【夠鐘食藥】一陣腦震盪點算呀

有日一對父母帶住兩個小朋友嚟到診所。佢哋登記後,父母都各自各坐低玩電話~ 兩個小朋友初時都會乖乖哋坐喺度,之後過咗陣就開始郁身郁勢~其中一個小朋友就同爸爸講:「我都想睇電話呀。」爸爸:「唔得呀,小朋友唔睇得㗎,係大人㗎。」小朋友嘟起嘴,之後兩個小朋友就行去拎診所玩具架上啲玩具玩~玩吓玩吓,個哥哥發脾氣大嗌:「唔好玩嘅!」佢一手掉個玩具,剛剛好玩具就喺佢細佬臉邊擦過~細佬喊起上嚟,媽媽即刻撲上前檢查細佬塊臉點。我以為媽媽第一反應會係炳哥哥點解掉玩具掉到個細佬。點知媽媽一開口就係:「有冇搞錯呀!點解會有呢啲嘢喺度㗎?好危險㗎知唔知呀你。」媽媽怒睥我。我覺得有啲無奈,啲玩具明明死直直唔曉飛,有幾危險呢?媽媽冇打算放過我,佢行埋嚟拍枱:「而家我個仔整親呀!喺你度整親呀?你成碌木咁企喺度做咩呀?」我望望小朋友塊臉,佢幼嫩嘅肌膚泛紅了:「小朋友少少紅啫,應該冇咩嘅,你唔駛咁激動。」媽媽:「冇咩?一陣腦震盪點算呀?」…俾你啲音波功攻擊緊嘅我會唔會更易有腦震盪?我:「我頭先見到係件玩具喺佢側邊擦過啊。」佢:「你睇到你唔阻止佢?」我有超能力可以令時間停頓?定係可以閃電俠咁秒閃到佢身邊幫佢擋呀?我有咁嘅能力,我閃咗你去婆羅乃啦。我:「太太,其實小朋友玩起上嚟有多少損傷都唔奇嘅,不過哥哥咁樣向住細佬掟玩具呢個行為你就要留意吓啦,今次掟歪咗冇事啫,下次掟中就麻煩啦~不如同哥哥講錫住細佬啦。」佢:「我個仔點教唔駛你插把嘴!我係話緊你放埋啲咁危險嘅嘢喺度呀!你哋明知有小朋友嘅就唔好放玩具啦!你知未呀?我大量唔告到你甩褲,唔係個個都有我咁嘅器量㗎!醒定啲呀你」 有小朋友嘅地方,唔放玩具~冇小朋友嘅地方,放玩具…咁我哋應該放啲咩喺度呀?成人玩具?

Read More

【夠鐘食藥】不如試吓俾班女索吓雞屁股味

波波雞喺屋企…係冇朋友嘅。 呢年幾以嚟,我留意咗好耐~佢真係乞貓憎乞狗憎得好緊要。B婆離遠見到佢想行埋嚟,就會一嘢狗衝想去咬佢咁款。頭頭卷卷MEME見到佢都會寧願行開避開佢,米米就好些少,係有時心情可能麻麻一見到波波雞就會兜巴星埋去… 究竟點解波波雞入咗屋咁耐都冇朋友嘅呢?除咗佢本身性格賤人之外,我懷疑係因為佢著咗尿片。自古以嚟,動物結交朋友都係由屁股開始,一埋身就隻隻都係走去聞屁股先嘅,有時一大班新相識嘅狗仔見到面就會大家玩屁股版嘅氹氹轉菊花園。可能你屁股陣味我幾喜歡就同你做朋友,臭味相投之類咁卦。 有一日我就喺度諗『不如試吓俾班女索吓雞屁股味呀?大家做個好朋友呀?』,於是我除咗雞條尿片,抱住雞,將雞屁股隊埋去頭頭度…頭頭不滿地喵咗一聲即刻走,卷卷又係,MEME都係…米米直程黑我面。見到咁,我唔敢拎雞屁股去試試B婆反應啦,我怕B婆一嘢咬到佢標屎… 呢一次之後我冇再強迫佢哋聞雞屁股,我又開始諗,以前收養米米返嚟嗰時,米米都一樣係冇朋友。不過到收養咗雞返嚟之後,米米就開始同其他貓Friend咗,會見到佢哋閒時互相整理吓對方啲毛毛,又會一齊曬日光浴,一齊對抗波波雞,應該係『有同樣嘅敵人就係盟友』。 如果真係咁,波波雞你呢世都應該冇朋友㗎啦,因為我收山啦,唔會再收養多一隻返嚟,淨係你一隻都已經夠頭痕…

Read More

【夠鐘食藥】你唔好俾我喺機上面見到你

有日有位小姐嚟到~佢行埋嚟登記處:「睇過㗎啦,照舊呀。」 照舊即係乜意思呀?肥叉飯多色多飯?我:「小姐,請問你係咪睇醫生呀?麻煩你俾覆診卡號碼我呀」佢:「我用醫療卡㗎喎。」我望望空無一物冷清清嘅枱面,唔好意思,張卡你收埋咗喺屎忽入面呀?我:「咁醫療卡呢?」佢:「好明顯冇帶啦下話?咁都要問㗎咩?你見到㗎。」哦,咁你嚟做咩呀?我就快喺度貼張紙『請勿獻世』㗎啦~我:「你用醫療卡睇醫生嘅話,我哋係需要你張醫療卡㗎喎。」佢瞪大眼:「吓?有啲咁嘅事?」你唔好一臉詫異咁嘅樣啦好冇呀?我真係好想一拳中醒你呀。佢:「咁我即係唔睇得呀?我喺第二度試過得㗎喎。」我:「我哋呢度唔可以啊,一定要拎卡嚟~」佢:「你打上去同我公司我冇拎卡囉,唔得咩?」我:「呢個你可以自己打返去嘅。」 佢:「吓?要我做㗎咩?我公司俾錢你駛㗎喎?你知唔知我咩公司呀?」 我:「因為你都要打上去問咗同對晒你啲個人資料先嘅,如果醫療卡公司嗰邊OK嘅,佢就會再通知返我嘅。」 佢:「即係其實咁嘅,我係一個病人,你係一個姑娘,啲嘢係咪應該你做呢?等如我喺飛機度都唔會要個客自己斟水咁囉,公司規矩嚟㗎囉。」我:「如果你要跟足公司嘅,我哋診所淨係接受有帶醫療卡嘅人,我哋張告示都有寫明必須出示醫療卡。」佢瞪到對眼大一大:「好,你唔好俾我喺機上面見到你,你知我係咩人嘅話,你仲會咁咩,吓?」我:「嗯。」佢講完之後就離開診所:「嘖,唔睇啦,真係掃興呀」你睇醫生為興緻咁趣緻㗎? 隔咗個幾鐘,佢返嚟了:「卡呀,睇得未呀。」我:「有醫療卡就梗係有得睇啦~」帶齊嘢嚟咪乖囉~

Read More

【夠鐘食藥】下半身大解放

上次講到波波雞喺屋企係冇朋友,有可能係因為佢冇得俾其他動物聞屁股味而引致。於是有位留言提議我不如試吓搵一日全日唔著尿片,等佢哋可以隨意地聞屁股。 我考慮咗幾日,決定搵日放假試試…嗰日我哋一早幫佢放晒屎尿,腸乾淨了!膀胱都READY了!好,波波雞下半身大解放,去以股交友吧! 由於屎尿呢啲嘢呢一刻清咗,並唔等如係全日都會冇貨交,為奴為婢嘅我唯有密切留意住波波雞跑跑跳跳時有冇滲咗幾滴尿出嚟,又留意吓佢瞓過嘅位會唔會有屎漬屎油屎粉嘅出現…呢一日放假,我過得好充實。 但係…波波雞似乎因為冇咗條尿片,佢好似有啲唔開心有啲自卑咁~呢日佢大部份時間都係自己一個瞓喺角落位,冇去撩過交打,冇去撩過佢嘅女神頭頭,就算有其他貓行過佢身邊,佢都直接避開算。即係點呀?以前係持住自己下體有金鐘罩保護,冇人入到佢中路,所以係無敵咁話啦?而家一冇咗條尿片金鐘罩就即刻淆底?哎喲~波波雞你原來係扮大抽啊。 就係因為咁,嗰日波波雞結交朋友並唔成功,我哋都決定由得佢算,幫佢著返條尿片,佢立即生猛晒。或者…始終佢習慣咗著片~一時之間冇咗又真係感覺幾怪嘅,俾著我都會擔心自己會唔會凍親下面。 有冇朋友好閒啫,都係自己活得自在食得開懷最緊要。

Read More

【夠鐘食藥】祈個禱求上帝俾你捲土重來?

