【夠鐘食藥】再幫手嗌貨

電話響起～

我：「你好，乜乜診所」

佢：「我上次嗌你做嘅嘢做咗未呀？」

你咁講我實知你嗌我做咩啦。

我：「唔好意思小姐，請問你係指啲咩呀？」

佢：「幫我嗌貨呀！」

咦，唔通你係華麗轉身嗰個？

我：「係咪之前嚟過話要幫手訂A酸嗰位小姐呀？」

佢：「係呀，係咪到咗貨啦？你唔打俾我嘅？」

我：「我咪同你講咗我哋冇得訂囉？你要呢啲藥嘅可以轉介你去見皮膚科嘛，我嗰日講得好清楚呀」

佢：「你冇咁同我講過喎」

嗱，你哋就係咁㗎啦，郁啲就扮晒我哋冇講過啲咩咩咩。你扮晒有腦退化啫，我個腦不知幾精靈呀！

我：「咁我而家同你講多次呀，我哋冇得訂」

嘟。佢收咗我線。

到第二日，佢又打嚟：「我上次嗌你做嘅嘢做咗未呀？」

妖，係咪真係有腦退化呀？唔好食咩A酸啦，嚟登記睇醫生拎封轉介信去搞搞個腦退化先啦。

我：「阿小姐，你噚日已經打過嚟，我都直接講咗冇得訂啦喎，你唔記得咗啦？」

佢：「又係你？」

嘟。佢又收咗我線。

轉個頭電話又響起，我：「你好，乜乜診所」

佢：「點解又係你㗎？冇第二個姑娘聽電話㗎咩？」

驚唔驚喜，意唔意外呀，你以為診所好大呀？

我：「係得我一個聽電話登記㗎咋，你打幾多次嚟問幾多次都係一樣冇得訂」

佢：「嘥我時間！你做唔到你要講㗎嘛！」 嘟。又CUT我線…不過都好～佢之後冇再打嚟啦。