有日有位先生面色好差咁嚟到診所。佢行埋嚟登記處細細聲講：「姑娘，登記呀，你哋要救我呀」我：「你邊度唔舒服呀？你面色都好差喎」佢：「我俾嘢插住好唔舒服呀」 我大為緊張：「邊度呀？整到邊度呀？」佢：「喺個胃對落呀，插住咗成晚，我真係就死㗎啦」我：「你俾啲咩插住呀？我哋呢度冇手術做㗎，一係你坐低先，我嗌醫生望望先呀，有需要嘅你都要去醫院㗎啦，知唔知呀？」佢：「應該係屎」我靜咗幾秒。佢見我呆咗：「姑娘？」我：「係講屎？你講你個胃俾屎插住？」佢：「係呀，佢再插上去就頂心杉咁㗎啦」你係嚟搞爛gag的嗎？枉我頭先為你而緊張…我：「身分證呀，我同你登記啦」佢拎出身分證問：「我會唔會死㗎？」如果你咁都死，你會成為史上第一個俾條屎插死嘅人，真係遺臭萬年啊。我：「你冇去廁所幾日咋嘛？」佢：「我有去廁所，係屙唔到佢出嚟，佢咪越生越長越頂越上」 你唔好再搞爛gag啦好嗎？我笑點好低㗎咋～你條屎快高長大啊。 我：「冇事嘅，醫生會開藥俾你嘅啦，放心啦，登記完㗎啦，你坐低等等呀」佢：「我坐唔到呀，佢真係成條咁插住呀，我摺唔埋呀」我：「咁你企吓啦，搵面牆挨吓啦，等六個啊」佢：「仲要等六個呀？佢又生多幾吋㗎啦喎」再咁生法，你都會高幾吋啊～

曾經有人問我『你屋企養咗幾多動物啊？』，我每次數完講俾佢哋知之後，佢哋都會有同一個反應『咁多？』 有啲甚至會話『佢哋死嗰時你咪要傷心好多次囉？』。所有生命都有完結嘅一日，我哋唔係不死身，生死冇辦法由自己控制之下，唯有放下。我曾經養過好多仔仔女女，有好多都已經走晒去玩，而家走剩嘅就係大家見到嘅五貓一狗。但B婆其實都已經唔細～已步入老狗階段。而我都決定咗養埋呢班仔女，我就收手。 如果問我面對佢哋嘅死會唔會傷心，會唔會唔習慣…答案一定會係傷心亦唔習慣。 B婆喺屋企時會好嘈，成日亂吠，佢走咗之後屋企會變到好靜，夜晚瞓覺會冇咗佢陣味，冇咗佢晚晚用腳伸醒我，聽唔到佢扯鼻寒，食嘢時冇咗一對blink blink眼望到實一實。但係有日要離開嘅終需要離開，我比較在乎佢哋喺度嘅時候過得開唔開心食得豐唔豐富瞓得爽唔爽。如果佢哋過得開心過得爽，我已經覺得無悔今生，人都一樣，對自己好對珍惜嘅人好，一齊過得開心就夠啦。命運同生死我哋冇辦法控制同預計，但到面對佢哋離開時，我哋多多少少都可以有啲話事權，俾佢哋走得安心，好好放下，俾佢哋知道即使佢哋走咗，你仍然會過得好食得飽，唔駛佢哋擔心你。軀殼雖已化成灰，但美好嘅回憶一直都會喺度。