有日有位先生嚟到診所~ 佢行埋嚟同我講:「我真係好憎星期一。」嗯。哦。 我:「睇過未?睇醫生嘅麻煩俾身分證我呀~」佢:「未睇過,睇之前我有嘢想請教你先。」唔好請教我啦~我咩都唔識㗎~我:「嗯?」佢:「我可唔可以個個星期一都嚟見你…醫生。」你鍾意俾錢醫生嘅話冇人阻到你嘅。我:「唔舒服要睇醫生好正常嘅。」佢:「假設我個個星期都嚟啦,咁我突然有個星期冇嚟嘅,醫生會唔會喺我冇嚟嗰個星期為我做返啲嘢㗎?」醫生要為你做返啲咩?祈個禱求上帝俾你捲土重來?我:「我唔係好明…你冇唔舒服唔駛嚟睇醫生,醫生要做啲咩呀?」佢:「我個個星期都嚟喎,突然唔嚟梗係我有啲事嚟唔到,但係嗰個醫生我都係需要嗰張病假證明㗎嘛,你get唔get到呀?」 哦,你想買病假紙! 我:「我哋唔會賣病假紙,你冇嚟睇醫生嘅,當日就唔會有病假紙。」佢:「但係其實我個個星期都會嚟㗎喎,長期客喎。」我:「如果你冇嚟到睇醫生而醫生寫病假俾你,咁就係犯法~」佢:「香港有啲咁嘅嘢㗎咩?應該犯咗法都唔會有人知呀?我唔講咪得囉?我諗好多人都係咁啫。」我:「我哋唔會咁做~」佢:「我唔會成日咁㗎,久唔久一次,偶爾一次應該唔驚呀?」我:「我哋唔會咁做~」佢:「你有冇咩提議可以做到我要求嘅嘢呀,話晒你哋先係專業呀嘛。」我低頭:「辭職囉,或者搵份例休星期一嘅工囉。」 佢安靜地離開診所,唔知佢係咪真係去搵份例休星期一嘅工呢~

Read More

【夠鐘食藥】明知佢得返唔多日子都要遺棄佢嗎?

早前收到一位讀者訊息話佢朋友喺美孚執到一隻俾人遺棄嘅貓,問我有冇朋友義工可以幫佢搵個好人家。訊息中有相有影片,喺影片中隻貓嘅行得唔太好,讀者亦回覆貓貓應該年紀唔細…我個心真係沉一沉。又係寵物年紀大先嚟遺棄街邊… 嗰晚我問咗幾個朋友,佢哋都不約而同話呢個季節收貓B都已經好爆好忙,真係收唔到多一隻大貓…喺兩日後,讀者已經話我知隻貓貓半夜離世了。 遺棄貓貓喺美孚嘅主人,你明知佢得返唔多日子都仲要遺棄佢嗎?你明知佢嘅世界淨係得你又或者佢最信任最有安全感嘅地方係你屋企,你都仲要遺棄佢嗎?不過我知道你一定冇考慮過呢啲嘢,因為你根本冇良心,你有嘅話一定做唔出咁嘅事。有病,年紀大就要俾主人掉出街嘅呢啲事,都已經唔係咩新鮮事…遺棄佢哋嘅人總會有一大堆藉口去合理化自己嘅行為。『我冇能力照顧到啦!』『醫佢要用好多錢呀』『我唔忍心睇住佢死』,一條生命就係因為呢啲理由俾人冷酷無情咁掉出街,係一條生命,有感覺有感情有記憶,心臟仍然識得跳動…並唔係一個毛公仔。 你遺棄佢時,最後一句說話係講咗啲咩啊? 你由第一日拎佢返屋企養時,你又係講咗啲咩啊? 你可能已經記唔起,但係佢永遠都會記得你嘅所有…直到你真正離開佢,佢離開世界時。因為佢將你當成係佢生命中最重要嘅家人,而你…冇當過佢係真正嘅家人。

Read More

【夠鐘食藥】老老實實我覺得你係留難我囉

有日一位小姐嚟到診所。佢望望等緊睇醫生嘅病人,行埋嚟登記處:「喂,要等幾多個呀?」 我:「你未登記嘅?而家登記就等十七個,你係第十八個」佢:「十八?咪起碼兩個鐘?」我:「係呀。」佢望望手錶:「但係我一陣要飛啦喎。」你飛啦,你而家飛都得呀。我:「你要睇嘅我就同你登記啊。」 佢:「我話我要飛喎?」我:「你係咪要睇醫生啊,係嘅我就同你登記,咁你排第十八個~你係咪睇呀?」佢:「其實你知唔知飛機係唔等人㗎?」唔等啲遲到嘅人啫。我:「咁小姐請問你想點呢?」佢:「你哋做嘢慢,我要遲去到機場嘅話,係咪應該你哋出面同航空公司Deal?」我deal你就有份~我:「小姐呀,其實我哋今朝早九點已經開始登記㗎啦,如果你早啲嚟登記,自己預返好時間嘅話,你應該一早入咗去睇醫生,咁就唔會遲到啦。」 佢:「咁我係而家先嚟嘅,我有問題咩?係你多人堆咗喺度啫,老老實實我覺得你係留難我囉,有咩可能我呢啲冇得優先睇?個個都知趕飛機有幾趕。」你咪自己去到機場咁同地勤講囉~我:「我哋診所一向都係咁多人睇嘅,小姐可能你平時少留意啦。」佢拎起手提電話:「你自己同航空公司deal。」而家要飛嗰個又唔係我。我:「小姐我哋唔會代你向航空公司講任何嘢㗎~」佢拍枱:「咁我要等幾耐呀?」我:「等十七個」佢:「得啦!你去死啦!」小姐衝出診所~大概係趕住搭飛機卦…

Read More

【夠鐘食藥】究竟仲有幾多正常人喺呢個世界

網絡上日日like之不盡,個個出post都想獲得n個like數~ 有啲為求可以表現出自己與別不同,就會做一啲平時唔會做嘅嘢去贏取掌聲like數。我唔反對你突破自己,不過突破自己同時可唔可以先評估咗風險先,唔係玩到置之死地而後生咁款呀?一個唔小心,你真係瓜咗,最後上報兼一時紅咗嘅就會係你篇死亡新聞,不過好快就會俾外人忘記… 有啲甚至會利用自己以外去刷存在感,就好似早幾日有人將隻狗放落一個玻璃大水缸入面,明明眼前隻狗係不停伸頭撥水掙扎,佢哋都仲可以氣定神閒咁拎住部電話喺度影,到隻狗仔已經掙扎到冇力,慢慢沉咗落水底…主人先好似知道『佢原來唔識游水,佢原來會死』。而家時代科技係進步咗,但係啲人就好似愈嚟愈大倒退咁,不論係智商定行為方面都係咁。有時我都會諗,究竟仲有幾多正常人喺呢個世界,我返工已經遇到好多傻豬,睇新聞上網又係好多傻豬,可唔可以俾返多啲正常人嚟睇吓呀? 你條命係你自己嘅,你自己顧掂自己就得啦。但係用自己以外嘅生命,為你搏取其他人嘅掌聲讚賞就係唔好嘅事。學習平凡平淡,可以承受一切淡如水,未必唔係幸福。想要like前,請先好好運用自己個腦思考吓先,如果唔係你分分鐘得到嘅唔係like,而係眾人嘅咒罵,到時只會得不償失。

Read More

【夠鐘食藥】我會返嚟!

