【夠鐘食藥】大肚好辛苦㗎

有日診所好多人~ 有位女士入到嚟診所望望~之後行埋嚟問我:「睇醫生要等幾耐呀?」我:「而家登記嘅等十六個」佢:「但係你呢度冇位坐啦喎」我:「你可以登記完之後出去行吓或者返屋企坐都得,你預返一陣十二點半左右返嚟應該差唔多~」佢:「我大肚㗎喎」咦,你唔講我都唔知添~我:「哦?係呀?咁更加唔好留喺診所等啦~你差唔多時間再返嚟啦」佢:「我唔騰上騰落啦」我:「咁…而家呢度好多人喎?」佢:「你可唔可以體恤吓大肚呀?大肚好辛苦㗎」 我可以點做呢?立即幫你催生,等你即刻輕鬆又自在? 我:「小姐,我有咩可以幫到你呀?」 佢:「你幫到幾多咪幾多囉,始終我大住個肚,好多嘢都唔方便開聲嘛」我:「即係要我幫你啲咩呢?我頭先咪建議咗你返屋企坐吓先,或者出去行吓先囉?」佢:「你唔俾我睇先唔緊要,好閒㗎啫,今日你咁對人,第日你自己都有機會受返咁解啫。所以我哋呢啲大住個肚嘅就會明大肚有幾辛苦,講偉大就真係唔駛講啦。你阿媽呀!」無啦啦做咩講我阿媽呀!我媽你呀!佢繼續講:「佢咪又係大住個肚,陀得好辛苦先生到你出嚟!你唔俾我睇先唔緊要,好閒㗎咋。」係好閒嘅你又係咁提係咁講?我:「咁我而家同你登記,你十二點半左右再返嚟啦」佢:「我睇唔睇你哋都好閒㗎咋,反正你做女人做姑娘都做到咁,入面個醫生有幾好都冇用啦,同我講聲俾你老細知啦喎,我嚟過㗎,不過係個姑娘唔體恤我哋呢啲大肚嘅啫」 同我老闆講做咩呀?唔通!你係老闆娘?

Read More

【夠鐘食藥】糯米雞係咪壞咗呀

大家成日話糯米雞嗲,我先係嚇一跳,然後得啖笑。 我對『嗲』嘅定義可能比較唔同,糯米雞喺我眼中係一個『煩』字… 舉個例:半夜三更佢想上床瞓覺時,正路佢識行識跳咪自己跳上床囉。但係佢係唔會,佢會喺床邊先嗌一輪,再等我望吓佢,之後再嗌一輪,最近我都稱佢呢類行為做『雞啼』。到佢嗌飽啦,佢就會自己跳上嚟旁觀我一輪,再跳上枕頭,再望我一輪。我有時都會忍唔住開口問佢:「你前世係變態佬嗎?」。到望完啦,佢就會出手撥吓我隻眼呀鼻呀頭髮等等,總之佢撥到睡意攻心,佢就會用個死人大屎忽隊埋嚟一齊瞓。嗲嗎?再舉個例:我坐喺梳化睇電視時,佢喺房見到後會立即衝埋嚟,衝埋嚟做咩呀?望望我,再跳上電視前成尊佛咁坐喺度。衰仔,你食玻璃大的嗎?定係你變態到要我眼中只能望住你…真係嗲? 嗲同煩,其實都係一線之差。有冇好心人可以幫我傳遞訊息俾糯米雞知道『你做多咗呀!OVER晒啦!』,你唔好以為你成身毛,我就會覺得你特別可愛啊。米米夠多毛囉~佢晚晚瞓覺想同我一齊瞓時,都會靜靜哋咁行埋嚟,好貼心咁怕整親我驚動我,慢慢慢慢再慢慢咁放輕動作瞓喺我隔離。邊似得糯米雞咁晚晚雞啼,好似喺度大嗌『朕要休息啦!人嚟!侍寢!』 其實糯米雞係咪壞咗呀?佢係咪要返工廠維修呀?間工廠喺邊呀?有冇人話到俾我知…

Read More

【夠鐘食藥】睇開都冇感情咩?

有日一位先生嚟到診所。 佢好瀟灑咁挨住登記處枱面,撥撥佢嘅頭髮問我:「清明係咪唔開呀?」我:「公眾假期休息,係呀,唔開」佢:「咁我點算?」過主囉可以點呀?我:「而家先二月咋喎?清明成四月喎?」佢又撥頭髮:「要準備㗎嘛」我:「哦~我哋清明唔開啊」佢:「我知呀,你頭先講咗啦,我係問你咁我點算嘛」我:「或者你去第二間問吓啦,我哋嗰日全日唔開㗎啦」佢喺胸前小袋掏出一張卡:「咁都唔開呀?」挑!醫療卡咋嘛?我仲以為你拎張任我哋碌嘅信用卡出嚟添~我:「醫療卡呢…你不如打上去客戶服務度問吓清明有邊間診所開啊~不過佢哋應該都冇咁早知嘅,你試吓問先啦」佢:「我平時喺度睇開嘅喎?」你買起醫生先啦,唔爭在買埋間診所啦~咁你想幾時開幾時睇都由你話事㗎啦~ 我:「真係唔好意思呀先生~因為嗰日我哋真係唔開啊」佢又撥佢個油頭啦:「睇開嘅都冇感情㗎咩?」 冇呀!我同你一啲感情都冇呀!醫生同你有冇感情我就唔知,你不如試吓自己問佢? 我:「我哋診所嘅應診時間由醫生定嘅~定咗公眾假期休息都已經係好耐嘅事嚟㗎啦」佢:「等錢駛嗰時就開門做生意賺我哋錢,而家搵夠就閂門不問不聞咁啫,係咪?」我:「先生,我諗你誤會啦,我哋咁耐以嚟都係公眾假期放假㗎」佢:「OK啦,你哋冇感情我都可以好絕情,我轉會囉」 佢撥撥頭髮離開診所。邊個好人家收留你嘅真係大恩大德呀!辛苦晒!

Read More

【夠鐘食藥】多謝你揀咗我,揀咗呢個家

我家除咗糯米肥雞係收養嘅之外,米米都係收養返嚟嘅。 米米當初返到嚟惡到不得之了!掂吓手仔都要咬我嘅,邊個喺佢面前行過,不論人定貓定狗,都要食佢嘅貓抓拳,佢個眼神永遠都係帶住一股怨氣。呢個情況維持咗以年計算嘅日子… 不過我好阿Q咁同自己講『呢個可能係佢嘅性格,好型呀喂』。到唔知邊一年嘅冬天,我喺床上享受緊被窩嘅暖笠笠,佢跳上床頭望望我。我問佢:「做咩呀?想入被竇呀?入嚟啦,好凍呀」佢好慢好慢咁行落嚟枕頭,思疑咗一陣就捐咗入被竇了。嗰晚我前所未有同佢共處喺一個小空間,亦前所未有咁近…多謝米米你願意接受我。之後嘅日子,我不停嘗試同佢建立更好嘅關係,我開始握住佢最憎俾人摸嘅手,餵佢食零食,日子有功。佢已經唔會再咬我抓我,佢而家會喺我面前反肚俾我摸,每朝早都會用個頭頂頂我嗌醒我,晚晚會痴住我背脊瞓… 證明冰山真係可以擘開,米米由一開始攻擊力特強,而家變成一隻任我摸嘅小綿羊,仲非常識得嗲人同鍾意痴住人。呢啲都係需要時間培養出嚟,米米,多謝你揀咗我,揀咗呢個家~

Read More

【夠鐘食藥】嚟,你嚟望埋我對眼

有位女士嚟到診所~ 佢問我:「姑娘呀?冇胃口食嘢可以點算呀?」 我:「睇個醫生先啦~因為都要知道詳細情況係點,你冇胃口食嘢呀?」 佢:「我個仔呀」 我:「幾歲呀?」 佢:「一歲咋」 我:「咁細個好少話會冇胃口㗎喎,帶佢嚟俾醫生望望呀」 佢:「唔方便呀」 小朋友睇醫生都會有唔方便嘅時候?我以為得女人經期嚟時先唔方便啫~ 我:「但係冇胃口呢啲…你就咁講,醫生都唔知咩事㗎喎,有可能要檢查㗎」…

Read More

【夠鐘食藥】咁樣衰嘅嘢都做得出?

早幾日夜媽媽我收到個PM… 對方問我『你搵咁多錢有冇做善事積陰德?幫吓有需要幫嘅人?』 我收到當堂嚇一跳,夜媽媽都竟然有人咁關心我,咁有大愛…半夜三更有覺唔瞓都仲要PM我,係咪我令你失眠呀?唔好諗咁多無謂嘢啦~ 錢搵返嚟嘅梗係用晒佢駛晒佢揈晒佢,至於我點揈真係關仁隱士咩。做善事又唔係咩大件事,駛唔駛拎個喇叭或者專登出個POST講『我捐咗幾多幾多去邊度』,你自己講完唔面紅,我都面紅啦,咁樣衰嘅嘢都做得出?唔通你年年打去保良局捐幾百留你全名,再拎住電話趴喺電視前等自己大名出現,之後即刻影相擺FACEBOOK? 咁做善事為咩呀?你志在拎啲錢出嚟賺取別人掌聲,出發點唔係錯晒咩?學食神咁講『一字記之曰:心』,你有心嘅就算你拎唔起一筆錢出嚟捐俾人,你用行動用體力去幫人,都可以係做善事㗎。 善心唔係成日俾你班市懀嘅人日日掛喺口邊講,講到CHEAP晒㗎~人善則心善,行善可以有好多方法,亦可以好低調咁做。 坦白講呀,善事我真係冇能力做呀,我捨棄唔到熱浪。我有錢都會食晒佢,而家仲要多隻糯米肥雞嚟同我爭食。善事,留俾你做啦。陰德,你積多啲啦~你唔好嚟搶我啲嘢食就得啦,咁我已經覺得你係一個大善人。我會日日祝福你早日Level up做善人NO.1。阿門。

Read More

【夠鐘食藥】我個女做唔做得成明星都靠你啦!

有日一位媽媽拖住一位小妹妹嚟到診所。 佢行埋嚟問我:「姑娘,醫生返咗未呀?」我:「未呀,醫生佢應該廿分鐘後返,而家登記嘅排第十一個」佢:「咁十點前睇唔睇到呀?」我望望鐘:「應該唔得啦,當一個睇五分鐘都應該十點半啦」佢:「我哋趕時間啊」趕時間搭火箭啊,我哋呢度係俾人睇醫生嘅,唔係俾人趕時間啊~你嚟錯地方啦。我:「咁或者你去第二間睇吓有冇醫生返咗啦」佢:「我公司卡喺度用㗎嘛,你唔認得我啦?」經過今次應該有機會認得~我:「哦?係呀?咁你要嚟嘅都要登記啊,唔舒服嘅唔好四圍走啦」呢個時候小妹妹拉拉媽媽衫:「媽媽,我想返學呀…」佢同小妹妹講:「今日我哋唔返學呀,我哋去影相相呀,等媽媽請埋假就行得㗎啦」佢同我講:「我個女今日要去試鏡呀,可唔可以行個方便呀?」門口嗰邊好方便。我:「呢度個個都係咁等緊嘅~你要睇醫生就要等啊」佢:「你當我一開門就嚟咗得唔得呀?呀,唔係!當我未開門已經嚟到呀!我個女做唔做得成明星都靠你啦!」小妹妹講:「媽媽,我想返學呀」我:「睇嚟妹妹佢想返學多過做明星喎」佢:「佢咁細邊知邊啲對佢好呀,佢唔知㗎啦」我:「點都好,睇醫生都要排隊嘅」佢:「我真係趕住去試鏡喎!」我:「呢個唔係一個打尖睇醫生嘅理由呀」佢發爛渣:「咁我急症嚟㗎嘛!」我:「不如你自己問吓坐喺度嘅人讓唔讓俾你睇先?」 佢:「要問都唔係我問啦!唔睇呀!反正我做咗星媽之後都唔得閒返工㗎啦!唔睇呀!」 佢嬲爆爆拖住小妹妹走~ 我都好贊成你劈你老細炮!

Read More

【夠鐘食藥】以前嘅運氣好似返晒嚟啦!

自從糯米肥雞用咗人類BB尿片之後,爆屎機會少咗,甩片機會少咗。對比下淘寶用嘅寵物尿片,質素的確好鬼差,不過嗰時我冇得揀冇得嫌棄佢,唯有焗住用。以前每次佢爆屎得嚟又唔會整到一屋屎,我都覺得自己係同死神玩緊俄羅斯輪盤咁,每次都會覺得係賭緊運,總會覺得運氣都會有用盡嘅一日。 而家用咗人類BB尿片,吸濕能力好咗,包覆範圍更好,又有顯濕線顯示係時候要換片,不過就算佢真係有尿滲咗出嚟,糯米肥雞嘅小雞雞周邊毛毛都仍然好乾爽,我仲試過好似人哋賣尿片廣告咁用手摸落返濕咗嘅尿片度,我隻手都仍然係乾爽冇水㗎!之後就會不禁讚嘆:「啊!真係人類史上最偉大嘅發明啊!」 至於你問點解交完尿都仲會有尿滲出嚟,因為只要佢一有少少尿喺膀胱入面,佢一跑一郁啲尿就會喺膀胱內動蕩~蕩吓蕩吓就捐咗出嚟。就好似頭文字D拓海送豆腐咁,揸車一CHOK啲,入彎入得唔靚仔,啲豆腐同車入面嗰杯水咪BYEBYE囉~證明糯米肥雞天生係一個粗心大意得嚟又好濕滑嘅司機。至於屎啦喎…都係繼續咁爆啦~都係好爛好濕啦,不過塊尿片質素高咗咁多,佢個屁股都冇咁受罪。佢已經好耐冇脫肛了,我亦都好耐冇再見到佢屁股紅紅。以前嘅運氣好似返晒嚟啦! 以前有幾難捱難過都開始唔多記得啦~我哋都一齊共同進步同成長了!

Read More

【夠鐘食藥】係屙嘅…索啖氣都屙啦﹗

有日一位小姐嚟到診所~ 佢:「姑娘我要去日本呀」哦?係呀?玩得開心啲呀。我:「有咩幫到你呢?」佢:「我想執幾劑平安藥呀」我:「你喺度睇過未㗎?」佢:「我未,我小朋友睇過」我:「係你想配藥定你小朋友想配?」佢:「有分別㗎咩?」我:「梗係有啦,大人同小朋友食嘅份量都唔同~」佢:「小朋友配啦,有啲咩藥㗎?」我:「你有冇覆診卡號碼或者電話號碼俾我CHECK咗先?」佢:「XXXX-XXXX」我拎出排版後:「小朋友而家就三個月大,都係得退燒收鼻水抗敏感嘅俾到你啊」佢:「止屙呢?」我:「我哋冇咁細個嘅止屙藥啊」佢:「咁佢喺日本食完嘢屙點算呀?」我:「多數啲媽媽都會帶定香港啲樽裝水去旅行,你可以試吓,咁會穩陣啲」佢:「關咩水事呀?係屙嘅一去到日本境內索啖氣都屙啦」 你對於『水土不服』真有見解!一踏入人哋土地就即屙啦嘛? 我:「因為小朋友得兩個幾月大,可以食嘅藥真係唔多㗎」 佢:「咁我配平安藥啦,我多啲款啦卦?」我:「你嗰啲絕對唔可以俾小朋友食㗎,你嘅份量同佢爭好遠㗎!」佢:「我原先食一粒,佢奶一兩啖得唔得呀又?」奶你個頭能醫百病呀!我:「成人嘅藥係唔可以咁樣俾BB食…」佢:「佢屙嘅話我仲點周圍去呀?」我:「你拎定啲樽裝水去啦,都係開奶飲啫,佢都冇得食魚生㗎啦」佢:「都話索啖空氣就屙囉!你都唔掂嘅,我去問第二個好過啦」 醫生,有冇啲食完可以唔呼吸嘅藥呀?

Read More

【夠鐘食藥】你冇咗嘅,我可以幫你填補

已經十個月大嘅糯米雞。望住佢大到而家咁漲卜卜,我真係好安慰。因為每個生命都唔係必然咁完美… 以前我搵唔到同樣有曼島貓症候群嘅貓,可能香港本身少繁殖呢種貓。有晚我失眠無意間CLICK入個封咗塵好耐嘅IG輸入『Manx syndrome』,好多好多好多受同樣問題困擾嘅貓仔出現了。 於是我隔幾日就會去望一次,最近我望到有隻好細好細嘅黑白貓仔,一樣有呢個病,佢對後腿比起糯米雞初初返嚟嗰時更加嚴重,我唔識形容係點嘅樣,但係我相信每一個人睇到都會覺得好心痛。隻黑白貓顯然唔知咩嘢叫病,佢仍然好活潑咁拖住後腿不停咁走動~鏡頭下嘅佢,其實真係好有生命力。之後,我再見到IG上有另一隻同樣有呢個病嘅病,佢只有四日大…唔知點解佢失去咗貓媽,去到兩位照顧者手上。到第五日,佢眼睛都未曾睜大望過呢個世界嘅色彩就靜靜離開…雖然小生命離開係一件唔值得開心嘅事,但係我反而有另一個諗法:可能佢投胎前拎漏咗嘢,而家佢要返去拎返~ 我都相信糯米雞佢都係拎漏嘢,仲可能唔止一樣,除咗條尾條完整嘅骨,應該仲拎漏咗個腦…如果唔係點會咁癲呀?媽媽希望你呢世都唔見咗個腦,唔記得亦唔知點樣返去攞返屬於你嘅嘢,因為你冇咗嘅,我可以幫你填補~我哋好樂意繼續照顧同包容冇腦嘅你。

Read More

【夠鐘食藥】有種發燒叫你媽覺得你發燒

電話響起~ 我:「你好,乜乜診所」對方係一位女士:「喂?診所呀?」我:「係~有咩幫到你?」佢:「我想攞啲藥呀」我:「係咪配藥呀?你覆診卡或者電話號碼幾號?」佢:「我噚日嚟過㗎」噚日百幾人嚟過添呀~我:「咁你覆診卡號碼幾多號呀?」佢:「噚日先嚟完,咁快就唔記得啦你!」我:「小姐,我哋一日睇百幾個症,記錯咗就唔好啦,核對清楚對你都有保障呀」佢:「XXXXX!」我:「你想配啲咩藥呀?」佢:「塞PATPAT嗰隻退燒呀」我望望排版:「噚日俾咗退燒藥水啦喎?」佢:「係呀,我知呀,唔夠勁呀!」我:「小朋友食完唔退燒咩?」佢:「唔係呀,退咗啦」我:「退咗燒仲做咩要退燒塞呀?」佢:「我覺得唔夠呀」 有種發燒叫你媽覺得你發燒。點唔夠法呀?你想佢退到變雪條咁凍呀?啋! 我:「食咗退燒藥退到燒就唔需要再塞藥㗎啦,佢冇發燒就OK㗎啦」 佢:「但係我摸佢額頭仲暖暖哋㗎喎」係?咁神奇?你摸吓自己嗰個呀,睇吓係咪又暖暖哋呀?我:「咁佢有體溫係正常…你有冇探熱針或者機呀?」佢:「有呀,探咗啦!」我:「幾多度呀?」佢:「36.1囉!」我:「咪即係冇燒囉,佢冇再燒嘅就唔需要再食退燒藥㗎啦,塞藥更加唔駛,冇超過37.5就可以唔駛食退燒㗎啦~」佢:「但係我摸到佢暖暖哋喎」我:「小姐,冇體溫嗰啲呢…就好大鑊㗎啦。正常人係有體溫㗎~」佢:「我冇㗎喎」咁你唔係人囉。佢繼續講:「真係唔攞得呀?」我:「唔得呀,37.5以上先係發燒呀~」 嘟。冇體溫嗰個收咗我線…

Read More

【夠鐘食藥】冇咗佢喺屋企 我真係好唔慣

上星期我將糯米肥雞安置咗喺寵物酒店渡假兩日~ 有呢個安排前,我問咗好多間寵物酒店有冇店員識人手放尿,接唔接受到照唔照顧到大便失禁嘅貓。有好多間都直接回覆『唔收』,明嘅~大便失禁之餘仲要唔係一粒粒,係一PATPAT,又真係做多好多功夫。我亦有搵過寵物保母,特別向自稱做過獸醫助護嘅埋手,不過有幾個都係『我唔識放』… 反而而家呢間喺我詢問期間,佢雖然表明佢唔識放尿,但係佢主動叫我帶糯米肥雞過去俾佢試吓,佢願意學亦願意照顧大便失禁嘅貓。嗰一刻我覺得自己見到曙光呀!到當日我湊咗糯米肥雞過去,雞爸示範完點放尿,店員用咗四十分鐘就學識了!仲要唔止一個人學識,係兩個人都學識~ 我突然覺得之前問過嗰啲做過獸醫助護嘅寵物保母都可以失業了。我爭啲就係現場撒花歡呼!安置好雞,我一離開寵物酒店就即刻開CAM睇佢做緊咩…一睇,我就睇足兩日了。原先我安排雞去酒店,係想試吓佢仲有冇分離焦慮症,兼睇吓自己仲有冇機會去旅行~點知到最後佢咩事都冇,反而眾人都認為我先係分離焦慮症患者。 自從呢兩日之後,我覺得我已經習慣咗糯米肥雞日日喺屋企嘈鬼住晒,朝朝用屁股坐住我個頭企圖臭醒我。冇咗佢喺屋企,我真係好唔慣… 以前成日聽人講糯米雞冇咗我唔得,而家係我冇咗糯米雞唔得啊。佢已經入侵晒我嘅生活了。

Read More

【夠鐘食藥】我唔駛要咁多藥,我要一粒得㗎啦

有日一位女士入到嚟診所。 佢行埋嚟登記處:「你可唔可以解釋吓我而家係咩情況呀?去到邊個stage?」從你個外表睇,你而家應該係中年階段,正準備步入老年…我:「請問有咩事呀小姐?」佢掉包藥上枱:「我噚日先嚟睇過,到而家一啲咳都冇止到,仲係咁咳」 係?你講咗咁多句,都冇咳過一聲啊,肯定係你見到我就藥都唔駛食~嚟,姐姐俾張相你返去日日對住呀。 我望望啲藥:「你…食咗一次藥咋?」 佢:「我食過一次覺得冇咩效,都仲係咳嘅!」我:「醫生開咗三日藥俾你,你食一次唔會即刻見效啦~」佢:「你開三日藥唔通我就要食足三日咩?」咁快好返嘅,嗰啲係仙丹啊姑姑!我:「你不如食埋啲藥先~如果真係都仲未好先再過嚟啦」佢:「我而家去到邊個stage呀?你唔識答唔緊要,搵個識答嘅嚟同我講!你唔識答都同我換藥呀!啲藥唔得先冇效呀!」我:「…你食得一次,你份藥醫生都跟足你嘅病情嚟開~氣管藥有,咳藥有,收鼻水都有~你食埋先啦」佢:「我唔駛要咁多藥,我要一粒得㗎啦,你照收我咁多日錢我ok㗎,錢我真係唔care。」如果我有『含笑半步釘』,我一定讓俾你…我:「我嘗試吓幫你問醫生有冇得換藥啦,都十有九係冇得換㗎啦,因為你真係食得嗰一次…」 問完醫生,醫生加多粒維他命俾佢…我:「咁…醫生加咗藥俾你~你再試吓有冇好啲啦」幾日後,小姐再嚟,佢拎住當日加嘅維他命藥袋嚟:「呢個好呀!我淨係食呢隻都已經冇咳啦!我就係要呢隻!我淨係嚟配呢隻擺定喺度得啦!」 維他命好嘢…

Read More

【夠鐘食藥】一生一世不離不棄

成日聽到有人埋怨領養程序複雜,重重難關,有部份人過唔到關就會放養領養,直接到寵物店或上網購買算了。 我都曾經幫貓貓搵過屋企,過程中的確係會比較嚴,可以話係精挑細選。至少我要感受到對方真係有心養一生一世不離不棄。 點感受?首先屋企要有窗網,連氣窗都必須要裝上窗網! 其次就喺對話中睇吓佢點解想養,萬一貓第時病咗有冇能力同佢睇醫生。我真係試過有人答我『邊有咁易病呀?有先算啦』,從對話中我都會好主觀咁感受對方有冇誠意有冇責任心。我明對方都會覺得我好煩,但係希望你明白我唔係俾一件商品一件死物你,我交託俾你嘅係活生生有感受有感情會病曉痛嘅動物。我希望你從我手上接走佢,可以令佢一世幸福,而唔係隨便射個波俾人,有人接手就算。如果是是但但交隻貓俾人,我點知對方係咪變態,係咪虐貓狂。唔好同我講呢個世界邊有咁多變態!呢個世界就係有咁多! 義工唔係食飽飯冇屎屙,亦唔係得閒到專登想留難你,我哋都想暫託嘅動物有家,我哋亦只係想要一份『信心』,而呢份『信心』你問我點俾出嚟?我只可以話人夾人緣。如果一兩次領養失敗,就驅使你直接去買貓,咁都冇辦法,呢個係你選擇。 每出一隻動物,每幫一隻動物搵一個家,我哋都需要左度右度思前想後,每一次我哋都真心希望祈盼呢次係幸福嘅配對。我哋只想笑住送佢到新家,唔想日後有機會喊住接收返佢…

Read More

【夠鐘食藥】點生貝多芬呀?