有日診所忙忙哋～有位媽媽帶住兩個小朋友嚟到診所。佢哋登記後坐低等嗌名，我就繼續忙我嘅嘢～突然聽到出面大堂有人起哄：「哇，有冇搞錯呀？」 我望望咩事，見到媽媽喺度幫其中一位小朋友換片…我望住佢一張又一張嘅染啡濕紙巾…我同佢講：「太太？我哋出面有洗手間啊，你要唔要同小朋友去呀？」佢拎住染啡濕紙巾揚揚：「唔駛唔駛，我抹乾淨個窿得啦！」 其他人望到眼坦坦，有位阿姨就出聲：「咁污糟去廁所啦，你咁樣抹完都要洗手㗎啦，你啲廁紙唔好就咁擺喺地下啦！污糟㗎！」媽媽：「BB屎咋嘛，邊污糟㗎？」啊，原來BB屎係乾淨嘅，我又長知識了，媽媽你要唔要試啖？阿姨：「都要洗手㗎！」媽媽：「BB屎嚟㗎！」到佢換好片，佢望望地下嗰堆濕紙巾，佢大嗌我：「姑娘！」我都冇佢咁好氣：「咩事呀？」佢指住埋紙巾：「你可唔可以出嚟同我執咗佢呀？」我：「你自己執啦。」佢：「我湊住兩個呀。」所以呢？所以我要做你工人幫你執手尾？我：「垃圾桶就係你前面，你可以自己執起掉啦。」佢：「唔得呀，污糟㗎。」頭先邊個話BB屎唔污糟㗎？頭先嗰位太太去咗邊呀？你又係邊個啊？我：「啊？如果你係整污糟咗診所地方嘅話，醫生會收返你清潔費啊，因為我哋要搵姐姐嚟清潔㗎～我哋呢度冇水清潔到㗎，要去搵清潔姐姐幫手㗎。你係咪要搵清潔姐姐嚟啊？我打電話去管理處㗎啦～」 我電話都未拎走，佢就好快手咁自己執返。人～～真係唔打開銀包唔流眼淚啊。

又到我去旅行放鬆叉叉電嘅時候～ 班大帝繼續留喺屋企由豬爸豬媽照顧，波波雞就過去我朋友度。第一日朋友已經話我知波波雞邊放尿邊fee人，我同朋友講：「係呀我哋都係咁。」第三日朋友再話我知，波波雞真係有精神分裂，上晝可以好嗲人，下晝可以又打又咬又鬧人，仲學人講粗口。我都同朋友講：「係呀我哋都係咁⋯」朋友以為我換咗隻貓⋯我自己都以為係。自從波波雞做咗小閹人之後，佢就好似鬼上身咁。一時可以好嗲，轉個頭就追住人嚟咬同打。而家同佢放尿放屎，佢會好似救護車上身咁嗌，抱起佢又會係咁嗌。總之佢鍾意掂你痴你嗲你嗰時，你就要感哂恩咁樣，但係又唔可以覺得太放鬆咁主動摸佢咁多，因為一個唔小心，佢就會反身咬你⋯我都唔知點解佢會變成咁，我而家都覺得波波雞同我嘅關係係有啲陌生。以前眠乾睡濕咁陪佢一齊瞓地下，起碼佢會真係主動走埋嚟用頭磨吓我塊臉，用手仔掃吓我。而家我同佢一齊瞓地，佢會走嚟咬我⋯這是青春期的反叛表現嗎？定係公公也有尊嚴俾個好大嘅下馬威我嘆？我分唔到⋯我淨係知好難捉摸呀喂！我屋企班大帝由細養大嘅我都熟哂佢哋嘅脾性，就連米米收養返嚟後都變到純良晒（除咗個西臉樣），波波雞都算係由細養到大啊？點解佢咁飄忽令人難以捉摸，唔通佢真係有精神分裂⋯貓有冇精神科睇㗎？定係波波雞嫌我呢個主人做得唔夠好，不如波波雞學識講人話直接表達我知佢想點啊？ 啊⋯都係當我冇講過啦。我已經幻想到佢會不停講『死肥婆你吔屎啦』。仲係曾志偉咁嘅聲⋯

有日有位小姐嚟到診所。其實我已經望住佢行埋嚟，佢都要伸手嚟敲敲登記處枱面：「Excuse me！」 我：「睇醫生嘅麻煩你俾身分證我啊～」佢：「I need your help囉。」啊！有『囉』字嘅，即係識中文啦～咁我同你講返廣東話㗎啦～我：「請問有咩幫到小姐你？」佢：「Do you know english？英—倫—掘—殊。你唔識嘅我講中文囉～」唔中唔西，都唔知你做乜鬼～我：「好呀，咁我有咩幫到你呀小姐？」佢拎出一張卡：「你哋收呀？」我望望：「唔收。」佢：「你望真啲。」我唔係賭神，賭神都要捽兩捽先變佢想要嘅牌啦，更何況我只係望！我：「我望真咗㗎啦，我哋診所唔收呢張啊。」佢：「So why…

