩㗎？」我：「音樂家嘛？彈琴嗰位嗎？」佢：「你都痴線，嗰個關我咩事？」咁你又係咁貝前貝後？我：「咁你講緊啲咩呀…」佢：「令人開心嗰啲呀！」安多酚呀聰明！ 我：「哦～你講嗰啲係安多酚…唔係貝多芬啊」佢：「我頭先邊有講貝多芬啫，一直都講緊貝多芬」嗱！你又講啦！我都冇佢咁好氣：「安多酚做運動都會有㗎啦」佢：「咁易？」我：「你係咪睇醫生㗎？係嘅我同你登記啦～」佢：「唔係呀，我行過見到突然有間診所棟咗喺度咪入嚟望吓」好神奇喎，成間診所會突然棟咗喺度，咁你即係入嚟運桔啦。我冇出聲，低頭做自己嘢。佢繼續問：「咁我做咩運動先有貝多芬呀？」貝你屎忽。我：「係安多酚啊，你做帶氧運動都得㗎啦，跑吓步都得」佢：「咁就會好開心？」我：「有幫助嘅～」佢：「跑幾下會有幾多個貝多芬生出嚟呀？」夠啦～～我唔想幻想你下體有無限個貝多芬出世呀～佢：「姑娘？做咩唔答我呀？」我：「如果你有咩問題不如入去問醫生呀？我同你登記呀，我答唔到你咁多嘢～」佢：「幾多個貝多芬都答唔到㗎咩？」我：「嗯，有咩問醫生啦，醫生先係專業㗎嘛」佢：「哦」佢終於離開了。

『你屋企係擠迫戶』，豬媽成日都咁講嘅，因為喺佢眼中我屋企多主子多雜物卦。 以前我嘅理想屋企係一開門返到屋企就有好多動物包圍住我，個個爭住俾我摸。而家我收皮了，理想同現實真係爭好遠～ 多動物等如收工後繼續好多清潔工作要做，好多伙食費要負擔。喺大家都健健康康時可能都覺得比較輕鬆，但到老年或病時就會吃力啲～最近我病咗幾日，嗰幾日一食完藥就大昏迷，撻足喺床幾日。雖然大部份家務雞爸已經揹晒上身，但係嗰種『力不從心』嘅感覺真係好差。本身自己身子已經唔多好，定時要去醫院報到，下個月都有一籮籮檢查要做。以前成日覺得好小事啫，要死咪死囉，天要你死唔通有得留低咩～ 到而家，我會講：「我唔想死住呀，至少我想照顧到班仔女百年歸老先」。特別係糯米雞嚟咗之後，更加會咁諗，更加覺得呢個責任係要負一世，應該係因為佢太麻煩太難搞。有人同我講糯米雞個樣唔似短命相，係好長命好有生命力。我都有問過自己係唔係短命種，對方話我知『你有排捱呀，唔駛諗死』。嗰刻我覺得好安心，我希望我可以比我班仔女長命，希望可以照顧佢哋一世。雖然我冇小朋友，亦冇打算生小朋友，不過我好理解咩嘢叫『養兒一百歲，長憂九十九』。如果我有小朋友嘅話，我一定係嗰啲就算入咗棺材都會彈返起身嘅痴線媽媽…