有日有位先生嚟到~ 佢行埋嚟問我:「姑娘,點生貝多芬呀?」 首先你要有個子宮,然後去搵上帝申請俾貝多芬去你度…不過貝多芬都走咗咁多年,可能投咗好多轉胎啦喎。 我:「唔好意思,先生~我唔係好明你問咩…」 佢:「我想要貝多芬呀」你不如去HMV望吓呀?圖書館呀?我:「貝多芬死咗好耐啦喎…」佢:「咩呀?咩嘢死咗呀?你知唔知我講咩㗎?」我:「音樂家嘛?彈琴嗰位嗎?」佢:「你都痴線,嗰個關我咩事?」咁你又係咁貝前貝後?我:「咁你講緊啲咩呀…」佢:「令人開心嗰啲呀!」安多酚呀聰明! 我:「哦~你講嗰啲係安多酚…唔係貝多芬啊」佢:「我頭先邊有講貝多芬啫,一直都講緊貝多芬」嗱!你又講啦!我都冇佢咁好氣:「安多酚做運動都會有㗎啦」佢:「咁易?」我:「你係咪睇醫生㗎?係嘅我同你登記啦~」佢:「唔係呀,我行過見到突然有間診所棟咗喺度咪入嚟望吓」好神奇喎,成間診所會突然棟咗喺度,咁你即係入嚟運桔啦。我冇出聲,低頭做自己嘢。佢繼續問:「咁我做咩運動先有貝多芬呀?」貝你屎忽。我:「係安多酚啊,你做帶氧運動都得㗎啦,跑吓步都得」佢:「咁就會好開心?」我:「有幫助嘅~」佢:「跑幾下會有幾多個貝多芬生出嚟呀?」夠啦~~我唔想幻想你下體有無限個貝多芬出世呀~佢:「姑娘?做咩唔答我呀?」我:「如果你有咩問題不如入去問醫生呀?我同你登記呀,我答唔到你咁多嘢~」佢:「幾多個貝多芬都答唔到㗎咩?」我:「嗯,有咩問醫生啦,醫生先係專業㗎嘛」佢:「哦」佢終於離開了。

Read More

【夠鐘食藥】你屋企係擠迫戶

『你屋企係擠迫戶』,豬媽成日都咁講嘅,因為喺佢眼中我屋企多主子多雜物卦。 以前我嘅理想屋企係一開門返到屋企就有好多動物包圍住我,個個爭住俾我摸。而家我收皮了,理想同現實真係爭好遠~ 多動物等如收工後繼續好多清潔工作要做,好多伙食費要負擔。喺大家都健健康康時可能都覺得比較輕鬆,但到老年或病時就會吃力啲~最近我病咗幾日,嗰幾日一食完藥就大昏迷,撻足喺床幾日。雖然大部份家務雞爸已經揹晒上身,但係嗰種『力不從心』嘅感覺真係好差。本身自己身子已經唔多好,定時要去醫院報到,下個月都有一籮籮檢查要做。以前成日覺得好小事啫,要死咪死囉,天要你死唔通有得留低咩~ 到而家,我會講:「我唔想死住呀,至少我想照顧到班仔女百年歸老先」。特別係糯米雞嚟咗之後,更加會咁諗,更加覺得呢個責任係要負一世,應該係因為佢太麻煩太難搞。有人同我講糯米雞個樣唔似短命相,係好長命好有生命力。我都有問過自己係唔係短命種,對方話我知『你有排捱呀,唔駛諗死』。嗰刻我覺得好安心,我希望我可以比我班仔女長命,希望可以照顧佢哋一世。雖然我冇小朋友,亦冇打算生小朋友,不過我好理解咩嘢叫『養兒一百歲,長憂九十九』。如果我有小朋友嘅話,我一定係嗰啲就算入咗棺材都會彈返起身嘅痴線媽媽…

Read More

【夠鐘食藥】我想拎嚟大便樣本…你哋要幾多呀?

電話響起~ 我:「你好,乜乜診所」佢:「我想睇醫生㗎」我:「今日我哋應診時間去到七點~你七點前嚟到就可以㗎啦」佢:「好呀,我轉頭落嚟呀,七點前呀嘛?我轉頭嚟呀」 收線後冇耐,電話又響起~我:「你好,乜乜診所」佢:「姑娘,我頭先打過嚟㗎」我:「係~有咩事呢?」佢:「你哋睇肚屙之類嗰啲嘢㗎?」我:「腸胃炎睇呀」佢:「咁就啱啦!我而家應該就係腸胃炎啦!」你在興奮什麼…我:「嗯,咁你七點前嚟呀」佢:「我而家仲屙緊唔係好方便呀,屙到我都唔知自己喺邊,而家幾點呀?」我:「五點半」佢:「好啦,我盡快啦,肚屙睇㗎嘛?」我:「係呀」 再一次收線後冇耐,電話又響起~我:「喂?」佢:「我呀我呀」我:「請問有咩事呢…」佢:「我想拎嚟大便樣本俾你哋,你哋要幾多呀?」我:「點解呀?點解要拎過嚟呀?我哋唔駛㗎喎!」佢:「你哋唔駛睇吓我啲大便有咩事㗎咩?」我:「你同醫生講就得㗎啦,除非你想做化驗先要交大便,而且都唔係交俾我哋,交俾化驗所㗎咋」佢:「我撈起咗啲啦喎」撈?你點撈呀?我:「我哋唔駛呀,唔駛呀,你自己處理咗佢啦」佢:「吓…咁㗎咩,醫生唔駛睇個形態㗎咩…」我:「你形容得㗎啦!我哋信你對眼㗎!」佢:「唔好意思呀姑娘,我自己都唔知點形容呀」佢繼續講:「我而家落嚟啦」 我面如死灰…同事問我:「咩事呀?」我:「有人拎住自己啲屎嚟緊診所…」同事:「用咩裝呀?」我:「唔知…我淨係知佢肚屙…」 然後,嗰年中秋我冇食過月餅…

Read More

【夠鐘食藥】糯米雞瀨屎也愉快

上星期糯米雞去咗朋友搞嘅領養加市集日。我哋比原定兩點到嘅時間早,諗住可以行陣買吓嘢先。未上樓前雞爸問我:「你估會唔會好多人呀啦?」,我好堅定咁答:「邊會呀,熱死辣辣,邊有人咁得閒咁神心特登嚟睇佢呀」。 一去到現場,對唔住我知錯了。我想認真行陣買嘢嘅機會都冇。只要我抱住佢出去行吓就會好多人喺身邊舉起手機捕捉佢個屎樣。之後我哋返去貼心朋友安排俾我哋嘅可攻可守嘅角落位,到原定時間後,人開始多,甚至要排隊望佢影佢…我不禁望住糯米雞講:「原來你真係紅過我,唔怪得啲人成日話我靠你上位,表面證供成立,我又等收pm啦。今日我哋係你經理人加保鑣啦」。初初糯米雞表現得有啲緊張,不過都一樣逢人癡同嗲,肆無忌憚咁成塊姨媽巾咁款撻咗喺其他義工心口…之後開始見攰就直程喺現場瞓埋。 你問我有咩感受呀?我都好想當場瞓埋一份呀,不過張枱唔夠大… 到大約四點,我哋離開了。因為糯米雞一味瞓,加上都自覺為附近正為動物機構義賣嘅攤檔帶嚟唔少麻煩,所以我哋比原定時間早咗離開。我之前一直以為雞面對咁多人會好緊張好驚,事實證明…佢比我更慫恿自在食得瞓得。相比下,我覺得自己以前去簽書會更似一舊蕃薯。 不過我未有打算推糯米雞出去做『明星』俾佢長期躝街,今次只係朋友搞嘅領養市集限定啊!見到朋友搞嘅活動咁成功,糯米雞瀨屎也愉快。

Read More

【夠鐘食藥】平嘢一定死人嘅﹗

有日一位太太帶住個女嚟到診所~ 佢問我:「有冇流感針打呀?」我:「有呀,你定小朋友打?」佢:「我個女」我:「我哋有政府資助計劃嘅,你有冇拎佢嘅身分證明文件嚟啊?有就可以填埋表,咁就會平啲㗎啦」佢:「針都係一樣㗎?會唔會平啲就俾垃圾我?」我:「我哋全部都一樣嘅…」佢:「政府有咁好死嘅咩?」我:「…咁有冇證件?」佢:「咪住先,問清楚啲先,枝針有幾大枝呀?」我:「嗯?」佢:「有幾大枝呀?個針窿會有幾大呀?」我:「小朋友之前未打過流感針㗎?」佢:「年年都有打」咁枝針年年都一樣咁嘅SIZE啫…我:「咁同往年嗰啲都一樣呀」佢:「我以前打嗰啲成幾百蚊枝㗎,你呢度幾錢話?」我:「如果你用埋政府資助嘅,你俾50蚊囉」佢好大反應:「咪係囉!我以前打嗰啲成幾百蚊㗎,至少都二百幾啦」我:「咁可能你以前去嗰啲診所冇參加呢個資助計劃啫,不過大家啲針都係咁上下㗎咋,唔會我哋嗰啲特別大枝定細枝…」佢:「都係唔好啦,平嘢一定死人嘅,一陣打到我個女成撻疤咁點算,我個女大個仲要去做香港小姐,佢衰咗你賠咩俾我呀」…我諗選唔成香港小姐未必關嗰撻未發生未成形嘅疤事… 我:「咁你想唔用個資助,照俾正價打針?」佢:「係啦,我個女好矜貴㗎」我:「嗯,明白,冇問題呀,咁我照收你正價啊」 …多錢得滯冇掟駛嘅嘢,我都係唔明㗎啦~

Read More

【夠鐘食藥】DREAM CAT?我笑而不語

早幾日篤篤吓電話,望見FACEBOOK內有隻黑貓嘅相~我只不過隨意講咗句:「啊~好可愛呀,好想養隻黑貓呀」 雞爸就即刻好大反應大嗌:「你唔好再講呀!」,玻璃心的我爭啲好似啲悲劇女主角咁跪喺地下,再伸出左手邊喊邊問『你咁對我?你講咩話?』。不過我只係豬腳,於是我一臉不屑咁問佢:「而家咩事先?講吓都唔得呀?」 佢:「你記唔記得你以前就係講過『哎~我都好想要一隻好多嘢講好活潑好動又玩得嘅貓啊,好羨慕人哋有啲咁多嘢講咁嗲嘅貓呀!簡直係DREAM CAT呀!』,你而家咪有囉!」,佢指指糯米雞。噢,呢啲只不過係巧合啫,我夠成日講想中六合彩,咪一樣一次都冇中過,所以我係無辜㗎法官大人! 認真啲諗,糯米雞真係我嘅DREAM CAT?可能係我許願時,唔記得咗講『要健康識自己屙屎屙尿』,於是上天安排嚟嘅DREAM CAT似乎有些少問題~係就係就夠多嘢講呀,朝朝多聲氣到我要大嗌『夠啦,知啦,收嗲啦!』。係嗲呀,嗲到我日日都講『唔好再痴埋嚟啦,我成臉貓毛啦,你啲屎呀!』。係活潑又好動呀,成日周圍貓衝,成日都趁我剛剛起身未回魂就成碌火箭炮咁喺我腳邊跑嚟跑去,於是我朝朝都會大嗌『跑夠未呀?你阿媽就快因為你仆死跌死㗎啦!我未裝平安鐘呀!』DREAM CAT?我笑而不語了…

Read More

【夠鐘食藥】我對眼就係證據!

有日朝早好多人排晒隊等登記~ 一開始登記,啲人一個跟一個咁嚟到登記處前。有位阿姨繞過排隊嘅人龍,喺登記處前左望望右望望…突然佢攝埋嚟並同準備登記嘅先生講:「我問少少嘢呀,你等吓呀」阿姨你個人都幾風趣。佢問我:「醫生返咗嚟未呀?」我:「未返呀,十點左右返,你要睇醫生嘅麻煩你排隊呀」佢繼續霸住個位,企圖塞埋個頭入嚟:「我有啲趕時間呀,可唔可以而家登記埋先呀?」我好大聲:「小姐,麻煩你排隊呀,後面全部人都係排隊登記嘅,唔該你排隊呀~」佢個頭稍稍退後,但身軀仍然唔郁:「關你乜事啫?」阿姨你個人都幾風趣。關我乜事?得我先會同你登記嘅,仲關唔關我事呀?我:「要睇醫生就排隊呀~麻煩你讓開呀」佢指住頭先俾佢攝咗位埋嚟嘅先生:「嘖,有冇搞錯呀,我喺度好耐啦,我咪排喺呢個哥仔前面囉」講大話講到自己呃埋自己,兼當其他人都係低能啊你~我:「小姐呀,頭先你冇排隊呀,你自己攝埋嚟話問嘢咋嘛」後面位先生和應:「係呀,你話問嘢咋嘛」佢同先生講:「關你乜事啫」你打人尖呀,唔關佢事,唔通關對面街個阿婆膝頭事呀?我:「總之你要睇醫生就要排隊」佢:「邊個睇到我冇排隊啫,有人證明咩~我趕時間呀嘛」 我:「我對眼就係證據!你唔排隊嘅我唔會同你登記!」 佢:「駛唔駛咁呀,關你乜事喎,登記咋嘛」 終於佢扭住屎忽口噏噏行返去隊尾排隊。

Read More

【夠鐘食藥】如此佛系嘅我~

上星期至今日我放監去咗旅行,安置咗糯米雞喺我朋友間貓酒店度。離開酒店前,我朋友同我講:「玩得開心啲啦,我會日日影相俾你㗎啦」我要做個狠角色:「唔好影呀!我唔會掛住佢㗎!」,之後我就懶瀟灑離開了。 夜晚我朋友傳嚟訊息話我知幫唔到糯米雞著片,話佢發哂癲。哎呀呀,我又好想睇吓隻雞仲可以有幾癲呀~喺我同佢相處十個月以嚟,我一早知佢係癲夾喪,根本係有精神病。佢呢一刻可以嗲到你死,下一刻可以咬到你爆粗。可能我本身都係癲,所以我好明白佢,亦可能我本身份工一直都受過訓練,知道對付呢類性格要點做,所以我一於話知佢。 不過我就有啲同情我朋友,佢應該都係俾糯米雞一臉天真嘅樣呃咗。可能都係到照顧後就先發現呢隻貓又煩又癲又喪,佢都係同我講:「佢係咁打人,冇人性㗎,咬完人就扮可愛」。幻想完全破滅了~呢隻糯米雞八分本性如此,另外兩分係受到我呢個主人縱出嚟嘅。我早就放棄咗『教育』佢嘅念頭,教嚟做乜呀~隻嘢都精神分裂嘅,呢頭打完佢,嗰頭佢就唔記得。 留返啖氣暖吓肚好過啦,我成日返工都係咁『無謂同唔同方向嘅人拗,大家目標都唔同,根本冇得拗』。我呢行真是令人麻木的好東西啊! 訓練岀如此佛系嘅我~直到交稿嘅今日,我仲喺東京,說好的唔會掛住糯米雞其實係假嘅,我好掛住佢,真係好掛住隻癲喪臭屎雞,早知帶條有餡屎片過嚟止吓癮啦~

Read More

【夠鐘食藥】同姓三分親

有日一位先生嚟到診所。 佢問我:「你哋醫生姓陳呀可?」我:「係呀」佢自己講自己笑:「同姓三分親」我望住佢冇出聲。佢:「姓陳呀可?」你係咪有老人痴呆呀?我:「係呀,你係咪睇醫生呀?係嘅你俾身分證我同你登記先呀~」佢:「你哋會唔會做緊啲咩折扣優惠咁呀?」我:「先生呀,我哋呢度診所嚟㗎喎?」佢:「我知呀,不過診所唔可以搞折扣優惠㗎咩?」我:「我哋唔做呢啲…」佢:「唔怕坦白同你講,我其實可以唔駛睇醫生」係?門口喺你身後,麻煩你轉身呀。我:「哦?係呀?」佢:「我淨係想要幾粒硬的的嘅藥」我:「先生,我哋呢度除咗藥水之外,係藥丸嘅都好硬吓㗎喎,你要配藥嘅話,你喺度睇過未?如果未睇過,我哋唔會配㗎喎,我哋要跟返你病歷上食過嘅藥先可以配俾你㗎」佢:「姑娘你一輪咀講,我都唔知你講乜。你同我問醫生啦,我都姓陳㗎」你姓陳關醫生咩事呀~全世界有幾多人姓陳呀~我:「其實…你係醫生邊位呀?」佢:「同姓三分親呀,四海之內皆兄弟呀,佢係男嘅分分鐘係我爸爸」….醫生,你喺一兩歲嗰時傳宗接代了嗎?定係你個仔熟得太快呀?我:「…先生呀…我哋呢啲配藥嘅程序唔駛再去問醫生㗎啦~你有喺度睇過就可以配返之前喺度睇過嘅藥。冇嘅話就冇得配㗎啦,你明唔明呀?」佢:「我唔明呀爸爸」…媽,呢度啲人好癲呀,我可唔可以唔撈啦?佢細細聲:「我要偉哥呀」我:「我哋診所都冇…」 佢冇再出聲,自行離開診所。 醫生,你個熟得比人快嘅仔走咗啦喎,你追唔追返佢呀?

Read More

【夠鐘食藥】你唔好搞我啲屎呀!

日本之旅結束~一落機冇耐就仆住去接返糯米雞。 去到朋友嘅舖頭時,朋友同我講:「佢同人(舖內其中一隻貓)鬧交鬧輸咗,而家心情有啲失落呀」 我望望糯米雞,陰公雞囉!又真係落晒形喎~平時蝦蝦霸霸稱王嘅糯米雞居然都會輸呀?返去再練多十幾年先再學人鬧交啦~雖然佢輸咗俾隻貓,但係我朋友話我知佢咬傷咗一名員工,咬到人哋隻手腫晒,繼而放咗幾日假…身為糯米雞媽媽嘅我表示非常抱歉,我問朋友:「可唔可以俾我負責返你同事嘅醫療費?」。 豪爽嘅朋友都係拒絕咗…我嗰刻心諗,真係樣衰啦。 喺住宿期間,平時屙開爛屎嘅糯米雞居然唔屙屎,全部屎堆晒喺腸度。我朋友已經幫佢推過一次屎,仲要一路推一路咬人鬧人,好辛苦先推到兩粒硬屎出嚟。可能糯米雞想講『你唔好搞我啲屎呀!我儲埋儲埋留俾個死肥婆嘆呀!去旅行呀啦?食屎啦佢!』。我接返佢之後,第一樣要做嘅就係幫佢通便,通便嚟講最直接不過都係灌腸,可以用生理鹽水亦可以用椰子油,再加以按摩。其他正常嘅貓狗多數灌完腸都會半個鐘至一個鐘內就會自己屙得到出嚟,但係糯米雞唔識屙屎嘛,所以我哋就要用人手推啲屎出嚟。推足兩日,我哋終於清晒佢條腸啲屎…見到最後嗰條屎擠埋出嚟,真係有種說不出的暢快感!究竟一隻屙開爛屎嘅貓,係點可以做到硬屎效果?

Read More

【夠鐘食藥】你可唔可以俾返嗰個幾鐘我呀?

有日一朝早診所剛剛開門~ 有位小姐入嚟診所,佢問我:「醫生紙係咪可以寫時間㗎?」我:「吓?你係咪指到診時間呀?」佢:「唔係呀,我要上一個鐘至拎到醫生紙嗰刻嘅鐘」乜拎得咁仔細呀?我:「我哋冇得咁寫㗎喎,一個上晝就有嘅」佢:「點解唔可以寫時間呀?」我:「病呢啲嘢,休息嘅…邊有時分秒咁準確嘅時間㗎」佢:「我都唔係病」即係呃病假啦~扯啦。我:「冇唔舒服嘅話,醫生更加唔會寫病假紙啦~」佢:「我今朝遲咗起身啫」關我蛋治?我:「呢啲唔關醫生事啊~」佢:「你可唔可以俾返嗰個幾鐘我呀?」我:「小姐呀,我哋呢度診所嚟㗎,嚟到都係睇醫生嘅」佢發爛渣:「我而家有話唔睇咩?我係要求你寫醫生紙俾我寫嗰少少時間啫」我:「病假紙嘅話係由醫生寫嘅,醫生認為你需要放假休息就會寫~而且一寫就唔會係幾個鐘…」佢舉起食指指向我:「咁你而家點賠返啲時間俾我呀?你講呀!你答我呀!」我:「小姐你自己瞓晏咗唔關我事㗎喎?」佢:「我唔係講我瞓唔瞓晏,遲唔遲到,我係要你嚟解決問題,姑娘唔係咁做㗎!」嚟,你嚟做!你咁勁嘅,你過嚟坐我呢個位,我做你個位,我嚟炳你!我:「總之醫生唔會因為你遲到而寫病假紙俾你啦」佢大嗌:「醫生!你聽到啦!唔係我唔俾錢你賺呀!係你隻門口狗攔住我咋!」佢再同我講:「我同醫生好熟吓㗎!佢聽到一定會炒咗你」 啊?係呀?炒咩呀?炒飯呀?醫生未返嚟啊。不如你自己打俾佢講呀~

Read More

【夠鐘食藥】呢一切,我哋捱過了

自從上次旅行後發現糯米雞都會有硬屎出現,我哋同佢通咗便之後就更加留意佢嘅便便。因為佢返到嚟之後,好似對原先食開嘅罐頭冇咩興趣,反而對其他貓食剩嘅乾糧更感興趣。於是我哋由得佢食乾糧了~ 初初執阿雞返嚟嗰時,佢個原主人寫嘅信交帶落阿雞只可以飲奶,如果唔係會便秘。嗰時睇咗幾位醫生都一樣有同樣嘅建議,話佢消化系統神經係有缺憾,一世都唔會有正常便便,亦會一世反反覆覆沒完沒了咁便秘或屙爛屎。我哋就係咁度過咗十個月。最近,糯米雞啲屎成型了!而且可以完整一條條咁推出嚟~我哋嗰刻真係歡呼咗出嚟。由只會屙水泥啫喱糊仔狀屎變成可以完整一條條,真係一個好大好大嘅進步。亦代表住『糯米雞的爆屎年代』已劃上句號了! 回望過去嗰十個月,由寵物尿片到BB尿片,由不停漏屎滲屎屙爆片到只有少量尿滲嘅尿片,由每日洗幾次籠拖十幾次地到個籠已經收埋咗,由當初日日壓大力到喊怕會整死佢害死佢到而家我日日俾佢煩到死。呢一切,我哋捱過了,終於成為過去。不過我哋仍然係邊養邊學,睇嚟呢個學堂,我哋仲可以上多十幾年了。 『存謙卑感恩的心學習能擁有更多。』呢句我唔記得喺邊聽返嚟,但係我一直都有袋穩。幫過我嘅人我一直牢記,至於叉過我嘅人記嚟都蒙嘉慧啦~

Read More

【夠鐘食藥】又唔係你親生嘅!

