【夠鐘食藥】病假紙

有日一位先生睇完醫生，我出完藥收埋錢。

佢拎住張病假紙睇，睇咗陣佢好大聲講：「你老母邊個話放一日㗎？」

醫生囉。

我：「頭先醫生應該有同你講係寫一日嘅病假俾你呀，排版都係寫一日喎」

佢：「一日我唔駛嚟攞啦！」

嗱，大家都聽到㗎，咁我撕爛張病假紙啦。

佢再講：「我要埋聽日後日呀！」

我：「你坐坐先呀，我轉頭再俾你入返醫生房同醫生講呀」

佢繼續好大聲：「你老母而家改唔得㗎咩？刪咗去再寫囉！」

講到咁輕鬆，不如你嚟做啦，你咪唔駛咁勞氣囉。

我：「唔可以就咁我刪㗎，要醫生寫㗎，你坐坐先，一陣再嗌返你入房啦」

佢：「俾得一日你就唔駛嗌我入去啦！唔駛再同我講任何嘢！直接收嗲！」

佢轉身行去坐低，一直等呀等呀等呀等呀等…

佢終於問我：「幾時入得去呀？又話嗌我入去？」

『俾得一日就唔駛嗌你入去！唔駛再同你講任何嘢！直接收嗲！』嘛，醫生聽到呢句呀，仲聽得好清楚。所以醫生嗌我唔好再同你講任何嘢，亦唔駛嗌你入房…等你出聲問先算喎。

我：「…醫生話寫唔到多過一日俾你，所以你可以走㗎啦」

佢：「我張假紙呢？」

我：「你拎住咗」

佢行埋嚟，我以為佢要打柒我之際，佢竟然露出真誠嘅眼神：「幫我同醫生講聲呀，一日真係唔得呀，我俾咗幾舊水冇可能淨係得一日㗎」

咦，頭先嗰位先生去咗邊呀？

我：「醫生話係得一日咋，如果你聽日都仲係唔舒服先再嚟啦」

佢好大聲講：「你老母仲要返嚟俾你呃多幾舊水寫得嗰一日呀？」

佢轉身離開診所。

嚇得我呀，我仲以為頭先嗰位先生失咗蹤，而家我安樂啦。