有晚一位小姐嚟到診所。佢氣沖沖咁行埋嚟登記處:「你知唔知點解急症要等咁耐呀?」 我哋係診所喎,唔係醫院喎,你會唔會去錯地方?我:「我哋係私家診所喎。」佢:「我知呀!我而家咪問你點解急症要等咁耐囉?」政府嘅錯,政府漠視民生需要嘅錯,每日一百五十人嘅錯,削減醫療開支嘅錯,大部人濫用急症服務嘅錯。我:「你係咪要喺度睇醫生?係嘅話麻煩你俾身分證我登記呀。」佢:「我頭先喺急症登記咗啦!我等咗四個鐘都未到我呀!」佢拎出醫院急症收據飛仔,一嘢『啪』喺枱面。我:「嗯,我哋同急症冇任何關係嘅,所以都係要重新登記嘅~」佢仰頭嘆氣,再低頭望住我:「咁我嗰一百八十蚊點算呀。」我:「….急症嘅,如果你已經分流咗,佢係冇得俾返你嘅。」佢:「即係我嗰一百八十蚊既得唔到急症醫療服務,仲要浪費我四個鐘生命呀?」好抱歉,係。我:「你而家係咪想喺度睇醫生呀?不如我同你登記先啦,因為我哋就快截症㗎啦。」佢又仰頭嘆氣:「真係浪費我生命呀!」我:「小姐?小姐?登唔登記?」佢:「你俾啲時間我!我返去睇吓到我未?差唔多到嘅我就唔駛再俾多筆錢。」我:「吓?醫院同我哋唔近㗎喎?」佢:「我住呢度㗎。」我:「但係我哋就收工啦喎,如果你去完醫院再返嚟,我哋收咗㗎啦,到時冇醫生睇㗎啦。 」佢衝出去診所,走前佢講:「總之一陣仲有耐未到我嘅,我就會返嚟啦!」於是,小姐消失了,我哋好準時收工。 第二朝我聽留言信箱…『我頭先咪同你講咗急症都未到我嘅,我會返嚟囉!急症真係痴線㗎!要我等八個鐘以上呀!你而家閂門算係點呀?將病人拒諸門外係咩品德呀?你同我開門呀,我返咗嚟呀!』

Read More

【夠鐘食藥】小朋友,你願意一齊努力嗎?

早排波波雞因為放唔到尿去咗睇醫生。我已經早早打定輸數,預咗係有石塞住咗尿道,由一開始養佢時,我都預咗有呢一日,因為佢個膀胱一早已經係報廢。 喺去診所期間,我就喺度諗如果要開刀拎石嘅話,究竟做唔做好?佢雖然年紀唔大,但係佢身體機能上本身就係有缺陷,捱唔捱到亦唔知,當時我真係好苦惱。去到醫生度,醫生手勢純熟快速放尿,啲尿足足整濕晒一大塊尿墊…我望住被接近揸乾尿袋嘅波波雞,鬆咗一口氣,同時我心諗『頂呀!喺屋企又放唔到,又鬼殺咁嘈,嚟到診所一見醫生就放到』。 醫生表示而家並無急切性嘅問題,既然放得到尿就可以再觀察多排先,不過我見反正都嚟到,我又好擔心會唔會係有石令到佢放尿時覺得痛,所以都拜託醫生幫手做驗尿石檢查。結果,醫生第二日打嚟話的確係有好多晶石,醫生亦需要驗多次波波雞嘅小便,話係拎去種菌睇睇。 種菌報告未出到,呢幾日放尿亦好順利,表面上波波雞就係一隻好健康好食得屙得嘅貓。望住佢周圍撩交打,我個腦一直喺度諗『究竟可以點做,係咪我做得未夠好先咁』,諗吓諗吓,我又好似返到去原點,返到去初初收養波波雞嗰陣。小朋友,你願意同肥婆媽媽一齊努力嗎?我唔放棄你嘅話,你可唔可以唔好咁快放棄自己?就好似當初一樣~

Read More

【夠鐘食藥】多重影分身

其中一位女士行埋嚟同我講:「我預約咗㗎。」我:「係~請問係咩名?」佢:「XXX」我:「你約咗十點半,坐坐先呀。」佢望望坐喺度嘅人,再擰轉頭問我:「係咪睇埋呢幾個到我呀?」我:「係呀。」佢指指後面跟佢尾嘅人:「我今日都帶咗幾個人嚟呀,可以睇埋呀可?」可以睇埋呀可?你覺得我哋只行預約制嘅流程,可以點樣睇埋你嗰幾位呢?我:「唔好意思呀小姐,我哋係一定要預約先有得睇㗎,一係我同佢哋約返個時間呀,咁最快嘅後日呀~」佢:「但係我預約咗㗎嘛」你預約咗你自己一個咋喎,突然玩多重影分身係咩事呀你?我:「你係預約你自己一位,但係你冇幫佢哋預約埋嘛,唔緊要㗎,我而家同佢哋預約後日嚟睇呀~」佢:「佢哋後日要返上去㗎啦,唔喺度㗎啦!」咁安心上路啦。我:「哦?係呀?咁或者佢哋知幾時再嚟香港嘅,可以預早約咗先呀。」佢:「唔得㗎,佢哋今日要睇㗎啦,唔睇嘅我好擔心囉。」我:「真係唔好意思啦小姐,今日真係冇位,我哋今日都排到滿晒啦。」佢:「針都插唔入呀?針仔嚟咋喎!」我望望佢口中講嗰幾枝針仔,嗯,你嗰幾枝都唔係針仔,鐵柱都嚟啦喎,做咩咁矮化自己呀~我:「真係冇位呀,約時間呀約日期呀,幾時再嚟呢頭呀?」佢:「我一陣入去嗰陣,佢哋入埋去得唔得呀?」我:「地方淺窄地方淺窄,其他唔關事嘅人就唔好入去啦,而家你睇醫生,唔係佢哋睇醫生嘛,你都唔想做檢查任人觀摩㗎?」佢擰轉頭同佢哋講咗一堆我聽唔明嘅語言,再擰返轉頭同我講:「佢哋可以蒙住個頭入房,你有冇頭笠呀?」我腦海內有班蒙頭人士排排企等打靶咁~我:「頭笠我就冇,膠手套我就有……」佢又擰轉頭疑似翻譯,之後又同我講:「係咪後日真係有得睇㗎?今日係咪真係冇得睇呀?佢哋幾個都唔係好阻你咋喎!」我:「我同佢哋約後日呀。」佢:「咁呀……好啦。」說好的後日已上路,原來都係呃我嘅?

Read More

【夠鐘食藥】廿幾蚊一罐嘅罐罐咁就被嫌棄了

波波雞嘅化驗報告已出。醫生話佢冇尿道感染冇菌,純粹係晶石問題。應該都算係好好彩嘅~晶石不致於大到塞住尿道,而家仍然可以日日放到一條強勁嘅水柱出嚟!至少鬆咗一口氣。晶石問題方面,醫生就話要多飲水多小便,等晶石可以易啲散易啲排出,四星期後可以再驗多一次小便,睇吓有冇少到晶石。 雖然拎報告時,我都買咗泌尿問題方面嘅處方罐頭,希望可以多多少少幫到啲,但係個衰仔竟然聞兩聞就唔食,廿幾蚊一罐嘅罐頭咁就被嫌棄了。唯有繼續食返佢原先食開嘅普通罐頭,加水加水再加水,之後再針筒灌水灌水再灌水。貓每日身體所需要嘅水份係每公斤60ML左右,波波雞而家有3.7公斤,即係至少要222ML水~咁計一計,平時主要以濕糧罐頭為主食嘅佢,需要特別灌水嘅ML數應該唔會令佢覺得好難受。 不過用針筒灌多幾次水之後,佢開始一見到針筒就瞳孔放大雞咁眼望住我,好似想話我知『你又嚟?唔好啦,我就死啦』,到真正灌佢水時,佢就會好精靈咁吐返啲水出嚟,真係好鬼精靈嘅啫。所以我又轉咗個方法,就係用之前網購返嚟嘅木魚片加熱水,攤凍之後再俾佢飲,又或者雞肉乾再加熱水浸到出味,又成為另一味有味水! 而家我全家都好幸福,日日都飲多咗好多水,包括我自己。因為我都好怕自己有尿石~諗起都覺痛…

