有日一位太太嚟到診所。
佢行埋嚟登記處問我:「瞓唔著應該係我老公食安眠藥定我食安眠藥呀?」
WHY NOT BOTH?兩個都瞓唔著呀?
我:「係你先生瞓唔著定你瞓唔著呀?不過要攞藥嘅都要睇咗醫生先嘅,你登記睇先?你先生嚟到可以再登記」
佢:「佢瞓覺好嘈嘅係咪應該佢食呀?」
扯鼻鼾呀嘛?如果係嘅,食完都唔會變靜音喎…
我:「你哋嘅情況係點不如入房同醫生講呀,始終我唔係醫生俾唔到咩意見你嘛,你俾你身分證我登記先呀」
佢:「佢淨係好嘈囉?應該係佢食定我食呀?如果唔係我食嘅,我唔駛睇醫生俾錢呀應該?」
我:「我答你唔到呀,因為我唔係醫生嘛,你會唔會都登個記入房同醫生傾吓呀?」
佢:「我想你俾些少食藥意見我啫」
我:「我唔係醫生唔可以俾到任何醫療方面嘅建議你呀,你需要醫療建議嘅,所以先要登記睇醫生嘛」
佢:「都唔係好算係醫療建議呀?」
咁你又嚟診所?你唔去教堂問?
我:「淨係食唔食藥都算係啦,你要唔要登記睇醫生?」
佢攤大手板:「可唔可以俾粒安眠藥我試吓呀?」
我想大大力打落你手板度!
我:「我唔可以就咁俾藥你呀,藥係要由醫生處方嘅」
佢手板上下搖咗幾下:「俾粒嚟試吓啫,試完得咪唔駛睇醫生囉」
咁醫生喺度托呀?
我:「唔好意思,我哋唔會自己俾藥你嘅,要藥就要睇醫生,等醫生了解咗你嘅情況先可以處方」
佢皺起眉頭望住我。
皺都冇用喎,我唔會攝粒安眠藥落你眉頭度啊…
佢繼續皺住眉頭:「你唔當係醫療建議咪得囉?」
哇,你諗咗咁耐先諗到呢句驚天對白,我真係寫個服字俾你啦。
我:「你要睇醫生我就同你登記啦」
佢:「跌都跌咗啦嗰一粒半粒」講完就轉身離開診所。
我個樣似成日跌嘢嘅人嗎?