波波雞度完假了。下個月再去度，下下個月又再去度。今次一去接波波雞，開貓酒店嘅朋友已經同我講『佢真係變咗好多，放尿放屎會不停扭擰鯉魚翻身咁，同埋佢真係好奄尖』。 鯉魚翻身呢個真係唔駛多講，小朋友係好動嘛，我一直都係咁安慰自己。至於奄尖…事源係因為我已經準備好一箱唔同牌子嘅罐頭零食拎過去，開咗罐之後我朋友發現波波雞唔肯食，於是佢唯有開佢舖頭賣緊嘅其他牌子俾佢食，食一兩餐之後佢又再唔肯食，我朋友就發現原來佢真係一隻貪新鮮口味嘅衰貓… 佢真係好衰格，識睇人嚟蝦。啲人成日同我講貓仔就係一部裸機一張白紙，你點教佢，佢就會點。但係明明作為榜樣嘅我係饑不擇食，有食唔食罪大惡極咁，佢喺邊度學到咁衰格？我諗咗陣，以波波雞呢啲衰性格，好大機會係佢明知我朋友嗰度有大把優質好味罐，又知我朋友係一個善良嘅人，一定唔會容許佢餓親，所以佢就大安旨意咁擺款。因為平時喺屋企，只要佢唔食佢放棄，我就會即刻將個兜隊俾其他姨姨食埋去，佢就只可以坐喺側邊眼白白睇人食。 可能就係因為咁，佢知道我屋企係一個『弱肉強食』嘅地方，食遲一陣都會奶碗底。或者下次再去度假時，我朋友可以考慮吓放隻為食大食貓入去同房，俾波波雞感受吓壓迫感？

有日一位小姐嚟到診所。佢問我：「係咪有嗰啲咩HPV針打呀？」 我：「我哋而家未有貨，如果要喺度打嘅，可以幫你留～有得打嗰時會打電話通知你。」佢：「我問多少少嘢先。」我：「嗯，好呀。」佢：「係咪打完就可以唔駛用套呀？」我：「打完針都一樣會有BB㗎喎，你要避孕都一樣要用安全套或者其他方法～」佢：「呢層我梗知啦！我意思係咪唔怕有性病呀！」我：「HPV主要唔係用嚟防性病…你要唔要入醫生房等醫生同你解釋吓呀？」佢：「唔係用嚟醫性病嘅咁我駛咩打呀？唔係話俾啲gay佬（同性戀者）打㗎咩？」首先，唔係gay佬，係同性戀。再者～你喺邊度聽埋啲咁嘅嘢返嚟？我：「我印象中係防到疣嘅～不過你想了解得清楚啲嘅最好入醫生房傾傾啦，你俾身分證我登記留資料先呀～」佢：「咪先咪先，唔係防性病嘅我打嚟做咩先？唔平㗎喎，成幾千蚊打支冇用嘅，我好有得閒好有米咩。啲gay佬又話打完冇性病嘅」我：「小姐…係同性戀，可能你對支疫苗有些少誤會，或者我俾份關於疫苗嘅單張你睇睇先呀？你有咩唔明嘅，喺打針前可以問清楚醫生～」佢：「咪啦咪啦，幾千蚊打啲唔包安全嘅針，真係幾百萬未開頭咩我。你啲單張拎去派俾啲gay佬好過啦！佢哋先係最需要嗰班呀！最污糟係佢哋呀！我冇佢哋咁隨便呀！」 其實，性病係不分男男女女或男女的～你並沒有比誰更高尚更『乾淨』。