有日一位小姐嚟到診所。 佢行埋嚟問我:「仲有針打呀?」我:「打咩針啊?」佢講嘢係有啲唔咸唔淡嘅:「尿感針」我:「流感針呀?我哋冇晒啦~今年嘅都打晒啦」佢好大反應:「我個仔都未打!做咩唔等埋我呀?」小姐,你個南瓜車爛咗啦…我:「我哋啲針有限嘅,打晒就冇㗎啦~」佢:「咁我而家打得唔得呀?」我:「我都冇晒針,冇得打㗎啦,而家都四月啦,你等新一季先再打啦,九月十月再嚟啊」佢:「新一季?我打上幾季都得㗎,有得打就得㗎啦」打你條命。我:「我哋唔會有以前啲疫苗喺度㗎,流感針年年都唔同㗎,唔係破傷風針呀,你年尾再嚟啦」佢:「我唔緊要呀,我可以呀」你唔著緊自己個仔條命都唔好搵我哋嚟陪葬呀~我:「唔係你自己覺得O唔OK問題呀,係我哋真係冇呀」佢:「我真係冇所謂呀」我:「小姐,我要講幾多次你先明白,我哋啲疫苗都已經冇啦,要等九月十月先會返新一季嘅流感針呀~」佢:「哎,講極你都唔明嘅」明明唔明嗰個就係你…我:「我哋冇流感針打,冇,冇針,冇疫苗」佢:「哎,咪講咗要之前嗰啲都得囉姑娘」我就斷氣:「我哋…冇呀…」佢發脾氣:「我個仔嚟咋,又唔係你親生嘅!怕咩啫,有咩事死咗咪再生過囉!」 哇,你好豁達喎。既然都唔怕死,仲打咩針呢?留返啲錢嚟醫包包啦你~ 佢繼續講:「我有錢嘅都冇呀?」我:「冇」佢邊講邊離開:「細路仔咋嘛,怕咩啫!我仲有得生,有錢都唔識搵咁笨!」 你咁搞法生到八十歲都冇得抖呀~

Read More

【夠鐘食藥】你又引埋啲傻人嚟

早幾日有位兄台PM我,問我有冇考慮搵多隻比糯米雞更差嘅貓返嚟呃LIKE。 我望望糯米雞,對住佢講咗句:「你又引埋啲傻人嚟」。糯米雞呢啲CASE係因為啲商人只為眼前利益,無視近親繁殖嘅基因缺陷問題而引起。唔係我專登令到糯米雞變成咁嘅~好可惜你只睇到一小部份再曲解。 佢成為我家成員,嗰個心路歷程你真係知條鐵咩~嚟,等姨姨同你講解吓。我有時會『執』到一啲小動物返嚟,每次暫託後見佢哋冇病冇痛都會幫佢哋搵個好人家。但好景不常,亦係上得山多終遇虎,人冇可能一世都好好彩,好多人都會瀨同一樣嘅嘢:終於遇到啲唔健康有缺陷。感覺就好似係個天叫你係時候收手啦~ 當初我鬼知佢咁大鑊咩,我以為真係睇幾次醫生,大不了燒晒啲銀紙做靈符就可以成功健康『出貓』。望住佢嗰啲屎,我諗咗好多次『有冇人真係願意同你抆一世屎?』。喺度諗咗好多好多日,我都係唔放心唔安心將佢交俾其他人,我怕佢會再俾人遺棄,我怕佢會遇上一個到最後會嫌棄佢啲屎嘅人,更怕嚟問領養嘅只係貪圖佢一時可愛。佢嘅貓生天生已經比其他苦,我唔願意再俾佢承受更多。我宣佈封佢盤嗰日,我係好沉重咁揹上佢嘅一生。 動物唔係用嚟鬥慘呃LIKE嘅,更何況我覺得糯米雞而家一啲都唔慘,明明就係我慘啲。

Read More

【夠鐘食藥】我住公屋呀~

有日有位小姐抱住隻狗仔入到嚟診所。 佢問我:「我可唔可以擺佢喺度呀?」我:「我哋診所嚟,唔係咁方便啊」佢:「緊急關頭呀!唔該你呀!」我:「咩事呀?」佢:「我屋企唔可以俾人發現有狗呀」我:「吓?咁你諗住擺低佢幾耐呀?」佢:「一星期咁上下啦」 我:「更加唔得啦!你去搵寵物酒店啊~」佢:「我住公屋邊有錢呀?」而家香港地住公屋先有錢喎,你唔好呃我呀~我:「我都唔可以幫你睇住佢成個禮拜咁耐呀~我哋診所嚟㗎嘛」佢:「咁你喺正我樓下嘛!」隔離麵舖夠係囉,你又唔去問吓佢?我:「我哋診所又點可以俾隻狗仔喺度呢?而且我哋收工都冇人喺度㗎~你去搵寵物酒店啦,有啲二百幾蚊一日㗎咋」佢大驚:「一個星期咪成千幾銀?」我冇出聲。佢:「我交租都係咁上下咋」我:「如果你住公屋嘅,長遠落去你都要諗點安置隻狗仔㗎啦~」佢:「隻狗我新買㗎,我未玩厭㗎!」玩你個頭!明知自己住公屋仲要買狗!我:「小姐,動物唔係拎嚟玩嘅~你自己住緊公屋,明知唔俾養狗就唔好買啦,你而家玩緊你自己咋」佢:「死八婆!你唔好開診所啦!我住公屋點解唔養得狗呀?我擺低佢喺度幾日你仲要煩過我老母!你唔好開喺我樓下呀嘛!」佢講完就離開了。 你同房署講啦~條例又唔係我定…

Read More

【夠鐘食藥】陰公雞啦!你頂唔頂得住呀?

糯米雞足一歲了~係我期待又擔憂嘅歲數。 因為佢係時候要絕育,佢初初返嚟時,我哋一直諗:「佢會唔會喺一歲前就瓜咗啊」,只係抱住邊養邊打算嘅態度去看待『絕育』。到就快一歲時,我哋又怕『佢捱唔捱得過』,諗諗吓就覺得不如唔好絕育算,反正佢都成世著住塊尿片搞唔出啲乜事~ 不過上天總係特別喜歡玩鬼我,我哋發現佢有隱睪症了。佢嘅蛋蛋似乎只出到一粒,另外一粒我哋摸唔到喺邊。隱睪症即係睪丸生咗喺唔應該生嘅地方,粒蛋蛋不見天日收埋咗唔知喺邊,呢個情況下不正常嘅睪丸日後好易成為腫瘤,所以係必須開刀搵佢出嚟。即係我哋冇得揀絕唔絕育,係必須要做,仲要越早越好~ 擔心就一定有㗎啦,因為要開刀,喺腹腔位搵返粒蛋出嚟,代表要全身麻醉了。做手術前,先為佢抽血驗身,睇吓合唔合格。報告顯示各指數非常靚仔!雖然糯米雞而家已經比以前強壯好多肥好多,但係我怪獸媽媽嚟㗎嘛~都仲係好驚好擔心呀大佬。仲要做手術前一晚開始禁水禁食,陰公雞啦!你頂唔頂得住呀?另一樣擔心嘅係佢絕育後變得更肥更漲更好胃口…我家一班女已經係例子。個個絕完育都肥至少一個碼嘅…係咪因為絕育後知道唔再需要吸引異性,人生冇晒戀愛啪啪啪目標,所以個個都大放縱啦?

Read More

【夠鐘食藥】我做老豆機會大唔大呀?

電話響起~ 我:「你好~乜乜診所?」對方係一位男士:「姑娘,我想問你少少嘢」我:「我哋今日開到七點,隨時過嚟登記就有醫生睇㗎啦」佢:「我唔係嚟睇醫生呀」我:「哦?係呀~咁你想問咩呀?」佢:「我噚日冇用套咁搞咗我老婆」哦,同老婆交合係好正常嘅事啊。我:「咁你有咩想問呀?」佢:「我就想問咁樣嘅我老婆有咗嘅機會大唔大呀?」隔住個電話你都睇到我似一張排卵試紙嗎?我:「先生呀~我答唔到你呢啲問題㗎喎」佢:「咁我做老豆機會大唔大呀?」你覺得我又可以聽聲睇相嗎?我唔係盲公陳呀!我:「如果你有啲咩問題嘅,不如同太太嚟見醫生啦」佢:「我而家好後悔呀」我:「你係有需要嘅就同太太嚟啦,我哋有事後避孕丸嘅」佢:「我知你有!我梗知診所有啲咁嘅嘢啦!你估我未食過咩?」你?你食過?你食嚟做咩呀?你怕你生咗一堆精子BB出嚟呀?佢:「噚日我做得咁有幹勁!而家先叫老婆去食藥避孕嘅話,我仲係人嚟?」 咁我可以收線未呀?我唔想聽你有幾幹勁呀~我怕我忍唔住答你『幹得好!』我:「先生,咁你自己決定啦,你有咩問題就嚟睇醫生啦~」佢:「你都未答我機會大唔大?」我:「女性嘅受孕機會高唔高,首先都要睇佢嘅排卵期嘅,呢啲都可以嚟問醫生㗎」佢:「粒卵我會唔會見到㗎?」 有緣嘅話,你派出去嘅精子大軍就會見到。我:「…你應該唔會見到嘅」佢:「我見唔到嘅係咪即係冇咁大機會做老豆呀?」我:「先生,卵子係喺子宮度…喺卵巢…」我都未講完,『嘟』,俾佢收咗我線添… 你唔會諗住叫老婆俾個卵巢你睇呀嘛?放鬆啲啦準爸爸!未來日子仲有好多嘢要學呀~

Read More

【夠鐘食藥】咁就真係奇過奇異種子啦

上星期糯米雞咪去咗絕育嘅~我由一朝早好繃緊咁等呀等~等到姑娘打電話嚟:「佢醒咗啦,可以接返佢啦」,個人先覺得鬆一口氣。 到去到診所時,醫生同我哋講:「佢真係好好喎」我以為係話佢好乖嘅意思,心諗醫生你一定係撞邪啦,佢會乖?原來醫生講嘅係第二樣:「早幾日咪同你講佢要開肚搵埋另外一粒蛋出嚟嘅?」我:「係呀,我仲擔心開刀佢會頂唔住」醫生:「我哋剃晒佢肚毛,打算拎咗陰囊嗰一粒出嚟先,一開就發現兩粒都喺入面啦」我:「吓?即係佢冇隱睪問題啊?」醫生:「係呀,佢兩粒都喺陰囊入面」咁就真係奇過奇異種子啦~明明早幾日醫生都摸唔到兩粒,明明我哋之前都一直摸唔到。唔通糯米雞知開刀手術費貴好多,為咗留返啲錢去食,佢就谷返粒蛋蛋去正常位置?我:「咁佢咪唔駛開刀囉?」醫生:「係呀,所以一陣有錢退返俾你」哇,發達啦,慳咗足足千六銀之餘,糯米雞仲冇咁傷身~接返佢返屋企之後…佢已經即刻跑跑跳跳。說好的做咗手術會有啲痛呢?明明做絕育前個個都話做完會乖好多,唔會再周圍撩交打…但係…似乎糯米雞真係一隻唔多正常嘅貓。佢比以前更撩交打更嘈,我已經冇覺好瞓咗一星期,我有時瞓瞓吓都會聽到佢擘大喉嚨咁嗌,係幻覺嗎?

Read More

【夠鐘食藥】你因住紅呀!

有日有位後生女嚟到診所。 佢行埋嚟問我:「幾錢呀?」我指指登記處玻璃上貼住嘅診金收費表:「呢度有寫~你可以睇吓先」佢望望再問我:「學生有冇得平呀?」我:「我哋淨係有長者優惠咋」佢:「唔係化?就死嘅先有得平」我望望佢,冇出聲。佢再問我:「你不如同老闆講吓學生收平啲呀,我係大學生嚟㗎喎,一係我哋拎學生證過嚟就平啲呀?」你唔講我仲以為你嗰張係咩VIP卡添~我:「唔好意思呀,其實之前都有大學生過嚟問過可唔可以做到優惠之類嘅嘢㗎啦,我哋醫生都係拒絕嘅~我哋暫時都係得長者優惠㗎咋」佢:「未來社會勞動力都係我哋呢啲後生嘅提供㗎喎?老嗰班冇嘢做㗎啦喎?」我:「小姐你冷靜啲先~就係因為老人家已經退咗休冇收入,我哋先會平少少俾佢哋啊。」佢:「我夠冇收入囉?」 但係你手上拎住部最新款嘅蘋果電話,仲有你個袋都係C字頭名牌…如果係你啲朋友送嘅,送得咁闊綽,你唔駛打工都得啦~ 我:「真係唔好意思啦,我哋診所都淨係有長者優惠。」 佢舉起電話影相:「好呀,我叫全校認住你,等全世界都知你睇唔起大學生!」原來唔俾任何優惠就等如睇唔起,而家啲人嘅思路真係好難捉呀~佢再講:「睇唔起大學生呀!你紅硬呀!」我:「我一直都冇講過睇唔起你啊,係你自己走嚟叫我哋平俾你…」佢:「仲要咁扮嘢!」我想翻白眼啊~但係鏡頭在前…我:「小姐,如果你唔係睇醫生嘅,請你離開啦~」佢:「我鍾意幾時走就幾時走!我未影完!影夠我就走!你咪試吓趕我走囉~你因住紅呀!」我:「咁你慢慢」頭先又話我紅硬,而家又話因住紅,咁即係俾唔俾我紅呀?

Read More

【夠鐘食藥】咩咩動物園

唔好睇我而家有五貓一狗就以為我已經係顛峰期。曾經我有更多嘅動物一齊共住,成日都俾人話我屋企係動物園,所以我自己已經唔需要再去咩咩動物園~ 對於加新動物入屋,我係採取幾自由嘅態度的。當新動物入屋時,我會為班『原住民』劃出大大空間,剩返嗰少少空間就係俾『新嚟新豬肉』。頭一星期新丁要困籠先,一嚟俾佢適應環境,二嚟要俾班原住民望真啲聞真啲,大家彼此熟悉吓大家嘅氣味。跟住零食不可缺少~新丁入屋後,正常人都會諗「佢會唔會分薄咗我哋嘅零食㗎?我會唔會冇得食㗎?」,所以我哋要用行動話俾班大帝知,就算多咗個飯碗,大家嘅伙食都只會有多冇少,奴才會更努力去搵食啊!呢點好重要啊,因為每個生命天性都係以食嚟維持生命,如果影響到『食』呢一環,隨時會引發大爆炸! 之後就係到共處啦,好多人應該都會好怕啲貓狗一埋堆就打架,但係我就唔會理嘅,由得佢哋打打撲撲。因為不打不相識,不是冤家不聚頭,大家都肯定係前世有孽積咗落嚟今世先會喺度相遇。只要喺我監察情況下,佢哋係可以自由地隻揪圍毆,唔咬喉嚨死唔去嘅,佢哋好快會自然分出勝負,自己再喺呢頭家度分配出屬於佢哋嘅位置。當然有啲動物性格上本身會比較孤僻焦慮,見到佢唔飲唔食冇咩生氣就要多加留意。 動物就好似人一樣,都會有唔同性格,最緊要係首先多多了解佢啊。

Read More

【夠鐘食藥】我用自己電話打OK嗎?

有日我坐喺登記位度適應緊新公司嘅節奏。 喺人頭湧湧嘅診所內,有位小朋友行埋嚟問我:「姑娘,我可唔可以打電話呀?」我問:「打俾邊個呀?」佢:「我媽咪」我:「好呀,得你自己一個嘅?你媽咪幾號電話呀?我幫你打呀」佢:「媽咪話去買啲嘢…我叫乜乜乜」我翻查登記咗嘅人排版紀錄,搵到電話號碼,於是拎起枱面上嘅有線電話打過去,不過打咗幾次都係冇人聽。我同小朋友講:「你媽咪冇聽電話啊,反正都未到你睇,你不如坐喺度等佢返嚟呀?可能佢而家買緊嘢聽唔到電話」小朋友個樣好失望咁點點頭行返去搵位坐低。 轉個頭診所阿姐走埋嚟同我講:「我哋部電話唔借俾人㗎」我:「但係小朋友嚟喎?搵佢阿媽喎?」阿姐:「都唔借㗎,呢啲你唔駛理㗎,你叫佢自己出去搵咪得囉」我:「佢得自己一個咋喎?」阿姐:「唔駛理㗎,你叫佢出去得㗎啦,有咩事都係佢嘅事咋嘛」我:「佢行到出去又係要搵人借電話,佢仲咁細個嘅邊放心呀?」阿姐:「呢個係佢自己問題啦,我哋啲電話唔俾病人掂㗎,仲有個小朋友點都唔關我哋事㗎」我:「佢都冇掂過電話…」講講吓小朋友又再行埋嚟問:「姑娘,可唔可以幫我打多一次搵媽咪呀?」 阿姐望住我。我望小朋友,再望望阿姐:「我用自己電話打OK嗎?」阿姐面燶燶行開。 新工除咗要適應節奏之外,仲要適應同事,試用期除咗係你試我,亦都係我試你。 祝你搵到志同道合嘅好同事。

Read More

【夠鐘食藥】再肥啲都仲瞓得落呀!

對於管教毛孩,我一定係一個失敗嘅主人。我屋企咁多隻毛毛,冇一隻係會驚我同聽我話…我覺得自己只不過係一個餵食器剷砂機。點解我會咁折墮,雞爸冷眼答我:「因為你縱佢哋」。隱約中我見到雞爸背後係有佛光… 敢問大大,我而家開始撥亂反正會唔會太遲?而家先學人做個惡阿媽又會唔會太突兀?雞爸耍耍手擰擰頭,似乎係睇死我。好!糯米雞,你係第一個,我要挑戰你!撥返你去正軌!於是,我開始同佢進行特訓~以前每晚佢會喺我頭頂瞓覺,霸住晒我個枕頭,瞓瞓吓仲會伸直晒啲手腳趕我個頭走~或者會瞓瞓吓咬我個頭啄我啲頭髮…有時佢自己瞓唔著,就會發晒癲咁通屋跑,每次個check point都會係我肚腩…我每晚都瞓得好差~就係因為我『縱容』佢哋。所以而家除咗b婆可以同我同床瞓之外,其他貓一律要出返廳瞓!頭幾日佢哋會喺門外嗌生嗌死嗌到就斷氣咁…我咬緊牙關同自己講:「唔好理!當聽唔到~唔好心軟呀!」。於是佢哋嗌咗幾日之後,就知道嗌嚟都冇用,不如早啲瞓等天光食早餐好過。呢次,我成功調教咗佢哋啦!我終於發現自己張四尺半床原來係咁大,再肥啲都仲瞓得落呀! 而家張床喺我瞓覺時間嗰陣,終於完全屬於我同b婆~再唔駛好似以前咁四肢扭曲搞到腰痛腿麻,或者瞓瞓吓突然遇襲見紅。我而家好後悔點解我唔早十年的起心肝啦!

Read More

【夠鐘食藥】你瞓緊覺又點返工呀?

有日一位先生嚟到診所。 佢緩慢地行埋嚟,望望我,再同我講:「呢一刻開始唔好講嘢,你聽晒我講先」我望住佢:「嗯」佢:「我噚晚喺床度瞓瞓吓扭到條腰」 瞓覺都整親呀?你係咪瞓到成個驅魔人咁呀?做咩咁百厭呀? 我冇出聲,表情亦冇露出半點驚訝,繼續望住佢。 佢繼續講:「我一整親即刻望鐘,見到個時間係凌晨2點36分」我點頭。佢:「我嗰刻有衝動打俾我老闆,不過最後我冇,因為我知夜啦」入正題未呀?爽快啲啦,我好悶呀。我:「跟住呢?」佢:「你唔好講嘢住,聽埋我講先得唔得呀?」妖。佢繼續講:「我就係想問我可唔可以睇醫生呀?」可以,你根本係要睇醫生啦。我:「可以呀,我同你登記呀,你俾身分證明文件我呀」佢:「我仲要寫份嘢證明我係頭先講嗰個時間同地點整親喎」我:「你意思係要醫生證明你係凌晨兩點幾喺床上整親條腰?」佢:「凌晨2點36分,瞓覺整親」我:「呢個應該有難度,你寫去邊㗎?」佢:「公司,工傷呀」即係你份工係負責瞓覺嗎?我:「啊!你喺公司休息緊嗰陣整親?」佢:「邊有人凌晨仲返工㗎?返工又點會瞓呀?你冇常識定係個腦有事?」先生,你真係話得我好啱。我:「咁你收咗工仲工咩嘢傷呀?收咗工就冇工傷㗎啦喎?」佢:「…係㗎咩?咁…我嗰刻返緊工得唔得呀?」我:「邊有人凌晨仲返工㗎?你瞓緊覺又點返工呀?」YES!仲唔係我威一轉?佢:「我嗰刻諗緊我老闆同公司嘢得唔得呀?」我:「唔係咁計嘅,你收咗工,唔係返工時間嘅照計就唔係計工傷,頂多你可以問自己嘅私人保險。」佢:「…係㗎咩?」我:「係呀~唔信你返去問吓你老闆」佢黯然離開。YES!我終於成功KO一個!