Read More

【夠鐘食藥】我條命都幾硬淨㗎

有日一位太太嚟到診所。佢氣沖沖行埋嚟我度同我講:「啲藥唔夠食喎!點搞呀?」 我:「你俾咗你袋藥我睇吓先呀」我望望,錫紙包裝嘅抗生素包裝上係有十粒,咁…我冇俾少到喎。係佢食多咗喎。我問佢:「我係俾咗十粒你㗎喎~你睇吓,一日兩次,每次食一粒,應該食到五日㗎,你一日食幾次呀?」佢:「你邊度有講係一日兩次呀?」我指指藥袋上嘅貼紙:「呢度囉,寫得好清楚㗎喎。」佢:「哇,啲字細到咁點睇呀?」我:「咁出藥時都有講嘅,你嗰時冇聽清楚咩?」佢:「邊記得咁多呀?我一日聽咁多嘢樣樣都要記咩。」你咁唔愛惜自己生命,我又阻唔到你嘅~我:「咁你記唔記得自己一日食咗幾多次抗生素呀?」佢:「唔定喎,有時一日一次又有,有次醒起咪食多次又有。」我:「你咁樣食抗生素唔得㗎,亂食好危險㗎。」佢:「有咩危險啫,醫生開得俾我嘅慌死會毒瓜我咩?醫生好人嚟㗎嘛,而且我條命都幾硬淨㗎,我細個都大病過好多次,咪又係喺度!況且死又有咩好怕喎。」你咁豁達係好事嚟嘅。第時死咗之後,做鬼時人哋問你點死,你都應該可以直接答『死咋嘛,個個都要死㗎啦,我可能死於豁達。』 我:「抗生素係要跟足嚟食㗎,因為係一個療程,咁先會有效~」佢:「車!我自己身體點嘅我實知㗎,食幾多有效我會唔知咩?你俾多十粒我啦,我爭呢十粒就好㗎啦。」 我:「嗯,你不如坐坐先呀,你應該需要入去見見醫生…」醫生辛苦你啦,請好好同呢位病人講解吓~

Read More

【夠鐘食藥】我真係做得好錯

我錯了。我真係做得好錯~ 呢個星期,波波雞嘅大便成為咗一PATPAT爛嘅…睇住佢個肚痛到成隻貓都縮埋一舊,我個心好痛。原來問題係出自我身上… 事緣我獲得一批新主食罐頭,我好開心可以減輕吓我呢方面嘅負擔。點知,食食吓覺得有啲唔妥,佢哋竟然可以一貓食一罐125g…125g對於一隻正常貓嚟講已經可以係一日先食得晒嘅份量。而佢哋係可以一餐搞掂,太恐怖啦!於是我刻意減佢哋食量,以免食窮自己,我將原先一貓一罐,減成兩貓一罐。不過可能之前食大咗個胃,佢哋個個都好似餓鬼上身咁… 波波雞突然有日朝早,聞兩聞唔再食,我以為係佢個王子奄尖病又發作,點知返到嚟同佢人手放大便,一按落去,佢放咗個爛屎屁有汁有屎…再之後輕輕向下一推,成篤軟軟爛爛就呈現眼前。嚇得我騰騰震呀! 之後我先知原來大概係因為我太急俾新罐佢食,我以為罐頭反正大家都是肉,應該唔駛好似乾糧咁麻煩要循序漸進逐啲加份量咁換,點知原來係我諗法太天真。原來罐頭都需要1新罐:9舊罐,2新:8舊,3新:7舊咁慢慢換上去,等腸胃可以慢慢適應,減低腸胃不適。 呢次真係我考慮唔夠周詳,令到波波雞白白受苦了,我會認真反省。希望大家唔好犯我今次犯嘅錯,都同樣知道原來罐頭都一樣要時間適應,屙爛臭亦唔駛驚到即刻搵醫生,問題持續時先考慮停新罐,再冇改善先去睇醫生都未遲。

Read More

【夠鐘食藥】真係諗壞腦啦

有日一位小姐嚟到診所。 佢行埋嚟同我講:「我有咗呀!」哦~恭喜你啊。 我:「係咪睇醫生?係嘅話你俾身份證我登記呀。」佢:「你可唔可以打俾我老公,同佢講我有咗呀?」小姐,經手人唔係我啊,點解要我打去同你老公講?我:「Er……點解呢?點解你唔自己講呢?」佢:「你係姑娘嘛!你講佢先信㗎!」我:「我哋可以寫張證明你有懷孕嘅信,不過首先要你喺度驗咗孕先。」佢:「……其實我未有,我準備會有。」即係你頭先呃我呀?我:「嗯,咁你可以遲啲再嚟驗呀?」佢:「你可唔可以打俾我老公,同佢講咗我有咗先呀?」我:「其實你係咪有咩事,所以先堅持要我打俾你先生呀?」佢:「係呀,我老公話要我有咗先考慮掉佢老母走呀,佢而家係咁話佢老母得自己一個人,唔肯掉佢走呀!」 你覺唔覺句嘢有啲問題呀?你有咗BB嘅話,佢老母即係你奶奶,都仍然會係自己一個人㗎喎,你有冇BB都唔關你奶奶事㗎? 我:「哦~呢啲嘢你哋兩公婆傾啦~」佢:「佢就係唔聽我講呀!我唔想同佢老母一齊住呀,你打俾佢同佢講我有咗BB先啦!」我:「冇得咁㗎~就算講咗,你又唔係真係有,你到時點交差呀?」佢:「是但整個出嚟囉!」去玩具反乜城拎個天真無邪曉眨眼唔曉屙屎嘅公仔返屋企嗎?我:「……小姐,你唔好咁諗啦,諗吓諗吓好易行錯路㗎~兩公婆嘅嘢再睇吓可以點啦,我呢度真係幫你唔到~」佢邊講邊走:「我大唔到肚,佢老母大囉!」嗱嗱嗱,真係諗壞腦啦!

Read More

【夠鐘食藥】有啲創傷係一世嘅烙印

經過轉罐頭唔成功後,佢哋食返舊罐算,廢事菊花痛~好大可能本身腸胃比較敏感,受唔到啲貴罐頭。 之但係今次又好似有少少因禍得福嘅感覺啊!事源就係之前批新罐頭可能因為主打吞拿魚嘅關係,我再俾返之前波波雞唔肯食嗰隻泌尿處方罐佢食時,佢竟然清碗!咁咪好囉大少爺,肯食處方罐,排出晶石終於有望啦! 而家波波雞飲食大方向都係向多水份埋手,不過我已經冇再灌佢水啦,因為之前睇到有人話『灌水係好傷感情』,咁將心比己的話,又真係好有道理。始終動物都係有情感有喜怒哀樂有記憶。 你對佢好,佢會知,佢亦會記一世。雖然啲人成日話貓得三日記憶,狗甚至得一日,但係我唔認同。以波波雞為例,佢嚟我屋企之前唔知係咪曾經遇過一啲唔太好嘅事,我發覺每次我換垃圾袋時,佢會驚到縮埋一舊,之後就會立即搵地方匿,呢個情況一直由入屋持續到而家。 我以前亦有隻收養返嚟嘅松鼠狗,由收養返嚟到離世嗰日,佢仍然對人嘅手腳一舉一動非常敏感,只要人一郁,佢就會追住邊吠邊咬。所以我好肯定貓狗嘅記憶唔係得短短幾日,有啲創傷對佢哋嚟講係一世嘅烙印。不論你愛唔愛動物或小朋友,喺你舉起手舉起腳準備打落去嗰陣,你就要考慮你係咪忍心要佢哋承受一世嘅心理創傷。選擇將佢帶嚟你嘅世界時,就好應該好好愛護佢一世,如果你做唔到,請你平靜和平地將佢交俾其他有能力嘅人…