呢幾日凍到波波雞晚晚都要上床一齊瞓，不過怪雞嘅佢唔係純粹要上床瞓咁簡單…佢係要控制埋我嘅瞓覺姿勢。 我已經留意咗幾日，我攤平瞓時佢會好唔滿意，不停向我下身出手抓抓抓企圖令我哋腿張開，當我腿張開後，佢就會安靜地鑽入我腿間，乖乖呼呼入睡。有時佢仲會將自己個頭貼近我嘅私人部位，一褲一布之隔隱約感受到波波雞呼吸嘅溫度…坦白講，個感覺幾難頂。於是我有時忍受唔到，就會將佢趕走，企圖帶佢返入正途，希望佢會可以試吓瞓其他位，例如身旁或手臂旁。但佢係硬頸定唔知係咪有咩癖好…會轉個頭又再重覆出手抓抓抓，永不放棄嘅佢會令我屈服…再一次腿張開，再一次感受住波波雞呼吸嘅溫度。 如是者，每晚都要重覆好多次咁嘅情況，我開始發覺自己一朝早起身有啲難度，我試過落唔到床，同雞爸講『死得啦，我覺得自己變咗一個正方形咁呀，碌唔到落床呀我』。雞爸聽到之後笑咗我好耐…企埋一邊食花生咁款睇我點落床。嗰時我望到波波雞好輕鬆咁跳咗落床，再回望我一眼，擺出一副事不關己嘅樣就行咗出去食早餐。 自從嗰日，每次波波雞出手要我腿張開時，我都會同佢講『去爸爸度啦，爸爸係暖爐嚟嘛』，講多幾次佢終於放棄我，去咗攻雞爸雙腿！波波雞一瞓愛上雞爸雙腿間的溫度～我望住雞爸腿張開又唔敢整醒個仔嘅樣…講咗句『到你感受吓啦～』。 仔就大家嘅，等變正方形啦你！

有日一位先生嚟到診所。 佢指住醫生朋友送嘅牌匾問：「係咪堅嘅先？」 我望住『醫者仁心』爭啲唱咗能迴避嗎？我怕了…：「請問先生你係咪睇醫生？係嘅話我同你登記先呀。」 佢：「你呢度咁寫㗎嘛？」我：「你睇醫生嘅話就登記啦～醫生係醫人嘅。」佢自拍心口：「咁仁心呢？」見人見智啦～唔好令我難做啦好冇？我打份工搵啖飯食吓咋～我：「你有咩唔舒服同醫生講得㗎啦，醫生會幫你㗎啦。」佢：「我身體上冇咩唔舒服，係我今朝遲咗起身，咁我公司遲到要扣糧嘅，所以想拎個病假。」我：「不如…你自己入去同醫生講呀？」佢：「我冇錢俾㗎喎，OK呀嘛？」O你死人頭呀！你老闆同你講你返工冇人工收呀，OK呀嘛？我：「我哋要收錢㗎～」佢：「我知你哋原本係要收錢呀，我知呀我真係知呀，但係我人生規劃上出咗啲問題，咁醫生呀嘛，仁心呀嘛？」仁心當飯食嗎？如果係嘅話，醫生要食咗塊牌匾醫肚啦。我：「呢個真係幫唔到你呀，我哋睇醫生一定會收錢㗎～」佢：「我唔駛睇醫生㗎，我淨係要個病假。」我：「你冇唔舒服嘅話，醫生都一定唔會開病假紙俾你。」佢：「佢唔會睇住我死卦？我冇病假當曠工㗎。」我：「呢個～我哋真係幫你唔到啦。」佢又拍心口：「仁心呢？」我：「其實咁大個人遲到呢…係自己責任嚟嘅。」佢：「我唔係嚟俾你教訓㗎！你唔幫嘅就拆埋個幾隻字落嚟呀！你唔配有呀！東亞病夫就配！」先生飛快地衝出診所。我個人覺得你需要個牌匾多啲…