Read More

【夠鐘食藥】又開始爆肝的日子

呢個月我又開始爆肝的日子了~ 因為我學人做奶媽呀!我托養緊一隻得幾日大嘅貓BB,每個幾兩個鐘就要餵一次奶,佢一嗌就要塞飽佢,不分晝夜咁食呀食呀食呀。照顧咁細隻貓BB我都係第一次,原先我以為家中已為人母嗰兩隻大貓會有啲母愛,點知…我一拎到返屋企,meme同米米都只係聞一聞,然後俾個『你自己接返嚟嘅就自己搞掂佢,又不是我親生的!』嘅眼神我…自從嗰一聞,佢哋都冇再理過隻貓BB。我嘅如意算盤打唔響了!咁既然接得返嚟,就唔可以輕易放棄。雖然呢隻貓BB好大機會係因為唔多識飲奶又偏細碼而被貓媽遺棄,但係我信每個小生命都係有生存嘅動力同希望。只係喺野外正在流浪嘅貓媽好難同時兼顧到~ 既然呢隻得76g嘅小生命嚟到我屋企,我一定會出盡力去養大佢,令佢變得肥肥白白,再幫佢搵個好家庭好奴才。所以呢期我真係好忙,連街都唔出得,就算要出都只可以喺半個鐘內返到屋企…每次餵奶前先幫佢放屎放尿,再慢慢用奶樽餵奶,見佢用奶樽飲得唔太好,又要同針筒補奶,之後同佢掃風,洗樽。即使係凌晨都要咁做,每個幾兩個鐘就重覆一次,就算幾眼瞓都好,都一定唔可以邊餵邊瞓…唔怪得朋友講『湊一次貓b老十年』,是真的!真係可一不可再呀,清咗呢罐奶粉之後我唔可以再買奶粉返嚟擺啦~只要冇奶粉自然唔會再豬衝去湊貓BB! 熱浪,請你快快長大,我好眼瞓。

Read More

【夠鐘食藥】我哋以前邊有呢啲嘢㗎

有日一位叔叔嚟到診所。 佢問我:「阿姐,呢度係咪咩都睇呀?」阿叔,你冇嘢呀?你應該去眼科喎。我:「我哋普通科診所~如果呢度醫生都幫你唔到嘅,就會轉介你去專科,你想睇啲咩呀?」佢:「眼呀」原來真係眼有事啊你,對唔住,我頭先怪錯咗你啦~我:「我同你登記先啦,你俾身分證我呀」佢:「要身分證㗎咩?」我:「要呀,睇醫生就要身分證㗎啦」佢:「乜而家咁㗎?以前都冇呢啲嘢㗎」係呀,個世界變咗好多啦,而家好多嘢都唔同晒啦,周圍都係車,個個都有智能電話,你由咩年代穿越過嚟㗎?講俾阿姐知,阿姐帶你去檢查呀~我:「嗯,咁你有冇帶呀?有就俾我啦」佢:「冇呀」我:「如果你要病假紙收據或者轉介信嘅話,我哋都要身分證做登記㗎~」佢:「我想睇對眼咋」我知,如果你可以做到對眼唔屬於你嘅身體一部份的話,咁應該可以唔駛身分證嘅…我:「咁你要唔要病假紙收據呀?」佢:「要呀」我:「或者你返去拎身分證先啦,醫生都未返~你可以拎完再返嚟登記呀」佢:「我喺好遠嘅地方嚟㗎,我唔屬於呢度㗎」 嗱!仲唔俾我陰到你!你肯定係外星人或者穿越過嚟嘅古代人! 我:「咁一係你去返屬於你嘅地方睇醫生啦」 佢:「即係你唔睇我呀?」我:「如果你要病假紙收據嘅,我哋一定要有身分證明文件登記呀,或者你睇咗先,之後拎返證件過嚟,我再俾返病假紙收據你都得。」佢:「我返咗去就再過唔到嚟㗎啦」喂?999呀?呢度有個非法入境呀。我:「咁…你都係去返屬於你嘅地方睇醫生啦,同埋呢~你咁大個人出街出遠門一定要帶身分證㗎,如果唔係有警察查你嘅時候就好麻煩㗎啦。」佢:「我哋以前邊有呢啲嘢㗎,係你哋呢度寧舍多花臣,而家呢個年代都唔知咩年代嚟!」 佢離開了。我頭先同緊咩人講嘢呀?

Read More

【夠鐘食藥】或者有日我哋可以再相遇

熱浪回貓星一星期了,你快樂嗎? 尚記得十三天前從別人手中接你回家,十三天後把你交到別人手中,那感覺很不真實。嗰晚同你插喉灌食後,睇住你安穩舒服的睡覺,我同雞爸快快手落樓食晚飯。回來後,你走了…我抱起你時,身體仍暖,我以為係你瞓得太冧…『小朋友?熱浪?起身啊?』你再冇回應,身體呼吸再沒起伏。雞爸把你放在小盒子內,我坐在一旁,突然聽到你在門口那邊響亮的『喵~』了一聲。我問雞爸『係咪熱浪嗌呀?係咪未死呀佢?』,雞爸再三檢查後擰擰頭。大概係你同我講再見了…熱浪,你好乖啊。老人家成日都講乖嘅有靈性嘅寵物係會唔願意俾主人見到佢死,所以佢哋會揀離家出走或者趁主人唔喺屋企時死… 你走嗰晚,我刪除電話內嘅熱浪夠鐘食奶鬧鐘提示,嗰每隔三小時不分晝夜的提示,係你喺呢頭家出現過最後的證明。家中已沒有你的叫聲,感覺好空洞,原來『多一隻唔多,少一隻好覺』係咁解。你唔舒服睇醫生時,醫生已提醒我奶b係好易走好脆弱。雖然我已做好心理準備,但同時我亦希望有奇蹟出現,就好似糯米雞咁,我希望可以用我嘅努力用我嘅心機補回你一切嘅不可能不完全。 不過現實並冇咁多奇蹟,只有現實嘅生老病死…你嘅離開固然難受,但總要面對總要承認現實中並冇十全十美一帆風順。或者有日我哋可以再相遇,我嘅熱浪仔仔,媽媽會再同你見面的,再見。

Read More

【夠鐘食藥】我賣咗間屋都唔會俾你哋

有日一位阿姨帶住婆婆嚟到診所。阿姨:「姑娘,我阿媽想入老人院,佢要做呢啲檢查呀」我:「好呀,麻煩你俾婆婆嘅身分證明文件我呀,我同佢登記先」企喺身旁嘅婆婆問:「係咪真係要去嗰度住呀?」阿姨:「媽,乖啦,我會成日過嚟睇你㗎」婆婆:「我唔想去生保地方呀,生保床我唔慣呀」 阿姨:「唔好咁啦媽,我哋之前傾好咗㗎嘛?我會成日過嚟睇你㗎啦」婆婆:「我自己行得走得都唔駛你照顧,我自己喺屋企都冇問題呀」阿姨:「屋企地方細都冇位俾你啦」婆婆:「我阻得幾多地方呀?老人院有幾大地方俾我呀?咪又係一個床位」阿姨:「嗰度有好多人陪你呀嘛,你去到唔怕悶呀」婆婆:「我要嗰啲人陪我做咩呀?我唔要嗰啲人呀,我都唔識佢哋」阿姨:「唔好再講啦,話咗去㗎嘛,屋企真係冇位啦。阿孫都大啦,佢都要自己一間房㗎」婆婆:「我真係唔想去呀」 阿姨問我:「姑娘,登記完呀?可唔可以快快趣同佢做咗先呀?」我:「但係你哋好似未傾掂啊?不如傾好咗先啦」阿姨:「傾好咗㗎啦,唔駛理佢㗎,老人家係咁麻煩」我:「做檢查唔係望兩望就得㗎,都要婆婆配合嘅,如果佢同意嘅就當然冇問題,但係佢唔同意我哋都唔可以迫佢做檢查嘅」阿姨:「幫吓手啦,責住佢嚟做又好,綁住佢嚟做又好,今日點都要做㗎啦,佢唔走我哋邊有地方住呀」婆婆一直都喺你身邊聽住你講嘢…阿姨:「姑娘拍硬檔呀」婆婆出聲了:「間屋我嘅,伯爺公走咗,你就趕埋我走。你返嚟住嗰時話要照顧我,我至俾你哋一家幾口嚟住…」阿姨:「阿孫大啦嘛,老人院有咩唔好呀?又多人陪你,你又唔駛咁悶。」 婆婆指住阿姨個頭:「你哋要住大地方就自己扯,我賣咗間屋都唔會俾你哋!」 講完之後忿然離開診所。留低阿姨企咗喺度,佢望望我:「哎,啲老人家真係寧舍煩,我遲啲再同佢過嚟呀」自此,我就再冇見過佢哋。

Read More

【夠鐘食藥】己所不欲,勿施於人

最近網上流傳一影片~係喺隻貓面前示範『如果主人被咬會有乜下場』,主人拎住一隻公仔扮成俾公仔咬,然後對公仔施展一輪暴力⋯主人隨即伸手俾貓,試試自己隻貓會唔會咬佢~結果當然貓冇咬主人。 主人雖然成功『教育』,但喺我角度睇⋯呢啲教育係失敗嘅~因爲大家建立嘅信任,喺主人向公仔施暴時已被破壞。寵物單純得如白紙如小朋友,大人要教小朋友唔好百厭時,係咪都用類似招數去恐嚇?『你唔聽話,你就會同佢一樣有呢個下場!』,呢個陰影⋯你唔會知道對佢哋有幾大影響~因爲拍呢啲整蠱影片嘅拍片者好似從來唔會考慮到呢啲問題,佢哋只求開心同觀眾回應⋯繼而好多人見有回響喎,就相繼模仿。以前有段時間,有人趁貓唔留意時放條青瓜喺貓身邊,等貓擰轉身望到時嚇到彈起,好多人睇完覺得好得意,就不停模仿⋯網絡上岀現好多類似嘅影片。我唔理解呢類拍片搏回響嘅行為,或者你會諗『嚇吓啫玩吓啫,有幾大不了呀?』,但係我真係想提醒大家,不論人定動物,有好多表面健康嘅都有機會係有隱性心臟病。嚇吓啫,真係可以一下子就死㗎啦~死咗時,你喊幾多次後悔自責亦無謂。 對人定對動物都好,都應該諗吓『己所不欲,勿施於人』。冇得玩好平淡好平凡乏味呃唔到like喎?你要岀位嘅,自己何不嘗試去彌敦道裸跑?整蠱影片~對比下都只不過係碎料啦~

Read More

【夠鐘食藥】我諗…你呢世都唔會成功

有日一位先生嚟到診所。佢問我:「姑娘,咩都睇㗎嘛?」我:「入去同醫生講呀,如果真係我哋醫生幫唔到你嘅,都會轉介你去睇專科嘅。我同你登記先呀,麻煩你身分證呀」佢:「我可唔可以問咗醫生睇唔睇,先再決定睇唔睇呀?」我:「你想睇啲咩呀?」佢:「er…我想幫我女朋友問㗎」 我:「咩嘢呢?」佢:「體味方面有冇得改變㗎?例如好臭」我:「或者你嗌你女朋友自己嚟睇醫生呀,到時再同醫生傾都得㗎」佢:「佢自己冇咩所謂咁呀,係我有所謂所以先嚟…」我:「但係我哋都要佢本人嚟咗先嘅,咁先知道你所講嘅體味有冇得解決」佢:「er…我帶咗嚟呀」我:「你帶咗咩嚟呀?」佢:「佢啲味…」你點帶佢啲味過嚟呀?用個樽裝住呀?我:「…佢啲味?」佢喺袋入面拎出一個保鮮袋,內裡有一團紙巾:「呢度」我:「真係唔好意思呀先生,我哋唔會咁樣俾意見,醫生都唔會咁樣診症㗎。你叫女朋友過嚟啦,有需要嘅會轉介佢去皮膚科」佢:「醫生要親自聞㗎?」我:「又唔駛嘅,但係醫生要親自同佢本人傾㗎嘛」佢:「嚇得我呀!我以為醫生要親自聞西呀!」我:「吓?」 西?西?西?唔係加拿大小狐仙咩?咁你嗰舊紙巾… 佢:「我都要諗吓點叫佢嚟喎,我冇可能直接話佢臭要睇醫生㗎嘛」我:「呢個…你哋自己傾啦,我俾唔到意見你呀,不過清潔得好啲嘅話應該問題不大嘅」佢:「我plan plan,搵個最好嘅時機先講」 我諗…你呢世都唔會成功。

Read More

【夠鐘食藥】佢哋做錯咗啲咩而要坐一世監

以前細個會一家人去海洋公園,到人大咗會發覺即使海洋公園入面嘅動物係假嘅,都一樣會好開心。因為重點係一家人,係邊個同我去,而唔係原本唔應該喺入面嘅動物… 網絡世界令人易知天下事,動物園動物表演…表面華麗動物可愛~睇動物表演時,個個都讚啲動物好叻。但係有冇諗過呢啲係原本佢哋唔需要識嘅嘢,只係佢哋被訓練出嚟,訓練又係點訓練?大象俾人鞭打,獅子老虎俾人剝牙…我哋睇緊嘅表演對於我哋觀眾係可有可無嘅節目,但對動物嚟講就可能係一個地獄。 最近日本有個動物園結業並遺下動物…睇報導留言好多人都覺得好意外。『日本咁有文化,文明大國都咁樣?』,每一個地方都有壞人好人,冇一個地方係會100%好人,有嘅都只係你自行幫佢加上嘅光環。你去旅行見到嘅一切都只係好表面嘅事,因為你每日喺嗰度都只需要食屙買瞓,你並唔係喺嗰度真真正正咁生活過…動物園亦都一樣,你以為動物喺入面日日食屙瞓好愜意舒適,事實佢哋又係咪真係想留喺嗰度一世…究竟呢啲動物原本係喺邊生活?佢哋嘅由來係點? 究竟佢哋做錯咗啲咩而要坐一世監… 我哋根本唔需要動物園或任何動物表演,去動物園又唔係可以親身感受俾老虎咬死嘅,咁我要隻活生生嘅老虎喺度做咩?我睇電視都睇到啦~

Read More

【夠鐘食藥】講咩都用多謝

有日診所好忙~ 一位新症嚟到登記處前問我:「而家登記等幾耐呀?」我望望登記名單:「而家嘅話…排第三十七」佢:「即係等幾耐呀?」我:「確實時間我答你唔到嘅,因為我唔知佢哋會喺醫生房度睇幾耐或者有冇咩檢查要做~大概預返五分鐘一個人啦,三個鐘左右啦,你兩個半鐘後再返嚟等啊」佢:「你講笑呀?」我已經忙到一頭煙,唔得閒同你玩呀~我:「冇講笑,你前面係有咁多人」佢:「喂!你啲態度好差喎?」忙都算,有咩慘得過忙嘅時候仲要有人嚟刷存在感…我:「先生,我哋今日真係好多人,如果你要睇嘅我就同你登記啦~」佢:「而家唔係登唔登記呢啲小問題,係你俾我感覺好差呀,而家好似要我跪喺度求你?」既然你個病咁小問題,扯啦,唔駛睇醫生㗎啦,返去打場飛機出身汗就好㗎啦。我:「你要睇醫生嘅就登記,其他嘢你可以到時入房再同醫生講」佢:「喂!你黑口黑面到咁?我點睇得落呀?」最近曬黑咗少少,都不至於黑口黑面啊?隔住個口罩你都睇到我黑口黑面,你好勁啊,你有神奇透視眼啊!我:「先生,我冇黑你面啊」佢:「咁你係咪應該講咩都用多謝做結尾呀?」啊!你鍾意呢味呀? 『先生,要睇醫生就登記啦多謝』,『你排第三十七呀多謝』,『我咁講嘢法係咪選緊香港小姐呀多謝』,『你係咪痴線㗎多謝』 我:「你係咪睇醫生呀?係就俾身分證我啦好冇?」佢:「你啲態度咁差咁西,我睇你咪即係縱容你!睇唔落呀!」 佢轉身離開。多謝。

Read More

【夠鐘食藥】大家一直互相傷害啊~

糯米雞因為便便問題,佢係唔可以完全食乾糧~不過佢又真係特別鍾意食乾糧…大概係因為乾糧比較重口味,所以久唔久都會俾一餐乾糧佢食吓。 喺長期食罐頭情況下,我發覺佢真係好麻煩,唔係麻煩在佢大食方面,煩就煩在佢食咗一個牌子大概幾個月後,佢會完全唔再願意食嗰個牌子…我已經唔係每餐同一口味咁俾佢食,我係會轉口味㗎!以前食過嘅生肉,食過嘅貴全餐罐,佢突然就係咁有一日全部唔再食。就算餓咗佢一餐,佢下一餐都唔會考慮食吓呢啲『舊愛』… 仔呀,你知唔知罐頭牌子唔係好多款㗎咋?你咁搞法,好快食晒全香港有得賣嘅品牌㗎啦!我真係頭都痛埋…以前嘅佢明明屎都唔臭都可以照食咁款㗎?搞咩越大越有要求呀?我而家屋企有超過九十幾罐『舊愛們』,就係因為我以前見佢食得咁好咁開心而囤貨的… 我望住堆『舊愛們』,再望望糯米雞以前嗰本寫真集,真係概嘆自己俾呢個仔玩咗一年有多。而家堆罐頭成為咗家中其他貓姨姨嘅零食…班貓姨姨梗係開心㗎,本身已經有幾個櫃桶嘅零食,而家又多咗九十幾罐零食,想唔肥過肥婆媽媽都唔得啦? 我而家學乖咗啦,食完先再買,每次只買少量~唔記得咗或者唔得閒買罐頭?咁就Oh sorry啦~糯米雞你會冇罐頭食㗎啦,食自己隻腳趾啦你。你嘅貓生同我嘅人生反正就係大家一直互相傷害啊~

Read More

【夠鐘食藥】好大嘅官威啊

佢氣都喘埋衝嚟登記處:「我要睇先呀!」 你話睇就睇~好大嘅官威啊? 我:「我哋要排隊㗎~你要睇嘅俾身分證我啊,我同你登記呀」佢:「我嗌得睇先梗係有需要睇先㗎啦!你係咪有病呀?」我就冇病啦,係你有病先要睇醫生啫~雖然我真係唔覺得你好緊急,但係我都係戴定頭盔先。我:「你有啲咩事咁緊急啊?如果係我哋處理唔到嘅,你可能要去醫院㗎喎」佢:「我M到呀」用M巾囉~冇呀?去買囉?我:「咁應該可以等喎?我同你登記睇醫生啦~麻煩你身分證」佢:「M到唔等得呀!我要睇先呀!」你咁好中氣,痛極有個譜啦,我見過大把人痛到面都青,企又企唔直~我:「你好痛呀?」佢:「冇痛呀」咁你喺度拗乜呀?我:「咁你係睇M到啲咩呀?」佢:「我要停咗佢呀!即刻呀!」我:「即刻?佢嚟咗就冇得停㗎啦~」佢好詫異:「你講真定講假呀?醫生喎?醫生唔係識止血㗎咩?你都唔識㗎?」平時止血就按住個出血位一陣…你不如試吓?我:「M到流出嚟嗰啲同流血唔同㗎~唔係話止就止~」佢:「我要去船P呀!我專登拎annual去㗎」我::「或者你用棉條啦~」佢:「我就係唔想用呀!喺人地面前抆條嘢出嚟咩?」吓?做咩無啦啦要喺人哋面前抆呀?啊~唔通…我:「呢個我哋都幫唔到你啊」佢仰天大呻:「搞~~錯~~呀,M咩到呀~」或者等收經再去囉?

Read More

【夠鐘食藥】渴望大自然賜大家一個颱風?

香港人工時長,假期少,所以渴望大自然賜大家一個颱風,令大家都有得額外多一日假。不過呢部份人應該代表唔晒全部香港人,有好多人喺打風期間都仍然要堅守崗位… 每逢打風時,就會見到好多人講『個風越大越好!唔駛返工最好!最好有全日假,最好吹冧埋我公司!』,你安坐家中開住冷氣梗係爽啦,出面橫風橫雨都唔關你事啦。雖然見到呢啲人咁講嘢會覺得好抆,但係同佢拗嚟其實一樣好無謂,你會唔會浪費時間同個傻嘅拗? 喺打風期間,最無助嘅都係喺出面流浪嘅動物,人有臨時庇護中心,但動物呢?呢啲日子仲係生仔高峰期,雖然好多人都話流浪動物匿開就識搵地方避風,但係湊住堆B嘅媽媽,好多時都顧唔到咁多。特別係村入面,好多時大雨後會發現有啲BB俾雨水沖咗出嚟,好命嘅俾人發現到執身彩,唔好命嘅大概已經成為食物…自然界嘅弱肉強食就係咁。作為人類,我哋都未必可以幫到全部,遇到需要幫嘅動物時唯有盡幫。 雖然有一邊嘅人好渴望打風打到吹冧埋公司,但係同樣有另一邊嘅人唔希望打風打到吹冧流浪動物嘅暫避處。就好似有人會將一卷膠紙抬高價格至八十蚊,亦有人會五蚊一卷咁賣俾人。我都唔知有啲人算唔算係識做生意識賺錢啦,我淨係知香港地咩都炒係大家縱出嚟…香港有啲打工嘅咁渴望打風死人冧樓,都可能係因為工作壓力太大卦。

Read More

【夠鐘食藥】你真識食~

有日一位姨姨嚟到診所。佢行埋嚟登記處問我:「阿妹呀,你哋睇唔睇鹹魚呀?」 鹹魚呢範係咪應該去搵獸醫呀?買賣鹹魚嘅去街市啦~我:「唔好意思呀,我哋呢度西醫診所嚟㗎~醫人㗎喎」佢:「我梗係知啦~所以我先嚟搵你。」我個樣睇嚟似鹹魚再生父母嗎?我:「…鹹魚喎?死咗嗰啲喎?」佢:「哎呀!我話你聽啦!鹹魚喺我度呀!我老公對眼咪唔係咁好嘅。」我:「啊!你老公要嚟睇眼呀?」佢:「你聽我講埋先啦!我老公老啦嘛,佢呢輪返到屋企,我喺度煮飯,佢梗會問我『今晚係咪有鹹魚食呀?』,我邊有整咸魚啫!我冇為意呀嘛,咪話冇囉!點知個衰佬日日都問我喎!我以為佢好鬼鍾意食鹹魚呀!呢啲嘢佢邊食得呀!就噚晚咋嘛,佢自己上咗床瞓先,我做晒家頭細務先上床啦,我一上床佢又問我『老婆,你夜媽媽仲整鹹魚食呀?』。我把幾火話冇啦,佢仲話『唔係喎,我聞到有鹹魚味喎,仲要係好平好低質嗰種喎』。佢索吓索吓,索到去床尾,即係我下面啊!佢好大聲咁講『係佢啦!』,佢話陣鹹魚味係喺我度呀!」 你下面即係…係咪要洗鮑鮑啦?我:「你想做婦科檢查?」佢:「啋!我都幾十歲人做咩檢查呀!我講我隻腳,腳掌呀!佢話我隻腳有鹹魚味呀!嬲到我震呀!」我恍然大悟:「哦~係咪甩皮有水泡好痕咁呀?香港腳呀?」佢:「甩皮?我以為自己換皮咋喎…」 你係蛇嗎?換皮嚟做咩呀?