Read More

【夠鐘食藥】太太發現咗呢個『新大陸』

有日有位太太嚟到診所。佢行埋嚟同我講:「你可唔可以叫你個負責人出嚟?」 我:「請問有咩事呢?」佢:「我要見你哋嘅最高決策負責人!」即係醫生啦下嘛?我:「如果你要見醫生嘅,我同你登記呀。你係有咩事搵佢㗎?」佢:「我唔同低檔次嘅人講嘢㗎。」好對唔住,你而家同緊我講嘢~我:「你係咪睇醫生呀?我同你登記啦,你俾身分證明文件我啦。」佢:「我個樣似有病咩?睇咩醫生呀?」似呀,仲係好病嗰款。我:「個個嚟得診所都係唔舒服睇醫生嘅,如果唔係,你有咩事要搵醫生呀?」佢:「梗係有嘢同佢講啦」『我愛你』,『I LOVE YOU』,『哎屎嗲嚕』嗎?我:「嗯,咁呀~我都要拎你證件同你登記咗啊,你唔話我知咩事,我都係當你要睇醫生㗎啦」佢:「其實你係咪唔認得我。」 係呀,你個樣咁平凡,平到落肚位先開始突出嚟,唔認得你好奇咩? 我:「嗯~你係….」 佢:「我前日嚟睇過醫生㗎!」我:「哦?係?請問叫咩名啊?我同你拎返排版出嚟先呀~係咪啲藥有咩問題?食完仲係好舒服?想覆診?」佢:「唔係呀,醫生啲藥會甩色㗎,我洗完手再拎藥,有隻橙色嘅啲色會冇咗忽色。」 …我突然好想一個膠紙座飛去你度,不過本診所係對暴力說不。你都係將我變返成低檔次嘅人啦。我唔係好想同你講嘢啦~我:「嗯…咁你啲藥食完啦嘛?仲有冇唔舒服呀?」佢:「食完啦,冇晒事啦。」我:「如果你係要入房見醫生為咗講呢件事嘅,不如我代你通知醫生啦好冇?同埋…色呢啲係會甩嘅,因為佢都係色素嚟~同埋佢要溶㗎嘛,俾你食完之後吸收㗎嘛~」佢:「藥喎,藥可以有色㗎咩?唔怕俾人告呀?」太太發現咗呢個『新大陸』~好新鮮好出奇呀~醫生,你哋準備好俾人告未呀?

Read More

【夠鐘食藥】你試下自己赤腳去行 享受陽光禮物呀

夏天硬係會有啲傻傻哋嘅主人帶住啲貓狗出街散步,貓出街啱唔啱呢樣嘢就唔多講啦,拗嚟冇意思,佢哋覺得自己隻貓OK嘅係享受嘅就得。 若果夏天真係有需要帶貓狗出街的話,真係有需要留意返個出街時間,普遍可以出街嘅時間都係太陽唔太猛烈嘅時候,即係大概朝早八九點,黃昏六點左右。正午時間,真係唔好出街啦,我試吓叫你自己赤腳去行呀,嚟享受下陽光嘅禮物呀! 有啲主人唔知喺邊度聽返嚟話正午時段帶隻狗出去曬一曬行一行,可以將身上嘅蝨或塵蟎通通殺死,亦會話狗嘅腳掌有厚厚嘅皮,並唔似得人咁脆弱,覺得狗係可以受得住高溫嘅地面。你塊臉皮睇落都好似幾厚,我又想睇吓你頂唔頂得住啦。 另外即使你唔係帶佢去石屎路,你覺得三十幾度烈日當空帶佢去行山係一件好碎料嘅事嗎?如果你哋本身一直都係咁行開訓練開都還可以。只要你唔係突然挑起唔知邊條筋好想去行山,好想人狗樂融融咁款去行,就好似平時冇跑開步嘅人突然走去報馬拉松一樣……你咁樣唔係挑戰自己極限,你係好無謂咁將自己條命放喺刀口上面。作為一個成年人,大家都好應該先評估咗自己加身邊嘅人或動物可唔可以喺呢種天氣下戶外活動,如果認為唔得嘅話,真係唔好勉強,寧願留喺屋企開住風扇一齊攤喺地下好過。你嘅寵物可以見到你就已經好開心。

Read More

【夠鐘食藥】隔籬嘅姑娘,到你聽電話啦

電話響起~ 我:「你好,乜乜診所。」 對方係一位先生:「我要投訴呀!」 我:「請問先生要投訴啲咩呢?」 佢:「我要投訴你啲姑娘好差呀!」 啊?即係你要我自己處理返自己啲投訴咁呀?好呀,左耳入右耳出啊。 我:「請問係咩事呢?」 佢:「有個死肥婆姑娘呀!」 係我,應該係我。 我:「嗯,繼續呀」…

Read More

【夠鐘食藥】自己嘅生活唔係活俾人睇

嚟緊六月,係波波雞真正嘅兩歲了,估唔到咁快就入咗屋接近兩年~ 睇返以前嘅相,諗返以前佢一定要痴住人捉住人先肯瞓,食嘢狼死到不得了嗰個樣,同而家嘅佢相比起,真係充份證明有家嘅小朋友就係幸福同任性。而家嘅佢已經唔會再次次清碗,亦唔會痴住我先瞓到。咁樣都應該係因為佢已經有足夠嘅安全感~佢知道俾佢日咬夜咬嘅肥婆唔會俾佢餓親之餘,更加係唔會掉佢出街。 早幾日有人問我『雞雞算唔算生命力好強勁?』,我諗都唔駛諗,梗係算啦!我自己三十幾度行出街一陣都想死,佢仲要係三十幾度天氣下冇水冇糧喺個寵物袋入面,咁都唔死得,生命力簡直勁過蚯蚓啦。而且佢細細個嗰時下半身咁嘅樣,到大個都可以成為貓界跑車,呢啲真係除咗生命力改善貓生可以解釋到,我都諗唔到另一個理由。 雖然我都俾人inbox炳過我係換咗N次貓,呢個情況就好似我俾人話我啲返工經歷係老作家一樣,解釋都冇用啦,其他人一口咬定係,無論你點解釋佢哋都一樣唔會聽得入耳,即使有證明,佢哋仍然係不痛不癢咁搵下一樣嘢嚟啄你。 唯有笑笑話『係呀,你真係看透世事啦』,反正本身係各不相干嘅人,何必執著糾纏。 自己嘅生活唔係活俾人睇,最緊要都係自己同班仔女,其他唔關事嘅人…一律都係屋外人~唔俾佢過門就唔係客啦,駛乜招呼佢。

Read More

【夠鐘食藥】我就快跟唔到佢個Beat啦

有日有位太太因為藥費問題嘈起上嚟…佢:「有咩可能咁貴呀吓?」 我:「我哋呢度有列明診金同藥費係幾多嘅,你可以睇吓張紙呀。」佢:「我頭先坐喺度咁耐都未見過呢張紙嘅出現!你啱啱黐出嚟㗎?」我:「佢一直都喺度呀。」佢:「你唔好講咁多廢話啦,你搵個同我一樣樣嘅人出嚟同我傾!」我可唔可以拎塊鏡出嚟俾你自己照住講呀?我診所冇個同你一樣樣嘅人喺度啊。你尋親不如去登報呀?我:「唔好意思呀太太,我哋診金藥費係定價㗎。」佢:「你搵個同我一樣樣嘅人嚟同我傾呀!我唔要同你呢啲嫁唔出嘅人講嘢呀!唔同級數呀!」哦?我突然好唔想承認我嫁咗,我好唔想同你一樣級數…我:「邊關嫁唔嫁得出事呢,而家係講緊診…」佢咆哮:「你呢啲連頭家係點維持嘅人都唔明呀!你嫁唔出梗係有原因㗎啦!」我細細聲:「其實我嫁咗㗎啦。」佢先係靜一靜,然後再咆哮:「嫁咗仲要出嚟做代表咩呀?代表你唔識維持頭家呀!定係你老公冇本事養唔起你呀?」…啊,你講晒啦,嫁咗又死,未嫁又死。你老公一定好有本事養得起你,其實你為嗰三百蚊喺度嘈,算唔算摑緊你老公呀? 我:「太太呀,不如冷靜啲先~有咩可以慢慢講,唔駛下下用真氣嘅。我哋診金藥費方面一直都係咁嘅價錢,其實你都唔係第一次睇啦,之前一直都係收開你咁嘅價錢,你會唔會係有咩難處呀?如果有嘅,一係我俾你入返醫生房同醫生傾吓呀?」 太太突然靜晒,慢慢喊咗出嚟…哇~我就快跟唔到佢個beat啦。我:「…你坐坐先,我轉頭俾你俾返醫生房呀。」其實有難處可以直接講,大家都係有血有肉嘅人,何必難為人呢?