請問如果我受家中主子傷害，我應該向咩人求救？ 話說有日美好嘅朝早，我發緊個美夢，突然手指一痛，立即脫離夢境回到現實。眼一睜開，我眼前見到嘅畫面實在令我難以置信！頭頭咬住咗我隻手指呀！點呀？食得多罐頭雞肉魚肉，而家想新潮啲食人肉啦嘛？佢唔係輕輕力咬，佢真係咬落嚟…嗰刻我覺得我應該死期到了。 平時我已經受盡其他傷害，例如每朝每晚佢哋都會喺我頭頂奔跑打交，我頭上僅餘嘅頭髮每朝每晚都會俾佢哋十幾磅嘅力踩甩，唔係斷嗰隻，係連毛囊完完整整咁甩出嚟。聽講人哋話一日甩五十至一百條頭髮係正常嘅事，我一日至少甩百五條卦，髮型師有問過我『你啲頭髮又薄咗喎，你做過咩嚟呀？』，我含住泡眼淚回應『因為我養貓』。髮型師露出一臉問號樣，我都係輕輕帶過『養貓後，你個世界就會變晒㗎啦，呀，唔係～係變L晒呀！』。 除咗髮型師會關心我之外，有時我啲客都會關心我，有時佢哋望到我又添上傷痕時，都會講『又嚟呀？』，我唯有答『係呀，日常嘢嚟啦，養貓係咁』。有啲新客當初見到我會以為我係不良姨姨，問我『你係咪自殘呀？』。我答佢『唔係呀，係家暴呀』，佢哋會問『你唔報警唔走？』。 『警察唔會理，因為我係俾我屋企班貓家暴，而且我俾佢哋家暴係冇得走之餘，仲要帶住感恩之心去鏟佢哋嘅屎，買佢哋嘅糧，一生一世不離不棄，啊，我覺得自己可以升仙啦』 我咁錫佢哋，可唔可以向佢哋申請打少我幾鑊呀？

電話響起～我：「你好，乜乜診所」對方係一位女士：「診所呀？我冇打錯呀？」 我：「係～我哋係乜乜診所呀。」佢：「我新抱早兩日嚟睇過呀。」 我：「係～有咩事呢？」佢：「我可唔可以嚟拎返佢啲藥呀？」 我：「係咪幫佢配藥呀？可以呀～你俾佢個覆診卡號碼我呀。」佢：「我唔知佢啲嘢㗎，唔係好熟㗎。」 你新抱同你唔熟呀？咁你做咩打嚟撻你新抱出嚟呀？我：「咁一係你叫佢自己打嚟啦～」佢：「唔係喎，我有佢啲藥㗎，我食緊佢啲藥㗎。」 我：「你食緊佢啲藥？啲藥唔係你㗎喎？」佢：「係呀，我唔舒服嘛。」 我：「即係你想配佢啲藥嚟俾你自己食呀？」佢：「係呀。」 我：「你唔可以咁食藥㗎，佢啲藥未必啱你食㗎～」佢：「我冇事呀，我食得好好呀。」 我：「如果你唔舒服嘅你嚟睇醫生啦～配藥都唔係平好多㗎咋，而且你都唔可以咁配人哋份藥嚟食～你過嚟睇醫生呀。」佢：「點解佢食得我唔食得呀？」 我：「因為每個人嘅病徵病歷都有唔同嘛，醫生都要問清楚你嘅病歷先可以開藥㗎～如果你對某啲藥有敏感嘅要更加小心。」佢：「我有咩同個新抱唔同呀？唯一唔同嘅就係同我個仔結婚嗰個係佢囉，唔係我囉？仲有咩唔同呀？」…

