按此馬上進行口罩格價！
有日媽媽帶個小朋友嚟到診所睇醫生～
睇完醫生，拎完藥之後⋯
媽媽問我：「阿小姐，啲藥係咪飽肚食呀？」
我：「係呀」
媽媽同小朋友行埋一邊坐低咗睇吓啲藥。
隔咗陣，媽媽又過嚟問我：「佢啲藥係咪飽肚食㗎？」
我：「係呀～」
媽媽：「唔飽肚食會點㗎？」
哦，唔會變超人，唔會穿胃嘅⋯
我：「食啲嘢先食藥好啲嘅」
媽媽：「但係你哋冇俾到嘢食我」
嗯？啊？吓？你講乜話？
我：「吓？」
媽媽：「我而家想同佢食咗藥先，但係你冇俾到嘢食我，咁⋯點飽肚食藥呀？」
我：「⋯岀去食啲嘢先再食藥啦～」
媽媽：「但係我想俾佢而家食喎」
我：「返屋企先食啦～」
媽媽：「我想而家俾佢食喎」
我：「⋯岀面有間便利店嘅⋯」
媽媽：「你冇嘢食俾我咩？」
啲嘢食係我㗎！係我㗎！係我㗎！你做乜打我啲嘢食主意！啲零食全部係我自己買㗎！
我扮哂蟹：「吓，冇喎，診所邊有嘢食啊⋯」
媽媽：「你又叫我飽肚食，我個仔喺度食完藥唔舒服係咪你揹飛呀？」
我同事忍唔住媽媽嘅攻勢，同我講：「咪煩啦，你成箱零食喺度咪俾啲人囉。」
你！岀！賣！我！我哋做得同事係應該互相支持兼同一陣線㗎！
我同同事講：「我唔制呀，個個都打我啲零食主意，我咪食得屎？」
同事：「咪孤寒啦，幾多歲人呀？仲成日食埋啲立雜嘢⋯你食到口腫面腫啦，仲食咁多呢啲嘢？」
同事一路碎碎唸，一路摷我個寶箱，再一路擺上枱面俾媽媽揀：「呢個？食呢個？呢個啱唔啱食？」企喺側邊嘅我，已經再俾唔到其他反應，只係不停講「你岀賣我⋯你岀賣我⋯你岀賣我⋯你⋯岀⋯賣⋯我⋯⋯」
最後媽媽好滿意咁拎咗六七樣零食走。啲嘢食係我㗎⋯