Read More

【夠鐘食藥】波波雞已經正式愛上你

 有晚我同雞爸一齊攤喺床睇電視,睇睇吓,波波雞喺床尾跳咗上嚟,佢行到去雞爸嘅腳位時停咗喺度… 我問雞爸:「你冇洗乾淨隻腳呀?阿雞係咁索嘅?」雞爸望望阿雞:「洗咗啦喎。」我哋一齊望住波波雞究竟想搞邊科,雞聞吓又聞吓,佢突然擘大口咬住被下雞爸嘅腳趾…我:「佢咬你腳趾喎。」雞爸:「由佢啦,反正唔痛。」雞爸繼續睇電視,我就繼續望住波波雞。雞一路咬,一路身體有啲郁動,初初我以為佢係嘗試緊移啱個位,等自己咬得舒服啲。點知望望吓好似有啲唔對路,雞嘅身體擺動幅度,再加上雞嘅表情雖然肉緊,但係眼神顯得異常空洞。啊!波波雞借用雞爸隻腳自瀆緊!我:「你個仔好似喺度打緊GG啊~」雞爸望望:「咁就係㗎啦?」我:「好似真係呀,你望吓佢郁嚟郁去都喺嗰個位,好似想磨出火花咁,我諗一除片就會見到佢枝唇膏仔㗎啦。」一除片下,果然見到枝小唇膏(貓公JJ)伸咗出嚟。我:「你要唔要由佢得除片後繼續J你呀?」雞爸:「…著返啦。」我望住雞爸嘅表情,佢好似有種講唔出口嘅感覺咁。我都明嘅,一個大男人俾隻閹咗嘅貓仔咬住腳趾頭嚟J,個感覺應該好複雜。不過…貓雖然閹咗,但係性慾都會長存的。因為閹應該只不過係將佢嘅繁殖能力杜絕咗,性慾係冇辦法杜絕~ 雞爸,辛苦你啦。波波雞已經正式愛上你…隻腳。

Read More

【夠鐘食藥】食嚟食去都仲係會屎忽痕呀

有日一位先生嚟到診所。佢行埋嚟登記處問我:「呢啲藥係咪可以食㗎?」 我望住佢手拎住嘅藥:「先生,我哋唔會幫你睇唔係我哋醫生處方嘅藥㗎~如果你有咩問題,可以同你登記入房見醫生。」佢:「吓?問少少嘢都唔答㗎?」係呀,好奇呀!你路過咋喎,我又唔係本十萬個為什麼~我:「因為藥呢啲唔係我哋應該答嘅問題」佢:「咁我問吓有冇效,係唔係隻藥得唔得呀?我覺得佢冇咩效呀。」我:「不如你俾身分證明文件我,我同你登記,你入去問醫生啦。」佢:「唔好啦,小小事我都唔係好想麻煩醫生。」我:「咁你去問返賣呢盒藥俾你嘅人啦。」佢:「藥房成班麻甩佬,一陣以為我係gay咪死。」…你gay唔gay,邊個會關心?我:「總之我唔可以答你任何藥嘅問題啦。」佢:「食法呢?」…吞落肚,吞啖水,乾咗佢囉?IQ題?我:「佢應該有講點食呀?你跟佢指示食就得啦。」佢:「我好似覺得食錯咗咁,食嚟食去都仲係會屎忽痕呀,咁我每朝拎返出嚟係見到佢有少少溶咗好似冇咗忽咁嘅,我係咪冇用錯方法俾佢食呀?」我望住盒杜蟲藥…我:「嗯,杜蟲藥係口服。」佢指指下面:「口服呀嘛。」我指指上面:「口呀,呢個口呀。」 佢:「哎呀!唔怪得啦!原來係我食㗎?我以為係放喺門口俾佢咬,引蛇出洞,好似啲老鼠藥咁呀!我放咗幾晚喺門口都覺得怪㗎啦!」 我:「下次睇清楚先好食啦…」佢:「我有睇清楚,係搞錯咗概念啫!」佢扭住屁股離開診所。…以後啲藥可唔可以有圖文說明?

Read More

【夠鐘食藥】放棄動物CAFÉ行程

之前去日本泰國旅行前都會睇吓有咩行程好推介,我見有唔少人都會推介去動物CAFÉ,去親親小動物。 泰國嘅動物CAFÉ有啲直程係動物園咁款,佢哋嘅動物種類已經唔係貓狗咁簡單,即係你喺香港根本唔會養到嘅,我亦唔知嗰啲叫咩名…有次我都對日本嘅一間刺蝟CAFÉ好心動,因為我以前養過刺蝟,喺佢哋去晒彩虹橋之後,我有時上網見到差唔多樣嘅刺蝟,就會特別掛住佢哋。 嗰次我雖然心動過,諗過去,但最後我都係冇去到。 因為自己養過刺蝟都會知道佢哋係夜晚先活躍嘅動物,就好似貓頭鷹咁,日光日白係會大覺瞓,夜晚就會大暴走,我好記得我以前晚晚都聽到佢哋喺出面挖礦咁嘅聲,有個大跑輪嘅仲會晚晚無敵風火輪咁大暴走。所以亦因為咁,好多人都會覺得養刺蝟冇咁大互動性,你瞓佢玩,你醒佢瞓。 CAFÉ嘅營業時間都係日白日光居多,即係你去到嘅時候,十有九佢哋都係瞓緊,剩返嘅一隻就可能係俾你拎咗出嚟『玩』。本身刺蝟亦係比較緊張嘅動物,對聲音對氣味非常敏感,CAFÉ每日都有唔同嘅人嚟嘗試拎佢哋上手,感受俾佢哋因為受驚而瑟縮一團成刺波波俾刺拮吓嘅感覺,如果佢識講嘢嘅話,我諗佢第一句應該係會講『放低我呀!』。諗到咁..我就真正咁放棄咗呢個行程。 雖然我掛住我班仔女,但係我唔想睇住一班小動物喺無限陌生恐懼輪迴當中過生活。 我都係繼續去搵好嘢食好過,班仔女都係繼續放喺心入面,久唔久睇返佢哋嘅相好了。

Read More

【夠鐘食藥】點解可以隨便掉我啲嘢呀

有個寧靜嘅早上,趁醫生未返到嚟,我喺度享受緊蕃茄蛋治~突然有位小姐衝入嚟診所,我嗱嗱聲吞咗啖蛋治。 佢行埋嚟登記處:「你哋啲流感針用邊間公司呀?」我:「XXX呀(英文名)」佢:「講中文啦,蝦我唔識聽英文呀?」我:「XXX呀(中文名)」佢:「未聽過喎,聽都未聽過囉。」咁你見識少又唔駛咁大聲話我知嘅~我:「上網搵到㗎,要唔要我寫低個名俾你?」佢:「我上次打嗰枝係咩公司呀?」我:「你俾一俾你身分證號碼我呀,我幫你睇睇。」佢:「XXXXXXX」我睇睇電腦紀錄:「都係XXX呀。」佢:「而家又係XXX,兩個月前又係XXX?你啲針唔換㗎?」我:「流感針嘅藥廠唔係好多間㗎咋,我哋之前打晒,有再入過貨嘅~你問嚟做咩呢小姐?」佢:「你俾返我之前打嗰劑嘅盒我呀。」我:「你打嗰劑?兩個月前喎?醫生喺同你打完當日已經掉咗啦。」佢:「我㗎喎?點解掉呀?唔駛俾返我㗎咩?搵人答我啦!」我:「你嗰時冇話要嘛,隔咗成兩個月先嚟話攞返,俾唔返你㗎啦,就算你要而家嗰啲盒都係唔同批次…」佢:「我冇話要而家嗰啲呀,我係要我打嗰枝個盒呀!」我:「我真係幫你唔到呀」佢拍枱:「你答我呀!點解可以隨便掉我啲嘢呀!我嗰日俾足錢㗎!」我:「…下次你要嘅話早啲講,即時講,咁先可以俾到你。」 佢:「NEVER!冇下次呀!我唔會再嚟呀!我實上網唱你隨便掉屬於病人嘅嘢!」 小姐嬲嬲豬離開診所。 兩年前你喺度掉嘅紙巾,我要唔要幫你KEEP呀?