自從冬天嚟咗後，波波雞戀上爸爸後… 我每日都覺得好似爭緊啲嘢咁～以前波波雞一聽到我嗌『食嘢啦』，佢就會雞衝埋嚟，而家此情不再，佢淨係會行過用眼尾望吓用，之後直行直過…以前佢會同我一齊瞓，而家佢轉咗同爸爸瞓，即使我肥，亦顯得我身邊嘅位置好空洞，空洞得我覺得會凍親感冒了，我個波波雞小暖爐不見了。以前我食嘢佢會第一時間衝埋嚟同我爭食，而家我同雞爸一齊食嘢，佢只會就走去搵爸爸… 我望住雞爸同佢嘅互動，我好呷醋好妒忌。全屋入面得兩個男嘅，呢兩個男嘅寧願自己圍爐自HIGH都唔理我哋呢班女…佢哋兩個寧願互相擁抱瞓覺，互相望住對方食嘢，都唔理我哋。我望住佢哋嘅眼神充滿愛與溫柔。頂你哋，你哋兩個前世係苦命鴛鴦嗎，我哋前世係拆開你哋嘅賤人嗎？今世你哋再續情緣，我哋就被迫睇住你哋馨馨我我。人貓殊途啊！ 我就快忍唔住幫佢哋出個人貓搞基頻道，將佢哋嘅冤氣畫面一一出賣。有時我望住佢哋咁樣，成個醋樣出晒嚟，我會同波波雞講『好還返個老公俾我啦喎！』，佢一臉得戚抬頭望望我，再將個頭挨得更貼爸爸。第三者總是挑釁人的！呢個第三者趕又冇得趕走，鬧又冇得鬧。我好絕望啊，波波雞幾時先肯還返個老公俾我呀？ 最多我俾多啲零食波波雞食呀？最多加多一個罐頭呀？

有晚我哋已經截咗症…距離原本收工時間已經過咗兩個鐘，診所內仲有幾位病人等緊睇醫生～ 一位爸爸抱住位小朋友嚟到診所，佢企喺登記處前大嗌：「姑娘！姑娘！」執緊藥嘅我行出嚟邊行邊講：「係～我哋截咗症啦喎？」佢氣都喘埋：「睇埋我個女呀得唔得呀？」我望住貼住退燒貼，塊臉紅卜卜嘅小朋友：「小朋友發緊燒呀？過嚟俾我探吓熱呀。」佢氣都喘埋：「係呀，我頭先返到屋企已經係咁啦，今朝佢媽咪帶過佢家姐嚟㗎，我唔知你哋記唔記得有冇紀錄呀，你可唔可以叫醫生睇埋佢呀？」我：「你俾家姐個名我呀，我睇睇先」佢：「XXX」 我翻查返今朝嘅紀錄：「有呀，家姐今日去咗做流感測試㗎，醫生都開咗流感藥俾佢，細妹有冇喺度睇過呀？」佢：「冇呀。」我：「你有冇帶佢身分證明文件嚟？」佢一臉焦急：「冇呀，係咪要拎呀？我而家即刻返去拎呀！」我：「唔駛唔駛，你下次補返俾我得㗎啦。」佢：「咁係咪即係可以睇埋呀？」我：「梗係要睇埋啦，家姐都中咗流感嘅，佢哋平時一齊玩都應該傳染埋㗎啦，你放低小朋友先，寫低佢嘅名同出生年月日俾我呀，咁嘅情況醫生都會睇埋啊～」佢嘆一口氣：「太好啦，我仲以為要去急症室等十個鐘呀，好彩我有過嚟搏吓你哋未收工，我都係返到去先見到佢咁。佢媽咪都周身唔得閒，湊住個幾個月大嘅又湊埋家姐。而家連個妹都病埋一份…」我：「幾個月大呀？咁…你哋真係要小心啲…」佢寫完資料後，坐低摸摸小朋友頭，同小朋友講：「好快冇事㗎啦，有Daddy喺度唔駛驚呀。」 爸爸拍拍自己大腿，小朋友安心伏喺爸爸大腿上邊瞓邊等…