Read More

【夠鐘食藥】以前嘅糯米雞已經唔喺度

2018年9月~代表糯米雞已住喺豬家一年有多~ 當初嘅細細粒貓仔而家已經變成肥條條大大舊,望返上年同月整嘅月曆相,不知不覺,我覺得大家真係一齊做咗一件好了不起嘅事。我真心想讚大家咁多位奶媽奶爸嘅,喺呢年入面你哋成日聽我廢噏,我出廣告文賺罐錢你哋都會支持。以前爭落一身卡數碌爆卡嘅時候,雖然我印象中明明記得自己嗰時係冇公開講過,但係你哋都好似知道我好唔掂當咁,會送罐頭俾我,媽媽們又將家中BB唔啱用嘅尿片送俾我。直到而家,仍然有有心人送罐頭零食俾我,亦仍然會有人同我講想助養我屋企班毛毛… 不過我一直都覺得呢個係我責任,因為係我自己當初選擇要留糯米雞喺度,係我自己喊苦喊忽叫個天留佢一條小命,所以佢係我嘅責任。我一直都覺得直接用錢助養就真係唔好啦,出面有更加多需要醫療費暫託費嘅毛毛,如果想幫吓我嘅,可以買吓糯米雞本書,又可以買吓佢嘅月曆。而家糯米雞穩定晒,雖然食量一樣咁大,不過至少喺開支上少咗一筆醫療費,亦唔需要再撲嚟撲去搵醫生,我個心臟都受少啲刺激。而家見到嘅糯米雞,眼神都同以前截然不同,真係可以好有自信咁講『我大隻咗又靚仔咗,考試仲一百分添』。 以前嘅糯米雞已經唔喺度,以前拋棄嘅主人亦請唔好打算喺而家出現返,一年前你咁樣對佢,一年後你唔配為佢講任何嘢。即使你有苦衷,我都唔希望你嚟打擾我哋嘅生活。當年我選擇唔打擾你唔追問你任何因由,而家亦希望你可以一樣。

Read More

【夠鐘食藥】先生你應該熱到有啲眼花

有日一位叔叔嚟到診所。 佢成塊臉出住水行埋嚟同我講:「喂,去呀」我:「吓?去咩呀?」佢:「我部冷氣唔出風呀!」阿先生,你應該熱到有啲眼花呀?我哋診所嚟㗎喎~我:「我哋呢度西醫診所嚟,冇人整冷氣㗎」佢:「你唔整嘅咪寫張紙俾我放假囉」終極目的係病假紙嗎?咁都俾你兜到搵位入?高手嚟喎~我:「你要睇醫生嘅我就同你登記啦,麻煩你俾身分證明文件我呀」佢:「我唔係嚟睇醫生呀」我:「咁我哋冇其他嘢可以做啦~」佢:「管理處叫我過嚟㗎!」係呀?肯定係見你病成咁,叫你快快嚟睇醫生啦,不過我哋普通科嚟~都要轉介你去專科啊。我:「佢叫你過嚟做咩呀?」佢:「過嚟咪過嚟囉」過嚟隻揪呀?我:「可能先生你聽錯啦,佢可能係叫你去搵冷氣師傅啊,或者你去商場周圍望吓有冇師傅幫到你啦」佢:「你都要俾張紙我呀!我都要放假去搞呀!」病因係咪寫『因家中冷氣需維修』?我:「如果你係有咩唔舒服嘅可以睇醫生,等醫生睇吓你需唔需要休息而寫病假紙啊」佢:「你係咪聽唔明呀?」聽唔明嗰個會唔會係你啊?我:「你部冷氣唔係我哋整壞㗎嘛,如果你係因為身體狀況唔好唔舒服嘅,你係可以睇醫生,我可以幫你登記~但係絕對唔會因為你部冷氣壞咗,我哋就會寫病假紙俾你,你明唔明呀?」佢:「_你老_!講極都唔_明,蠢到成塊嘢咁!我去搵管理處同你講呀!」 先生離開後,然後…太陽日落西山,佢再冇返過嚟。唔知佢係咪俾管理處直送入醫院呢…

Read More

【夠鐘食藥】點解收百五蚊診金呀?

有日有位小姐嚟到診所睇醫生。睇完醫生,拎藥時,佢問我:「有冇收據呀?」我:「哦?有呀,下次喺房同醫生講要收據就得㗎~你等等啊」等醫生寫好收據後,我轉交俾小姐。 佢望望收據問我:「個價錢唔會寫明幾多幾多錢咁計㗎咩?」 我:「吓?我唔係好明你意思~」佢:「即係好似打邊爐咁逐碟料寫明幾錢呀」 呀~我食開任食㗎,全包呀!我:「我哋唔會咁寫㗎~我哋診金連藥費咁一個價錢啊」佢:「咁一係你分開診金同藥費寫呀?」我:「你保險要咁寫明呀?」佢:「唔係呀,我純粹自己想知嘅唔得咩?」…得~仲吹你唔漲添。我:「我幫你問問醫生呀」醫生喺診金同藥費一欄填上銀碼後,我再俾張收據小姐。佢望望又問:「診金成百五蚊?」我冇出聲。佢繼續講:「診金收費係點定㗎?」全憑醫生自覺值幾錢,好似係應該係,除非唔係。佢再繼續講:「你知唔知係點定呀?醫生自己定價定係你同佢定價㗎?」我:「醫生自己定嘅」佢:「醫生覺得自己應該收百五蚊診金呀?」我:「小姐呀~其實我哋呢度有貼紙出嚟寫明幾多日藥連診金收費係幾多嘅,你頭先冇睇到咩?」佢:「我問佢點解收百五蚊診金咋嘛」我:「診金呢啲係醫生定嘅,百五蚊都平㗎啦~」 佢:「去打邊爐都有寫明花生醬油茶芥幾錢位啦」 你好喜歡打邊爐嗎?做咩係咁一直講打邊爐啫~呢度診所嚟㗎!唔通醫生逐個步驟同你計錢呀?聽肺一個收費,問診一句一收費咁呀?我:「不如咁啦,你有咩問題嘅,一係我俾你入返房直接自己問醫生呀?你自己問醫生點解佢收百五蚊診金呀?」佢嘴藐藐收埋張收據離開診所:「問真啲問多幾句,咁都發爛渣」我咁都叫發爛渣?你真係未見識過真正嘅發爛渣啊~

Read More

【夠鐘食藥】付出嘅唔係錢咁簡單

我曾經喺網上見到人問『我部寵物水機有好多蟲仔,點算?』,『貓砂盤好大陣味,點算?』。呢啲係你自己清潔得唔好,懶於清潔嘅後果啊。 我亦曾經去過一個義工暫托貓嘅地方,見到貓嘅食物兜充滿污漬…嗰啲污漬並唔係一兩日就可以儲成,連基本清潔都做唔好,但係平時就成日見佢周圍走又可以成日上facebook呃like,我心入面即刻將呢位貓義工打叉叉。你可以利用動物去幫自己成名,但首先請你做好啲基本嘢先。 人懶真係唔好養寵物,養寵物唔會令你變得勤力,只會為你生活上帶嚟更多嘅需要做嘅嘢。連自己都未照顧好,平時亦懶得打掃嘅,一個人養我養嘅心態下,往後幾十幾廿年就要日日左清右潔,又要執屎又要洗兜。到寵物年老時,更要花更大心機時間去照顧佢,所以養寵物並唔係一時慶起,係一世嘅責任。唔好信任何人講嘅『貓好獨立,唔駛點打理㗎』,呢個只不過係一個對比。對比起你養一隻拉布拉多狗,貓的確係比較獨立亦唔駛點打理。因為拉布拉多精力非常旺盛,你唔同佢出去跑街嘅話,你間屋分分鐘會冇咗。我鄰居就係因為收養咗隻拉布拉多,身型由大碼變細碼。因為佢一日至少要俾隻拉布拉多落街跑三次,當然拖住繩嘅佢都要跑埋一份…咁對比下,貓真係好似唔駛點打理。 不過你望望原本自由極懶嘅自己,你本來就乜都唔駛理,養貓後你每日要清潔砂盤食物兜水機,吸塵拖地,甚至有機會每日換床單。同你嘅無貓生活對比下,有貓生活係咪即刻覺得要打理好多嘢?養寵物付出嘅唔係錢咁簡單。

Read More

【夠鐘食藥】你係咪痴_線㗎?

電話響起~我:「你好,乜乜診所」 小姐一開口就大鬧:「你係咪痴_線㗎?」你係咪問緊你自己?我:「請問咩事呀小姐?你冷靜少少先~」佢:「你俾啲咩我阿媽食呀?你係咪痴_線㗎?」我:「你阿媽呀?你有冇你阿媽嘅名俾我?今日嚟睇過醫生嘅?」佢:「你係咪痴_線㗎?你搞到我阿媽咁樣你唔記得佢?」『你係咪痴_線㗎』呢個係你口頭襌嗎?你去買嘢都會咁的嗎?『你係咪痴_線㗎?我要C餐凍檸茶』,『你係咪痴_線㗎?我要紅件呢件衫,要新嘅』我:「你冷靜啲先~我都要睇排版嘅,你就咁打過嚟我唔知你係邊個,亦唔知你阿媽係邊個嘅,佢係咪今日嚟睇過呀?叫咩名啊?」佢:「早幾日嚟睇啦!乜乜乜呀!」我搵足四日內嘅登記資料,終於見到乜乜乜個名:「請問小姐啲藥有咩問題呢?」佢:「我阿媽話你俾埋啲咩軟骨精佢食呀!食到佢而家個人唔知點咁呀!你係咪痴_線㗎?」我:「我睇返紀錄,醫生係寫咗張紙俾佢去買藥,我哋診所本身就開咗啲止痛藥俾佢,你所講嗰個軟骨應該就係醫生寫紙提議佢出去買嘅~係葡萄糖胺加軟骨素嘅保健品~」佢:「你係咪痴_線㗎?開咩軟骨精俾佢食呀?人嘅骨係要硬㗎嘛!食到佢軟到唔知點咁!做咩事呀?」你係咪誤會咗軟骨素呀…你以為佢係化骨綿掌提鍊而成嘅丸呀?我:「小姐呀,或者我解釋你知呀~軟骨素係用嚟修補關節軟骨嘅,或者可以話係一種潤滑劑咁嘅嘢~佢唔會將硬嘅變軟…保健品嚟~我哋診所都冇藥可以軟咗人啲骨…」 『嘟』 我被CUT線了。我明白小姐你都一片孝心,只不過係擔心自己媽媽~不過下次可以試吓GOOGLE咗先~

Read More

【夠鐘食藥】好命嘅尚有全屍 唔好命嘅全已化屎

我家班大帝係好為食嘅,凡係佢哋知道食得嘅嘢,不論人食定寵物食嘅,佢哋都會有興趣。好多時一不留神,就會見到包裝袋被撕咬,好命嘅尚有全屍,唔好命嘅全已化屎… 教係得教嘅~首先需要教嘅係自己先。每次發現零食被偷食後,好多人第一個反應會係『有冇搞錯呀?偷食零食?』,繼而就會捉住隻狗或貓又打又罰話一番。但係捉賊都要拿贓呀,如果你唔係當時見到佢撕咬緊個包裝袋,你只係返到屋企見到凋零嘅碎屍,你再打佢話佢,佢都可能已經唔記得發生咩事。佢好大可能只會覺得點解佢開心迎接你返屋企之後就係俾人打同鬧? 其實首先要自己收好啲零食先,因為屋企唔係你一人獨享,你需要嘅係顧吓寵物感受先。俾著係你,你一日廿四小時都喺一間屋度,人生真係除咗食屙瞓就冇其他嘢做,你悶唔悶先?口唔口痕先?口痕搵嘢食係本性嚟,見到好似擺得入口就咬㗎啦,食落又幾啱口味就吞㗎啦~如果我係動物,我鬼識分咩係人食定寵物食咩,我又唔識字。 所以我哋作為識字識分咩係佢哋食得或唔食得嘅人類,我哋應該好好放好啲零食同任何物件。唔好到佢食咗之後先教訓佢做咩食咗你啲嘢~你應該問自己『係咪你冇放好啲嘢』。如果見到佢食咗一啲唔應該食嘅嘢,亦請麻煩你好好觀察佢身體狀況有冇異樣,如果你係愛錫佢嘅係應該好好保護佢。

Read More

【夠鐘食藥】唔係醫生唔好開診所呀嘛

有日下午,一位先生嚟到診所。佢揚揚衣領行埋嚟登記處問我:「食咗飯啦可?」 我望望鐘,下午茶時間都過了:「食咗啦~係咪睇醫生呀?」佢:「算係啦」我:「麻煩你俾身分證我登記呀~」佢:「咩都睇得㗎?」我:「你想睇啲咩呀?」佢:「我未諗呀,醫生可唔可以搵到我有咩問題先呀?」你當醫生有超能力的嗎?一睇就睇得穿你身體有咩事?我:「你知唔知自己有邊度唔舒服啊?」佢:「我唔知呀,就係覺得有啲嘢咁囉,但係真係講唔出係咩呀」我:「咁…醫生好難幫到你㗎喎~」佢:「醫生唔係醫生嚟㗎咩?」我:「醫生係醫生,但係你都要話俾醫生知你有邊度唔舒服,等醫生再同你檢查㗎嘛」佢:「我俾佢檢查呀,佢咪慢慢檢查囉,我冇所謂呀」你成個身體咁大忽,由頭檢到落腳趾尾嘅話,要檢幾耐呀?我:「ER….係咪心口痛呀?抖氣唔太順呀?」佢:「唔係呀,冇喎」我:「手手腳腳麻痺?」佢:「冇喎」我:「頭痛頭重重?」佢:「冇喎,你唔好問啦,直接俾我見醫生好過啦,你又唔係醫生!」對唔住,係我錯。醫生,靠你啦!一陣發現病人係運桔嘅唔好又炳我把關把得唔好呀!我:「好…」 佢入到醫生房,第一句就係:「你估吓我有咩事?估到你就真係醫生啦!」….好快,佢就俾醫生掟返出嚟。 佢邊講『唔係醫生唔好開診所呀嘛』邊離開診所,醫生有一望就知咩事嘅能力就唔駛屈喺度啋你啦~

Read More

【夠鐘食藥】想唔煩嘅,唔好養寵物

我成日聽到『貓狗食乾糧就夠㗎啦,濕糧嗰啲好易蛀牙㗎』 咁人係咪都一樣食乾糧就夠,唔應該食其他食物?因為大家啲牙都係牙啫,你啲牙特別硬淨啲?乾糧即係脫水,佢成份表入面不含水份,你有冇發覺貓本身係唔太鍾意飲水呀?因為佢哋天性係靠食肉去吸收水份,而唔係飲水補充水份。『唔係喎,我隻貓食完乾糧有去飲水㗎喎』,咁係因為佢真係好鬼死口乾呀,你食完成包餅會唔會一啖水都唔飲呀? 根本食乾糧同食濕糧都一樣有機會影響啲牙,只係睇你平時有冇同佢清潔。長期食乾糧更加會引起令一個問題,就係水份不足,有機會影響埋個腎。食乾糧冇問題,只係好似人一樣,食物唔可以係單一習慣性咁食,一定要配合埋其他食物。即係我今日俾一餐乾糧佢,下餐就係濕糧,得閒嘅有心機嘅又可以整鮮食俾佢。 寵物唔係機械人,唔係入幾粒電芯就夠,你俾乜佢食,佢嘅健康就會係點~等如人都一樣,你食幾多,食有益嘅嘢定垃圾食物,你嘅磅數你嘅身體檢查報告都會如實反映出嚟。 每隻寵物嘅習性都唔同,有啲好鍾意食乾糧有啲好鍾意飲水嘅,所以人哋嘅寵物飲食係點,並唔代表你嗰隻都一樣,最緊要係你用心慢慢觀察你嘅寵物,再為佢揀選佢鍾意嘅飲食餐單。係煩㗎~養寵物就係咁煩。想唔煩嘅,唔好養寵物,請個鐘點姐姐返嚟打掃吓屋企好過~

Read More

【夠鐘食藥】你最好日日祈禱我冇事呀!

有日一位太太嚟到診所。佢喺登記處前大大聲:「你哋啲藥冇料到呀!離晒譜呀!搞到我哋全家都病晒呀!」冇料到同全家病晒之間究竟有咩關連呢? 我:「太太你冷靜啲先,你慢慢講我知咩事啦~唔好咁激動」 佢:「我個仔前日嚟睇過你呀!」我:「你個仔叫咩名呀?我睇睇排版先呀~」佢:「乜乜乜呀!我個仔叫咩名你都唔知,你唔好做啦!前日先嚟咋嘛!」你喺額頭刻住『我個仔叫乜乜乜』,咁就全世界知你個仔叫咩名冇難度啦~我望望排版:「你個仔有咩事呀?前日朝早睇完,今日啲藥應該食晒咁滯啦喎,仲好唔舒服?」佢:「我而家都病晒呀!」我:「其他人有冇睇醫生呀?」佢:「睇咩醫生呀仲?你啲藥搞到我全家都病晒呀!仲睇?」我:「我哋啲藥?我哋前日開啲藥淨係開咗俾你個仔咋喎?關其他人咩事啊?」佢:「就係你啲藥唔掂,啲菌惹到周圍都係呀!」我:「…藥係用嚟舒緩病徵…例如你個仔有流鼻水,醫生就會開啲收鼻水俾佢咁」佢:「唔殺菌㗎咩?又話西藥毒藥嚟?老鼠藥連老鼠都殺得死啦!」你其實係想借藥殺仔嗎?我:「…人食嘅藥喺醫生處方指引下服用嘅,係唔會死人嘅!」佢:「你連啲菌都殺唔到,仲搞到全家都中晒,你唔掂啦!你啲藥唔掂呀!冇料到呀!」我:「一個人病嘅,如果佢冇好好注意衛生嘅,即係唔掩口咳同打噴嚏,都有機會傳染俾其他人~就算佢食咗藥都唔會即刻好到…藥真係幫佢舒緩㗎咋」佢:「呵!有事就話舒緩舒緩!冇事就話醫得好人啦嘛!你呢個『醫者父母心』牌講咩醫得好人呀?呢度冇你嘅事啦!我有咩冬瓜豆腐實追你追到天腳底!你最好日日祈禱我冇事呀!」 『醫者父母心』嘅意思係咩啊?我讀得書少… 一個人病嘅,如果佢冇好好注意衛生嘅,即係唔掩口咳同打噴嚏,都有機會傳染俾其他人

Read More

【夠鐘食藥】對唔住,你嘅一番好意俾我掉咗了!

早幾日喺街發吽豆時,見到一個女仔撩隻流浪貓玩~ 玩咗陣,佢轉身離開。原來佢係去咗買罐頭返嚟…佢輕聲召喚貓:「喵喵~出嚟食嘢啦,我買咗好味嘅罐俾你呀」隻貓冇理到佢,佢將罐頭打開,就咁倒咗喺花槽…「貓貓,食嘢啦」,佢嗌咗幾次都冇貓走埋去食。佢準備轉身走…我同佢講:「你走啦?」佢:「係呀」我:「咁你唔執返好啲嘢㗎?」佢:「我要執返好啲咩呀?」我:「你頭先唔係倒咗pat罐頭落去咩?」佢:「係呀,我請啲貓食㗎」我:「咁你走嘅就要執返好先走呀,你唔可以就咁擺喺度㗎」佢:「我請啲貓食㗎喎,我係有愛心嘅人嚟㗎,唔係毒啲貓呀」我:「我知你係一番好意,但係你就咁倒咗pat罐頭喺度,最後食嘅都唔係貓,係大強咋,你連兜仔都冇個,就咁倒喺度都唔衛生啦,俾其他唔鍾意貓嘅人見到又入貓數㗎啦。其實呢度都有人餵貓㗎,你細心啲望會見到有啲兜喺度~」佢:「而家係得你話我啫,都冇其他人話我,我請啲貓食嘢咋喎」佢嬲爆爆走咗去。我行去佢倒咗pat罐嘅位,用紙巾一手拿起pat罐,再塞番落佢冇掉到嘅罐頭,一手掉入垃圾桶。對唔住,你嘅一番好意俾我掉咗了。 正正係因為餵貓嘅都係想為貓好,想減少被投訴嘅機會,所以要顧得更全面。最基本係保持地方整潔,令其他唔係太鍾意貓嘅人冇位入話因為餵貓搞到地方污糟晒。希望你會明白啦~

Read More

【夠鐘食藥】即係你話我本身好鬆啦!

電話響起~對方係一位女士:「診所?喂?」我:「你好~乜乜診所」佢:「你哋有冇啲檢查係FOR女性㗎?」我:「身體檢查係咪?我哋有婦科檢查~抹片有做㗎~會轉介你去化驗所度做,之後返嚟診所拎報告」佢:「係咪即係窒舊嘢入去嗰隻呀?」我:「會有個好似鴨咀咁嘅嘢輔助囉~」佢:「係呀係呀,我知呀,我曾經做過」我:「如果你係做嘅,可以親自嚟登記睇醫生,醫生會轉介你去做嘅」佢:「但係有冇得唔用嗰舊嘢做㗎?」我:「嗰個應該冇得唔用啊,因為要拎子宮頸樣本做化驗…冇得就咁拎到啊」佢:「我上次用完嗰舊嘢覺得自己鬆咗好多呀,所以之後我都驚咗唔敢再做」我:「正常就唔會嘅,因為有彈性嘅…又唔係放咗喺入面好耐」佢立即跳制:「你咁講咩意思呀?你話我鬆呀?」…明明頭先係你自己話自己鬆~我:「唔係呀~我意思係一個檢查唔會令到你有咁嘅影響~」佢跳得更勁:「即係你話我本身好鬆啦!係咪咁嘅意思呀姑娘?」咁…你要咁諗我又阻唔到你嘅~我:「我冇咁講過啦小姐,你冷靜啲先,你要做檢查嘅可以過嚟登記」佢:「我唔係打嚟俾你話我㗎!我都係想做檢查啫!我有錯咩?我冇錯呀~點解你要咁樣人身攻擊我呀?」我:「小姐..我真係冇呀…我…」嘟。 小姐未聽我講完已經CUT咗我線。我真係冇呀…個檢查真係唔會令人變鬆㗎!

Read More

【夠鐘食藥】忙,唔係將家人忘記嘅藉口

狗生貓生短短十幾廿年~你有冇諗過用幾多時間去用心對待佢照顧佢了解佢? 只要俾個地方佢哋住,繼續日日如常返工放工出街食飯吃喝玩變,返到屋企就咁摸佢哋幾吓陪佢哋玩一陣就可以。咁我就係好主人? 動物都有思想,佢哋都有情感。你對佢付出幾多,佢哋會知嘅。就好似我同b婆嘅關係咁,雖然佢係一隻懶得落地行,亦唔願意坐寵物車嘅狗。但係佢好鍾意落街吹風,一到秋天佢就會開始坐喺窗邊瞇起雙眼享受秋風,有時我返到屋企佢會刻意坐喺窗邊望望我,之後再望望街悶哼一聲。呢個時候,我就知道『b婆要出街了!』。就算嗰日幾忙幾攰都好,都要立即上狗繩抱佢落街。同佢落到街,抱佢抱到佢心愛嘅小草地,佢會行一陣,留低些少自己嘅氣味後,佢就會開始唔肯行,不停撲去我度扭抱…出名廢人冇力冇肌肉嘅我,抱完重七公斤嘅b婆後,我每次都會直接雙手報廢。 但係每次見到佢落完街吹風,睡得甜甜時,我就會覺得一切都值得。雖然我而家要身兼幾職去維繫生計,私人時間已經冇幾多剩,但係留俾班主子嘅時間的確係絕對一分一秒都不能減。佢哋就好似你嘅家人,你嘅父母咁,能相處時就該多相處。忙,絕對唔係一個將家人忘記嘅藉口。

Read More

【夠鐘食藥】你係咪屎蟲上腦啊?

