【夠鐘食藥】視像診症

電話響起～

我：「你好，乜乜診所」

對方係一位男士：「掛號呀」

我：「我哋冇電話預約啊，你直接過嚟登記就可以啦」

佢：「醫療卡話可以唔駛出現喎？」

我：「我哋要親自嚟登記啊」

佢：「視像診症呢？冇咗啦咩？」

我：「我哋一直都冇啊」

佢：「醫療卡話有嘅？我見到話有喎」

你隻屎眼捽乾淨未呀？捽清啲眼屎啦～

我：「你打去你醫療卡後面個電話問問邊間診所有呀，我哋診所冇呀」

佢：「冇？」

我：「真係冇呀，你打去問醫療卡公司啊」

佢：「我有喺度睇開喎」

我：「我哋都係得親身診症，你要睇嘅就要親自過嚟」

佢：「你CHECK下我個名先呀，你一定記得我㗎」

叫古天樂嗎定叫八兩金呀？

我：「如果你要睇醫生就要親自過嚟，唔關你有冇喺度睇過嘅事呀，我哋真係冇做視像診症」

佢：「唔關我有冇喺你度睇過嘅事嘅話，我以後唔駛喺你度睇都得啦，我睇開你嘅就係要人跟足我咋嘛，我係客你係狗咋，你扮咩啫？吠聲嚟聽吓啦，汪汪」

你自己吠咗啦，仲兩聲添，嗌人吠又自己情不自禁吠出聲，似乎你係狗似啲喎。

嘟。

佢CUT咗我線。

而家啲人火氣真大啊～