自從我上兩篇叫波波雞去爸爸度瞓覺之後，懂性嘅雞真係從此就自動自覺去咗同爸爸一齊瞓… 我呢個麻煩女人即刻覺得自己失寵，內心泛起陣陣酸味醋味。於是我之後每晚一見到波波雞走去爸爸度瞓時，我就會望住波波雞講『你係咪唔愛媽媽啦？媽媽先係買罐頭俾你食嘅人啊，媽媽有好多零食㗎，得媽媽歡心如得天下所有零食啊，波波雞你知唔知呀？』。 經過我日以繼夜，夜以繼日嘅洗腦式催眠，連雞爸都頂唔順叫我收皮收嗲，就喺某一晚… 波波雞主動行埋嚟我度，伸手抓兩抓我手臂，我立即明白並表示要繼續come on baby，我將我嘅手臂稍為移過啲，波波雞主動行入臂彎內，一個波波雞死魚撻！就咁撻咗喺我臂彎內！佢再伸出小手攬住我手臂…天呀！我嘅催眠終於有用啦！波波雞返嚟我嘅懷抱啦！我即時忍唔住露出一臉幸福樣同雞爸講『我個仔終於要返我呢個阿媽啦，呵呵～世上只有媽媽好，有雞的媽媽是個寶～』。雞爸完全鄙視我『妖』咗我一聲。 嗰晚我沉醉咗喺雞嘅寵幸之中，不知不覺就瞓咗覺～半夜醒一醒擘大眼見到波波雞仲係瞓咗喺我側邊，大家共用一個枕頭。我都忍唔住望咗陣，兼講咗句『真係好鬼靚仔』就繼續瞓。呢種幸福應該會直到永遠…好景不常，第二日佢已經冇再啋我。 聽講係因為我半夜瞓瞓吓隻手一揈橫跨咗過去，雞爸食咗我一拳，波波雞都係。 幸福係我親手破壞的…

有日診所有幾對互不相識嘅母子父子登記完坐喺度等醫生返～其中一對母子比較後生，小朋友十歲以下… 呢位小朋友坐坐吓開始唔耐煩，開始周圍走搵嘢玩。佢睇中咗我哋擺出嚟嘅單張～於是佢抽起一疊散落地上，邊踩邊滑行邊叫喧。 我同小朋友講：「小朋友，唔好咁玩啲單張呀，人哋要嚟睇㗎，唔係俾你咁玩㗎。」小朋友望望我，一於廢事啋我，再轉身拎埋其他單張散落地上。佢媽媽由始至終都係咁自己坐埋一邊玩電話…其他人見到咁嘅情況都搖晒頭～ 當中有位先生帶佢年老爸爸嚟睇醫生嘅，先生忍唔住出聲同個媽媽講：「太太，你叫你個仔唔好再咁啦。」媽媽望望先生，露出一副不屑嘴臉：「我教唔到我個仔喎，咁叻你教呀!」先生望望個小朋友，再望望個媽媽，狀甚谷氣，先生企起身了！我以為先生會衝埋去打個小朋友一身，想阻止命案發生：「先生！」先生行去媽媽身邊，摀低身用雙眼望住媽媽。媽媽見佢貼到咁埋，個身自然避避：「你做咩呀？」先生喺媽媽耳邊大叫：「呀！！！！！！！呀！！！！！！」媽媽立即掩住耳仔彈起身彈得遠遠，一臉驚慌問：「你做咩呀？你痴線㗎？喺我耳邊咁大聲嗌？」先生冇理佢，繼續追住佢耳邊大叫：「呀！！！」媽媽行到埋嚟登記處：「姑娘呀，佢痴線㗎。」唔知個小朋友係咪覺得咁樣好好玩，於是小朋友又走埋嚟喺媽媽身邊大叫：「呀！！！！！！！！」先生又『呀！！！！！』，小朋友又『呀！！！！！』，好嘈…媽媽望住先生嘅年老爸爸問：「喂！你個仔嚟呀？嗌你個仔收聲啦！佢搞到我個仔都學埋佢啦。」 爸爸笑笑說：「我個仔都咁大囉，我仲邊教得到呀？你教呀。」 媽媽呆咗一陣，之後同我講：「你啲客呀！啲痴線走咗先好叫我過嚟呀！」佢急急腳拖住個仔離開診所，明明走咗一段路，我都仲聽到佢個仔仍然喺出面『呀！！！！！！』緊…

