【夠鐘食藥】點解你可以咁叻

有日一位小姐嚟到診所。

佢行埋嚟登記處：「嗌你阿頭過嚟」

我：「請問有咩事呀小姐？」

佢：「我就報咗警㗎啦」

係？

我：「請問咩事呢？」

佢：「唔駛好耐㗎，轉個頭阿SIR就嚟封你哋舖㗎啦」

所以你係一個好好心地嘅人嚟預告嗎？

我：「咩事呢？」

佢：「冇咩嘅，假藥啫」

我：「你意思係我哋俾假藥你？」

佢：「你諗你啦」

我：「唔好意思小姐，我哋啲藥全部都係經藥廠訂嘅，你係咪有咩誤會？」

佢：「我食咗咁多年藥其實真係未見過有隻咁嘅藥囉」

身子咁差成日食藥原來都係一件值得炫耀嘅事。

我：「邊一隻呀？」

佢：「我唔記得啦，我淨係知我未見過囉，咁多年都冇見過」

話時話，你企咗喺度咁耐，說好的警察呢？今日咩日子？要遲到呀又？我唔想等咁耐啊。

我：「你未見過啫，有咁多種藥你都好難見過晒啊。你幾時喺度睇過？我幫你睇返紀錄呀，你俾一俾你身分證號碼我呀？」

佢：「你想而家消滅證據呀？」

咁大個人喺度有啲難度喎。

我：「我係想幫你睇返你講嘅係邊隻藥啫」

佢：「唔駛你睇，我自己睇咗㗎啦」

我：「你記唔記得隻藥係咩色呀？」

佢：「我唔會答你，你有咩同返阿SIR講」

我：「….」

佢望望門口，自己同自己講：「咁耐都未嚟嘅？」

我：「你駛唔駛坐低等呀？」

佢：「我要企喺度喎」

咁你慢慢企。我冇理佢，去咗做嘢～

過咗一陣又一陣，我都做完晒啲文書嘢，我：「小姐呀，我哋lunch time㗎啦，你一係三點半再嚟過啦」

佢似乎企到有啲腳仔軟：「你係咪出咗啲咩古惑呀？我企喺度咁耐一個客都冇？」

我：「呢啲時間係比較少人」

佢：「我報咗警㗎喎，冇阿SIR嚟㗎咩？」

我：「你一係再去問吓啦」

佢行出門口望兩望，再企喺門口邊大嗌：「你唔係乜乜乜醫生診所咩？」

我：「唔係呀」

佢閂返診所門，我哋準時放飯。

柒。