有日一位叔叔嚟到診所。佢聲音響亮:「同我登記!」我:「麻煩你俾身分證明文件我呀」佢:「急屎睇呀?」急屎就去屙啦~你要醫生睇住你屙屎呀? 我:「你要唔要去咗洗手間先呀?」佢:「我去到就唔駛過嚟啦,你都戇L,你以為我好似你咁戇L呀?」係呀。我:「哦~便秘呀?睇,梗係睇啦」佢:「登記啦」我:「你都未俾身分證我,我點登記呢?」佢好唔順超咁拎出身分證,『啪』一聲放低喺枱面。等等吓,佢又問我:「醫生會點醫呀?」我:「我唔係醫生我答唔到你啊,你一陣入去見醫生再問醫生啊」佢:「你都戇L,唔係食藥嘅仲有得點醫呀?」你其實係咪鍾意自問自答啫?係嘅話,我唔騷擾你㗎啦~我冇出聲。佢繼續問:「我問你係咪食藥呀?」我:「登記好㗎啦,你坐低等醫生嗌名啊」佢:「我問你嘢十問九唔應嘅?」你都戇L嘅。我答你咪繼續俾位你入?我:「去坐坐先啦先生」佢邊行邊講:「呢間嘢啲姑娘咁嘅態度嘅?」 坐喺側邊嘅姨姨搭嗲:「你係咁話人戇乜,人哋梗係唔理你啦」佢:「你都戇L嘅,佢唔戇L就唔駛喺度啦,佢係醒就坐咗入房啦」姨姨亦廢事理佢。到叔叔入醫生房後,過咗冇耐佢就出返嚟,邊行邊講:「房入間嗰個都戇L嘅,開幾粒藥俾我就話得啦喎」佢坐坐吓等等吓藥,行埋嚟同我講:「我唔要啦!唔睇啦!當我冇嚟過啦」 我都未出聲,佢已經轉身離開診所。 你係咪屎蟲上腦啊?

Read More

【夠鐘食藥】你個屎忽仔好現真身啦喎

以前糯米雞細個時出親街,例牌一上車就會瞓覺,到落車時就會精神奕奕四圍玩,見人就會嗲,係一隻不折不扣嘅世界仔。 而家?一樣一上車就即瞓,但係已經唔會再四圍玩,淨係會縮埋一舊成舊蕃薯咁。我都係最近先知原來佢已經抗拒咗出街,佢已經決心做一隻深閨的小雞了。上次帶佢出街諗住可以同哥哥姐姐玩吓,點知去到佢對任何人都冇反應,就連餵零食俾佢都唔食…哥哥姐姐見到雞仔咁,就同我講『你又話佢好曳嘅?好乖喎!你平時屈佢㗎?佢明明就好乖好定』。我望住鵪鶉雞,心諗『你個屎忽仔好現真身啦喎!而家有新鮮生面口嘅肉俾你咬呀!快啲去咬到佢標肉汁啦!就好似你平時咬我一樣咁咬就得㗎啦』。雞眨眨眼望我,一副睬我都傻嘅樣… 就係咁,鵪鶉雞好乖好安靜,完全冇搞搞震咁瞓足兩個半鐘…到我哋返到屋企後,佢又繼續跑跑跳跳撩交打咬人。唔知係咪做咗公公後,又太耐冇出過街,佢已經完全融入家中,已經完全唔願意離開家半步…即係養純了的豬。 以前出街好英偉的雞不見了,係有少少傷心嘅,難得有隻貓仔肯出街。不過而家都冇打算再訓練返佢等佢習慣多出街,就繼續做家中大惡爺,出街鵪鶉雞嘅籮柚仔啦。反正我…抱住你都已經覺得好重啦肥仔,再拎埋你個籠仔真係直接斷手。

Read More

【夠鐘食藥】你都是但得好厲害

有日一位小姐嚟到診所。佢行埋嚟問我:「有冇子宮打呀?」我:「有呀~你打過未呀?」佢:「印象中有打過,又好似未打過?」 我:「你有冇帶針卡嚟?打過嘅話應該有張針卡俾你啊~」佢:「冇卡㗎喎,有卡㗎咩?我記得好似有打過呀」我:「咁你記唔記得喺邊間診所打呀?你會唔會去返嗰間打呀?佢有你紀錄嘛」佢:「唔係好記得喎,你唔可以同我打咩?」我:「因為你話你之前打過,我哋都要問清楚你係打邊一款啊~所以最好有針卡俾我哋睇返」佢:「咪子宮頸嗰隻囉」我:「我知啊,但係佢有分幾款嘅,你知唔知自己打邊一款?幾多價知唔知啊?」佢:「咩呀?咪子宮囉」我:「不如你諗吓自己去咗邊間診所打,去返嗰間打或者問返佢拎張針卡啊~」佢:「我真係唔記得邊間喎,你是但同我打返幾枝咪得囉,上次我都係是但行入是但一間叫佢是但同我打咋嘛」 咁多個是但,你都是但得好厲害啊。 我:「我哋一定要知你打邊款啊~」佢:「你當我冇打過唔得咩?」我:「唔得啦,你打過嘅就唔需要再打~唔駛重覆打嘅,同埋佢係半年內打三針,你記唔記得自己上次係幾時打啊?」佢:「姑娘,你唔好成日問我記唔記得啦,打針係你嘅責任你嘅問題,你唔好咩都推晒落我度先得㗎,你係應份知我打咗啲咩㗎喎!你冇料到就由佢啦!唔好再問我嘢呀!」 嚟,俾姨姨我CHECK吓你個腦係咪有咩事呀?

Read More

【夠鐘食藥】冇愛心嘅做咩開寵物店呢!

以前B婆嘅髮型同沖涼咪由我一手包辦嘅~ 有睇開我Page嘅人就知我對手有幾殘,將B婆個頭剪成梯形,鑽石形都試過…其實當時我係想剪圓…不過睇嚟應該係我完全冇天份加藝術感零分。嗰時點解我堅持咗咁多年自己沖涼剪毛呢~事源係有次我帶B婆去剪開毛沖開涼嘅寵物店,接返佢之後發覺佢成身震晒,返到屋企又唔願啋我。過咗半日都冇,B婆個身出晒紅點,好似敏感咁。就係呢一次,我覺得B婆喺寵物店度經歷咗一啲唔太好嘅事… 自此,我再冇勇氣帶B婆出去寵物店沖涼,B婆就一直做咗我手殘下嘅作品多年。直到大概年幾前,我行過一間寵物店見到佢哋全店都係大玻璃,所有行過嘅人都可以望到佢哋喺入面做緊咩~我當時見到一隻貓喺度吹緊毛,隻貓一路吹毛一路反肚俾店員摸肚,見店主唔摸佢又企返起身用個頭去頂人磨人~我望到呢個畫面覺得好溫馨亦好安心。所以就決定搵日帶B婆去沖涼剪毛!第一次帶B婆去,我記得我嗰時好似一個痴漢偷窺狂咁,喺遠遠望向寵物店,睇住B婆同店員嘅一舉一動,一望我就望足全程了…成個過程令我100%放心,接返B婆後,我問B婆『鍾唔鍾意呢度嘅姐姐呀?以後喺度沖涼剪頭髮好冇呀?』。B婆展露出佢個招牌笑容,好開心狗咁行返屋企。 搵一間真正有愛心會善待動物嘅寵物店真係好難~我有時都諗…冇愛心嘅做咩開寵物店呢…

Read More

【夠鐘食藥】醫生快唔快㗎?

有日有位小姐嚟到診所。佢行埋嚟登記處問我:「有冇啲舒服快捷嘅方法可以快啲俾我返屋企休息呀?」 有呀,門口嗰邊,擰轉身行返出去直接返屋企呀。我:「係咪睇醫生?係嘅麻煩你俾身分證明文件我呀。」佢:「醫生快唔快㗎?」我醫生係男人,男人最怕俾人話快㗎啦。我:「而家登記嘅都係等三個啫,你排第四~」佢:「四四聲咁唔老黎呀?」咁俾你排第十八囉好冇?我:「而家第四,好快第三第二,之後就第一」佢:「好啦好啦同我登記啦。」登記時佢又問我:「呢度咩都睇㗎可?」我:「你想睇啲咩呀?」佢:「我驗到自己有咗呀。」我:「係咪要寫轉介信去健康院?你要喺度驗多次啊,我一陣俾小便樽你,你去洗手間留少少小便拎返嚟俾我得㗎啦」佢:「唔係呀,我想快快手落咗佢呀。」我:「er…呢個你要入醫生房同醫生講啦。」佢:「仲要講㗎?係咪講完就即刻可以拎走㗎啦?」我:「我哋係普通科診所,你呢啲冇得喺度做㗎~醫生會轉介你。」佢:「俾返身分證我!」我擺返低張身分證喺枱面,小姐立即拎返,我:「你唔睇啦?」佢:「都冇得即刻拎走佢嘅我睇嚟做咩呀?家計會我去過俾佢問長問短煩到死,我就係見冇得即刻做先走咋嘛,唔係即刻做嘅駛咩你啫。」我:「呢啲冇得即刻㗎,都要俾個機會你諗清楚先…」佢:「諗咩啫,我梗係知自己想點㗎啦,要嚟做咩呀。」我:「既然係咁,你以後記得要做足避孕措施啦。」佢:「一個二個都教訓我,我唔係嚟俾錢聽你哋講耶穌㗎!」佢嬲爆爆走咗去… 既然知自己想點,點解唔做足避孕?

Read More

【夠鐘食藥】你再係咁落去,因住變孤獨雞~

最近發現天不怕地不怕日日蝦蝦霸霸嘅糯米雞,原來喺屋企都會有嘢怕! 佢怕嘅原來係…B婆!每次B婆喺床上面,雞仔都會慢慢接近張床,望吓床上嘅B婆瞓冧未~一望就可以望好耐,望到我都瞓著唔鬼理佢。有時B婆只不過係攤咗喺張床度,望見雞仔漸漸接近床時,就會即刻彈起身,兩個互相對望一輪,最後雞仔都係會悶哼一聲轉身離開。 零食時間,只要B婆一行近,雞仔就會立即縮口退步。總之B婆行到邊,雞仔就會退避~B婆真係有咁恐怖咩?我諗諗吓…對於雞嚟講,B婆又真係好似幾恐怖。當全家個個都縱到雞仔不得了,個個都咬不還口。B婆就唔係嘅,雞仔一咬佢,佢立即追住佢還撃,甚至有時雞仔只不過係唔關事咁行過,B婆都要吠佢幾聲。可能就係咁,呢年以嚟雞仔已經認定咗B婆係一個難搞嘅惡角色。我冇打算糾正佢哋之間嘅『敵對』關係,我覺得咁樣都幾好呀~ 同人一樣,我唔一定要做好人角色,我可以做一個惡人衰人角色,我唔需要你討好我,我亦唔需要討好你,大家之間就河水不犯井水互不相干吧。一個『好人』嘅標籤會為自己帶嚟壓力不適的話,就試吓做個只對自己好,別人眼中嘅『衰人』吧。 大愛有時未必係為人好,一啲將當大愛係理所當然嘅人唔會珍惜你嘅大愛,只會越踩越上,與其任由佢踐踏你,不如收起大愛。雞仔,你再係咁落去,因住變孤獨雞~

Read More

【夠鐘食藥】佢應該係隻食指甩咗呀

有日我睇睇吓劇,診所門突然『嘭』一聲~有位太太衝住入嚟診所。佢行埋嚟:「俾膠布我呀」做咩呀?隻玻璃門爆咗呀?流血呀? 我:「係咪整親呀?」佢遞出一隻手示意我快啲俾佢。我將膠布放到佢掌心,用心幫醫生:「邊度整親呀?要唔要洗傷口呀?俾醫生睇睇?」佢望望掌心內的一塊膠布,我以為佢會受到我嘅熱情打動…佢:「一塊?你當我乞兒呀?」哦?你咁樣肆無忌憚攤大手板拎嘢仲咁嘅態度,人哋都好禮貌過你啊!你唔好影衰人啊~我:「你整到邊度需要膠布呀?」佢:「拎膠布都要查家宅呀?」 我唔會再用熱情打動你啦,我決定要同你一鑊熟啦! 我:「唔係~只係我哋呢度診所嚟,你有咩需要就睇醫生」佢:「我拎膠布唔駛睇醫生呀」我:「我亦都唔係一定要俾你,俾你係人情啫。如果你真係有急切嘅需要,而我又見到嘅,我哋會俾你㗎~你整親邊度呢?傷口都要消咗毒先可以痴膠布㗎~」佢握拳緊握唯一的膠布:「你如果知我係邊個,你一定會俾我」哦。係呀?我要唔要幫你配大白鯊音樂呀?我微笑冇出聲。佢又攤大手板。我:「小姐,真係唔好意思啦,如果你有需要嘅,我同你登記睇醫生啦」佢:「服務性行業咁做㗎?今日你幫我,第日我幫你㗎咋!你咪唔好幫囉!」要人幫咁嘅態度,我未打鑊你都已經好忍耐㗎啦~ 佢邊揈食指邊離開診所,啊~我終於知佢咩事要膠布啦,佢應該係隻食指甩咗呀,吊吊揈啦~

Read More

【夠鐘食藥】自我中心嘅人唔好養動物

每次喺網絡上一啲動物群組度,見到有人出POST話發現邊度有貓攤咗喺地下唔郁…明明好心情嘅都會立即沉晒。 究竟要講幾多次要發生幾多次,啲人先知道住高樓大廈養貓唔裝窗網係極危險嘅事?動物就好似小朋友咁BB咁,佢哋係一張白紙,係唔知道咩叫『危險』,小朋友一直處於一個好奇嘅狀態,因為世上所有嘢都係佢哋第一次見第一次接觸。BB時學行時,佢哋會喺地下周圍爬周圍掂佢範圍內掂到嘅嘢。到再大少少,腳仔更加有力可以企到時,佢哋開始向上摸索,有啲掂到窗望到窗,佢哋會開始沉迷望屋外嘅景物… 你見到一個小朋友企喺窗前,你會驚嗎?你會同人講『我個仔好乖嘅,邊會跳落去呀?你估佢蠢嘅咩?』。蠢嘅唔係你個小朋友,係你,你蠢得好緊要,自私得好緊要。你淨係識用你自己嘅角度諗嘢,既然你咁自我中心,你養自己得啦,唔好養其他啦。 明明可以避免嘅意外,你哋就會用『裝咗窗網屋企冇咁靚呀』,『裝咗窗網開窗咪好煩囉』,『裝窗網唔平喎,好貴喎,自己整我又懶呀』…你要為靚,唔好養動物,因為養咗之後,屋企會好多雜物。你要為輕鬆,唔好養動物,養咗之後,你家務都做多幾轉。你要為慳錢,絕對唔好養動物,因為養動物係必需要錢!自我中心嘅人唔好養動物,淨係養你自己就好了。

Read More

【夠鐘食藥】再咁生法,你都會高幾吋啊~

有日有位先生面色好差咁嚟到診所。佢行埋嚟登記處細細聲講:「姑娘,登記呀,你哋要救我呀」我:「你邊度唔舒服呀?你面色都好差喎」佢:「我俾嘢插住好唔舒服呀」 我大為緊張:「邊度呀?整到邊度呀?」佢:「喺個胃對落呀,插住咗成晚,我真係就死㗎啦」我:「你俾啲咩插住呀?我哋呢度冇手術做㗎,一係你坐低先,我嗌醫生望望先呀,有需要嘅你都要去醫院㗎啦,知唔知呀?」佢:「應該係屎」我靜咗幾秒。佢見我呆咗:「姑娘?」我:「係講屎?你講你個胃俾屎插住?」佢:「係呀,佢再插上去就頂心杉咁㗎啦」你係嚟搞爛gag的嗎?枉我頭先為你而緊張…我:「身分證呀,我同你登記啦」佢拎出身分證問:「我會唔會死㗎?」如果你咁都死,你會成為史上第一個俾條屎插死嘅人,真係遺臭萬年啊。我:「你冇去廁所幾日咋嘛?」佢:「我有去廁所,係屙唔到佢出嚟,佢咪越生越長越頂越上」 你唔好再搞爛gag啦好嗎?我笑點好低㗎咋~你條屎快高長大啊。 我:「冇事嘅,醫生會開藥俾你嘅啦,放心啦,登記完㗎啦,你坐低等等呀」佢:「我坐唔到呀,佢真係成條咁插住呀,我摺唔埋呀」我:「咁你企吓啦,搵面牆挨吓啦,等六個啊」佢:「仲要等六個呀?佢又生多幾吋㗎啦喎」再咁生法,你都會高幾吋啊~

Read More

【夠鐘食藥】美好回憶一直都會喺度

曾經有人問我『你屋企養咗幾多動物啊?』,我每次數完講俾佢哋知之後,佢哋都會有同一個反應『咁多?』 有啲甚至會話『佢哋死嗰時你咪要傷心好多次囉?』。所有生命都有完結嘅一日,我哋唔係不死身,生死冇辦法由自己控制之下,唯有放下。我曾經養過好多仔仔女女,有好多都已經走晒去玩,而家走剩嘅就係大家見到嘅五貓一狗。但B婆其實都已經唔細~已步入老狗階段。而我都決定咗養埋呢班仔女,我就收手。 如果問我面對佢哋嘅死會唔會傷心,會唔會唔習慣…答案一定會係傷心亦唔習慣。 B婆喺屋企時會好嘈,成日亂吠,佢走咗之後屋企會變到好靜,夜晚瞓覺會冇咗佢陣味,冇咗佢晚晚用腳伸醒我,聽唔到佢扯鼻寒,食嘢時冇咗一對blink blink眼望到實一實。但係有日要離開嘅終需要離開,我比較在乎佢哋喺度嘅時候過得開唔開心食得豐唔豐富瞓得爽唔爽。如果佢哋過得開心過得爽,我已經覺得無悔今生,人都一樣,對自己好對珍惜嘅人好,一齊過得開心就夠啦。命運同生死我哋冇辦法控制同預計,但到面對佢哋離開時,我哋多多少少都可以有啲話事權,俾佢哋走得安心,好好放下,俾佢哋知道即使佢哋走咗,你仍然會過得好食得飽,唔駛佢哋擔心你。軀殼雖已化成灰,但美好嘅回憶一直都會喺度。

Read More

【夠鐘食藥】我抹乾淨個窿得啦~

有日診所忙忙哋~有位媽媽帶住兩個小朋友嚟到診所。佢哋登記後坐低等嗌名,我就繼續忙我嘅嘢~突然聽到出面大堂有人起哄:「哇,有冇搞錯呀?」 我望望咩事,見到媽媽喺度幫其中一位小朋友換片…我望住佢一張又一張嘅染啡濕紙巾…我同佢講:「太太?我哋出面有洗手間啊,你要唔要同小朋友去呀?」佢拎住染啡濕紙巾揚揚:「唔駛唔駛,我抹乾淨個窿得啦!」 其他人望到眼坦坦,有位阿姨就出聲:「咁污糟去廁所啦,你咁樣抹完都要洗手㗎啦,你啲廁紙唔好就咁擺喺地下啦!污糟㗎!」媽媽:「BB屎咋嘛,邊污糟㗎?」啊,原來BB屎係乾淨嘅,我又長知識了,媽媽你要唔要試啖?阿姨:「都要洗手㗎!」媽媽:「BB屎嚟㗎!」到佢換好片,佢望望地下嗰堆濕紙巾,佢大嗌我:「姑娘!」我都冇佢咁好氣:「咩事呀?」佢指住埋紙巾:「你可唔可以出嚟同我執咗佢呀?」我:「你自己執啦。」佢:「我湊住兩個呀。」所以呢?所以我要做你工人幫你執手尾?我:「垃圾桶就係你前面,你可以自己執起掉啦。」佢:「唔得呀,污糟㗎。」頭先邊個話BB屎唔污糟㗎?頭先嗰位太太去咗邊呀?你又係邊個啊?我:「啊?如果你係整污糟咗診所地方嘅話,醫生會收返你清潔費啊,因為我哋要搵姐姐嚟清潔㗎~我哋呢度冇水清潔到㗎,要去搵清潔姐姐幫手㗎。你係咪要搵清潔姐姐嚟啊?我打電話去管理處㗎啦~」 我電話都未拎走,佢就好快手咁自己執返。人~~真係唔打開銀包唔流眼淚啊。

Read More

【夠鐘食藥】貓有冇精神科睇㗎?

又到我去旅行放鬆叉叉電嘅時候~ 班大帝繼續留喺屋企由豬爸豬媽照顧,波波雞就過去我朋友度。第一日朋友已經話我知波波雞邊放尿邊fee人,我同朋友講:「係呀我哋都係咁。」第三日朋友再話我知,波波雞真係有精神分裂,上晝可以好嗲人,下晝可以又打又咬又鬧人,仲學人講粗口。我都同朋友講:「係呀我哋都係咁⋯」朋友以為我換咗隻貓⋯我自己都以為係。自從波波雞做咗小閹人之後,佢就好似鬼上身咁。一時可以好嗲,轉個頭就追住人嚟咬同打。而家同佢放尿放屎,佢會好似救護車上身咁嗌,抱起佢又會係咁嗌。總之佢鍾意掂你痴你嗲你嗰時,你就要感哂恩咁樣,但係又唔可以覺得太放鬆咁主動摸佢咁多,因為一個唔小心,佢就會反身咬你⋯我都唔知點解佢會變成咁,我而家都覺得波波雞同我嘅關係係有啲陌生。以前眠乾睡濕咁陪佢一齊瞓地下,起碼佢會真係主動走埋嚟用頭磨吓我塊臉,用手仔掃吓我。而家我同佢一齊瞓地,佢會走嚟咬我⋯這是青春期的反叛表現嗎?定係公公也有尊嚴俾個好大嘅下馬威我嘆?我分唔到⋯我淨係知好難捉摸呀喂!我屋企班大帝由細養大嘅我都熟哂佢哋嘅脾性,就連米米收養返嚟後都變到純良晒(除咗個西臉樣),波波雞都算係由細養到大啊?點解佢咁飄忽令人難以捉摸,唔通佢真係有精神分裂⋯貓有冇精神科睇㗎?定係波波雞嫌我呢個主人做得唔夠好,不如波波雞學識講人話直接表達我知佢想點啊? 啊⋯都係當我冇講過啦。我已經幻想到佢會不停講『死肥婆你吔屎啦』。仲係曾志偉咁嘅聲⋯

Read More

【夠鐘食藥】I Need Your Help囉

有日有位小姐嚟到診所。其實我已經望住佢行埋嚟,佢都要伸手嚟敲敲登記處枱面:「Excuse me!」 我:「睇醫生嘅麻煩你俾身分證我啊~」佢:「I need your help囉。」啊!有『囉』字嘅,即係識中文啦~咁我同你講返廣東話㗎啦~我:「請問有咩幫到小姐你?」佢:「Do you know english?英—倫—掘—殊。你唔識嘅我講中文囉~」唔中唔西,都唔知你做乜鬼~我:「好呀,咁我有咩幫到你呀小姐?」佢拎出一張卡:「你哋收呀?」我望望:「唔收。」佢:「你望真啲。」我唔係賭神,賭神都要捽兩捽先變佢想要嘅牌啦,更何況我只係望!我:「我望真咗㗎啦,我哋診所唔收呢張啊。」佢:「So why…

Read More

【夠鐘食藥】奄尖波波雞

波波雞度完假了。下個月再去度,下下個月又再去度。今次一去接波波雞,開貓酒店嘅朋友已經同我講『佢真係變咗好多,放尿放屎會不停扭擰鯉魚翻身咁,同埋佢真係好奄尖』。 鯉魚翻身呢個真係唔駛多講,小朋友係好動嘛,我一直都係咁安慰自己。至於奄尖…事源係因為我已經準備好一箱唔同牌子嘅罐頭零食拎過去,開咗罐之後我朋友發現波波雞唔肯食,於是佢唯有開佢舖頭賣緊嘅其他牌子俾佢食,食一兩餐之後佢又再唔肯食,我朋友就發現原來佢真係一隻貪新鮮口味嘅衰貓… 佢真係好衰格,識睇人嚟蝦。啲人成日同我講貓仔就係一部裸機一張白紙,你點教佢,佢就會點。但係明明作為榜樣嘅我係饑不擇食,有食唔食罪大惡極咁,佢喺邊度學到咁衰格?我諗咗陣,以波波雞呢啲衰性格,好大機會係佢明知我朋友嗰度有大把優質好味罐,又知我朋友係一個善良嘅人,一定唔會容許佢餓親,所以佢就大安旨意咁擺款。因為平時喺屋企,只要佢唔食佢放棄,我就會即刻將個兜隊俾其他姨姨食埋去,佢就只可以坐喺側邊眼白白睇人食。 可能就係因為咁,佢知道我屋企係一個『弱肉強食』嘅地方,食遲一陣都會奶碗底。或者下次再去度假時,我朋友可以考慮吓放隻為食大食貓入去同房,俾波波雞感受吓壓迫感?