Read More

【夠鐘食藥】要喊就即管喊

近日大家應該都好難開心到,甚至有部份人應該會自覺情緒已經唔多妥。 你唔係孤獨一個人嘅,我哋好多人都一樣。要喊就即管喊,唔好收收埋埋,覺得喊係軟弱嘅表現,男定女都係。每個人都有情緒,亦有無力感嘅時候。即使軟弱無力亦唔係羞愧嘅事,我哋係人嘛,唔係超人。面對好多情況,我哋都一樣會冇能力解決,一個人唔得嘅,就試試搵人幫吓手,至少有個照應亦可互相扶持。人生中或多或少都會面對挫折,我哋都會從中學習同成長。 家中班寵物係我嘅精神支柱,我攰嘅時候,會望望佢哋嘅相,睇吓佢哋啲影片。呢個時候會係我心靈上最寧靜,腦袋最放鬆嘅時候,亦係叉電嘅好機會。如果你家中冇寵物就睇吓其他人嘅,寵物天真爛漫嘅笑臉,滑稽逗趣嘅動作,為你提供一息間嘅喘息機會。 覺得唔舒服時,可以暫且抽離一下,冇人會怪你。我哋或者冇辦法一個人堅守到最後,但我哋係一班人,一大班人!一個人暫且離開,其他人自動補上。 就算我哋行唔同嘅路,亦唔需要惡言相向,因為路有好多,世界亦好大。不同路的偶爾相遇,只需點頭示好,然後繼續行自己嘅路。唔好望人哋行嘅係死路,人哋嘅死唔會令你有乜好處,反而會係自己作口業。一生中受嘅挑戰有好多,每次我哋都應該抱住謙卑嘅態度應對,因為對方未必有惡意,只係佢表達嘅方式可能唔係你預期想要。 一齊吸貓吧!

Read More

【夠鐘食藥】周潤發 Vs. 任達華

有日有位熟客嚟到診所…佢如常坐埋一邊手指指我:「登記呀,咳,咳,咳。」 佢嘅咳聲非常響亮,即使醫生俾幾多咳水佢,照過幾多次肺,一直都搵唔到咳嘅原因…聽同事講,佢已經咳咗幾年。初初我見佢咁咳法,會覺得佢好慘好可憐,但係久而久之,我開始不再帶有一絲同情憐憫之心… 坐喺度同樣等睇醫生嘅父子,仔仔每次一聽到咳聲就會立即掩鼻。 熟客留意到仔仔有咁嘅反應,於是同仔仔講:「你有冇家教㗎?當住人面掩口掩鼻做咩呀你?你有冇禮貌㗎?」 爸爸見到自己個仔俾佢鬧:「你做咩話佢呀?你痴線㗎?」 熟客:「我咳關你哋咩事呀,咳!咳!我係要咳呀!」 阿熟客呀,查實你把聲同咳聲都好刺耳呀,你咳還咳,唔好撩交打咁款啦,你唔好以為你咳聲大大就BODY大大先得㗎,人哋一拳KO你啦。 熟客繼續響亮地咳,咳,咳。仔仔掩住口向爸爸講咗一啲嘢,我聽唔到。爸爸就大大聲講:「可能呢個叔叔冇讀過書呢,學校有教咳要掩口,佢可能冇返過學呢。」 熟客反擊:「我名牌大學畢業㗎!」係咪福建炒飯大學呀? 爸爸望住熟客講:「你講就係呀?我係周潤發添呀。」…

Read More

【夠鐘食藥】可能係屋企人祖先化身嚟探我

天氣一熱,家中嘅小蟑螂大軍都開始出動… 過往每年嘅六至八月都會有一隻大蟑螂入屋,大版蟑螂嘅真係每年得一隻嘅啫,有人同我講過『可能係屋企人祖先化身大蟑螂嚟見你探你呀』。我啋!變隻靚啲嘅昆蟲得唔得呀?大版蟑螂我真係頂唔順呀。我好記得有晚我已經上咗床熄晒燈攬住頭頭準備瞓,突然聽到窗台有『沙沙沙沙』聲,我即刻拎起電話開電筒燈望望聲音嘅源頭,我生平中最驚嘅嘢就咁出現咗喺我眼前,我立即彈起身,一心諗住我班貓會幫我解決問題啦。點知佢哋都係同我一齊跑走… 再有一年夏天,我一屋主子全部都不停嘔,係除咗B婆同頭頭冇事,我諗嚟諗去都唔知點解會咁,咁我帶佢哋去睇醫生啦,醫生都係開啲止嘔藥抗生素之類嘅嘢。第二日我就喺雞仔嘔出嚟嘅嘢搵到一條屬於大版蟑螂嘅殘肢….之後我就醒起嗰排對面搬屋,走廊亦曾經傳出陣陣類似殺蟲水嘅味。大概係因為佢哋全部有份食咗隻身帶殺蟲水嘅蟑螂咁就中招了。好彩最後大家嘔乾嘔淨就冇事… 但係自從呢次,我就對所有殺蟑螂嘅藥通通說不,真係唔敢搏。我雖然已經唔喺屋企煮飯,亦盡量唔喺屋企食嘢,渠口位都有定時定候加稀釋漂白水,但係啲小蟑螂依然有好多好多…今年仲覺得比往年多咗活躍咗,究竟點樣先可以唔用藥而令屋企冇晒啲小蟑螂呢? 同埋一年一會嗰隻大蟑螂祖仙今年可唔可以唔好再化身蟑螂嚟探我呀?我真係好怕蟑螂…

Read More

【夠鐘食藥】你咬我食呀

冬天的某一日,診所內有幾位病人喺度等睇醫生~突然坐近門口嘅病人行到去另一邊嘅位度坐,即使佢已經調咗位,佢眉頭依然深深鎖,仲掩住口鼻,時不時單手撥撥。另外幾位病人都開始係咁… 我問佢哋:「係咪有咩事呀?」其中一個病人同我講:「你自己出嚟聞吓呀」於是我行出去~一出到去就聞到陣煙味…我再行出去診所門外,正正見到幾位先生挨住診所玻璃喺度食煙。佢哋望望我就唔理我,繼續食煙。我開口:「唔好意思呀幾位,你哋介唔介意唔好挨住喺度食煙呀?」A先生起晒鋼:「有咩問題呀?塊玻璃你㗎?」佢邊講邊敲玻璃。幾歲人呀?要唔要話俾老師知呀?我:「冇錯呀,診所玻璃梗係我哋㗎啦,所以請你哋唔好挨住喺度食煙呀。」A先生分明係一個屎忽仔,佢用身撞玻璃:「我係要挨係要撞呀,你咬我食呀?」B先生捉住佢:「走啦。」A先生死都唔走,可能想同塊玻璃註冊結婚過人世:「佢(指我)以為自己係邊個先?憑咩可以叫我哋走呀?我係鍾意喺度食呀,唔得咩?」C附和:「係囉,歧視呀?食煙合法㗎!」A:「係呀!」我:「哦,咁即係你哋繼續喺度食煙呀?」A極度挑釁:「吹呀?」我行返入診所直行入倉,我同事好緊張問我:「做咩呀?攞咩呀你?」 我搬個座地風扇出去,插好插蘇,拉開診所門,放把風扇出去,按著電制~『呼~~~~~~~~~~~~~』幾位先生急急腳離開原地。吹呀?吹啦嘛!

Read More

【夠鐘食藥】你仍然係全屋最麻煩最衰格嗰隻

我屋企又多咗兩隻兔仔,當兩隻兔仔返到屋企時,雞仔嘅反應表情都好好笑,成個樣都充分表現咗咩係『好委屈,雞雞心裡苦』。同我屋企其他主子嘅一臉從容,好客熱情打招呼嘅反應成為強烈對比。我明明記得我之前都有喺街執過一隻兔仔返嚟養,點解雞仔今次咁大反應嘅? 雞爸一言驚醒洛克人:「上次嗰隻兔仔喺度嗰時,雞仔都未返嚟,雞仔應該係生平第一次見兔仔咋。」 咦,又好似係喎,唔怪得雞仔個反應咁大啦。兔仔喺籠入面,雞仔一見佢哋郁就會發出怪叫嘅聲。兔仔出嚟放風,雞仔就化身牧羊狗咁趕返兩隻兔仔入籠。嗰兩隻兔仔完全唔驚貓狗,自己會走埋去撩啲貓狗痴身痴勢咁,雞仔見到咁真係眼火都爆,fee到聲都沙。 我有同雞仔講:「你乖啦,兔仔都應該係暫時喺度㗎咋,佢哋搵到頭好主家就走㗎啦。」 雞仔圓碌碌嘅眼望住我,好似聽得明,又好似聽唔明咁。 我:「你仍然係全屋最麻煩最衰格嗰隻呀,放心啦,冇一隻可以超越到你地位㗎啦。」 其實我都好心郁想養埋呢兩隻兔仔,因為佢哋真係好乖,長時間放出嚟佢哋都識得自己返入籠屙屎屙尿,又可以同貓狗相處又嗲人。但係我屋企似乎真係似動物園多過人住嘅屋企了…反正佢哋都要絕埋育先會搵好人家,我又可以慢慢諗諗。唔想佢哋成為繁殖者下嘅商品,所以先絕育後搵主人似乎係必需!

