【夠鐘食藥】估唔到我都有今日

最近我開始覺得班大帝嘅伙食費大咗好多～最主要原因，係因為過往我都係貪方便嘅上班族，多數貓狗主食都係乾糧，幾百蚊一大包，一個月先買得一包…感覺當然覺得好EASY！

而家因為我唔可以再返全職，要照顧隻患有分離焦慮症兼曼島貓症候群嘅貓（嗌聲雞哥），同時佢又唔可以食乾糧，唯有大家一齊餐餐主食轉做濕糧…支出大大提高。半年後，即係而家，我真係入不敷支了。我都向現實低頭，加入埋做寵物保姆…

當主人離港，留喺家中嘅主子冇人照顧冇人餵食冇人鏟屎，就由寵物保姆一日上門一至數次打理陪玩。以前我去旅行時，都有諗過不如請個寵物保姆上門啦，因為貓去寵物酒店嘅話，有可能因為陌生地方引起佢哋不安焦慮。但係我個人比較麻煩，唔鍾意俾陌生人入屋…唔鍾意俾陌生人掂我啲私人物品，所以我過往出外爽爽都係靠豬爸豬媽幫手。真係估唔到我都有今日。

而家做寵物保姆，其實都幾開心，一嚟我可以離開屋企數小時，唔駛日日屈喺屋企，二嚟我又可以去摸吓其他毛孩撩吓佢哋玩。三嚟大家都真係好錫我，可能大家都知我屋企班化骨龍係只應天上有，俾錢請我做埋啲輕鬆嘢之餘，仲會收到利是同零食，最離譜係咩呀？居然會有人同我講『我屋企所有嘢任你食』…咩嘢叫又食又拎？我咪係呢啲賤人囉。