Read More

【夠鐘食藥】係咪打完就可以唔駛用套呀

有日一位小姐嚟到診所。佢問我:「係咪有嗰啲咩HPV針打呀?」 我:「我哋而家未有貨,如果要喺度打嘅,可以幫你留~有得打嗰時會打電話通知你。」佢:「我問多少少嘢先。」我:「嗯,好呀。」佢:「係咪打完就可以唔駛用套呀?」我:「打完針都一樣會有BB㗎喎,你要避孕都一樣要用安全套或者其他方法~」佢:「呢層我梗知啦!我意思係咪唔怕有性病呀!」我:「HPV主要唔係用嚟防性病…你要唔要入醫生房等醫生同你解釋吓呀?」佢:「唔係用嚟醫性病嘅咁我駛咩打呀?唔係話俾啲gay佬(同性戀者)打㗎咩?」首先,唔係gay佬,係同性戀。再者~你喺邊度聽埋啲咁嘅嘢返嚟?我:「我印象中係防到疣嘅~不過你想了解得清楚啲嘅最好入醫生房傾傾啦,你俾身分證我登記留資料先呀~」佢:「咪先咪先,唔係防性病嘅我打嚟做咩先?唔平㗎喎,成幾千蚊打支冇用嘅,我好有得閒好有米咩。啲gay佬又話打完冇性病嘅」我:「小姐…係同性戀,可能你對支疫苗有些少誤會,或者我俾份關於疫苗嘅單張你睇睇先呀?你有咩唔明嘅,喺打針前可以問清楚醫生~」佢:「咪啦咪啦,幾千蚊打啲唔包安全嘅針,真係幾百萬未開頭咩我。你啲單張拎去派俾啲gay佬好過啦!佢哋先係最需要嗰班呀!最污糟係佢哋呀!我冇佢哋咁隨便呀!」 其實,性病係不分男男女女或男女的~你並沒有比誰更高尚更『乾淨』。

Read More

【夠鐘食藥】等變正方形啦你

呢幾日凍到波波雞晚晚都要上床一齊瞓,不過怪雞嘅佢唔係純粹要上床瞓咁簡單…佢係要控制埋我嘅瞓覺姿勢。 我已經留意咗幾日,我攤平瞓時佢會好唔滿意,不停向我下身出手抓抓抓企圖令我哋腿張開,當我腿張開後,佢就會安靜地鑽入我腿間,乖乖呼呼入睡。有時佢仲會將自己個頭貼近我嘅私人部位,一褲一布之隔隱約感受到波波雞呼吸嘅溫度…坦白講,個感覺幾難頂。於是我有時忍受唔到,就會將佢趕走,企圖帶佢返入正途,希望佢會可以試吓瞓其他位,例如身旁或手臂旁。但佢係硬頸定唔知係咪有咩癖好…會轉個頭又再重覆出手抓抓抓,永不放棄嘅佢會令我屈服…再一次腿張開,再一次感受住波波雞呼吸嘅溫度。 如是者,每晚都要重覆好多次咁嘅情況,我開始發覺自己一朝早起身有啲難度,我試過落唔到床,同雞爸講『死得啦,我覺得自己變咗一個正方形咁呀,碌唔到落床呀我』。雞爸聽到之後笑咗我好耐…企埋一邊食花生咁款睇我點落床。嗰時我望到波波雞好輕鬆咁跳咗落床,再回望我一眼,擺出一副事不關己嘅樣就行咗出去食早餐。 自從嗰日,每次波波雞出手要我腿張開時,我都會同佢講『去爸爸度啦,爸爸係暖爐嚟嘛』,講多幾次佢終於放棄我,去咗攻雞爸雙腿!波波雞一瞓愛上雞爸雙腿間的溫度~我望住雞爸腿張開又唔敢整醒個仔嘅樣…講咗句『到你感受吓啦~』。 仔就大家嘅,等變正方形啦你!

Read More

【夠鐘食藥】醫生要食咗塊牌匾醫肚啦

有日一位先生嚟到診所。 佢指住醫生朋友送嘅牌匾問:「係咪堅嘅先?」 我望住『醫者仁心』爭啲唱咗能迴避嗎?我怕了…:「請問先生你係咪睇醫生?係嘅話我同你登記先呀。」 佢:「你呢度咁寫㗎嘛?」我:「你睇醫生嘅話就登記啦~醫生係醫人嘅。」佢自拍心口:「咁仁心呢?」見人見智啦~唔好令我難做啦好冇?我打份工搵啖飯食吓咋~我:「你有咩唔舒服同醫生講得㗎啦,醫生會幫你㗎啦。」佢:「我身體上冇咩唔舒服,係我今朝遲咗起身,咁我公司遲到要扣糧嘅,所以想拎個病假。」我:「不如…你自己入去同醫生講呀?」佢:「我冇錢俾㗎喎,OK呀嘛?」O你死人頭呀!你老闆同你講你返工冇人工收呀,OK呀嘛?我:「我哋要收錢㗎~」佢:「我知你哋原本係要收錢呀,我知呀我真係知呀,但係我人生規劃上出咗啲問題,咁醫生呀嘛,仁心呀嘛?」仁心當飯食嗎?如果係嘅話,醫生要食咗塊牌匾醫肚啦。我:「呢個真係幫唔到你呀,我哋睇醫生一定會收錢㗎~」佢:「我唔駛睇醫生㗎,我淨係要個病假。」我:「你冇唔舒服嘅話,醫生都一定唔會開病假紙俾你。」佢:「佢唔會睇住我死卦?我冇病假當曠工㗎。」我:「呢個~我哋真係幫你唔到啦。」佢又拍心口:「仁心呢?」我:「其實咁大個人遲到呢…係自己責任嚟嘅。」佢:「我唔係嚟俾你教訓㗎!你唔幫嘅就拆埋個幾隻字落嚟呀!你唔配有呀!東亞病夫就配!」先生飛快地衝出診所。我個人覺得你需要個牌匾多啲…

Read More

【夠鐘食藥】被家暴仍帶感恩心做鏟屎官

請問如果我受家中主子傷害,我應該向咩人求救? 話說有日美好嘅朝早,我發緊個美夢,突然手指一痛,立即脫離夢境回到現實。眼一睜開,我眼前見到嘅畫面實在令我難以置信!頭頭咬住咗我隻手指呀!點呀?食得多罐頭雞肉魚肉,而家想新潮啲食人肉啦嘛?佢唔係輕輕力咬,佢真係咬落嚟…嗰刻我覺得我應該死期到了。 平時我已經受盡其他傷害,例如每朝每晚佢哋都會喺我頭頂奔跑打交,我頭上僅餘嘅頭髮每朝每晚都會俾佢哋十幾磅嘅力踩甩,唔係斷嗰隻,係連毛囊完完整整咁甩出嚟。聽講人哋話一日甩五十至一百條頭髮係正常嘅事,我一日至少甩百五條卦,髮型師有問過我『你啲頭髮又薄咗喎,你做過咩嚟呀?』,我含住泡眼淚回應『因為我養貓』。髮型師露出一臉問號樣,我都係輕輕帶過『養貓後,你個世界就會變晒㗎啦,呀,唔係~係變L晒呀!』。 除咗髮型師會關心我之外,有時我啲客都會關心我,有時佢哋望到我又添上傷痕時,都會講『又嚟呀?』,我唯有答『係呀,日常嘢嚟啦,養貓係咁』。有啲新客當初見到我會以為我係不良姨姨,問我『你係咪自殘呀?』。我答佢『唔係呀,係家暴呀』,佢哋會問『你唔報警唔走?』。 『警察唔會理,因為我係俾我屋企班貓家暴,而且我俾佢哋家暴係冇得走之餘,仲要帶住感恩之心去鏟佢哋嘅屎,買佢哋嘅糧,一生一世不離不棄,啊,我覺得自己可以升仙啦』 我咁錫佢哋,可唔可以向佢哋申請打少我幾鑊呀?

Read More

【夠鐘食藥】我有咩同個新抱唔同呀?!

電話響起~我:「你好,乜乜診所」對方係一位女士:「診所呀?我冇打錯呀?」 我:「係~我哋係乜乜診所呀。」佢:「我新抱早兩日嚟睇過呀。」 我:「係~有咩事呢?」佢:「我可唔可以嚟拎返佢啲藥呀?」 我:「係咪幫佢配藥呀?可以呀~你俾佢個覆診卡號碼我呀。」佢:「我唔知佢啲嘢㗎,唔係好熟㗎。」 你新抱同你唔熟呀?咁你做咩打嚟撻你新抱出嚟呀?我:「咁一係你叫佢自己打嚟啦~」佢:「唔係喎,我有佢啲藥㗎,我食緊佢啲藥㗎。」 我:「你食緊佢啲藥?啲藥唔係你㗎喎?」佢:「係呀,我唔舒服嘛。」 我:「即係你想配佢啲藥嚟俾你自己食呀?」佢:「係呀。」 我:「你唔可以咁食藥㗎,佢啲藥未必啱你食㗎~」佢:「我冇事呀,我食得好好呀。」 我:「如果你唔舒服嘅你嚟睇醫生啦~配藥都唔係平好多㗎咋,而且你都唔可以咁配人哋份藥嚟食~你過嚟睇醫生呀。」佢:「點解佢食得我唔食得呀?」 我:「因為每個人嘅病徵病歷都有唔同嘛,醫生都要問清楚你嘅病歷先可以開藥㗎~如果你對某啲藥有敏感嘅要更加小心。」佢:「我有咩同個新抱唔同呀?唯一唔同嘅就係同我個仔結婚嗰個係佢囉,唔係我囉?仲有咩唔同呀?」…

Read More

【夠鐘食藥】好還返個老公俾我啦喎!

自從冬天嚟咗後,波波雞戀上爸爸後… 我每日都覺得好似爭緊啲嘢咁~以前波波雞一聽到我嗌『食嘢啦』,佢就會雞衝埋嚟,而家此情不再,佢淨係會行過用眼尾望吓用,之後直行直過…以前佢會同我一齊瞓,而家佢轉咗同爸爸瞓,即使我肥,亦顯得我身邊嘅位置好空洞,空洞得我覺得會凍親感冒了,我個波波雞小暖爐不見了。以前我食嘢佢會第一時間衝埋嚟同我爭食,而家我同雞爸一齊食嘢,佢只會就走去搵爸爸… 我望住雞爸同佢嘅互動,我好呷醋好妒忌。全屋入面得兩個男嘅,呢兩個男嘅寧願自己圍爐自HIGH都唔理我哋呢班女…佢哋兩個寧願互相擁抱瞓覺,互相望住對方食嘢,都唔理我哋。我望住佢哋嘅眼神充滿愛與溫柔。頂你哋,你哋兩個前世係苦命鴛鴦嗎,我哋前世係拆開你哋嘅賤人嗎?今世你哋再續情緣,我哋就被迫睇住你哋馨馨我我。人貓殊途啊! 我就快忍唔住幫佢哋出個人貓搞基頻道,將佢哋嘅冤氣畫面一一出賣。有時我望住佢哋咁樣,成個醋樣出晒嚟,我會同波波雞講『好還返個老公俾我啦喎!』,佢一臉得戚抬頭望望我,再將個頭挨得更貼爸爸。第三者總是挑釁人的!呢個第三者趕又冇得趕走,鬧又冇得鬧。我好絕望啊,波波雞幾時先肯還返個老公俾我呀? 最多我俾多啲零食波波雞食呀?最多加多一個罐頭呀?

Read More

【夠鐘食藥】有Daddy喺度唔駛驚呀

有晚我哋已經截咗症…距離原本收工時間已經過咗兩個鐘,診所內仲有幾位病人等緊睇醫生~ 一位爸爸抱住位小朋友嚟到診所,佢企喺登記處前大嗌:「姑娘!姑娘!」執緊藥嘅我行出嚟邊行邊講:「係~我哋截咗症啦喎?」佢氣都喘埋:「睇埋我個女呀得唔得呀?」我望住貼住退燒貼,塊臉紅卜卜嘅小朋友:「小朋友發緊燒呀?過嚟俾我探吓熱呀。」佢氣都喘埋:「係呀,我頭先返到屋企已經係咁啦,今朝佢媽咪帶過佢家姐嚟㗎,我唔知你哋記唔記得有冇紀錄呀,你可唔可以叫醫生睇埋佢呀?」我:「你俾家姐個名我呀,我睇睇先」佢:「XXX」 我翻查返今朝嘅紀錄:「有呀,家姐今日去咗做流感測試㗎,醫生都開咗流感藥俾佢,細妹有冇喺度睇過呀?」佢:「冇呀。」我:「你有冇帶佢身分證明文件嚟?」佢一臉焦急:「冇呀,係咪要拎呀?我而家即刻返去拎呀!」我:「唔駛唔駛,你下次補返俾我得㗎啦。」佢:「咁係咪即係可以睇埋呀?」我:「梗係要睇埋啦,家姐都中咗流感嘅,佢哋平時一齊玩都應該傳染埋㗎啦,你放低小朋友先,寫低佢嘅名同出生年月日俾我呀,咁嘅情況醫生都會睇埋啊~」佢嘆一口氣:「太好啦,我仲以為要去急症室等十個鐘呀,好彩我有過嚟搏吓你哋未收工,我都係返到去先見到佢咁。佢媽咪都周身唔得閒,湊住個幾個月大嘅又湊埋家姐。而家連個妹都病埋一份…」我:「幾個月大呀?咁…你哋真係要小心啲…」佢寫完資料後,坐低摸摸小朋友頭,同小朋友講:「好快冇事㗎啦,有Daddy喺度唔駛驚呀。」 爸爸拍拍自己大腿,小朋友安心伏喺爸爸大腿上邊瞓邊等…

Read More

【夠鐘食藥】媽媽先係買罐頭俾你食嘅人啊

自從我上兩篇叫波波雞去爸爸度瞓覺之後,懂性嘅雞真係從此就自動自覺去咗同爸爸一齊瞓… 我呢個麻煩女人即刻覺得自己失寵,內心泛起陣陣酸味醋味。於是我之後每晚一見到波波雞走去爸爸度瞓時,我就會望住波波雞講『你係咪唔愛媽媽啦?媽媽先係買罐頭俾你食嘅人啊,媽媽有好多零食㗎,得媽媽歡心如得天下所有零食啊,波波雞你知唔知呀?』。 經過我日以繼夜,夜以繼日嘅洗腦式催眠,連雞爸都頂唔順叫我收皮收嗲,就喺某一晚… 波波雞主動行埋嚟我度,伸手抓兩抓我手臂,我立即明白並表示要繼續come on baby,我將我嘅手臂稍為移過啲,波波雞主動行入臂彎內,一個波波雞死魚撻!就咁撻咗喺我臂彎內!佢再伸出小手攬住我手臂…天呀!我嘅催眠終於有用啦!波波雞返嚟我嘅懷抱啦!我即時忍唔住露出一臉幸福樣同雞爸講『我個仔終於要返我呢個阿媽啦,呵呵~世上只有媽媽好,有雞的媽媽是個寶~』。雞爸完全鄙視我『妖』咗我一聲。 嗰晚我沉醉咗喺雞嘅寵幸之中,不知不覺就瞓咗覺~半夜醒一醒擘大眼見到波波雞仲係瞓咗喺我側邊,大家共用一個枕頭。我都忍唔住望咗陣,兼講咗句『真係好鬼靚仔』就繼續瞓。呢種幸福應該會直到永遠…好景不常,第二日佢已經冇再啋我。 聽講係因為我半夜瞓瞓吓隻手一揈橫跨咗過去,雞爸食咗我一拳,波波雞都係。 幸福係我親手破壞的…

Read More

【夠鐘食藥】我教唔到我個仔喎!

有日診所有幾對互不相識嘅母子父子登記完坐喺度等醫生返~其中一對母子比較後生,小朋友十歲以下… 呢位小朋友坐坐吓開始唔耐煩,開始周圍走搵嘢玩。佢睇中咗我哋擺出嚟嘅單張~於是佢抽起一疊散落地上,邊踩邊滑行邊叫喧。 我同小朋友講:「小朋友,唔好咁玩啲單張呀,人哋要嚟睇㗎,唔係俾你咁玩㗎。」小朋友望望我,一於廢事啋我,再轉身拎埋其他單張散落地上。佢媽媽由始至終都係咁自己坐埋一邊玩電話…其他人見到咁嘅情況都搖晒頭~ 當中有位先生帶佢年老爸爸嚟睇醫生嘅,先生忍唔住出聲同個媽媽講:「太太,你叫你個仔唔好再咁啦。」媽媽望望先生,露出一副不屑嘴臉:「我教唔到我個仔喎,咁叻你教呀!」先生望望個小朋友,再望望個媽媽,狀甚谷氣,先生企起身了!我以為先生會衝埋去打個小朋友一身,想阻止命案發生:「先生!」先生行去媽媽身邊,摀低身用雙眼望住媽媽。媽媽見佢貼到咁埋,個身自然避避:「你做咩呀?」先生喺媽媽耳邊大叫:「呀!!!!!!!呀!!!!!!」媽媽立即掩住耳仔彈起身彈得遠遠,一臉驚慌問:「你做咩呀?你痴線㗎?喺我耳邊咁大聲嗌?」先生冇理佢,繼續追住佢耳邊大叫:「呀!!!」媽媽行到埋嚟登記處:「姑娘呀,佢痴線㗎。」唔知個小朋友係咪覺得咁樣好好玩,於是小朋友又走埋嚟喺媽媽身邊大叫:「呀!!!!!!!!」先生又『呀!!!!!』,小朋友又『呀!!!!!』,好嘈…媽媽望住先生嘅年老爸爸問:「喂!你個仔嚟呀?嗌你個仔收聲啦!佢搞到我個仔都學埋佢啦。」 爸爸笑笑說:「我個仔都咁大囉,我仲邊教得到呀?你教呀。」 媽媽呆咗一陣,之後同我講:「你啲客呀!啲痴線走咗先好叫我過嚟呀!」佢急急腳拖住個仔離開診所,明明走咗一段路,我都仲聽到佢個仔仍然喺出面『呀!!!!!!』緊…

Read More

【夠鐘食藥】我隨風而嚟隨風而去~

自從上次一拳睡羅漢無情拳後,波波雞再次離開我嘅懷抱。 係我抵死,我明嘅。仔又係我自己叫佢走,之後又叫佢返嚟,點知自己發瘟請咗佢食一拳又趕走佢… 嗰日之後我有啲唔開心,一心諗住『唉,算啦,反正我做咩都係錯嘅啦,由佢啦,勉強冇幸福』。我再冇時時刻刻提住波波雞啲罐頭係邊個買,亦再冇夾硬抱起佢瘋狂啜佢面珠兼不停講『你係媽媽個乖豬B呀』。我變得自暴自棄… 雞爸望見我一副這些機會不是我的樣撻咗喺床度,佢問我『你唔再叫波波雞同你瞓啦?』。我都繼續一副死樣回答『算cow數啦,我放棄啦,我隨風而嚟隨風而去~我係一粒塵呀』,雞爸望望我,可能心諗從來未見過一粒塵係咁有份量,佢冇講出口,自己靜靜行開算。而波波雞喺床邊望望我,我望住雞講『你鍾意瞓邊就瞓邊啦,肥婆以後唔迫你㗎啦,你鍾意爸爸嘅話就去同爸爸瞓啦』。波波雞好似聽得明我講咩咁,佢自己行咗出房… 到半夜我一醒,發現波波雞瞓咗喺床邊,佢係貼住我咁瞓,而唔係瞓喺我同雞爸中間!我摸摸佢,好感動咁講『你終於生性啦,終於知道瞓喺媽媽身邊係最好啦?』。波波雞輕輕『嗯~喵』一聲。到第二日我同雞爸講返佢噚晚自動自覺瞓喺床邊,而唔係我哋中間… 雞爸面有難色咁答我『阿雞醒呀!佢都知道你嗰晚根本係想打我,所以佢先唔再瞓喺我側邊…』噢,今舖我都唔知可以點拆啦~

Read More

【夠鐘食藥】我怕條牙牙腸會走出嚟!