自從上次一拳睡羅漢無情拳後，波波雞再次離開我嘅懷抱。 係我抵死，我明嘅。仔又係我自己叫佢走，之後又叫佢返嚟，點知自己發瘟請咗佢食一拳又趕走佢… 嗰日之後我有啲唔開心，一心諗住『唉，算啦，反正我做咩都係錯嘅啦，由佢啦，勉強冇幸福』。我再冇時時刻刻提住波波雞啲罐頭係邊個買，亦再冇夾硬抱起佢瘋狂啜佢面珠兼不停講『你係媽媽個乖豬B呀』。我變得自暴自棄… 雞爸望見我一副這些機會不是我的樣撻咗喺床度，佢問我『你唔再叫波波雞同你瞓啦？』。我都繼續一副死樣回答『算cow數啦，我放棄啦，我隨風而嚟隨風而去～我係一粒塵呀』，雞爸望望我，可能心諗從來未見過一粒塵係咁有份量，佢冇講出口，自己靜靜行開算。而波波雞喺床邊望望我，我望住雞講『你鍾意瞓邊就瞓邊啦，肥婆以後唔迫你㗎啦，你鍾意爸爸嘅話就去同爸爸瞓啦』。波波雞好似聽得明我講咩咁，佢自己行咗出房… 到半夜我一醒，發現波波雞瞓咗喺床邊，佢係貼住我咁瞓，而唔係瞓喺我同雞爸中間！我摸摸佢，好感動咁講『你終於生性啦，終於知道瞓喺媽媽身邊係最好啦？』。波波雞輕輕『嗯～喵』一聲。到第二日我同雞爸講返佢噚晚自動自覺瞓喺床邊，而唔係我哋中間… 雞爸面有難色咁答我『阿雞醒呀！佢都知道你嗰晚根本係想打我，所以佢先唔再瞓喺我側邊…』噢，今舖我都唔知可以點拆啦～

有日一位先生嚟到診所。佢掩住肚問我：「姑娘，可唔可以睇吓我條牙牙腸係咪發炎？」 什麼是牙牙腸？腸有牙定牙有腸？我：「你俾身分證我先呀，醫生會同你檢查～」佢：「我好痛呀！」我：「我知呀，但係你都要俾咗身分證我登記先㗎。」佢：「我痛到縮唔到手呀，我怕一縮條牙牙腸會走出嚟。」我望住一臉認真得嚟又有啲痛苦嘅佢，我唔敢糾正佢嘅錯誤思想…我：「嗯～你身分證放喺邊呀？我幫你拎啦。」佢：「袋呀。」我行出去拎身分證，邊登記邊問想分散吓佢注意力：「你痛咗好耐啦？」佢：「一陣啦」我：「係咪食錯嘢呀？」佢：「我唔想再講嘢呀，我覺得痛到就快喺口度走出嚟。」你演開劇的嗎？點解個人可以咁誇張？我：「嗯，咁你坐坐先呀，我登記完之後幫你放返好身分證呀。」佢：「我唔想坐。」我：「哦～好呀好呀，咁你企喺嗰邊啊。好快有得睇～」 佢：「唔好再叫我等啦！我條牙牙腸等唔到啦！」 我拎埋排版入去同醫生講：「呢位病人好痛啊，佢話佢等唔到㗎啦。」 轉個頭醫生就即刻叫佢入去～ 喺診症期間，我喺藥房聽到『呀！我條牙牙腸出嚟啦！唔得唔得唔得！我唔可以縮開手！你唔好掂我唔好掂我唔好掂我！』之後冇耐…先生出返嚟問我：「你哋連牙牙腸都唔識切又唔識開藥俾我收咗佢，你哋喺度做咩啫？醫生嗌我去醫院，我走得啦話？」我：「盲腸炎嘛？係要去醫院㗎～你而家去啦。」 佢：「唔好做醫生啦！掛羊頭賣狗肉，開間診所咩都唔識醫嘅，不如開街市啦！」 我：「你快啲去醫院先啦～我哋唔收你診金㗎。」佢：「梗係唔駛收啦！又唔係我自己要嚟睇！你收聲啦！」…嗯～係條牙牙腸要嚟睇嘛～