【夠鐘食藥】飛甩粉紅色！向白色藍色進發～

上年八月糯米雞用緊MINI SIZE嘅寵物尿片，仲要有鬆，要用髮圈加固～嗰時佢成身凍冰冰，四肢肉枕都係凍嘅，就好似一隻就瓜就走嘅貓仔一樣。

當時因為我初接觸呢類大小便不受控嘅貓，連去邊度買尿片都唔知…淨係靠棄養者攝喺袋入面嗰幾塊尿片得知原來呢個世界有啲咁嘅嘢。

嗰時喺屋企附近行過見到有寵物店就入去問『請問有冇貓用嘅尿片買呀？』，十個有十個都會以為我係講尿墊…我一講明係好似人BB用嗰啲尿片，其中一間有位店員反應好大問我：「你做咩要咁做呀？貓會屙尿係正常㗎！你唔可以因為佢屙尿而咁樣包住佢㗎！」

我解釋：「因為佢係大小便失控…佢個病一世都係咁…」

佢：「咁都唔可以咁呀！」

…咁唔影響大家生活質素嘅大前提，又可以減少互相傷害嘅程度下，你有冇咩好提議？

冇。於是佢只繼續講住一句：「唔可以咁呀」

冇咩事我都係走先。行咗好多間，都搵唔到尿片，行去超市時，望見一堆人用嘅BB尿片…我拎起一包初生BB嘅望，啊～要3KG啊。糯米雞先得嗰0.7KG…即係冇機會用到啦～嗰時其實真係好失望好有挫敗感。甚至會諗我呢啲新手照唔照顧到呢隻貓。

到今日二零一八年三月！佢用到初生BB嘅尿片啦！仲非常之咁FIT SIZE！佢以後可以唔駛再用淘寶嘅粉紅色寵物尿片！可以用到市面上不同牌子嘅BB尿片，飛甩粉紅色！向白色藍色進發啦～今日我開心嘅程度簡直係好似有幾千包薯片充滿我間屋咁！