有日一位先生嚟到診所。佢掩住肚問我:「姑娘,可唔可以睇吓我條牙牙腸係咪發炎?」 什麼是牙牙腸?腸有牙定牙有腸?我:「你俾身分證我先呀,醫生會同你檢查~」佢:「我好痛呀!」我:「我知呀,但係你都要俾咗身分證我登記先㗎。」佢:「我痛到縮唔到手呀,我怕一縮條牙牙腸會走出嚟。」我望住一臉認真得嚟又有啲痛苦嘅佢,我唔敢糾正佢嘅錯誤思想…我:「嗯~你身分證放喺邊呀?我幫你拎啦。」佢:「袋呀。」我行出去拎身分證,邊登記邊問想分散吓佢注意力:「你痛咗好耐啦?」佢:「一陣啦」我:「係咪食錯嘢呀?」佢:「我唔想再講嘢呀,我覺得痛到就快喺口度走出嚟。」你演開劇的嗎?點解個人可以咁誇張?我:「嗯,咁你坐坐先呀,我登記完之後幫你放返好身分證呀。」佢:「我唔想坐。」我:「哦~好呀好呀,咁你企喺嗰邊啊。好快有得睇~」 佢:「唔好再叫我等啦!我條牙牙腸等唔到啦!」 我拎埋排版入去同醫生講:「呢位病人好痛啊,佢話佢等唔到㗎啦。」 轉個頭醫生就即刻叫佢入去~ 喺診症期間,我喺藥房聽到『呀!我條牙牙腸出嚟啦!唔得唔得唔得!我唔可以縮開手!你唔好掂我唔好掂我唔好掂我!』之後冇耐…先生出返嚟問我:「你哋連牙牙腸都唔識切又唔識開藥俾我收咗佢,你哋喺度做咩啫?醫生嗌我去醫院,我走得啦話?」我:「盲腸炎嘛?係要去醫院㗎~你而家去啦。」 佢:「唔好做醫生啦!掛羊頭賣狗肉,開間診所咩都唔識醫嘅,不如開街市啦!」 我:「你快啲去醫院先啦~我哋唔收你診金㗎。」佢:「梗係唔駛收啦!又唔係我自己要嚟睇!你收聲啦!」…嗯~係條牙牙腸要嚟睇嘛~

Read More

【夠鐘食藥】你短暫失吓戀啦

前排去完旅行,好快又再去…中間只不過有一星期時間。上轉返嚟時,我數數日子就問雞爸:「得一個星期咋喎?接返波波雞返嚟冇耐,佢又要再去貓酒店,佢會唔會唔捨得我㗎?」。 佢:「咁接唔接呀?唔接嘅話你通知聲貓酒店應該OK,佢咁好人。」我:「接~梗係接啦,我怕波波雞掛住我呀!冇見我幾日,佢一定掛我掛到癲。」返到香港第二日,等埋雞爸收工就即刻走去接返波波雞。一入到貓酒店,姐姐抱波波雞出嚟打算俾佢望吓我先,俾佢知道我去接返佢…佢望一望我喵咗幾聲。姐姐就叫佢入返籠跟我走,點知… 個衰仔唔入籠,繼續依偎喺姐姐嘅懷抱內。 我望住佢個樣,就諗返起去旅行期間姐姐SEND佢喺酒店嘅影片嚟~影片中嘅波波雞喺度享受緊姐姐嘅撫摸,主動用雞頭去嗲姐姐…我喺現場望住波波雞個樣,睇嚟佢根本冇掛住我,而且佢似乎唔捨得走…我忍唔住同佢講:「走啦屎仔包!姐姐好忙㗎!下星期又嚟㗎啦~」於是波波雞入籠了,佢一上到車就不停擰雞頭望,好似搵緊姐姐咁,每望一下發現姐姐唔喺身邊就喵一聲,佢每喵一聲我就應佢『下星期又重拾戀愛嘅感覺啦你!你短暫失吓戀啦』。一喵就喵咗幾十聲,幾十聲後佢接受現實了,返到屋企佢喺籠入面探頭望望其他貓姨姨,一發現頭頭姨姨嘅身影,佢就即刻貓衝追住頭頭嚟撲…波波雞嘅戀愛熱度比我想像中快過。

Read More

【夠鐘食藥】點解請我食檸檬

有日滂沱大雨~診所入面有幾個人喺度等緊睇醫生。 有位先生入到嚟企咗喺門邊,我望望佢,佢唔望我… 我唯有嗌嗌佢:「先生,係咪睇醫生呀?」 佢望望我,之後伸手去遮架拎起一把遮:「唔係呀,我嚟拎返我把遮。」 喺佢拎起把遮時,坐喺度嘅一位女士嗌住佢:「呢把遮我㗎喎。」 佢即刻放低:「係咩?唔好意思,認錯認錯。」 其他病人嘅視線都望住佢~ 佢再拎起另一把遮,另一位男士又嗌住佢:「喂,你做咩呀?」 佢:「哎,又攞錯。」 我問佢:「先生,你把遮係幾時漏咗喺度㗎?今朝?」…

Read More

【夠鐘食藥】同你一齊我就覺得幸福

去旅行期間,屋企班大帝會由豬爸豬媽上門照顧,佢哋係我專屬嘅寵物保姆。 呢幾日佢哋上去時,發覺B婆完全唔察覺佢哋入咗屋,佢哋除晒鞋去埋廁所岀嚟,B婆都仍然原封不動咁熟睡緊。豬爸影咗B婆相whatsapp同我講『我哋喺度咁耐,佢都冇郁過』。我覆佢『係呀,B婆聾咗啦』。所謂嘅聾咗即係好似老人家咁聽力下降,始終B婆都老了⋯ 以前B婆可以同我一齊捱通頂睇電視煲劇,而家佢每晚十點前就會自己入房瞓先。 以前我一岀?,拎條鎖匙岀嚟就已經聽到屋入面嘅B婆吠住歡迎我入屋,而家我返到屋企閂埋門都會仲見到佢趴咗喺梳化瞓,有好幾次我點嘈佢都未醒,我以為佢香咗,不過望望吓見佢肚仔有起伏,就鬆一口氣講『哇,好彩未香啫,嚇死人咩!』。 以前佢會自己跳上床,而家就算我哋已經準備咗一個櫃仔俾佢做樓梯咁上床,佢都好似懶得行,會成日喺床邊叫我抱佢上床,就算佢半夜岀咗去屙夜尿,佢都一樣會叫我起身抱佢上床。 以前睇嘢好精靈,會望實我食嘢睇吓我有冇漏口跌嘢食落地,之後再飛快精準地搶食!而家我用手指住啲嘢食,佢都好似睇唔到咁,要送到埋嘴邊佢先發現有得食。 B婆老了。 有時Facebook回顧岀現以前B婆嘅相,就發覺原來B婆陪咗我哋好多年⋯提醒我要好好珍惜,因為相處嘅時間已經剩返唔係好多。 B婆,我唔介意你又聾又盲,唔介意晚晚要我抱你上床,可以同你一齊我就覺得幸福了。

Read More

【夠鐘食藥】呢度我開㗎,得未呀!

有日診所好多人~ 大家都坐得迫迫的,有啲小朋友喺度玩~久唔久要大叫一兩聲。 有位先生一副好唔耐煩嘅樣望住啲叫喧嘅小朋友。其中一個媽媽望到先生咁,佢出聲:「你望夠未呀?有咩好望呀?」先生:「好嘈呀,診所嚟㗎。」媽媽:「咁唔鍾意去睇私家囉。」HI?HELLO?喂?我哋呢度係私家診所嚟㗎~你有冇去錯地方呀媽媽?先生打個突:「呢度唔係私家咩?」媽媽繼續升Level:「咁唔鍾意搵醫生上門睇你囉!」先生:「呢度你開嘅咩?個個都坐喺度等,係得你哋幾個嘈咋喎,點解唔係你搵醫生上門睇你呀?」媽媽激動企起身大嗌:「呢度我開㗎!得未呀得未呀?」咦,老闆,乜你轉賣咗俾人咩?出面有條茂利話自己係老闆喎,我想打俾老闆娘報串啊~先生俾媽媽拋窒了,佢望住我問:「佢?你老細?」我擘大口得個窿望住媽媽:「係囉?啊…你係我老闆?」媽媽似乎發現大話要穿,再用拋字訣:「你咪入去問醫生囉!你去問囉!你一陣唔好同我跪低叩頭認錯呀!」無啦啦做咩要同你叩頭呀?先生似乎好怕傻潑婦:「廢事同你嘈」,佢再同我講:「姑娘,我出去行吓先再返嚟呀。」媽媽有風駛盡?:「扯啦唔做你生意呀!以後唔好再俾我見到你呀!」 我望住幫手趕客嘅媽媽:「阿太太呀,我問吓醫生係咪轉咗老闆呀~如果唔係嘅話,你咁樣趕走我哋啲病人又或者令到我哋診所有咩損失,我哋係可以追究㗎。」 先生即刻停步,轉身回頭望媽媽,冇出聲~淨係俾咗一個笑容佢,坐返低,一直望住媽媽…媽媽打咗幾吓自己啲小朋友膊頭,細細聲講:「咪再嘈呀!」小朋友們懵懂問:「做咩呀?」媽媽:「咪嘈呀收聲啦。」先生繼續望住佢哋,一直望一直笑…阿假老闆娘做咩唔出句聲呀?

Read More

【夠鐘食藥】人就係咁易掉以輕心

前排我開始俾返餐乾糧班大帝食,一嚟因為貪方便,返工前可以快快手餵咗糧就出門口,二嚟係想慳返些少錢,始終一屋六隻要食,餐餐主食罐頭老實講真係幾金吓。 食咗一排,波波雞就用生命嚟控訴了!佢啲尿變咗粉紅色,我以為係膀胱爆咗,有石之類,嚇到我即刻帶佢去睇醫生… 點知最後答案係:飲得少水。 以前因為會罐頭加水,廢事佢變咗隻重口味貓,變得更偏食,所以佢水份都幾足夠。之後見佢食乾糧啲屎靚咗成形晒又唔會好硬,所以我好放心俾佢食返餐乾糧。我仲以為佢大個仔不停進步,開始變返隻正常些少嘅貓…因為剛剛入屋時,啲醫生都睇死佢捱唔得耐又話癱又盛㗎嘛,就連佢前主人都寫晒信話佢淨係可以飲奶唔可以食其他嘢,咁我哋養吓養吓發覺波波雞好似完全剝晒佢哋棚牙咁。完全冇癱呢回事,又完全冇就死呢回事,更加冇一世只可以飲奶呢回事… 經過咁多波波雞嘅進步表現,我都爭啲唔記得咗佢係一隻有缺陷嘅貓,人就係咁易掉以輕心。 好彩睇完醫生,再加飲返多啲水,佢好快就回復正常。我以後唔敢啦,我以後會俾返餐餐罐頭你食㗎啦,啲乾糧你等班阿姨食剩幾粒俾你先走去咬吓過吓口癮啦。 以後你都係做隻濕雞啦~乾糧冇你份㗎啦,咪鬼再朝朝望住桶乾糧雞啼呀你!

Read More

【夠鐘食藥】細路玩得,我唔可以玩!?

有日一位小姐單手掩住條腰咁入嚟診所。佢行埋嚟登記處問我:「有冇醫生睇呀?」我:「有呀,麻煩你身分證明文件呀。」 佢:「仲有個問題,有冇得寫證明㗎‧」我:「你想寫啲咩證明呀?」佢:「你哋出面個公園嗰張搖搖櫈整到我呀,我條腰好痛呀。」我一頭霧水:「出面個公園?搖搖櫈?」佢:「呢~動物樣,坐上去可以向前向後搖嗰啲。」我:「係呀,我大概知你講邊啲,你點整親呀?俾佢整親條腰?」我想像唔到個畫面…唔通….佢:「我玩玩吓佢突然向後跌囉。」並唔係突然啊,小姐,你知唔知嗰啲係小朋友玩㗎?小朋友幾重,你幾重呀?俾你坐一坐搖兩搖,根都斷好正常呀!我:「啊..咁你想寫張紙交俾公司?」佢:「梗係唔係啦,我都唔駛返工嘅,俾管理處㗎!」我:「吓?你諗住投訴呀?」佢:「係呀,唔得咩?而家你哋個公園啲嘢爛喎,整到我喎!」我:「但係嗰啲本身係俾小朋友玩㗎喎?不過你都可以入去問吓醫生寫唔寫到嘅…」佢:「咩意思呀你?細路玩得,我唔可以玩㗎咩?」我:「小朋友同成人個體重唔同嘛。」佢:「我都係著中童衫㗎咋!」啊!唔怪得你件衫就爆咁啦,我仲喺度諗緊你做咩要虐待自己啲肉~我以為你鍾意玩綑綁咋~佢:「身分證呀,登記啦,我病人嚟㗎!」 嗯,你真係好病,病到自己就快十八對都仲覺得自己係小朋友。

Read More

【夠鐘食藥】『媽媽,媽~媽,媽~』

有朝早我同雞爸起身冇耐,大家望望對方,都不約而同問咗對方一句:「噚晚瞓得好差呀?」 佢:「係呀,阿卷成晚喺度跳嚟跳去,米米又瞓喺中間。」我:「頭頭成晚喺床邊抓我,要我抱佢上去一齊瞓,痴鬼線㗎,點抱呀?佢學埋B婆啲嘢呀!」佢:「一天光你個仔就嗌啦又!」 我:「你個仔呀!我聽到呀,嗌媽媽呀嘛!」 你冇睇錯,我哋都冇聽錯,波波雞真係識嗌『媽媽』,仲係發音發得好四正… 佢一天光就會喺廳度行入房,邊行邊擘大喉嚨大嗌『媽媽,媽~媽,媽~』,我初初未發現嗰時仲以為自己瞓覺有幻聽。係之後有一日我失失哋眠,到天光都未瞓到,就發現佢識嗌媽媽…不過每次我想起身拎電話錄佢音影佢片時,佢就會好快發現唔再嗌,有好幾次我都捉到佢係要我哋瞓到唔郁或者雞爸扯晒鼻寒嗰陣,佢先會專登咁大聲嗌。佢根本係想擾人清夢!我哋本來諗住唔理佢,由得佢嗌吓就收聲嘅心態繼續瞓,點知個衰仔變本加厲,直程喺床邊大嗌『媽媽~媽』,再繼而直接跳上我哋身度抓抓哄哄,總之一定要整親我哋啦!我同雞爸好多時都會望望對方,之後講『你個仔呀…好煩呀。』但係每次講到最尾,都會係『但係到佢走咗嗰時,就以後冇咗佢把聲,冇咗佢煩屋企會好靜…』做結尾。雖然佢真係好煩好嘈好曳好賤格,不過我哋愛~

Read More

【夠鐘食藥】棵樹有精㗎!

有日診所都幾忙~突然我聽到『嘭』一聲,我即刻企起身望咩事~ 眼前我見到醫生太太擺喺度嘅風水樹俾個小朋友…扯冧咗。我:「哇~乜咁搞法呀」小朋友個媽媽即刻走埋去小朋友度,捉住小朋友隻手帶佢離開事發範圍。個媽媽一路行去坐低一路講:「冇事嘅冇事嘅,唔關我事嘅唔關我事嘅。」你喺度自我催眠嗎?我行出去問佢哋:「小朋友,你有冇整親邊度呀?」媽媽瞪大對眼問我:「做咩個個都唔問,係要問我呀?」我:「吓…咁頭先係你小朋友整冧盆嘢嘛?」媽媽:「我就見唔到啦!你問第二個啦!」啊,你個自我催眠又幾成功喎~我問小朋友:「你有冇整親邊度呀?」媽媽一手擋住小朋友視線,同小朋友講:「唔駛理佢㗎!佢唔係同你講嘢,你當聽唔到得㗎啦。」我:「太太,你唔駛咁嘅,我唔係要追究啲乜~我想睇吓小朋友有冇整親邊度啫。」媽媽:「我唔駛你咁懶好心喎,個仔我嘅,我自己理得㗎啦。」於是我廢事同佢拗,走去扶返好棵樹仔,睇睇有冇邊度爛咗。 媽媽好大聲咁嗌:「棵樹有精㗎!」 精?你老公射咗落去呀?信唔信我告你老公性侵棵樹?你老公喺邊呀?叫佢帶埋佢細佬嚟認錯啦喎!我:「你講咩呀…」媽媽:「佢唔想喺度呀,佢話我知呢度好凍呀,所以頭先佢先想走咋,我同佢傾計呀!」我望住佢,唔想再同佢講嘢了。由佢自己慢慢同棵樹傾計啦,我都係廢事騷擾佢哋~總之唔係你老公喺度搞搞震就得啦。

Read More

【夠鐘食藥】你知唔知睇佢哋係好忙㗎!

數數月份~波波雞原來已經一歲八個月,喺今年六月已經係兩歲了。亦都代表我半失業狀態維持咗近兩年,喺搵工時我份履歷成日都被問到『點解呢段時間冇返全職?』。 有試過好坦白咁講因為屋企有一隻貓有啲事,要比較貼身照顧,所以揀咗Part time維持生計…對方半帶恥笑『貓喎?唔返工為隻貓呀?』,我笑笑勉強完全咗個interview就算了。 對於唔理解嘅人,我都唔會嘗試要對方理解~始終呢啲都係我自己嘅事。之後見工,我都唔敢再講因為隻貓~都會講係自己想休息吓就算。直到而家,我都仍然未敢返全職… 雖然波波雞而家身體狀況都暫且穩定,但係我發覺自己變咗了,變得懶咗。口講就係好想返全職搵返個正常人工,但身體卻很誠實地想用多啲時間留喺班主子身邊。有時雞爸見我成日吽喺屋企,佢都會問我『你唔悶咩?』。我又真係覺得唔悶啊,我可以睇佢哋睇足一日,你知唔知睇佢哋係好忙㗎?睇佢哋撩事鬥非,睇佢哋食嘢飲水,睇佢哋去廁所,睇佢哋梳洗整理毛毛,睇佢哋望雀仔,同佢哋一齊望同一方向研究吓究竟佢哋望緊咩,睇佢哋瞓覺。咁就足以睇足一日㗎啦!我真係一啲都唔覺得悶,我覺得可以俾我咁樣陪佢哋過一世係件好幸福嘅事,所以有時我都會多謝波波雞嘅出現。 多謝波波雞令我當初辭咗份全職,令我可以好好休息~

Read More

【夠鐘食藥】屋企人有咩咁重要呀?

電話響起~ 我:「你好,乜乜診所。」佢:「今日收幾點呀?我收工過嚟呀。」 我:「今日中秋會提早收,五點前過嚟就有醫生睇~」佢:「五點?平時你收幾點呀?」我:「平時七點半截症嘅。」 佢:「駛唔駛早咁多收呀?我都未收工。」 要唔要接埋你收工呀咁? 我:「今日中秋嘛,醫生會早啲走嘅。」佢:「聽日咪補咗日假囉,早咩放呀你哋?貪得無厭成咁㗎咩?」 吓?你老闆成日見你放假都會咁話你㗎? 我:「我哋聽日都會開半日嘅。」佢:「係囉!咁你哋都有半日補假呀,今日仲放咩早呀?憑咩呀?」 憑我老闆係老闆,佢話事㗎囉。 我:「呢個係醫生決定㗎~唔係我哋話事㗎,總之今日五點前嚟到就有醫生睇啦~」佢:「我收六點呀!我返到嚟咩都冇啦?」我:「係呀小姐,過咗五點就冇醫生睇㗎啦。」佢:「會閘都落埋呀?」我:「係呀。」佢:「痴線㗎咩!連閘都要落?」…

Read More

【夠鐘食藥】你啲肉咁澎湃我都好驚㗎!

早排帶B婆去剪毛沖涼~喺接返B婆帶佢返屋企時… 迎面有位阿姨離遠見到B婆,佢指住我哋方向大嗌:「咪行埋嚟呀你!」。 咁我哋就停低啦,佢一路行埋嚟一路指住我哋大嗌:「打死你呀!唔好行過嚟呀你!」。我望住佢充滿肉感嘅衝力…嗰刻覺得無謂同佢有咩碰撞,即刻抱起B婆掉頭行遠些少,不過位阿姨仲喺遠遠嗌:「打死你呀!醜樣到死!最憎畜牲!」。我嗱嗱聲行快幾步,務求盡快離開呢位阿姨嘅視線範圍,最後我都要過咗兩個街口先好似再聽唔到佢把聲。 擰轉頭再三確認佢冇跟嚟,我先鬆一口氣,之後先發覺我抱住嘅B婆真係好重,我即刻放B婆落地,同B婆講:「你可唔可以自己行一陣呀?我抱到手軟啊」。B婆即刻雙手撲上我身度,用佢嘅陽光B笑容示意要我繼續抱,死都唔肯行…呼~我輸了。我擰擰頭:「唉,真係慈母多敗兒」,我唯有抱住佢行返屋企,我望住原本好近嘅路變到要行雙倍就想捉返頭先個阿姨出嚟同佢講『隻揪呀!』~ 我明唔鍾意狗或驚狗嘅人係勉強冇幸福~但係條路咁廣闊,我又已經企埋一邊企圖將自己加B婆縮埋一舊,你驚我隻松鼠狗會突然變成草泥馬咁大隻咁標出嚟咬你咩…做咩要衝埋嚟話要打死我喎~我望住你咁衝埋嚟,啲肉咁澎湃我都好驚㗎。大家就唔可以河水不犯井水咁直行直過嗎?

Read More

【夠鐘食藥】你個負心人!

有日一位小姐嚟到診所。佢睇完醫生拎完藥俾埋錢,佢喺度睇吓啲藥,唔知係咪我又衰樣衰,佢竟然突然發我脾氣:「喂!」 我:「係~咩事呢小姐?」佢:「我唔係食開呢隻藥㗎喎!」我望望排版,你今日第一次嚟睇咋喎。我:「你意思係你喺其他診所食開其他藥?你有冇藥名俾到我呀?因為藥有機會係個款同色唔同,但係就係同一樣嘢~」佢:「咩呀?我喺度睇開㗎!」我再望望排版,再去電腦搵多次佢身分證號碼,證實咗佢係第一次嚟睇…我:「Er…小姐你第一次喺呢度睇咋喎?頭先同事有拎你身分證嚟登記㗎嘛。」佢:「梗係唔係啦,我喺度睇開㗎,我同醫生好熟㗎。」係咩?有幾熟呀?我:「但係我搵唔到你有喺度睇過嘅紀錄喎,你今日係第一次嚟睇乍喎。」 佢:「你都痴線,你叫Richard出嚟呀。」我:「邊個Richard啊?」 佢:「r-i-c-h-a-r-d!we柒呀!」 我:「Er…我哋冇呢個人喺度喎。」佢走去敲醫生門大嗌:「we柒we柒we柒。」我嗌住佢:「小姐,我哋真係冇呢個人喺度呀。」佢繼續嗌:「we柒!唔該你出出嚟呀。」我:「小姐,醫生睇緊症㗎,你唔好騷擾醫生啦。」佢:「我同醫生好熟吓㗎~我有咩自己同佢講得㗎啦,你晏啲都唔喺度㗎啦。」我:「咁或者你坐低等等~我一陣俾你入去同醫生傾啦。」佢眼超超手指指坐低:「一陣你仲唔死?」 轉個頭,小姐再入去醫生房。好快佢又出返嚟,急急腳單手遮住塊臉離開診所~我問醫生:「佢做咩呀?佢唔係要換藥咩?」醫生:「佢認錯咗我係上一手嗰個醫生,嗰個都走咗好耐啦,咁都認得錯嘅。」哎呀~WE柒搬咗都冇通知你咩?WE柒你個負心人!

Read More

【夠鐘食藥】多謝每一個曾經睇死我嘅人

糯米雞,由以前返嚟一開始已經好有食力,只要見到人食嘢或有食物嘅出現,佢都會邊嗌邊搶食,就係因為佢呢股食力,我嗰時先會覺得佢係冇放棄過自己,佢係確確實實咁想生存落去。 嗰時見佢咁食得,我固然冇放棄佢,冇聽獸醫話將佢『人道處理』,一心諗住佢要食就俾佢食,佢覺得自己食夠就自然會升仙同我講BYEBYE。 一食佢就食咗年幾啦,睇住佢越嚟越肥大,坦白講我好有滿足感。以前有唔少人走嚟炳我話我冇照顧呢類貓,留佢喺自己身邊等如害死佢,不如早啲交俾有經驗嘅義工或機構。嗰時真係有因為呢啲說話而質疑自己究竟有冇能力… 但係我真係唔想是是但但咁交佢俾人,始終佢已經俾人遺棄過一次,仲要再承受多一次嘅話,我都擔心佢會好難受。我覺得動物係有感覺,亦都知發生緊咩事… 覺得唔夠經驗嘅,我去努力了解努力學。覺得唔夠時間唔夠貼身照顧嘅,我辭職貼身照顧。覺得我唔夠財力去應付,我咪食少啲零食,你估我一個月買零食嘅錢少嘢呀?我唔係為咗你哋先走去學走去做,一切都係為咗糯米雞同其他主子。不過亦都好多謝每一個曾經睇死我,喺我背後插刀或者明插嘅人,因為你哋正正就係指出我嘅不足,令我可以真真正正咁睇到自己有咩問題,同時有唔少都為我提供咗唔少生活樂趣。最近『道德偉』少出現了,我有啲掛住你哋~

Read More