Read More

【夠鐘食藥】我又唔係冇交稅

有日一位小姐嚟到診所。佢行埋嚟登記處同我講:「你知唔知醫院好多人呀。」 我又點會知呢,我對眼跟住我個人㗎嘛。我:「你係咪睇醫生呀?麻煩你身分證呀。」佢:「我頭先登記過啦。」我:「你喺度登記咗?頭先?我哋睇晒登記咗嘅症啦喎…佢嘆咗啖氣:「唔係你呢度呀,醫院呀,我咪話咗我喺醫院過嚟囉,你白痴㗎咩。」哦~原來你第一句已經包含咗咁多意思。我:「你喺醫院登記咗唔關我哋診所事㗎,我哋都要同你登記過㗎。」佢:「醫院同診所唔係互通㗎咩?我喺醫院登記咗仲要再登記?」我真係幾羨慕你啲頭髮咁烏黑,證明你個腦100%全新咁樣。我:「唔係㗎~診所還診所,醫院還醫院。你頭先係去急症登記呀?你喺嗰邊應該都俾咗錢㗎喎。」佢:「係呀。」我:「你咩事要去急症呀?你係睇完嘅?定係登記咗就走?」佢:「佢將我排到去尾尾咁滯呀!話我係咩非緊急呀,我已經等咗兩個鐘都未到我呀!」我:「咁你咩事呀?」佢:「我條脷生咗粒嘢呀!」佢立即伸出條脷。…係痱滋嚟喎,應該係除非唔係。我:「哦~咁我同你登記睇醫生呀,你俾身分證我先呀。」佢:「醫院都白痴,咩非緊急呀,我講嘢都痛呀!仲要同我講嗰一百八十蚊冇得退返俾我喎!都白痴,我都廢事同佢哋嘈落去,我當交錢養班廢人囉!」我:「嗯,講嘢痛嘅就唔好講咁多嘢住呀,我同你登記先呀。」佢撻張身分證喺枱面:「真係講起就嬲呀,我又唔係冇交稅喎。」 我:「急症嘅意思係真係俾生命有危急嘅人用啊…」佢:「我講嘢都痛呀!點唔危急呀?係咪要就死或者死晒咁滯嗰啲先可以去呀?白痴!」我:「你都係唔好講嘢住啦,見痛就抖抖先呀。」原來講得多提得多白痴,好似真係會對自己有影響啊~以後我會改口話人『你真係聰明絕頂啦』!

Read More

香港藥房格-口罩格價珍寶豬欄-夠鍾食藥

【夠鐘食藥】會轉彎的J

『內文含有不雅用語,如要繼續請….』 有日兩個男仔一齊嚟到診所。佢哋一齊遞上身分證,A男:「未睇過」我:「好呀,麻煩你哋寫低你哋嘅電話同地址呀」寫地址期間,B男問A:「你肯定你要睇呀?」A:「嗯」B:「可能冇事呢」B問我:「姑娘呀,醫生係男醫生定女醫生呀?」我:「男醫生」B同A講:「男嚟喎,你真係俾佢睇你條j呀?好gay囉成件事」醫生係一個正當人家為病人診症咋喎,請唔好加埋啲無謂幻想畫面落去。A:「下體就下體啦,j咩喎」B:「j你都唔識,你真係枉為人呀」B問我:「姑娘,你知唔知咩係j呀?」我冇出聲。 B:「j即係下體即係你碌鳩呀,好似象形文字利用實物外表化成圖形嘅文字」 啊,好有學識啊。A繼續寫嘢:「你下體成個j字咁㗎?」B身體扭動:「當然!曉轉彎呀嘛!」A:「j字嗰點係你個頭呀?」B:「你真係唔識㗎喎,嗰點係我PAT鳩毛!你大PAT啲就用大楷J,細PAT啲用細楷j。」B再講:「你係大楷定細楷呀?」A擰擰頭嘆咗啖氣,冇阿B咁好氣。有呢啲朋友幾好呀,唔會悶呀~

Read More

香港藥房格-口罩格價珍寶豬欄-夠鍾食藥

【夠鐘食藥】診所賭聖就喺我

有日我出緊藥…我:「呢啲每日四次,每次一粒…」我未講完,先生就打斷我嘅對白:「啲藥咁嘅?」我望住啲藥:「有咩問題啊?」佢:「你色盲呀?唔同色喎」我望住啲藥,相信佢係講緊其中一包擁有雙面顏色嘅藥,我正想解釋… 佢就一嘢炳埋嚟大大聲嗌:「喂!醫生,色盲可以做姑娘嘅咩?食死我點算呀?同一包藥撈兩款喎」 我拎起嗰包藥。佢望住我:「你喺度捽包嘢做咩呀?」我冇理佢,繼續專注做我想做嘅嘢。佢:「你當你自己係賭聖呀?捽吓就變返同一隻藥呀?低能!要唔要加啲煙俾你呀?」診所內嚴禁吸煙,不過你有咁嘅諗法我覺得低能啲。佢又向醫生房大嗌:「喂!醫生!出嚟睇吓你個姑娘啦,佢當自己係賭聖呀佢」當我完成我做嘅嘢後,我放返低包藥喺枱面:「嗱,一樣色啦」佢望住包藥,再抬頭望住我冇出聲。隔咗十零秒左右,佢終於開口:「你真係賭聖呀?你仲可以捽啲咩呀?」老泥得唔得呀?我:「…隻藥本身係雙面嘅」佢冇出聲望住我,我報以一個最和諧嘅笑容。佢:「你覺得我好戇鳩呀?」呢啲嘢你問自己啦,唔好問我啦,我都唔識你。我:「先生,隻藥的確係雙面嘅,你可以自己拎嚟睇睇」佢拎起包藥睇,再冇出聲,我繼續安心出藥收錢。

Read More

香港藥房格-口罩格價 珍寶豬欄-夠鍾食藥

【夠鐘食藥】點解要來診所打劫口罩呢

有日朝早醫生未返到,得我一個喺度等運到。大門掛鈴響了~一位小姐行埋嚟登記處:「有冇口罩?」點解明明聽落好似一句好普通嘅嘢,但係我會覺得配合埋你嘅語氣就好似講『家陣老笠』一樣,睇嚟我攰了。我:「唔好意思小姐,我哋冇口罩賣」佢:「你俾幾個我呀」我:「我哋冇得俾呀」佢:「係咪我唔係客你就可以唔俾我呀?」咦,乜你唔係嚟睇醫生呀?咁你即係嚟運桔呀?我:「我哋係本身都唔派口罩」 佢退後兩步抬頭望望:「唔係診所咩?唔係西藥診所咩?冇口罩?你呃我呀?你戴緊嗰個咩嚟呀?」 我都想試吓去銀行用呢招『唔係銀行咩?唔係有錢銀行咩?冇錢?你呃我呀?你櫃桶嗰啲咩嚟呀?』,之後我未來N年都應該不愁衣食,仲日日有生果吔。我:「呢啲都係我哋自己嘅,我哋冇得俾你啊」佢:「冇?」我:「真係冇」佢:「西藥診所唔係要預俾人㗎咩?個個都冇口罩你死得㗎啦喎」係呀我死咗你開心冇?我:「我哋自己都訂唔到啦」佢:「你呃我呀?你哋會訂唔到?」我:「連阿特首都話買唔到,要市民捐俾佢,我哋訂唔到有幾奇?」佢:「講你又信,呃人㗎咋,藥房好多得你買啦」我:「咁你唔買?」佢:「貴呀嘛,你哋西藥診所以前都有得拎㗎,白搞㗎你」佢扭住腰離開咗診所。以前夠唔駛幾百蚊一盒口罩啦…以前夠唔駛你周圍撲口罩啦,你醒未呀?

Read More